(vovworld) - ພາຍຫຼັງ 3 ປີ ແຫ່ງການຜັນຂະຫຍາຍ, ໂຄງການກໍ່ສ້າງຊົນນະບົດໃໝ່ຢູ່ເມືອງເກາະຟູ໋ກວີ໋, ແຂວງບິ່ງທ້ວນ, ໄດ້ຮັບຄວາມເຫັນດີເຫັນພ້ອມສູງຈາກປະຊາຊົນທ້ອງຖີ່ນ. ສິ່ງດັ່ງກ່າວໄດ້ຊ່ວຍໃຫ້ເມືອງເກາະຟູ໋ກວີ໋ ຮັບຜົນງານຢ່າງຕັ້ງໜ້າໃນຂະບວນການນີ້.
ທະເລເກາະຟູ໋ກວີ໋
ມາຢ້ຽມຢາມເກາະຟູ໋ກວີ໋, ແຂວງບິ່ງທ້ວນ ໃນຊຸມມື້ນີ້, ສິ່ງທີ່ສ້າງຄວາມປະທັບໃຈທຳອິດນັ້ນແມ່ນສີຂຽວອຸ່ມທູ່ມຂອງແຖວຕົ້ນໄມ້ຢູ່ແຄມທາງ. ເມືອງເກາະແຫ່ງນີ້ຕ້ອງປະເຊີນໜ້າກັບຄື້ນທະເລ ແລະ ລົມພັດຕະຫຼອດປີ, ແຕ່ທັງເກາະໄດ້ຮັບການປົກຄຸມໄປດ້ວຍສີຂຽວອຸ່ມທູ່ມ. ທຸກເສັ້ນທາງລ້ວນແຕ່ສະອາດ, ສວຍງາມ. ປ້າ ຟ້າມທິຮວາ, ບ້ານມີ້ເຄ, ຕາແສງຕາມແທງ, ເມືອງເກາະຟູ໋ກວີ໋, ໃຫ້ຮູ້ວ່າ:
“ເມື່ອຍິນສຽງໄກ່ຂັນປະຊາຊົນກໍ່ຕື່ນນອນແລ້ວໄປກວາດລ້າງທາງບ້ານໃຫ້ສະອາດ, ຕອນແລງກໍ່ຄືກັນ. ມື້ໃດພວກຂ້າພະເຈົ້າກໍ່ເຮັດຄືແນວນັ້ນ.“
ການກະທຳຮັກສາສິ່ງແວດລ້ອມ, ຮັກສາຮ່ອມບ້ານໃຫ້ສະອາດສວຍງາມແມ່ນເລີ່ມມາຈາກຂະບວນການກໍ່ສ້າງຊົນນະບົດໃໝ່, ໂດຍແຂວງບິ່ງທ້ວນປຸກລະດົມກ່ອນນີ້ 3 ກວ່າປີ. ນັບແຕ່ມີຂະບວນການດັ່ງກ່າວ, ປະຊາຊົນໃນເກາະໄດ້ບົວລະບັດຕົ້ນໄມ້, ຮັກສາອະນາໄມສິ່ງແວດລ້ອມຢ່າງຫ້າວຫັນ, ນອກນັ້ນເຂົາເຈົ້າຍັງຕັ້ງໜ້າສະໜັບສະໜູນການກໍ່ສ້າງລະບົບທາງຄົມມະນາຄົມຊົນນະບົດອີກ. ທ່ານ ຫງວຽນຮວຽນ, ບ້ານຈ່ຽວເຢືອງ, ຕາແສງຕາມແທງ ແບ່ງປັນວ່າ:
“ບັນດາເສັ້ນທາງຢູ່ທີ່ນີ້ໂດຍລັດຊ່ວຍເຫຼືອ, ສ່ວນຍັງເຫຼືອແມ່ນການປະກອບສ່ວນຂອງປະຊາຊົນ. ພວກເຮົາຕ້ອງປະກອບສ່ວນພ້ອມກັບລັດກໍ່ສ້າງທາງຄົມມະນາຄົມຊົນນະບົດໃຫ້ສະອາດສວຍງາມ, ເພື່ອໄປມາຢ່າງສະດວກສະບາຍ“.
ໂສມໜ້າເກາະຟູ໋ກວີ໋ໃນປະຈຸບັນ
ຂະບວນການກໍ່ສ້າງຊົນນະບົດໃໝ່ ໄດ້ຮັບຄວາມເຫັນດີເຫັນພ້ອມສູງຈາກປະຊາຊົນ. ໂດຍຕອບສະໜອງຂະບວນການນີ້, ປະຊາຊົນ ແລະ ອຳນາດການປົກຄອງທ້ອງຖີ່ນໄດ້ປະຕິບັດວຽກງານໂຄສະນາກ່ຽວກັບໂຄງການກໍ່ສ້າງຊົນນະບົດໃໝ່ເປັນຢ່າງດີ. ທ່ານ ເລຮົ່ງເລີ້ຍ, ຮອງເລຂາຄະນະພັກ, ຜູ້ປະຈຳການຄະນະເລຂາພັກເມືອງຟູ໋ກວີ໋, ໃຫ້ຮູ້ວ່າ, ການໂຄສະນາເພື່ອໃຫ້ປະຊາຊົນເຂົ້າໃຈໄດ້ຜົນປະໂຫຍດຂອງຂະບວນການ, ຈາກນັ້ນເຂົາເຈົ້າຈະສູ້ຊົນ, ສະໝັກໃຈຮ່ວມແຮງຮ່ວມໃຈເຂົ້າໃນວຽກງານລວມຂອງຕາແສງ, ຂອງເມືອງ. ພິເສດ, ນັບແຕ່ເມື່ອຫາກໍ່ປຸກລະດົມຂະບວນການກໍ່ສ້າງຊົນນະບົດໃໝ່, ອຳນາດການປົກຄອງເມືອງເກາະຟູ໋ກວີ໋ ໄດ້ມີຄວາມເອົາໃຈໃສ່ເຖິງວຽກງານຂົນຂວາຍປະຊາຊົນຮ່ວມແຮງຮ່ວມໃຈກໍ່ສ້າງຊົນນະບົດໃໝ່. ທ່ານ ເລຮົ່ງເລີ້ຍ ໃຫ້ຮູ້ວ່າ:
“ພວກຂ້າພະເຈົ້າຕັ້ງໜ້າໂຄສະນາ, ພິເສດແມ່ນໃນບັນດາອົງການຈັດຕັ້ງມະຫາຊົນ ເຮັດໃຫ້ປະຊາຊົນເຂົ້າໃຈໄດ້ບັນດາເນື້ອໃນຂອງຂະບວນການກໍ່ສ້າງຊົນນະບົດໃໝ່, ເພື່ອພ້ອມກັບອຳນາດການປົກຄອງທ້ອງຖີ່ນເຂົ້າຮ່ວມການກໍ່ສ້າງຊົນນະບົດໃໝ່“.
