(vovworld) – ຈຸດໝາຍຕົ້ນຕໍຂອງໂຄງການກໍ່ສ້າງຊົນນະບົດໃໝ່ທີ່ພວມໄດ້ຮັບການຜັນຂະຫຍາຍຢ່າງກວ້າງຂວາງຢູ່ຫວຽດນາມນັ້ນແມ່ນພັດທະນາການຜະລິດ, ຍົກສູງລາຍຮັບໃຫ້ແກ່ຊາວກະສີກອນ. ເພື່ອປະຕິບັດຈຸດໝາຍດັ່ງກ່າວໃຫ້ໄດ້, ໃນ 3 ປີຜ່ານມາ, ເມືອງ ກືເມີກາ, ແຂວງດັກລັກ, ໄດ້ຫັນປ່ຽນຜົນລະປູກເປັນຢ່າງດີ, ເພີ່ມທະວີການຖ່າຍທອດຄວາມກ້າວໜ້າດ້ານວິທະຍາສາດເຕັກນິກໃນການຜະລິດກະສີກຳ, ຍົກສູງປະສິດທິຜົນການຜະລິດຕາມທິດພັດທະນາຢ່າງຢ່າງໝັ້ນຄົງ.
ໂສມໜ້າເມືອງກືເມີກາໃນປະຈຸບັນ
(ພາບອິນເຕີແນດ) ໂດຍປະຕິບັດວຽກງານໂຄສະນາເປັນຢ່າງດີ, ດັ່ງນັ້ນພາຍຫຼັງ 3 ປີ ແຫ່ງການຜັນຂະຫຍາຍ. ເມືອງ ກຶເມີກາ ໄດ້ສ້າງຄວາມເຫັນດີເຫັນພ້ອມໃນໝູ່ປະຊາຊົນກ່ຽວກັບການກໍ່ສ້າງຊົນນະບົດໃໝ່. ທົ່ວເມືອງມີ 15 ຕາແສງ, ໃນນັ້ນມີຫຼາຍຕາແສງຊົນເຜົ່າສ່ວນໜ້ອຍຍັງປະສົບກັບຄວາມຫຍຸ້ງຍາກຢູ່. ແຕ່ປະຈຸບັນບັນດາຕາແສງທັງໝົດລ້ວນແຕ່ປະຕິບັດສຳເລັດແຜນຮ່າງກໍ່ສ້າງຊົນນະບົດໃໝ່, ໃນນັ້ນມີ 3 ຕາແສງແມ່ນຂຶ້ນກັບເມືອງ ກືເມີກາ ນັ້ນແມ່ນ: ກວາງຕ໋ຽນ, ແອອາຕູນ ແລະ ແອອາກະປາມ. ທ່ານຟ້າມກວາງເມື່ອຍ, ຫົວໜ້າຫ້ອງກະສີກຳເມືອງ ກືເມີກາ, ໃຫ້ຮູ້ວ່າ:
“ນັບແຕ່ຊຸມມື້ທຳອິດແຫ່ງການກໍ່ສ້າງ, ຄະນະຊີ້ນຳການກໍ່ສ້າງຊົນນະບົດໃໝ່ຂອງເມືອງໄດ້ຊີ້ນຳການຜັນຂະຫຍາຍບັນດາເນື້ອໃນຂອງໂຄງການກໍ່ສ້າງຊົນ ນະບົດໃໝ່ ແລະ 15 ຕາແສງໄດ້ສ້າງຕັ້ງຄະນະຊີ້ນຳຂັ້ນຕາແສງ, ຂັ້ນບ້ານແລ້ວ. ວຽກງານໂຄສະນາກໍ່ໄດ້ຮັບຄວາມເອົາໃຈໃສ່ເປັນພິເສດນັບແຕ່ຫົວທີ, ດ້ວຍການປຸກລະດົມບັນດາຂະບວນການແຂ່ງຂັນ, ດັ່ງນັ້ນການກໍ່ສ້າງຊົນນະບົດໃໝ່ຈຶ່ງໄດ້ຮັບການສະໜັບສະໜູນ ແລະ ຄວາມເຫັນດີເຫັນພ້ອມຈາກປະຊາຊົນ“.
