(vovworld) - ນັບແຕ່ 20 ປີມານີ້, ແຫຼ່ງທຶນຈາກກອງທຶນໜູນຊ່ວຍຊາວກະສີກອນໄດ້ຊ່ວຍໃຫ້ຫຼາຍຄອບຄົວຊາວກະສີກອນຢູ່ແຂວງດົ່ງນາຍ ບືນຕົວຂຶ້ນຫຼຸດພົ້ນອອກຈາກຄວາມທຸກຍາກ. ໃນໄລຍະປະຈຸບັນ, ແຫຼ່ງທຶນດັ່ງກ່າວກໍ່ໄດ້ປະກອບສ່ວນຊຸກຍູ້ໂຄງການກໍ່ສ້າງຊົນນະບົດໃໝ່ຕາມທິດພັດທະນາແບບຍືນຍົງ.
ກອງທຶນໜູນຊ່ວຍຊາວກະສີກອນແຂວງດົ່ງນາຍໃຫ້ປະຊາຊົນກູ້ຢືມທຶນທຳການຜະລິດ
ນັບແຕ່ປີ 2011 ຄືນຫຼັງ, ຄອບຄົວອ້າຍ ຟ້າມແທ່ງແອງ, ຢູ່ຕາແສງດົງຮ່ວາ, ເມືອງຈາງບອມ, ແຂວງດົ່ງນາຍ ປະສົບກັບຄວາມຫຍຸ້ງຍາກຫຼາຍຢ່າງ, ຍ້ອນບໍ່ມີວຽກເຮັດງານທຳເປັນປົກກະຕິ. ແຕ່ພາຍຫຼັງເຂົ້າຮ່ວມໂຄງການລ້ຽງໝູຈະເລີນພັນຂອງທ້ອງຖີ່ນ ແລະ ກູ້ຢືມທຶນໄດ້ 20 ລ້ານດົ່ງ ຈາກແຫຼ່ງທຶນໜູນຊ່ວຍຊາວກະສີກອນ, ຊີວິດທາງດ້ານເສດຖະກິດຂອງຄອບຄົວທ່ານໄດ້ຮັບການປັບປຸງຢ່າງຈະແຈ້ງ, ເມື່ອມີທຶນ, ທ່ານ ແອງ ໄດ້ຊື້ໝູແມ່ 3 ໂຕມາລ້ຽງ ແລະ ຂາຍໝູພັນ. ແຕ່ລະປີ, ພາຍຫຼັງຂາຍໝູພັນ, ຄອບຄົວທ່ານຫາກຳໄລໄດ້ປະມານ 60 ລ້ານດົ່ງ. ມາຮອດປະຈຸບັນ, ຈຳນວນເງິນທີ່ທ່ານສະສົມໄດ້ໃນ 4 ປີຜ່ານມາ, ບໍ່ພຽງແຕ່ຊ່ວຍທ່ານໃຊ້ຈ່າຍໃນຊີວິດການເປັນຢູ່ເທົ່ານັ້ນ, ຫາກຍັງຊ່ວຍຄອບຄົວທ່ານມີແຫຼ່ງທຶນຕື່ມອີກເພື່ອກະກຽມເປີດກວ້າງຂະໜາດຄອກຟາມ, ສົມທົບກັບການລ້ຽງໄກ່ອີກດ້ວຍ. ທ່ານ ຟ້າມແທ່ງແອງ, ໃຫ້ຮູ້ວ່າ:
“ກ່ອນນີ້ບໍ່ມີທຶນ, ເຮັດຫຍັງກໍ່ບໍ່ໄດ້, ເມື່ອມີທຶນ 20 ລ້ານດົ່ງ, ຂ້າພະເຈົ້າສາມາດທຳມາຫາກິນ, ພັດທະນາເສດຖະກິດ, ມີວຽກເຮັດງານທຳ, ດັ່ງນັ້ນລາຍຮັບກໍ່ເພີ່ມຂຶ້ນຫຼາຍສົມຄວນ“.
ເລື່ອງສ້າງຄວາມຮັ່ງມີຂອງສະມາຊິກ 40 ຄົນໃນສະໂມສອນລ້ຽງປາໃຫ້ສະມັດຕະພາບສູງ, ຢູ່ບ້ານ 8, ຕາແສງຊົງເຈົ່າ, ເມືອງຈາງບອມ ກໍ່ເປັນການພິສູດໃຫ້ເຫັນບົດບາດຂອງກອງທຶນໜູນຊ່ວຍຊາວກະສີກອນໃນການພັດທະນາເສດຖະກິດ ປະກອບສ່ວນກໍ່ສ້າງຊົນນະບົດໃໝ່. ພາຍຫຼັງທີ່ສະມາຄົມຊາວກະສີກອນແຂວງໃຫ້ກູ້ຢືມທຶນ 400 ລ້ານດົ່ງຈາກແຫຼ່ງທຶນດັ່ງກ່າວ, ບັນດາສະມາຊິກໃນສະໂມສອນໄດ້ສຸມໃສ່ລົງທຶນບຸລະນະ, ຍົກລະດັບໜອງລ້ຽງປາ, ນຳໃຊ້ວິທະຍາສາດເຕັກນິກເຂົ້າໃນການລ້ຽງປາ. ຍ້ອນເຫດນັ້ນ, ປະລິມານປາທີ່ລ້ຽງມາໄດ້ໃນເນື້ອທີ່ໜອງ 1 ກວ່າເຮັກຕາໄດ້ເພີ່ມຂຶ້ນທົບ 8 ກວ່າເທົ່າເມື່ອທຽບໃສ່ກ່ອນນີ້ແມ່ນ 1,2 ໂຕນ/ເຮັກຕາ. ປະຈຸບັນ, ລາຍຮັບຂອງບັນດາສະມາຊິກສະຫະກອນແມ່ນບັນລຸໄດ້ເກືອບ 100 ລ້ານດົ່ງ/ຄົນ/ປີ. ທ່ານ ລືວດິ່ງງວຽນ, ຫົວໜ້າສະໂມສອນລ້ຽງປາໃຫ້ສະມັດຕະພາບສູງບ້ານ 8, ຕາແສງຊົງເຈົ່າ, ໃຫ້ຮູ້ວ່າ:
“ຂ້າພະເຈົ້າຖືວ່າກອງທຶນໜູນຊ່ວຍຊາວກະສີກອນ ມີຄວາມຈຳເປັນຢ່າງແທ້ຈິງ, ພິເສດແມ່ນໃນສະພາບເສດຖະກິດພວມປະສົບກັບຄວາມຫຍຸ້ງຍາກຄືປະຈຸບັນ. ຫວັງວ່າລັດຈະໃຫ້ພວກຂ້າພະເຈົ້າກູ້ຢືມທຶນຕື່ມອີກຈາກກອງທຶນດັ່ງກ່າວເພື່ອສືບຕໍ່ເປີດກວ້າງການຜະລິດ“.
