(vovwold)- ໂດຍສືບຕໍ່ບົດຂຽນໃນລາຍການ ”ຊົນນະບົດໃໝ່ຫວຽດນາມ” ອາທິດຜ່ານມາ ກ່ຽວກັບບັນດາມາດຕະການປະຕິບັດໂຄງການຈຸດໝາຍແຫ່ງຊາດກ່ຽວກັບຊົນນະບົດໃໝ່ຢູ່ຫວຽດນາມໃນປະຈຸບັນ. ມື້ນີ້, ພວກເຮົາຂໍແນະນຳບົດທີ່ມີຫົວຂໍ້ວ່າ: ”ແຜນກຳນົດພັດທະນາຊົນນະບົດໃໝ່”, ເຊິ່ງແມ່ນໜຶ່ງໃນບັນດາມາດຕະການທີ່ສຳຄັນໃນການປະຕິບັດໂຄງການນີ້.
ຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່
(ພາບ: google.com.vn)
ພາຍຫຼັງ 3 ປີ ແຫ່ງການປະຕິບັດໂຄງການ (2009-2011) ບັນດາເນື້ອໃນກໍ່ສ້າງຊົນນະບົດໃໝ່ລ້ວນແຕ່ໄດ້ຮັບການຜັນຂະຫຍາຍ ແລະ ບັນລຸຄາດໝາຍທີ່ໄດ້ວາງອອກໂດຍພື້ນຖານ. ກ່ຽວກັບແຜນກຳນົດຊົນນະບົດໃໝ່, ຮອດເດືອນ 6/2010 ການວາງແຜນກຳນົດໂດຍລະອຽດຢູ່ 11 ຕາແສງທີ່ປະຕິບັດທົດລອງໃນທົ່ວປະເທດໄດ້ສຳເລັດໃນຂັ້ນພື້ນຖານແລ້ວ. ການກໍ່ສ້າງພື້ນຖານໂຄງລ່າງໄດ້ຮັບຖືວ່າແມ່ນຂອດເປີດສາກໃຫ້ແກ່ການກໍ່ສ້າງຊົນນະບົດໃໝ່. ນອກຈາກແຫຼ່ງທຶນໃນເບື້ອງຕົ້ນໂດຍສູນກາງໜູນຊ່ວຍແລ້ວ, ບັນດາທ້ອງຖີ່ນຍັງສົມທົບ, ລະດົມແຫຼ່ງທຶນອື່ນໆເຂົ້າໃນການກໍ່ສ້າງພື້ນຖານໂຄງລ່າງ. ມີ 8ຕາແສງ ໃນຈຳນວນຕາແສງໄດ້ປະຕິບັດສຳເລັດບັນດາມາດຖານກ່ຽວກັບໂຄງລ່າງ, ເຮັດໃຫ້ໂສມໜ້າຊົນນະບົດມີການປ່ຽນແປງຢ່າງຈະແຈ້ງ ແລະ ມີຜົນກະທົບໂດຍກົງເຖິງການພັດທະນາເສດຖະກິດ, ປັບປຸງ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນ, ຊຸກຍູ້ການເຄື່ອນໄຫວທາງດ້ານວັດທະນະທຳ. ລາຍຮັບຂອງປະຊາຊົນຢູ່ບັນດາຕາແສງປະຕິບັດທົດລອງໄດ້ເພີ່ມຂຶ້ນສະເລ່ຍປະມານ 60%. ບັນດາຕາແສງສ່ວນຫຼາຍແມ່ນບັນລຸມາດຖານກ່ຽວກັບການສຶກສາ, ສາທາລະນະສຸກ, ໝູ່ບ້ານວັດທະນະທຳ, ນ້ຳສະອາດ, ກິດຈະກຳສຸຂະອະນາໄມ… 11 ຕາແສງບັນລຸມາດຖານກ່ຽວກັບການກໍ່ສ້າງລະບົບການເມືອງ. ທ່ານ Tang Minh Loc. ຫົວໜ້າກົມເສດຖະກິດຮ່ວມມື ແລະ ພັດທະນາຊົນນະບົດ, ຫົວໜ້າຫ້ອງການຊີ້ນຳໂຄງການຈຸດໝາຍແຫ່ງຊາດກ່ຽວກັບຊົນນະບົດໃໝ່, ໃຫ້ຮູ້ວ່າ:
”ທົ່ວປະເທດມີທັງໝົດ 9121 ຕາແສງໃນເຂດຊົນນະບົດ, ປະຈຸບັນ, 51%ຕາແສງໃນຈຳນວນດັ່ງກ່າວພວມຜັນຂະຫຍາຍການວາງແຜນກຳນົດ, ແລະ ຮອດປີ 2015 ຈະມີ 20% ຈຳນວນຕາແສງນີ້ບັນລຸມາດຖານຊົນນະບົດໃໝ່. ການວາງແຜນກຳນົດແມ່ນວຽກງານທີ່ຮຽກຮ້ອງໃຫ້ທຸກຕາແສງຕ້ອງດຳເນີນກ່ອນ. ປີ 2011, 2012 ນີ້, ພວກເຮົາຈະໃຫ້ບຸລິມະສິດແກ່ບັນດາຕາແສງໄດ້ຈົດທະບຽນວາງແຜນກຳນົດແລ້ວ. ເປັນອັນວ່າ, ບັນດາຫົວໜ່ວຍໃຫ້ຄຳປຶກສາຕ້ອງຊ່ວຍເຂົາເຈົ້າດ້ານແຫຼ່ງກຳລັງ ກໍ່ຄືລົງທຶນຫຼາຍກວ່າອີກ ແລະ ຕ້ອງມີການຊີ້ນຳນຳພາຢ່າງຂ້ຽວຂາດກວ່າ”.