ໃນການກໍ່ສ້າງຊົນນະບົດໃໝ່, ຍາມໃດ ກືເມີກາ ກໍ່ກຳນົດກາເຟແມ່ນຕົ້ນໄມ້ຕົ້ນຕໍ. ດ້ວຍການກຳນົດດັ່ງກ່າວ, ທາງເມືອງໄດ້ລົງທຶນພັດທະນາຕົ້ນກາເຟຢ່າງໝັ້ນຄົງ ເພື່ອຍົກສູງສະມັດຕະພາບ, ຄຸນນະພາບຂຶ້ນ. ມາຮອດປະຈຸບັນ, ທົ່ວເມືອງມີ 9.400 ຄອບຄົວຊາວກະສີກອນຜະລິດກາເຟ ໃນເນື້ອທີ່ 15.380 ເຮັກຕາ. ນອກນັ້ນ, ທາງເມືອງຍັງຂົນຂວາຍປະຊາຊົນປູກກາເຟສະລັບກັບຕົ້ນໄມ້ ທີ່ມີມູນຄ່າດ້ານເສດຖະກິດສູງຄື: ຕົ້ນໝາກຜິກໄທ, ໝາກຖ່ົວລຽນ... ໃນຂົງເຂດລ້ຽງສັດທາງເມືອງໄດ້ສ້າງຟ້າມລ້ຽງໝູ, ງົວ, ສັດປີກແບບລວມສູນ, ແຕ່ລະປີສ້າງລາຍຮັບຫຼາຍພໍສົມຄວນໃຫ້ແກ່ບັນດາຄອບຄົວຊາວກະສີກອນ. ພ້ອມກັນນັ້ນ, ທາງເມືອງຍັງສົມທົບກັນຈັດຕັ້ງຊຸດເຝິກອົບຮົມກ່ຽວກັບການຖ່າຍທອດວິທະຍາ ສາດເຕັກນິກໃນການປູກຝັງ ແລະ ລ້ຽງສັດ, ອັນໄດ້ດຶງດູດ 3.800 ເທື່ອຄົນເຂົ້າຮ່ວມ. ການເຄື່ອນໄຫວເຫຼົ່ານັ້ນໄດ້ປະກອບສ່ວນຍົກສູງຄວາມຮູ້ໃຫ້ແກ່ຊາວກະສີກອນ ໃນການປູກກາເຟຕາມທິດຜະລິດທີ່ມີປະສິດທິຜົນ ແລະ ໝັ້ນຄົງ. ທ່ານ ອີເຕ, ຊາວກະສີກອນຢູ່ຕາແສງກວາງຕ໋ຽນ, ເວົ້າວ່າ:
“ກ່ອນນີ້ຂ້າພະເຈົ້າກໍ່ປູກກາເຟ, ແຕ່ບໍ່ຮູ້ຈະລົງທຶນຄືແນວໃດໃຫ້ມີປະສິດທິຜົນຢ່າງໝັ້ນຄົງ, ແຕ່ພາຍຫຼັງເຂົ້າຮ່ວມຊຸດເຝິກອົບຮົມຂ້າພະເຈົ້າຈຶ່ງຮູ້. ທຸກສິ່ງທຸກຢ່າງທີ່ຖອດຖອນມາໄດ້ຈາກການຮຳ່ຮຽນ, ຂ້າພະເຈົ້າກໍ່ແບ່ງປັນໃຫ້ພໍ່ແມ່ປະຊາຊົນໃນບ້ານ“.
ຊາວເມືອງກືເມີກາຫັນທິດມາປູກກາເຟເປັນຕົ້ນ
(ພາບອິນເຕີແນດ) ຜ່ານການປະຕິບັດ, ບັນດາໂຄງການກໍ່ສ້າງຊົນນະບົດໃໝ່ໄດ້ປະກອບສ່ວນເພີ່ມລາຍຮັບໃຫ້ແກ່ຊາວກະສີກອນ. ນີ້ກໍ່ແມ່ນໜຶ່ງໃນບັນດາມາດຖານສຳຄັນກວ່າໝູ່ໃນ ຈຳນວນ 19 ມາດຖານກໍ່ສ້າງຊົນນະບົດໃໝ່. ທ່ານຟ້າມກວາງເມື່ອຍ, ໃຫ້ຮູ້ຕື່ມອີກວ່າ.
