(vovworld) - ໃນການກໍ່ສ້າງຊົນນະບົດໃໝ່. ວັດທະນະທຳມີບົດບາດສຳຄັນ, ທັງແມ່ນຄາດໝາຍ, ທັງແມ່ນກຳລັງໜູນຂອງການພັດທະນາ ແລະ ຈຸດປະສົງສຸດທ້າຍຂອງການກໍ່ສ້າງຊົນນະບົດໃໝ່ນັ້ນແມ່ນຍົກສູງຊີວິດທາງດ້ານວັດຖຸ, ວັດທະນະທຳ, ຈິດໃຈຂອງປະຊາຊົນ. ຕ້ອງເຮັດແນວໃດເພື່ອທັງຮັບປະກັນຈຸດໝາຍກໍ່ສ້າງຊົນນະບົດໃໝ່ທີ່ທັນສະໄໝ ທັງຮັກສາວັດທະນະທຳທີ່ເປັນມູນເຊື້ອອັນດີງາມຂອງເຂດບ້ານນາໄດ້. ສິ່ງດັ່ງກ່າວຮຽກຮ້ອງໃຫ້ມີວິທີເຮັດຢ່າງມີຫົວຄິດປະດິດສ້າງ, ເໝາະສົມກັບສະພາບຕົວຈິງຂອງແຕ່ລະທ້ອງຖີ່ນ.
ສາລາບ້ານຢູ່ຟູ່ລືວຍັງຄົງຮັກສາຮູບເດີມໄວ້ຄືເກົ່າ
(ພາບ. ອິນເຕີແນດ)
ໃນຈຳນວນ 19 ມາດຖານກໍ່ສ້າງຊົນນະບົດໃໝ່, ນອກຈາກບັນດາມາດຖານກ່ຽວກັບແຜນກຳນົດລົງທຶນກໍ່ສ້າງພື້ນຖານໂຄງລ່າງຊົນນະບົດແລ້ວ, ຍັງມີບັນດາຂໍ້ກຳນົດທີ່ສຳຄັນກ່ຽວກັບການພັດທະນາວັດທະນະທຳ, ຮັບປະກັນສິ່ງແວດລ້ອມ, ສ້າງແບບແຜນວັດທະນະທຳຊົນນະບົດອີກດ້ວຍ. ຄຽງຂ້າງມາດຖານພັດທະນາການຜະລິດເພື່ອຍົກສູງລາຍຮັບແລ້ວ, ຫຼາຍທ້ອງຖີ່ນໄດ້ຖືເປັນສຳຄັນມາດຖານວັດທະນະທຳ, ຮັກສາ ແລະ ເສີມຂະຫຍາຍບັນດາຄຸນຄ່າອັນດີງາມຂອງເຂດບ້ານນາໄວ້. ຟູ່ລືວ ແມ່ນບ້ານເດີມຂອງແຂວງບັກນິງ ເຊິ່ງແມ່ນໝູ່ບ້ານທີ່ຮັ່ງມີດ້ວຍມູນເຊື້ອວັດທະນະທຳ. ມາຟູ່ລືວ ຜູ້ໃດກໍ່ຮູ້ສຶກໄດ້ຄວາມກົມກຽວລະຫວ່າງຈຸດທີ່ເກົ່າແກ່ກັບທັນສະໄໝ. ລະບົບວັດທະນະທຳຄື: ສາລາບ້ານ, ວິຫານ, ວັດວາອາຮາມ, ງານບຸນຂອງໝູ່ບ້ານລ້ວນແຕ່ໄດ້ຮັບການອະນຸລັກຮັກສາໄວ້. ໃນທ່າອ່ຽງແຫ່ງການພັດທະນາ, ທາງຄົມມະນາຄົມຫຼາຍສາຍໄດ້ຮັບການກໍ່ສ້າງດ້ວຍເບຕົງຢ່າງກວ້າງຂວາງ. ແຕ່ຜ່ານການປຶກສາຫາລືລະຫວ່າງອຳນາດການປົກຄອງ ແລະ ປະຊາຊົນ, ເສັ້ນທາງປູດ້ວຍຫີນຂຽວໃນບ້ານກໍ່ໄດ້ຮັບການເປີດກວ້າງ ແຕ່ຍັງຮັກສາໄດ້ຄວາມງາມທີ່ເໝາະສົມກັບທັດສະນີຍະພາບໃນໝູ່ບ້ານ. ທ່ານ ຫງວຽນວັນເຢິ່ນ, ຊາວບ້ານຟູ່ລືວ, ໃຫ້ຮູ້ວ່າ:
”ບາງຄົນ, ພິເສດແມ່ນລຸ້ນໜຸ່ມຢາກກໍ່ສ້າງເສັ້ນທາງໃນໝູ່ບ້ານດ້ວຍຊີມັງໃຫ້ສະອາດ, ສວຍງາມ. ແຕ່ພວກຂ້າພະເຈົ້າບໍ່ຄິດຄືແນວນັ້ນ, ຫາກຢາກຮັກສາຈຸດພິເສດສະເພາະໄວ້, ດັ່ງນັ້ນຈຶ່ງປູທາງດ້ວຍຫີນຂຽວ, ທັງສອງພາກທາງປູດ້ວຍດິນຈີ່. ເຮັດຄືແນວນັ້ນ ພວກຂ້າພະເຈົ້າຈະຮັກສາສີສັນພິເສດສະເພາະຂອງໝູ່ບ້ານໄວ້ໄດ້”.
ບັນດາເສັ້ນທາງໃນບ້ານຟູ່ລືວ ຖືກຢູດ້ວຍຫີນຂຽວເພື່ອຮັກສາວັດທະນະທຳ
ທີ່ເປັນເອກະລັກສະເພາະຂອງບ້ານເກົ່າ
(ພາບ. ອິນເຕີແນດ)
ຢູ່ເຂດບ້ານນາອື່ນໆຂອງຫວຽດນາມໃນປະຈຸບັນຍັງຄົງຮັກສາຫຼາຍຮີດຄອງປະເພນີອັນດີງາມຄື: ຖືເປັນສຳຄັນການພົວພັນໃນວົງຕະກຸນ, ໝູ່ບ້ານ, ຄວາມເປັນລະບຽບຮຽບຮ້ອຍໃນໝູ່ບ້ານ, ເຄົາລົບຜູ້ອາຍຸສູງ, ດຳລົງຊີວິດຮ່ວມກັນ, ສາມັກຄີ, ຊ່ວຍເຫຼືອເຊິ່ງກັນ ແລະ ກັນໃນການອອກແຮງງານ, ທຳການຜະລິດ ແລະ ໃນການດຳລົງຊີວິດ... ນີ້ແມ່ນບັນດາປັດໃຈວັດທະນະທຳທີ່ສຳຄັນ, ປະກອບສ່ວນເພີ່ມພູນ, ປຸກລຸກຈິດໃຈ, ສະຕິຕື່ນຕົວ ແລະ ຄວາມເຫັນດີເຫັນພ້ອມຂອງປະຊາຊົນໃນການກໍ່ສ້າງຊົນນະບົດໃໝ່. ໃນຊຸມປີມໍ່ໆມານີ້, ບັ້ນຂົນຂວາຍ “ທົ່ວປວງຊົນສາມັກຄີກໍ່ສ້າງຊີວິດທາງດ້ານວັດທະນະທຳຢູ່ເຂດຊຸມຊົນ“ ໂດຍຄະນະກຳການສູນກາງແນວໂຮມປະເທດຊາດຫວຽນາມປຸກລະດົມ ໄດ້ຕິດພັນກັບຂະບວນການກໍ່ສ້າງຊົນນະບົດໃໝ່. ຕອບສະໜອງບັ້ນຂົນຂວາຍນີ້, ປະຊາຊົນຢູ່ຫຼາຍແຫ່ງໄດ້ມີຂໍ້ກຳນົດກ່ຽວກັບແບບແຜນວັດທະນະທຳໃໝ່ຕື່ມອືກ ບົນພື້ນຖານສືບທອດຂໍ້ກຳນົດອັນເປັນມູນເຊື້ອທີ່ດີຂອງໝູ່ບ້ານ. ມີຫຼາຍຂໍ້ກຳນົດກ່ຽວກັບການແຕ່ງດອງ, ງານສົບ... ຕາມແບບແຜນດຳລົງຊີວິດໃໝ່ໄດ້ຮັບການສະໜັບສະໜູນຈາກປະຊາຊົນໃນທົ່ວປະເທດ. ຢູ່ຫຼາຍທ້ອງຖີ່ນຍັງກໍ່ສ້າງບັນດາບ້ານວັດທະນະທຳ, ເຂດຊຸມຊົນແບບໃໝ່, ກຳນົດກ່ຽວກັບເຮືອນຢູ່, ສວນ, ຮົ້ວ, ຕົ້ນໄມ້, ການປະພຶດສີວິໄລ, ການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຢ່າງລະອຽດ...ໃນວິວັດແຫ່ງການປະຕິບັດ, ມີຫຼາຍທ້ອງຖີ່ນໄດ້ພະຍາຍາມລົງທຶນກໍ່ສ້າງພື້ນຖານດ້ານວັດຖຸ, ສ້າງສິ່ງແວດລ້ອມວັດທະນະທຳຢ່າງກົມກຽວ, ຜ່ານນັ້ນຊຸກຍູ້ຂະບວນການກໍ່ສ້າງຊົນນະບົດໃໝ່ແບບຍືນຍົງ. ທ່ານ ຫງວຽນກວົກແຄ໋ງ, ພະນັກງານໃຫ້ຄຳປຶກສາກ່ຽວກັບໂຄງການກໍ່ສ້າງຊົນນະບົດໃໝ່, ສັງກັດກະຊວງກະສີກຳ ແລະ ພັດທະນາຊົນນະບົດ, ໃຫ້ຂໍ້ສັງເກດການວ່າ:
“ຂະບວນການວັດທະນະທຳໄດ້ຮັບການຫັນເປັນລະອຽດດ້ວຍມາດຖານຕ່າງໆ. ຂະແໜງວັດທະນະທຳກໍ່ໄດ້ຍົກມາດຖານອອກມາ ເພື່ອໃຫ້ທ້ອງຖີ່ນ ຕ່າງໆປະຕິບັດຄື: ສ້າງສິ່ງແວດລ້ອມ, ທັດສະນີຍະພາບສະອາດ, ສວຍງາມ. ພິເສດມີຫຼາຍທ້ອງຖີ່ນໄດ້ເອົາໃຈໃສ່ເຖິງສິ່ງແວດລ້ອມວັດທະນະທຳໃນເຂດຊຸມຊົນ, ວັດທະນະທຳໃນການປະພຶດລະຫວ່າງຄົນກັບຄົນ, ລະຫວ່າງຄົນກັບທຳມະຊາດ, ກັບສິ່ງແວດລ້ອມ“.
ການກໍ່ສ້າງຊົນນະບົດໃໝ່ບົນພື້ນຖານອະນຸລັກຮັກສາບັນດາຄຸນຄ່າວັດທະນະທຳທີ່ເປັນມູນເຊື້ອ, ເຮັດໃຫ້ໂສມໜ້າຊົນນະບົດນັບມື້ນັບໄດ້ຮັບການປັບປຸງ, ມີຊີວິດທາງດ້ານວັດຖຸ ແລະ ວັດທະນະທຳຈິດໃຈນັບມື້ນັບອຸດົມສົມບູນ, ນີ້ແມ່ນໜຶ່ງໃນບັນດາເນື້ອໃນເຊິ່ງໂຄງການກໍ່ສ້າງຊົນນະບົດໃໝ່ພວມມຸງໄປເຖິງ.