ວາງແຜນກຳນົດກໍ່ສ້າງຊົນນະບົດໃໝ່ຮັບໃຊ້ໃຫ້ແກ່ການພັດທະນາ
(ພາບ: google.com.vn)
ພຶດຕິກຳຕົວຈິງຢູ່ບັນດາຕາແສງປະຕິບັດທົດລອງ ບໍ່ພຽງແຕ່ຊ່ວຍໃຫ້ລັດຖະບານ, ບັນດາກະຊວງ, ຂະແໜງການມີພື້ນຖານເພື່ອປະກາດໃຊ້ ແລະ ເພີ່ມເຕີມບັນດານະໂຍບາຍ, ກົນໄກຢ່າງແທດຈິງ, ແກ້ໄຂຄວາມຫຍຸ້ງຍາກໃຫ້ແກ່ບັນດາຕາແສງປະຕິບັດທົດລອງຢ່າງທັນການເທົ່ານັ້ນ, ຫາກຍັງປະກອບສ່ວນຜັນຂະຫຍາຍໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ຢ່າງກ້ວາງຂວາງອີກດ້ວຍ. ພາຍຫຼັງ 3 ປີ ແຫ່ງການປະຕິບັດ, ສາມາດເຫັນໄດ້ພາບພົດຂອງຊົນນະບົດໃໝ່ໃນໄລຍະຫັນເປັນອຸດສາຫະກຳ ແລະ ທັນສະໄໝຢູ່ຫວຽດນາມ, ນັບທັງແຜນກຳນົດ, ການກໍ່ສ້າງພື້ນຖານໂຄງລ່າງ, ການພັດທະນາການຜະລິດ, ວັດທະນະທຳ, ສັງຄົມ, ສິ່ງແວດລ້ອມ, ການສ້າງວຽກເຮັດງານທຳ, ເພີ່ມລາຍຮັບ, ການກໍ່ສ້າງລະບົບການເມືອງ… ຜ່ານນັ້ນສາມາດເຫັນໄດ້ບັນດາມາດຖານທີ່ດີ, ເໝາະສົມ ກໍ່ຄືບັນດາມາດຖານບໍ່ທັນເໝາະສົມ… ຕາມທ່ານ Tang Minh Loc ແລ້ວ, ເລື່ອງປະຕິບັດແຜນກຳນົດຊົນນະບົດໃໝ່ໃນປະຈຸບັນໄດ້ຮັບການຕີລາຄາຕາມ 19 ມາດຖານໃນປະມວນມາດຖານແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່ ເຊິ່ງທ່ານນາຍົກລັດຖະມົນຕີໄດ້ປະກາດໃຊ້.
