(vovworld) - ເພື່ອຮັບປະກັນໃຫ້ປະຊາຊົນທຸກຄົນໄດ້ເອົາບຸນເຕັດຢ່າງຄົບຖ້ວນ, ກ່ອນບຸນເຕັດ 1 ເດືອນ, ວຽກງານເຄື່ອນໄຫວເບິ່ງແຍງດູແລບັນດາເປົ້າໝາຍປະສົບກັບຄວາມຫຍຸ້ງຍາກໃນໂອກາດບຸນເຕັດໄດ້ຮັບການຜັນຂະຫຍາຍຢູ່ຫຼາຍທ້ອງຖິ່ນ. ການຢື້ຢາມຖາມຂ່າວ, ມອບຂອງຂວັນໃຫ້ປະຊາຊົນຜູ້ທຸກຍາກ, ພ້ອມກັບຂະບວນລົດຂົນສົ່ງເຄື່ອງຂອງບຸນເຕັດໄປຍັງເຂດປະສົບກັບຄວາມຫຍຸ້ງຍາກ, ກໍ່ຄືຂົນສົ່ງຄົນງານກັບເມືອບ້ານຕ້ອນຮັບບຸນເຕັດນັ້ນ ໄດ້ສ້າງບັນຍາກາດອົບອູ່ນໃນໂອກາດບຸນເຕັດ, ເຊີດຊູວັດທະນະທຳອັນດີງາມໃນການປະພຶດຂອງຊາວຫວຽດນາມ. ບົດຂຽນຂອງກຸ່ມນັກຂ່າວ VOV.
ທົ່ວແຂວງບັ໋ກກ້ານ ມີເກືອບ 32.000 ຄອບຄົວທຸກຍາກ. ໃນຈຳນວນນັ້ນມີຫຼາຍຄອບຄົວທຸກຍາກເປັນພິເສດ, ຜູ້ເຖົ້າຢູ່ໂດດດ່ຽວ, ເດັກກຳພ້າບໍ່ມີບ່ອນເພິ່ງພາອາໄສ. ເພື່ອກະກຽມຂອງຂວັນມອບໃຫ້ເຂົາເຈົ້າໃນໂອກາດບຸນເຕັດ, ຄະນະກຳມະການປະຊາຊົນແຂວງບັ໋ກກ້ານ, ສະພາກາແດງແຂວງ ໄດ້ຮຽກຮ້ອງແຫຼ່ງອຸປະຖຳຕ່າງໆ. ທ່ານ ຫງວຽນວັນເກື່ອງ, ປະທານສະພາກາແດງແຂວງບັ໋ກກ້ານໃຫ້ຮູ້ວ່າ, ໄລ່ຮອດຈຸດເວລານີ້, ສະພາຜັນຂະຫຍາຍລາຍການມອບຂອງຂວັນໃນໂອກາດບຸນເຕັດໄດ້ເກືອບ 2.000 ພູດແລ້ວ, ອັນໄດ້ນຳເອົາລະດູບານໃໝ່ມາໃຫ້ພໍ່ແມ່ປະຊາຊົນເຂດພູສູງ, ແລະຜູ້ທຸກຍາກໃນແຂວງ.
“ເປົ້າໝາຍປະສົບກັບຄວາມທຸກຍາກໃນແຂວງຍັງຫຼາຍຢູ່. ດັ່ງນັ້ນນັບແຕ່ນີ້ຮອດບຸນເຕັດປີລະກາພວກຂ້າພະເຈົ້າຕ້ອງພະຍາຍາມຈັດການເຄື່ອນໄຫວຕ່າງໆເພື່ອສູ້ຊົນໃຫ້ມີຂອງຂວັນແຕ່ 5.000 ຫາ 7.000 ພູດ ມອບໃຫ້ພໍ່ແມ່ປະຊາຊົນ”.
ຢູ່ແຂວງແທງຮ໋ວາ, ທ່ານນາງປະທານສະພາກາແດງ ຈິ້ງທິ້ຕ໋ຽບ ໃຫ້ຮູ້ວ່າ, ສະພາໄດ້ຜັນຂະຫຍາຍແຜນການນັບແຕ່ຕົ້ນເດືອນ 11, ເພື່ອມອບຂອງຂວັນປະມານ 40.000 ພູດໃຫ້ແກ່ຜູ້ທຸກຍາກ, ດ້ວຍຍອດມູນຄ່າກວ່າ 16 ຕື້ດົ່ງ.
