ບໍ່ຟົດຟື້ນເນືອງນັນ, ແຕ່ບັນຍາກາດຕ້ອນຮັບບຸນປີໃໝ່ປະຈຳຊາດຫຼືບຸນເຕັດຢູ່ ເມືອງເກາະເຈື່ອງຊາ, ແຂວງແຄ້ງຮ່ວາພັດມີຄວາມອົບອຸ່ນດ້ວຍອາລົມຈິດຄວາມຮັກແພງລະຫວ່າງດິນຕໍ່ແຜ່ນກັບເຂດທະເລໝູ່ເກາະ. ຕ້ອນຮັບບຸນເຕັດຢູ່ເຂດຫມູ່ເກາະກໍມີເຄື່ອງຂອງຄົບທຸກຢ່າງເຊັ່ນ: ງ່າດອກຄາຍ, ດອກເຜີຍ, ຕົ້ນໝາກແປ້ນພ້ອມກັບລົດຊາດຂອງບັນດາເຍື່ອງອາຫານພິເສດໃນຍາມບຸນເຕັດ.
ອ້າຍນ້ອງທະຫານເຮືອໃນໝູ່ເກາະເຈື່ອງຊາຫໍ່ເຂົ້າຕົ້ມຕ້ອນຮັບບຸນເຕັດ |
ເຮືອຖ້ຽວຕ່າງໆໄດ້ເດີນຮອດເມືອງເກາະເຈື່ອງຊາ ກໍແມ່ນຈຸດເວລາທີ່ບັນດາພະນັກງານ, ນັກຮົບ ແລະ ປະຊາຊົນເລີ່ມຫ້າງຫາກະກຽມວຽກງານທຸກຢ່າງເພື່ອຕ້ອນຮັບບຸນເຕັດ. ເຮືອ 3 ຖ້ຽວສົ່ງຄະນະປະຕິບັດງານໄປຢ້ຽມຢາມ ແລະ ອວຍພອນບຸນເຕັດ ແລະ ບັນທຸກສິນຄ້າເຄື່ອງຂອງຈຳເປັນກວ່າ 50 ໂຕນເພື່ອຮັບໃຊ້ບຸນເຕັດເຊັ່ນ: ຊີ້ນທຸກຊະນິດ, ໃບຕອງຈິງ, ເຂົ້າໜົມ… ອັນໄດ້ຊ່ວຍ ພະນັກງານ, ນັກຮົບ ແລະ ປະຊາຊົນໃນ ເມືອງເກາະເຈື່ອງຊາຕ້ອນຮັບບຸນເຕັດຢ່າງເບີກບານມ່ວນຊື່ນ. ໂອກາດບຸນເຕັດປີນີ້, ນອກຈາກຂອງຂວັນບຸນເຕັດຂອງກະຊວງປ້ອງກັນປະເທດ, ເຫຼົ່າທັບເຮືອ, ກອງບັນຊາການທະຫານເຂດ 4 ແລ້ວ, ກໍຍັງມີບັນດາອົງການສຳນັກງານ, ອຳນາດການປົກຄອງແຂວງແຄ້ງຮ່ວາ, ບັນດາທ້ອງຖິ່ນ, ວິສາຫະກິດ ແລະ ສ່ວນບຸກຄົນໃນທົ່ວປະເທດໄດ້ຝາກສິນຄ້າເຄື່ອງຂອງຈຳເປັນມາຍັງເມືອງເກາະເຈື່ອງຊາເພື່ອຮັບໃຊ້ບຸນເຕັດ. ທ່ານ ບຸຍດີງເຢືອງ ປະທານຄະນະກຳມະການປະຊາຊົນເມືອງເກາະເຈື່ອງຊາ ໃຫ້ຮູ້ວ່າ :
“ ກອງທັບ ແລະ ປະຊາຊົນເມືອງເກາະເຈື່ອງຊາຍາມໃດກໍມຸ່ງໄປສູ່ດິນຕໍ່ແຜ່ນ. ເມື່ອລະດູບານໃໝ່, ບຸນເຕັດວຽນມາ, ເຖິງວ່າຢູ່ຫ່າງໄກຈາກດິນຕໍ່ແຜ່ນກໍຕາມ, ແຕ່ໃຜໆກໍຮູ້ສຶກໄດ້ເຖິງຄວາມອົບອຸ່ນຄືຢູ່ໃນຄອບຄົວຂອງຕົນເອງ. ເມືອງເກາະເຈື່ອງຊາພວກຂ້າພະເຈົ້າໝັ້ນໝາຍວ່າ ເຖິງວ່າ ຈະປະສົບຄວາມຫຍຸ້ງຍາກລຳບາກຄືແນວໃດກໍຕາມ, ພວກຂ້າພະເຈົ້າຈະສາມັກຄີກັນເພື່ອປົກປັກຮັກສາເຂດນ້ຳແດນດິນອັນສັກກະຫຼະບູຊາຂອງປະເທດຊາດຊຶ່ງປະຊາຊົນໄດ້ມອບໝາຍໃຫ້”