”ບົນພື້ນຖານນັ້ນ ຕ້ອງວາງແຜນກຳນົດຄືນໃໝ່ຕາມທິດພັດທະນາສີວິໄລ, ທັນສະໄໝ, ຮັບປະກັນໃຫ້ແກ່ການພັດທະນາແບບຍືນຍົງ. ໜຶ່ງໃນບັນດາຂໍ້ກຳນົດທີ່ບັງຄັບຕ້ອງປະຕິບັດໃຫ້ໄດ້ນັ້ນແມ່ນເຖິງປີ 2012, ບັນດາຕາແສງຕ້ອງວາງແຜນກຳນົດຊົນນະບົດໃໝ່ໃຫ້ສຳເລັດໂດຍພື້ນຖານ. ເມື່ອມີແຜນກຳນົດແລ້ວຈຶ່ງສາມາດປະຕິບັດບັນດາເນື້ອໃນໃໝ່ໄດ້. ໃນຊຸມປີຜ່ານມາ, ຍ້ອນພວກເຮົາບໍ່ວາງແຜນກຳນົດເຂດຊົນນະບົດ. ການພັດທະນາຢູ່ເຂດຊົນນະບົດຈຶ່ງສັບສົນ, ຕາມລຳພັງໃຈ, ອັນໄດ້ທຳລາຍທັດສະນີຍະພາບ, ກໍ່ມົນລະພິດສິ່ງແວດລ້ອມ, ສົ່ງຜົນສະທ້ອນບໍ່ດີເຖິງຈຸດວັດທະນະທຳອັນເປັນມູນເຊື້ອທີ່ດີງາມຢູ່ເຂດຊົນນະບົດ”
ໃນກອງປະຊຸມຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ກັບການນຳບັນດາແຂວງ, ນະຄອນ ແລະ ບັນດາກະຊວງ, ຂະແໜງການຂັ້ນສູນກາງ ທີ່ຫາກໍ່ຈັດຂຶ້ນຫວ່າງແລ້ວນີ້, ທ່ານຮອງນາຍົກລັດຖະມົນຕີ Vu Van Ninh ຖືວ່າ, ຈາກພຶດຕິກຳຕົວຈິງແຫ່ງການຜັນຂະຫຍາຍໄດ້ສະແດງໃຫ້ເຫັນວ່າ, ຢູ່ບ່ອນໃດຄະນະພັກ, ອຳນາດການປົກຄອງມີຄວາມເອົາໃຈໃສ່, ໃກ້ຊິດກັບແຜນນະໂຍບາຍ ແລະ ການຈັດຕັ້ງປະຕິບັດ, ຂະບວນການປະຕິບັດຢູ່ບ່ອນນັ້ນຈະບັນລຸປະສິດທິຜົນ. ປີ 2012, ບັນດາແຂວງ, ນະຄອນຕ້ອງວາງແຜນສັງລວມຢູ່ຕາແສງຕ່າງໆໃຫ້ສຳເລັດໂດຍພື້ນຖານ, ໃນນັ້ນເອົາໃຈໃສ່ເຖິງການວາງແຜນກຳນົດຜະລິດ ເພາະວ່ານີ້ແມ່ນກົກເຄົ້າຂອງບັນຫາ. ທ່ານຮອງນາຍົກລັດຖະມົນຕີ Vu Van Ninh ເນັ້ນໜັກວ່າ:
”ໂຄງການຈຸດໝາຍແຫ່ງຊາດກ່ຽວກັບຊົນນະບົດໃໝ່ ແມ່ນໜຶ່ງໃນບັນດາເນື້ອໃນ, ມາດຕະການສຳຄັນທີ່ສຸດ ເພື່ອຜັນຂະຫຍາຍການປະຕິບັດມະຕິສູນກາງເລກທີ 7 ກ່ຽວກັບກະສີກຳ - ຊາວກະສີກອນ - ຊົນນະບົດ. ມາຮອດປະຈຸບັນ, ໂຄງການໄດ້ກາຍເປັນຂະບວນການ ແລະກ້າວເຂົ້າສູ່ຊີວິດການເປັນຢູ່, ດັ່ງນັ້ນພວກເຮົາຕ້ອງຕັດສິນໃຈປະຕິບັດໃຫ້ໄດ້, ເຖິງວ່າວິວັດແຫ່ງການຜັນຂະຫຍາຍຍັງປະສົບກັບຄວາມຫຍຸ້ງຍາກຫຼາຍກໍ່ຕາມ. ແຕ່ບັນດາອົງການ, ອຳນາດການປົກຄອງ, ອົງຄະນະພັກຕ້ອງສຸມໃສ່ຊີ້ນຳ, ນຳພາ ແລະ ຈັດຕັ້ງການຜັນຂະຫຍາຍຢູ່ແຕ່ລະຕາແສງໃຫ້ເໝາະສົມ”.
ການວາງແຜນກຳນົດກໍ່ຕ້ອງແທດເໝາະກັບແຕ່ລະເຂດ. ການນຳບໍ່ສາມາດຕັດສິນດ້ວຍຕົນເອງໄດ້, ຫາກປະຊາຊົນຈະເປັນຜູ້ຕັດສິນ. ເຂດໃດຕ້ອງການທາງຄົມມະນາຄົມຈະວາງແຜນກຳນົດທາງຄົມມະນາຄົມກ່ອນ, ເຂດໃດຕ້ອງການໄຟຟ້າ ຈະໃຫ້ບຸລິມະສິດພັດທະນາໄຟຟ້າ… ວາງແຜນກຳນົດເພື່ອພັດທະນາ, ນັ້ນແມ່ນເນື້ອໃນຕົ້ນຕໍໃນກິດຈະການກໍ່ສ້າງຊົນນະບົດໃໝ່ຢູ່ຫວຽດນາມ.