(vovworld) - ເຂດພູມລຳເນົາຄົງທີຄືນໃໝ່ ກາຕັງ ຢູ່ເທດສະບານ ລາວບ໋າວ, ເມືອງ ເຮື໋ອງຮ່ວາ, ແຂວງ ກວາງຈີ້ ແມ່ນບ່ອນດຳລົງຊີວິດຂອງ 51 ຄອບຄົວ ດ້ວຍພົນລະເມືອງເຊິ່ງແມ່ນຊາວເຜົ່າເວີນກ່ຽວກ່ວາ 200 ຄົນ. ນີ້ໄດ້ຮັບຖືວ່າແມ່ນເຂດພູມລຳເນົາຄົງທີທ່ີ່ເປັນແບບຢ່າງຢູ່ແຂວງ ກວາງຈີ້ ຍ້ອນໄດ້ປະຕິບັດສຳເລັດກ່ຽວກັບໂຄງປະກອບໂຄງລ່າງ, ພິເສດແມ່ນຄວາມເຫັນດີເຫັນພ້ອມຂອງປະຊາຊົນໃນໄລຍະກ່ອນ, ໃນ ແລະ ພາຍຫຼັງມາຍັງບ່ອນຢູ່ອາໄສໃໝ່. ບົດຂຽນຂອງນັກຂ່າວ ເລຮ໋ຽວ.
ໝູ່ບ້ານ ກາຕັງ
ເມື່ອພາພວກຂ້າພະເຈົ້າໄປຢາມບັນດາເຮືອນແຖວໃໝ່ທີ່ຕັ້ງຕິດຕໍ່ກັນຢູ່ເຂດພູມລຳເນົາຄົງທີກາຕັງ, ທ່ານ ຝາເຢຍ, ນາຍບ້ານ ກາຕັງ, ເທດສະບານ ລາວບ໋າວ, ເມືອງ ເຮື໋ອງຮ່ວາ, ແຂວງ ກວາງຈີ້, ໃຫ້ຮູ້ວ່າ: ຢູ່ທີ່ນີ້, ມີກ່ວາ 50 ຄອບຄົວໄດ້ຮັບການກໍ່ສ້າງເຮືອນໃໝ່, ດຳລົງຊີວິດຮ່ວມກັນຢູ່ຕີນພູ ກາຕັງ. ກ່ອນນີ້ 2 ປີ, ປະຊາຊົນໃນບ້ານໃຜໆກໍ່ບໍ່ມັກດຳລົງຊີວິດ, ທຳມາຫາກິນຢູ່ທີ່ນີ້. ມາຮອດປະຈຸບັນ, ບ້ານແຫ່ງນີ້ໄດ້ຮັບການກໍ່ສ້າງຢ່າງໃຫຍ່ໂຕໂອໂຖງ ແລະ ສວຍງາມບໍ່ຕ່າງກັບເຂດຕົວເມືອງ, ຊີວິດການເປັນຢູ່ມີຄວາມອິ່ມໜຳສຳລານດັ່ງນັ້ນປະຊາຊົນໃນບ້ານຮູ້ສຶກມີຄວາມເບີກບານມ່ວນຊື່ນ ແລະ ອູ່ນອຽນໃຈດຳລົງຊີວິດ, ທຳມາຫາກິນກ່ວາ. ທ່ານ ຝາເຢຍ ໄດ້ແບ່ງປັນຄວາມໃນໃຈວ່າ, ປະຈຸບັນ, ພໍ່ແມ່ປະຊາຊົນໄດ້ສຸມໃສ່ສ້າງເສດຖະກິດສວນ, ປ່າ, ຫລຸດຜົ້ນອອກຈາກຄວາມທຸກຍາກອຶດຫິວ, ດັ່ງນັ້ນ, ໃຜໆກໍ່ມີຄວາມປິຕິຊົມຊື່ນ.
“ເມື່ອດຳລົງຊີວິດຢູ່ທີ່ນີ້, ພັກ ແລະ ລັດໄດ້ເອົາໃຈໃສ່ກໍ່ສ້າງເສັ້ນທາງ, ຕິດຕັ້ງໄຟຟ້າ, ສຸກສາລາ, ນອກນັ້ນເຮືອນໄດ້ຮັບການກໍ່ສ້າງໃຫຍ່ໂຕໂອໂຖງ. ພໍ່ແມ່ປະຊາຊົນໄດ້ປູກຕົ້ນກ້ວຍ, ມັນຕົ້ນ, ປູກປ່າ, ຊີວິດການເປັນຢູ່ກໍດີກ່ວາເກົ່າ.”