“ໃນການກໍ່ສ້າງຊົນນະບົດໃໝ່, ຕາແສງກວາງຕ໋ຽນໄດ້ປະຕິບັດສຳເລັດມາດຖານທີ 13 ກ່ຽວກັບການຈັດຕັ້ງການຜະລິດ. ດັ່ງນັ້ນລາຍຮັບຂອງຊາວກະສີກອນກໍ່ເພີ່ມຂຶ້ນ. ນອກນັ້ນ, ດ້ວຍການຮ່ວມສຳພັນຢ່າງແໜ້ນແຟ້ນໄດ້ປະກອບສ່ວນເພີ່ມປະສິດທິຜົນແຫ່ງການເຄື່ອນໄຫວ, ຊ່ວຍຊາວກະສີກອນຊອກຫາຕະຫຼາດຈຳໜ່າຍຜະລິດຕະພັນໃຫ້ດີກວ່າ, ຊີວິດເປັນປົກກະຕິກວ່າ“.
ມາຮອດປະຈຸບັນ, ເມືອງ ກືເມີກາ ໄດ້ມີ 1 ຕາແສງບັນລຸໄດ້ 17 ມາດຖານ, 5 ຕາແສງບັນລຸໄດ້ແຕ່ 9 – 15 ມາດຖານ, 7 ຕາແສງບັນລຸໄດ້ແຕ່ 5 – 8 ມາດຖານ ແລະ 2 ຕາແສງບັນລຸໄດ້ແຕ່ 4 ມາດຖານກໍ່ສ້າງຊົນນະບົດໃໝ່. ມາຮອດປະຈຸບັນ, ລະບົບທາງຄົມມະນາຄົມຊົນນະບົດຢູ່ເມືອງ ກືເມີກາ ພວມພັດທະນາຢ່າງສະດວກຍ້ອນມີການຮ່ວມແຮງຮ່ວມໃຈຂອງປະຊາຊົນ. ນັບຮ້ອຍຄອບຄົວຊາວກະສີກອນໄດ້ສະຫງວນທີ່ດິນ, ບໍລິຈາກເງິນທອງ, ຊັບສິນ, ແຮງງານເພື່ອກໍ່ສ້າງທາງຄົມມະນາຄົມຊົນນະບົດ. ທ່ານ ອີຊູຍ, ຊາວຕາແສງກວາງຕ໋ຽນ, ໃຫ້ຮູ້ວ່າ:
“ຂ້າພະເຂົ້າຄິດວ່ານີ້ກໍ່ແມ່ນຜົນປະໂຫຍດຂອງຊາວກະສີກອນ, ພວກເຮົາສະຫງວນທີ່ດິນໃຫ້ລັດກໍ່ສ້າງທາງຄົມມະນາຄົມ, ແຕ່ພວກເຮົາເອງກໍ່ແມ່ນຜູ້ຊົມໃຊ້ໂດຍກົງ. ກ່ອນນີ້ທາງໄປມາເຄີຍເປັນຂີ້ຕົມ, ຂີ້ຝຸ່ນ, ແຕ່ປະຈຸບັນທາງໄປມາສະອາດສວຍງາມ ແລະ ສະດວກສະບາຍທີ່ສຸດ“.
ເສັ້ນທາງເບຕົງຢູ່ເມືອງກືເມີກາໃນປະຈຸບັນ
(ພາບອິນເຕີແນດ)
ດ້ວຍການຮ່ວມແຮງຮ່ວມໃຈຂອງປະຊາຊົນ, ເມືອງ ກືເມີກາ ໄດ້ມີທາງເບຕົງຫຼືທາງປູຢາງລະຫວ່າງຕາແສງ 171 ກມ, ກວມ 97% ເສັ້ນທາງທັງໝົດໃນຕາແສງ. ເສດຖະກິດພັດທະນາ, ໂສມໜ້າຊົນນະບົດໄດ້ຮັບການປັບປຸງ, ອັນໄດ້ປະກອບສ່ວນຍົງສູງຊີວິດທາງດ້ານວັດທະນະທຳ, ຮັກສາຮີດຄອງປະເພນີ, ບັນດາງານບຸນທີ່ເປັນມູນເຊື້ອຂອງຊາວຊົນເຜົ່າໄວ້. ນີ້ແມ່ນກຳລັງໜູນທີ່ສຳຄັນເພື່ອໃຫ້ຕາແສງຕ່າງໆໃນເມືອງ ກືເມີກາ ປະຕິບັດສຳເລັດບັນດາມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໃນທ້ອງຖີ່ນ.