ມາຮອດປະຈຸບັນ, ຕາມແທງ ແມ່ນຕາແສງທຳອິດປະຕິບັດສຳເລັດ 19/19 ມາດຖານກໍ່ສ້າງຊົນນະບົດໃໝ່ຂອງເມືອງເກາະຟູ໋ກວີ໋. ທ່ານນາງ ໂງທິທ້າຍ, ປະທານຄະນະກຳມະການປະຊາຊົນຕາແສງຕາມແທງ, ເມືອງເກາະຟູ໋ກວີ໋, ໃຫ້ຮູ້ວ່າ:
“ຂະບວນການສູ້ຊົນປະຕິບັດສຳເລັດບັນດາມາດຖານກໍ່ສ້າງຊົນນະບົດໃໝ່, ໄດ້ຮັບຄວາມເຫັນດີເຫັນພ້ອມ, ການປະກອບກຳລັງເຫື່ອແຮງຢ່າງຫຼວງຫຼາຍຈາກປະຊາຊົນ. “
ຖະໜົນຫົນທາງທີ່ສະອາດໃນເກາະຟູ໋ກວີ໋ ໂດຍໄດ້ຮັບຄວາມເຫັນດີເຫັນພ້ອມຈາກປະຊາຊົນ, ເມືອງເກາະຟູ໋ກວີ໋ ຈຶ່ງມີຄວາມສະດວກຫຼາຍຢ່າງໃນການກໍ່ສ້າງຊົນນະບົດໃໝ່. ປະຈຸບັນໂສມໜ້າຂອງເມືອງເກາະໄດ້ມີການປ່ຽນແປງຢ່າງຈະແຈ້ງ. 100% ຈຳນວນຄອບຄົວໄດ້ນຳໃຊ້ນຳ້ຈືດ, ຈຳນວນຄອບຄົວທຸກຍາກກໍ່ຫຼຸດລົງ, ຊີວິດທາງດ້ານເສດຖະກິດຂອງປະຊາຊົນສ່ວນຫຼາຍເປັນປົກກະຕິ. ພ້ອມກັນນັ້ນ, ທາງຄົມມະນາຄົມ, ພື້ນຖານໂຄງລ່າງກໍ່ໄດ້ຮັບຄວາມເອົາໃຈໃສ່ລົງທຶນ ເພື່ອຮັບໃຊ້ໃຫ້ການດຳລົງຊີວິດຂອງປະຊາຊົນໃນເກາະ. ທ່ານ ຕ້າມິງຍືດ, ຮອງປະທານຄະນະກຳມະການປະຊາຊົນເມືອງເກາະຟູ໋ກວີ໋, ຢັ້ງຢືນວ່າ:
“ຜ່ານສາມປີແຫ່ງການປະຕິບັດຂະບວນການກໍ່ສ້າງຊົນນະບົດໃໝ່ໃນເມືອງເກາະ, ພວກຂ້າພະເຈົ້າຫາກໍ່ສະເໜີແຂວງຮັບຮອງຕາແສງຕາມແທງ ແມ່ນຕາແສງບັນລຸ 19/19 ມາດຖານ, ສ່ວນສອງຕາແສງທີ່ຍັງເຫຼືອແມ່ນຕາແສງລອງຫາຍ ບັນລຸ 16/19 ມາດຖານ, ຕາແສງຫງູຟຸ້ງ ບັນລຸ 15/19 ມາດຖານ. ນີ້ແມ່ນພື້ນຖານເພື່ອໃຫ້ພວກຂ້າພະເຈົ້າສູ້ຊົນຮອດທ້າຍປີ 2015 ກາຍເປັນເມືອງທີ່ເປັນແບບຢ່າງໃນຂະບວນການກໍ່ສ້າງຊົນນະບົດໃໝ່“.
ດ້ວຍຄວາມມານະພະຍາຍາມຂອງທົ່ວປວງຊົນ ແລະ ອຳນາດການປົກຄອງ, ເມືອງເກາະຟູ໋ກວີ໋ຈະບັນລຸມາດຖານກໍ່ສ້າງຊົນນະບົດໃໝ່ໃນປີ 2015 ຢ່າງແນ່ນອນ. ເຖິງວ່າຈະຢູ່ໝູ່ເກາະທີ່ຫ່າງໄກຊອກຫຼີກ, ແຕ່ປະຊາຊົນເມືອງເມືອງເກາະຟູ໋ກວີ໋ ກໍ່ຄືປະຊາຊົນແຂວງບິ່ງທ້ວນລ້ວນແຕ່ມຸ່ງໄປເຖິງຈຸດໝາຍແຫ່ງຊາດກ່ຽວກັບການກໍ່ສ້ງຊົນນະບົດໃໝ່.