“ຂະບວນການບຸນເຕັດເພື່ອຄົນທຸກຍາກ ແລະ ຜູ້ປະສົບເຄາະຮ້າຍຈາກທາດຜິດສີສົ້ມຂອງສະພາກາແດງ ມີຜົນປະໂຫຍດຢ່າງແທດຈິງ. ບັນດາຄອບຄົວມີຄວາມເບີກບານມ່ວນຊື່ນ ແລະ ຕື້ນຕັນໃຈຫຼາຍເມື່ອໄດ້ຮັບຂອງຂວັນໃນໂອກາດບຸນເຕັດ, ລະດົມກຳລັງໃຈໃຫ້ຄົນທຸກຍາກຫຼາຍຢ່າງ. ຜ່ານວິທີເຮັດຂອງສະພາກາແດງ, ຂອງຂວັນຂອງບັນດາອົງການຈັດຕັ້ງ, ສ່ວນບຸກຄົນ ກໍຄືຜູ້ໃຈບຸນໃຈກຸຊົນລ້ວນແຕ່ຖືກສົ່ງເຖິງຜູ້ຮັບ”.
ທ່ານນາງ ເຈີ່ນທິຮົ່ງອານ, ຮອງປະທານສູນກາງສະພາກາແດງຫວຽດນາມ ໃຫ້ຮູ້ວ່າ, ປີນີ້, ສະພາກາແດງ ຫວຽດນາມ ໄດ້ປຸກລະດົມເດືອນບຸນເຕັດເພື່ອຄົນທຸກຍາກ, ນີ້ແມ່ນຈຸດໃໝ່ເມື່ອທຽບໃສ່ປີກ່ອນໆ.
“ປີນີ້, ພວກຂ້າພະເຈົ້າໄດ້ເປີດກວ້າງຮູບການມອບຂອງຂວັນ. ນອກຈາກການມອບເງິນ, ມອບເຄື່ອງຂອງແລ້ວ, ສະພາກາແດງຍັງມອບເຮືອນສະພາກາແດງ, ມອບບັດປະກັນສຸຂະພາບອີກ. ສູນກາງສະພາກາແດງໄດ້ຈັດຄະນະຕ່າງໆລົງກວດ, ປິ່ນປົວພະຍາດມະນຸດສະທຳ, ມອບງົວພັນໃຫ້ຄົນທຸກຍາກ ກໍຄືຈັດຕັ້ງລາຍການສະແດງສິລະປະເພື່ອການກຸສົນໃນທົ່ວປະເທດອີກ. ພວກຂ້າພະເຈົ້າຫວັງວ່າ, ຂະບວນການຈະໄດ້ຮັບຜົນງານທີ່ດີ”.
ແລະກໍ່ແມ່ນການເຄື່ອນໄຫວເພື່ອຄົນທຸກຍາກ, ຜູ້ປະສົບກັບຄວາມຫຍຸ້ງຍາກ, ມີໄວໜຸ່ມຫຼາຍຄົນໄດ້ເຂົ້າຮ່ວມລາຍການ “ຫໍ່ເຂົ້າຕົ້ມຂຽວພ້ອມກັບຄົນທຸກຍາກ ຕ້ອນຮັບບຸນເຕັດ 2017”. ເຂົ້າຕົ້ມ 1.000 ຫໍ່, ຂອງຂວັນ 1.000 ພູດ ໄດ້ມອບໃຫ້ບັນດາເປົ້າໝາຍນະໂຍບາຍ, ຄົນທຸກຍາກ, ປະຊາຊົນຊາວເຜົ່າຢູ່ 4 ແຂວງດ້ຽນບຽນ, ຮ່າຕິ້ງ, ກວາງບິ່ງ ແລະ ກວາງຈີ້. ສະມາຊິກຊາວໜຸ່ມ ຫງວຽນທິຮັ່ງ ແບ່ງປັນວ່າ.
“ນີ້ແມ່ນລາຍການທີ່ມີຄວາມໝາຍທີ່ສຸດ. ເຖິງວ່າບໍ່ໄດ້ມາຮອດແຫ່ງນັ້ນ, ແຕ່ຜ່ານລາຍການນີ້ ຂ້າພະເຈົ້າສາມາດຝາກເຂົ້າຕົ້ນເຖິງຄົນທຸກຍາກ ແລະ ຫວັງວ່າຜູ້ທຸກຍາກທຸກຄົນລ້ວນແຕ່ໄດ້ຕ້ອນຮັບບຸນເຕັດໃນຄວາມອົບອຸ່ນ”.
