(vovworld)- ຜົນສຳເລັດຂອງການປະຕິວັດເດືອນສິງຫາ ໄດ້ເປີດສັງກາດໃຫມ່ໃຫ້ແກ່ຊາດຫວຽດນາມ. ເມື່ອເວົ້າເຖິງການປະຕິວັດເດືອນສິງຫາ ຕ້ອງເວົ້າເຖິງບັນດາບົດເພງປະຕິວັດເດືອນສິງຫາ ຊື່ງໄດ້ປະກອບສ່ວນປຸກລຸກນ້ຳໃຈໃຫ້ແກ່ການຕໍ່ສູ້ຂອງປະເທດຊາດ. ຜ່ານໄລຍະທົດສອບນາໆປະການ, ບັນດາບົດເພງປະຕິວັດເດືອນສິງຫາ ຍັງຄົງໄດ້ຮັບຄວາມນິຍົມຈາກຜູ້ນິຍົມດົນຕີຫວຽດນາມຮຸ່ນຕ່າງໆ.
ງານຊຸມນຸມປຸກລະດົມການລຸກຮືຂຶ້ນເພື່ອຍາດເອົາອຳນາດການປົກຄອງ
ດຳເນີນຢູ່ໂຮງລະຄອນໃຫຍ່ຮ່າໂນ້ຍເມື່ອວັນທີ 19/8/1945
ພາບເອກະສານ
|
ສຽງເພງທີ່ທ່ານພວມຮັບຟັງແມ່ນເນື້ອໃນຂອງບົດເພງ“ວັນທີ 19 ເດືອນສິງຫາ” ໂດຍນັກດົນຕີ ຊວນແອງ ເປັນຜູ້ແຕ່ງ. ບົດເພງໄດ້ຮັບການແຕ່ງຂຶ້ນກົງກັບວັນທີ 19/8/1945 ຂະນະທີ່ນັກດົນຕີ ຊວນແອງ ພ້ອມກັບຄະນະຜູ້ເຂົ້າຮ່ວມການລຸກຮືຂຶ້ນຄັ້ງໃຫຍ່ພວມບຸກເຂົ້ານະຄອນຫລວງ ຮ່າໂນ້ຍ. ເວລານັ້ນ, ບັນຍາກາດອັນຟົດຟື້ນຂອງວັນປະຫວັດສາດໄດ້ພາໃຫ້ນັກດົນຕີມີຄວາມຮູ້ສຶກພິເສດ ສະນັ້ນ ທ່ານຈຶ່ງແຕ່ງບົດເພງດັ່ງກ່າວ ແລະ ແຕ່ງໄດ້ແຖວປະໂຫຍກໃດທ່ານຂັບຮ້ອງຂຶ້ນເພື່ອໃຫ້ທຸກຄົນຂັບຮ້ອງຕາມ ແລະ ຮອດຕອນແລງວັນດຽວກັນ ບົດເພງໄດ້ພິມອອກ ແລະ ນຳມາເຜີຍແຜ່ຢ່າງກວ້າງຂວາງ, ສຽງເພງກ້ອງກັນວານໄປທົ່ວຖະຫນົນສາຍຕ່າງໆຢູ່ນະຄອນຫລວງ ຮ່າໂນ້ຍ ພ້ອມກັບບັນດາບົດເພງອື່ນຂອງນັກດົນຕີ ວັນກາວ, ຫງວຽນດີງທີ, ໂດ໋ຍ້ວນ. ນັກສີລະປິນ ຈູງກຽນ ຊື່ງແມ່ນຜູ້ຂັບຮ້ອງບັນດາບົດເພງກ່ຽວກັບການປະຕິວັດເດືອນສິງຫາທີ່ສ້າງຄວາມຕື້ນຕັນໃຈໃຫ້ແກ່ຜູ້ຟັງ ໄດ້ໃຫ້ຮູ້ວ່າ:
“ເມື່ອເວົ້າເຖິງການປະຕິວັດເດືອນສິງຫາຕ້ອງເວົ້າເຖິງບັນດາບົດເພງຄື: (Tiến quân ca) - ເພງກ່ຽວກັບການຍົກທັບຂອງນັກດົນຕີ ວັນກາວ, ບົດເພງ: Diệt phát xít (ດັບສູນຟາດຊີດ) ຂອງນັກດົນຕີ ຫງວຽນດີງທີ, ເພງ: ວັນທີ 19 ເດືອນສິງຫາ ຂອງນັກດົນຕີ ຊວນແອງ ຫລືເພງ: Du kích ca (ເພງກ່ຽວກັບກອງຫລອນ)… ບັນດາບົດເພງເຫລົ່ານັ້ນ ມີຄຸນຄ່າດ້ານປະຫວັດສາດສູງກວ່າເມື່ອທຽບໃສ່ຄຸນຄ່າດ້ານສີລະປະ ແລະບັນດາບົດເພງດັ່ງກ່າວ ຍາມໃດກໍຝັງເລິກໃນດວງໃຈຂອງປະຊາຊົນຫວຽດນາມທຸກຄົນ. ໃນໂອກາດສະເຫລີມສະຫລອງວັນປະຕິວັດເດືອນສິງຫາ, ຜູ້ຄົນທັງຫລາຍລ້ວນແຕ່ຢາກຮັບຟັງບັນດາບົດເພງນີ້ ແລະ ອາດຈະເວົ້າໄດ້ວ່າ ບໍ່ມີບົດເພງໃດສາມາດທົດແທນໄດ້.”