ທ່ານ ຝາເຢຍ ໃຫ້ຮູ້ວ່າ: ຢູ່ທີ່ນີ້, ຄອບຄົວໃດກໍ່ລ້ຽງແບ້ນັບສິບໆໂຕ, ໄກ່, ເປັນ ນັບຮ້ອຍໆໂຕ, ໝູໄດ້ລ້ຽງ ແລະ ຜັກຫຼາຍປະເພດເຊິ່ງໄດ້ຮັບການບົວລະບັດແບບທຳມະຊາດ. ກ່ອນນີ້, ທ່ານ ຝາເຢຍ ກໍ່ຄືພໍ່ແມ່ປະຊາຊົນຫຼາຍຄົນຢູ່ບ້ານກາຕັງ ເມື່ອດຳລົງຊີວິດຢູ່ບ່ອນເກົ່າບໍ່ເຄີຍຄິດເຖິງການກໍ່ສ້າງເຮືອນ. ແຕ່ມາຮອດປະຈຸບັນແມ່ນຕ່າງແລ້ວ, ເມື່ອດຳລົງຊີວິດຢູ່ບ່ອນໃໝ່, ມີເຮືອນຢ່າງໃຫຍ່ໂຕ, ສວຍງາມ ແລະ ສະອາດ, ທັນຍາຫານປອດສານພິດໂດຍປະຊາຊົນປູກ, ລ້ຽງເອງ, ລູກຫຼານຂອງປະຊາຊົນໃນບ້ານກໍ່ໄດ້ຮັບການເບິ່ງແຍງດູແລ, ຮ່ຳຮຽນເປັນຢ່າງດີກ່ວາ.
ເຮືອນຂອງໝູ່ບ້ານກາຕັງ
ກ່ອນນີ້, ປະຊາຊົນຢູ່ບ້ານກາຕັງ ໄດ້ດຳລົງຊີວິດຢູ່ລຽບຕາມເຂດຊາຍແດນ ຂາເຂົ້າ ຂາອອກ ລາວບ໋າວ. ປີ 2013, ໂດຍນອນໃນໂຄງການວາງແຜນສັງລວມ, ກໍ່ສ້າງ ແລະ ພັດທະນາເຂດເສດຖະກິດການຄ້າພິເສດລາວບ໋າວ ດັ່ງນັ້ນ, ປະຊາຊົນຕ້ອງຍົກຍ້າຍໄປເຂດພູມລຳເນົາຄົງທີ່ຢູ່ຕີນພູ ກາຕັງ. ຄະນະກຳມະການປະຊາຊົນເທດສະບານ ລາວບ໋າວ, ເມືອງ ເຮື໋ອງຮ່ວາ, ແຂວງ ກວາງຈີ້ ໄດ້ໃຫ້ພໍ່ແມ່ປະຊາຊົນເລືອກເຟັ້ນທີ່ດິນເອງເພື່ອປຸກສ້າງເຮືອນຢູ່. ຕາມນັ້ນແລ້ວ, ເຂດຕັ້ງຖິ່ນຖານຄົງທີ່ຄືນໃໝ່ ກາຕັງ ມີເຮືອນ 3 ປະເພດໄດ້ຮັບການຜັນຂະຫຍາຍ, ອີງໃສ່ຈຳນວນຄົນໃນຄອບຄົວຈຶ່ງຈຳແນກແຫຼ່ງເງິນໜູນຊ່ວຍ ດັ່ງນັ້ນ, ພໍ່ແມ່ປະຊາຊົນລ້ວນແຕ່ມີຄວາມເຫັນດີເຫັນພ້ອມ. ພິເສດ, ບັນດາເຮືອນຢູ່ທີ່ນີ້ດ້ານໜຶ່ງໄດ້ຮັບການກໍ່ສ້າງແບບທັນສະໄໝແຕ່ຍັງຄົງໄດ້ປຸກສ້າງຕາມແບບເຮືອນຮ້ານໃຫ້ເໝາະສົມກັບການດຳລົງຊີວິດທີ່ເປັນມູນເຊື້ອຂອງປະຊາຊົນເຜົ່າ ເວີນກ່ຽວ. ທ່ານ ເລບ໋າຮູ່ງ, ຮອງປະທານຄະນະກຳມະການປະຊາຊົນເທດສະບານ ລາວບ໋າວ, ເມືອງ ເຮື໋ອງຮ່ວາ, ແຂວງ ກວາງຈີ້ ໃຫ້ຮູ້ວ່າ: ການກໍ່ສ້າງເຮືອນຮ້ານໃຫ້ແກ່ປະຊາຊົນແມ່ນຕ້ອງເອົາໃຈໃສ່ເຖິງບັນດາປັດໄຈນ້ອຍໆທີ່ເຄີຍມີຢູ່ແລ້ວໃນແບບແຜນການດຳລົງຊີວິດຂອງປະຊາຊົນ. ເຮັດໄດ້ຄືແນວນັ້ນພໍ່ແມ່ປະຊາຊົນຈຶ່ງເພິ່ງພໍໃຈກັບການດຳລົງຊີວິດຢູ່ບ້ານໃໝ່:
“ນັບແຕ່ເມື່ອປະຊາຊົນໜ່ວຍ 4 ບ້ານກາຕັງໄດ້ຍ້າຍໄປດຳລົງຊີວິດຢູ່ເຂດພູມລຳເນົາຄົງທີ່, ຊີວິດການເປັນຢູ່ຂອງພໍ່ແມ່ປະຊາຊົນໄດ້ເປັນປົກກະຕິເທື່ອລະກ້າວ, ການຜະລິດຂອງພໍ່ແມ່ປະຊາຊົນກໍ່ສະດວກກ່ວາ. ພິເສດ, ນອກຈາກການພັດທະນາເສດຖະກິດ, ພໍ່ແມ່ປະຊາຊົນ ກາຕັງ ຍັງເຂົ້າຮ່ວມການປົກປັກຮັກສາຄວາມສະຫງົບຢູ່ເຂດຊາຍແດນແຫ່ງຊາດພ້ອມກັບປະຊາຊົນເທດສະບານລາວບ໋າວອີກ.”