ໃນຊຸມມື້ນີ້,ບັນຍາກາດຕ້ອນຮັບບຸນເຕັດໄດ້ປົກຄຸມໄປທົ່ວໝູ່ເກາະເຈື່ອງຊາ. ຢູ່ຕາແສງເກາະ ຊອງຕືໄຕ, ພະນັກງານ, ນັກຮົບ ແລະ ປະຊາຊົນໄດ້ພ້ອມກັນປັດກວາດ, ປະດັບປະດາເຮືອນຊານ, ເຮັດອະນາໄມຢູ່ຕາມເດີນ, ສວນ, ໂຮງຮຽນເພື່ອກະກຽມຕ້ອນຮັບບຸນເຕັດ. ອ້າຍຫງວຽນວັນຈີ້ ຢູ່ເກາະ ຊອງຕືໄຕໃຫ້ຮູ້ວ່າ :
“ ບັນດາຄອບຄົວໃນເກາະພວມກະກຽມຫໍ່ເຂົ້າຕົ້ມ ແລະ ປຸງແຕ່ງອາຫານບຸນເຕັດ. ບຸນເຕັດຢູ່ເກາະ ກໍມີການເຄື່ອນໄຫວລະຫຼີ້ນມ່ວນຊື່ນຫຼາຍຢ່າງ ”
ສ່ວນຢູ່ເກາະນາມອຽດ, ໃຕ້ຮົ່ມເຢັນຕົ້ນຫູກວາງ ແລະ ຕົ້ນໄມ້ໃຫຍ່ທີ່ໃຈກາງເກາະ, ບັນດາການເຄື່ອນໄຫວຕ້ອນຮັບບຸນເຕັດພວມຖືກຈັດຂຶ້ນຢ່າງຄຶກຄື້ນ, ຊຶ່ງເລີ່ມຕົ້ນແມ່ນການແຂ່ງຂັນຫໍ່ເຂົ້າຕົ້ມ.
ນອກຈາກຫໍ່ເຂົ້າຕົ້ມດ້ວຍໃບຕອງຈິງແລ້ວ, ຢູ່ໝູ່ເກາະເຈື່ອງຊາຍັງມີວິທີຫໍ່ເຂົ້າຕົ້ມແບບພິເສດ, ນັ້ນແມ່ນຫໍ່ເຂົ້າຕົ້ມດ້ວຍໃບຫູກວາງ. ຮ້ອຍເອກ ເລດັງຊ້າງ ຢູ່ເກາະນາມອຽດໃຫ້ຮູ້ວ່າ:
“ຫໍ່ເຂົ້າຕົ້ມດ້ວຍໃບຫູກວາງຈະມີຄວາມແຕກຕ່າງກັນຫຼາຍເມື່ອທຽບໃສ່ການຫໍ່ເຂົ້າຕົ້ມດ້ວຍໃບຕອງຈິງ, ເພາະໃບຫູກວາງບໍ່ໃຫຍ່ ແລະ ບໍ່ອ່ອນຄືໃບຕອງຈິງ. ເຂົ້າຕົ້ມທີ່ຫໍ່ດ້ວຍໃບຫູກວາງກໍມີສີຂຽວຄ້າຍຄືກັບເຂົ້າຕົ້ມທີ່ຫໍ່ດ້ວຍໃບຕອງຈິງ. ແຕ່ມີລົດຊາດແຕກຕ່າງ ເພາະມີກິ່ນສະເພາະຂອງໃບຫູກວາງ ”
ໝູ່ເກາະເຈື່ອງຊາເຖິງວ່າຢູ່ໄກແຕ່ພັດໃກ້ທີ່ສຸດ ແລະ ຢູ່ໝູ່ເຫາະແຫ່ງນີ້, ບັນດາພະນັກງານ, ນັກຮົບ ແລະ ປະຊາຊົນໃນເມືອງເກາະຍາມໃດກໍກຳນົດວ່າ “ ເກາະແມ່ນເຮືອນ, ທະເລແມ່ນບ້ານເກີດເມືອງນອນ”. ເຂົາເຈົ້າຈະ ປົກປັກຮັກສາເຂດນ້ຳແດນດິນອັນສັກກະຫຼະບູຊາຂອງປະເທດຊາດຢ່າງໝັ້ນຄົງໜັກແໜ້ນເພື່ອໃຫ້ປະຊາຊົນຢູ່ດິນຕໍ່ແຜ່ນໄດ້ຕ້ອນຮັບບຸນເຕັດດ້ວຍຄວາມອົບອຸ່ນ ແລະ ເບີກບານມ່ວນຊື່ນ.