ຜ່ານການຜັນແປຫລາຍຢ່າງຂອງປະຫວັດສາດ, ບັນດາບົດເພງກ່ຽວກັບການປະຕິວັດເດືອນສິງຫາ ຍັງຄົງໄດ້ຮັບຄວາມນິຍົມຈາກຜູ້ຟັງຢ່າງຫລວງຫລາຍ. ບັນດາບົດເພງເຫລົ່ານັ້ນ ລ້ວນແຕ່ຕິດພັນກັບຂີດໝາຍປະຫວັດສາດ. ບົດເພງແມ່ນການປະສານສົມທົບລະຫວ່າງນ້ຳໃຈຮັກຊາດອັນແຮງກ້າ ແລະ ສຽງດົນຕີພື້ນເມືອງຂອງຊາດ. ປະຈຸບັນ ບັນດາບົດເພງດັ່ງກ່າວຍັງຄົງສືບຕໍ່ໄດ້ຮັບການສະແດງຢູ່ເວທີສະແດງຕ່າງໆໃນທົ່ວປະເທດຫວຽດນາມ ແລະ ຮຸ່ນໄວຫນຸ່ມຫວຽດນາມ ປະຈຸບັນ ສືບຕໍ່ຮ້ອງເພງປະຕິວັດເດືອນສິງຫາ. ນັກຮ້ອງ ລານແອງ, ຄູສອນສະຖາບັນດົນຕີ ຫວຽດນາມ ແບ່ງປັນວ່າ:
“ຂ້າພະເຈົ້າກໍຄືນັກຮ້ອງອື່ນ ເຄີຍຂັບຮ້ອງບັນດາບົດເພງຄືດັ່ງກ່າວໃນໂອກາດວັນບຸນໃຫຍ່ຂອງປະເທດຊາດ. ບັນດາບົດເພງນັ້ນລ້ວນແຕ່ຕິດພັນກັບຂ້າພະເຈົ້າກໍຄືຜູ້ຮ່ວມອາຊີບຈຳນວນຫນຶ່ງ. ນັ້ນແມ່ນບົດເພງມ່ວນຫລາຍ ແລະ ມີຄວາມໝາຍດ້ານປະຫວັດສາດ.ຂ້າພະເຈົ້າຮູ້ສຶກມີຄວາມຜາສຸກເມື່ອໄດ້ຂັບຮ້ອງບັນດາບົດເພງດັ່ງກ່າວໃນລາຍການສຳຄັນພິເສດຂອງປະເທດຊາດ”
ບັນດາບົດເພງປະຕິວັດເດືອນສິງຫາ ຍາມໃດກໍມີພະລັງຊີວິດຢ່າງແຮງກ້າ ແລະ ຍືນຍົງຄົງຕົວຕະຫລອດການ.
ສຽງກັງວານຂອງບັນດາບົດເພງກ່ຽວກັບຊຸມວັນໃນເດືອນສິງຫາປະຫວັດສາດນັ້ນຈະຝັງເລິກ
ໃນດວງໃຈຂອງປະຊາຊົນຫວຽດນາມທຸກຄົນກໍຄືບັນດາຜູ້ນິຍົມດົນຕີຫວຽດນາມ.