ມາຮອດປະຈຸບັນ, ເຂດຕັ້ງຖິ່ນຖານຄົງທີ່ ກາຕັງໄດ້ຮັບຖືວ່າເປັນແບບຢ່າງຂອງທົ່ວແຂວງ ກວາງຈີ້ ຍ້ອນທີ່ຕັ້ງເໝາະສົມ, ໂຄງປະກອບພື້ນຖານໂຄງລ່າງໄດ້ຮັບການກໍ່ສ້າງສຳເລັດ, ຮັບປະກັນໃຫ້ແກ່ວຽກງານພັດທະນາການຜະລິດ, ການຮ່ຳຮຽນ ແລະ ການດຳເນີນຊີວິດດ້ານວັດທະນະທຳຂອງປະຊາຊົນ. ໂດຍຕິດກັບເຂດຊາຍແດນ ຫວຽດນາມ - ລາວ, ບ້ານກາຕັງ ຍັງໄດ້ແຮກສ່ຽວກັບບ້ານ ແດນສະຫວັນ ຂອງ ລາວ. ປະຊາຊົນຢູ່ 2 ບ້ານແຫ່ງນີ້ເຄີຍມີການພົບປະແລກປ່ຽນນຳກັນ, ຮັກສານ້ຳໃຈເພື່ອນມິດ, ພ້ອມກັນປົກປັກຮັກສາຄວາມສະຫງົບຢູ່ເຂດຊາຍແດນ ແລະ ຮັກສາຫຼັກໝາຍອະທິປະໄຕເຂດຊາຍແດນຂອງ 2 ປະເທດ. ຮ້ອຍເອກ ໂຮ່ເລລ້ວນ, ຮອງກຳມະການການເມືອງ, ປ້ອມປ້ອງກັນດ່ານຊາຍແດນ ລາວບ໋າວ, ແຂວງ ກວາງຈີ້, ໃຫ້ຮູ້ວ່າ:
“ຜ່ານວຽກງານແຮກສ່ຽວ ບ້ານ - ບ້ານຢູ່ເຂດຊາຍແດນ 2 ປະເທດໄດ້ຍົກສູງສະຕິຄວາມຮູ້ໃຫ້ແກ່ປະຊາຊົນ 2 ເຂດຊາຍແດນ, ປັບປຸງ ແລະ ເສີມຂະຫຍາຍການພັດທະນາເສດຖະກິດກ່ຽວກັບການແລກປ່ຽນສິນຄ້າ. ພ້ອມກັນນັ້ນ, ຜ່ານການເຄື່ອນໄຫວນີ້ ໄດ້ສົມທົບກັນໃນວຽກງານຄຸ້ມຄອງປົກປັກຮັກສາອະທິປະໄຕປ້ອງກັນຄວາມສະຫງົບຢູ່ເຂດຊາຍແດນໄດ້ຮັບການເພີ່ມທະວີ ແລະ ຮັກແໜ້ນກ່ວາອີກ.”
ຊີວິດການເປັນຢູ່ຂອງປະຊາຊົນຢູ່ເຂດພູມລຳເນົາຄົງທີ່ ກາຕັງ ພວມມີຄວາມເບີກບານມ່ວນຊື່ນທີ່ສຸດ. ທ່ານລ້ວນ ໄດ້ແບ່ງປັນຕື່ມອີກວ່າ: ບ້ານກາຕັງ ປະຈຸບັນຕ່າງກັບເມື່ອກ່ອນຫຼາຍຈາກດ້ວຍການດຳລົງຊີວິດທີ່ປະສົມກັບຄວາມຫຍຸ້ງຍາກ, ສັບສົນຫຼາຍ, ປະຈຸບັນ, ປະຊາຊົນໃຜໆກໍ່ມີວຽກເຮັດງານທຳ, ລາຍຮັບເປັນປົກກະຕິ ແລະ ມີເຮືອນຊານໃຫຍ່ໂຕໂອໂຖງ ດັ່ງນັ້ນ ຄວາມເປັນລະບຽບຮຽບຮ້ອຍໄດ້ຮັບປະກັນ, ລູກເຕົ້າໄດ້ຮັບການຮ່ຳຮຽນເປັນຢ່າງດີ. ປະຈຸບັນ, ເມື່ອໄປຢາມບ້ານ ກາຕັງ ຜູ້ໃດກໍ່ລ້ວນແຕ່ຮັບຮອງວ່າ: ຢູ່ບ້ານນີ້ຄືດັ່ງເຂດຕົວເມືອງຢູ່ໃນປ່າ, ດ້ວຍຄວາມສະຫງົກສຸກແທ້ໆ.