ຮ່ວມເດີນທາງພ້ອມກັບອຳນາດການປົກຄອງທຸກຂັ້ນ, ການເຄື່ອນໄຫວເອົາໃຈໃສ່ເບິ່ງແຍງດູແລຄົນທຸກຍາກໃນໂອກາດບຸນເຕັດ, ໃນນັ້ນມີຄົນງານທີ່ເຮັດວຽກໃນບໍລິສັດ, ເຂດອຸດສາຫະກຳຕ່າງໆ. ທ່ານນາງ ຟ້າມເວີນແອງ, ປະທານກຳມະບານບໍລິສັດ Canon ຫວຽດນາມ ຈຳກັດ ໃຫ້ຮູ້ວ່າ, ດ້ວຍຄົນງານ 22 ລ້ານຄົນ, ບໍລິສັດຈະຈັດລົດໂດຍສານຫຼາຍຖ້ຽວເພື່ອຂົນສົ່ງກຳມະກອນກັບເມືອບ້ານຕ້ອນຮັບບຸນເຕັດ ແລະ ຮັບກຳມະກອນກັບມາເຮັດວຽກພາຍຫຼັງບຸນເຕັດ.
“ກ່ອນນີ້, ອັດຕາກຳມະກອນກັບມາເຮັດວຽກພາຍຫຼັງບຸນເຕັດບັນລຸພຽງ 91 – 92% ເທົ່ານັ້ນ. ພາຍຫຼັງຜັນຂະຫຍາຍບັນດາລົດໂດຍສານຂົນສົ່ງກຳມະກອນກັບເມືອບ້ານ, ອັດຕາກຳມະກອນກັບມາເຮັດວຽກໄດ້ບັນລຸ 99,5%. ນີ້ແມ່ນປະສິດທິຜົນອັນໃຫຍ່ຫຼວງທີ່ສຸດຂອງບໍລິສັດໃນການຈັດລົດຂົນສົ່ງກຳມະກອນເມືອບ້ານເອົາບຸນເຕັດ. ນີ້ແມ່ນໜຶ່ງໃນບັນດາການເຄື່ອນໄຫວທີ່ມີຄວາມໝາຍສຳລັບຄົນງານ ແລະ ວິສາຫະກິດ, ນຳມາເຊິ່ງຜົນປະໂຫຍດໃຫ້ທັງ 2 ຝ່າຍ.”
ໂດຍແມ່ນໜຶ່ງໃນຈຳນວນກຳມະກອນນັບພັນຄົນທີ່ໄດ້ຮັບຂອງຂວັນ, ຮັບປີ້ລົດກັບເມືອບ້ານໂດຍບໍ່ເສຍຄ່າ, ເອື້ອຍ ຮ່າທິຊິມ, ກຳມະກອນບໍລິສັດ Nisei Electric ຫວຽດນາມ ຈຳກັດ, ເຂດອຸດສາຫະກຳ ທັງລອງ, ຮ່າໂນ້ຍ, ແບ່ງປັນວ່າ.
“ຂ້າພະເຈົ້າມີຄວາມຕື້ນຕັນໃຈເມື່ອກຳມະກອນໄດ້ຮັບຂອງຂວັນ ແລະ ປີ້ລົດເພື່ອກັບເມືອບ້ານຕ້ອນຮັບບຸນເຕັດ. ຊ່ວຍໃຫ້ພວກຂ້າພະເຈົ້າໄປມາຢ່າງສະດວກສະບາຍ. ຂ້າພະເຈົ້າອາດຈະພາລູກຂອງຕົນກັບເມືອບ້ານພ້ອມກັນໄດ້. ນີ້ແມ່ນການແບ່ງປັນ, ການຊ່ວຍເຫຼືອທີ່ມີຄວາມໝາຍທີ່ສຸດ”.
ເລື່ອງເບິ່ງແຍງດູແລຄົນທຸກຍາກໃນໂອກາດບຸນເຕັດພວມກາຍເປັນຂະບວນການໃນທົ່ວສັງຄົມ. ສະແດງໃຫ້ເຫັນຄວາມສະນິດຕິດພັນຂອງຊາວຫວຽດນາມ, ສ້າງກຳລັງໜູນເພື່ອໃຫ້ທຸກຄົນສູ້ຊົນເພື່ອບັນດາຈຸດໝາຍໃໝ່.