ລ້ຽງໝູ່ດ້ວຍທຶນກູ້ຢືມຈາກກອງທຶນໜູນຊ່ວຍຊາວກະສີກອນ
ດ້ວຍຈຸດປະສົງຊ່ວຍເຫຼືອຊາວກະສີກອນທີ່ມີຄວາມຕ້ອງການທຶນເພື່ອທຳການຜະລິດ, ໃນຊຸມປີຜ່ານມາ, ກອງທຶນໜູນຊ່ວຍຊາວກະສີກອນໂດຍສູນກາງສະມາຄົມຊາວກະສີກອນປຸກລະດົມ ໄດ້ເສີມຂະຫຍາຍປະສິດທິຜົນດີທີ່ສຸດ. ພິເສດແຫຼ່ງທຶນດັ່ງກ່າວຍັງປະກອບສ່ວນໜູນຊ່ວຍຢ່າງຕັ້ງໜ້າ ເພື່ອໃຫ້ທ້ອງຖີ່ນຕ່າງໆປະຕິບັດສຳເລັດບັນດາມາດຖານໃນການກໍ່ສ້າງຊົນນະບົດໃໝ່, ໂດຍສະເພາະແມ່ນມາດຖານນຳວິທະຍາສາດເຕັກນິກເຂົ້າໃນການຜະລິດ ແລະ ຍົກສູງລາຍຮັບໃຫ້ແກ່ປະຊາຊົນ. ດ້ວຍຈຳນວນທຶນທີ່ມີຢູ່ແລ້ວໃນປະຈຸບັນແມ່ນ 11 ຕຶ້ກວ່າດົ່ງ, ແຫຼ່ງທຶນໜູນຊ່ວຍຊາວກະສີກອນຢູ່ແຂວງດົ່ງນາຍ ໄດ້ຊ່ວຍຊາວກະສີກອນນັບພັນຄົນມີເງື່ອນໄຂທຳການຜະລິດ, ຍົກສູງລາຍຮັບ. ທ່ານ ເລຫື້ວທ້ຽນ, ຮອງປະທານສະມາຄົມຊາວກະສີກອນແຂວງດົ່ງນາຍ, ໃຫ້ຮູ້ວ່າ:
“ໃນໄລຍະຜ່ານມາ,ຍາມໃດພວກຂ້າພະເຈົ້າກໍ່ເອົາໃຈໃສ່ເຖິງເລື່ອງໃຫ້ຊາວກະສີກອນກູ້ຢືມທຶນສົມທົບກັບການຖ່າຍທອດຄວາມກ້າວໜ້າດ້ານວິທະຍາສາດເຕັກນິກໃນການກໍ່ສ້າງຊົນນະບົດໃໝ່. ກໍ່ຄືເອົາໃຈໃສ່ເປັນພິເສດເຖິງການຮ່ວມສຳພັນກັບຂະແໜງສົ່ງເສີມກະສີກຳ ແລະ ບັນດາວິສາຫະກິດອີກ. ຜ່ານບັນດາໂຄງການ, ລາຍການ, ພວກຂ້າພະເຈົ້າໄດ້ສ້າງການພົວພັນ ເພື່ອໃຫ້ຊາວກະສີກອນພາຍຫຼັງກູ້ຢືມທຶນທຳການຜະລິດແລ້ວ ຈະມີການພົວພັນແລກປ່ຽນນຳກັນເພື່ອປະຕິບັດຢ່າງມີປະສິດທິຜົນ“.
ປະຈຸບັນ, ແຂວງດົ່ງນາຍ ໄດ້ຮັບການຕີລາຄາວ່າແມ່ນໜຶ່ງໃນບັນດາທ້ອງຖີ່ນທີ່ໄດ້ຄຸ້ມຄອງ ແລະ ບໍລິຫານແຫຼ່ງທຶນໜູນຊ່ວຍຊາວກະສີກອນເປັນຢ່າງດີ. ເມື່ອມີທຶນເປີດກວ້າງການຜະລິດ, ຍົກສູງລາຍຮັບ, ຊາວກະສີກອນຕາແສງຕ່າງໆຈະມີເງື່ອນໄຂລົງທຶນໃຫ້ພື້ນຖານໂຄງລ່າງກໍ່ສ້າງຊົນນະບົດໃໝ່. ມາຮອດປະຈຸບັນ, ປະຊາຊົນໃນທົ່ວແຂວງໄດ້ປະກອບເຫື່ອແຮງ ແລະ ວັດຖຸອຸປະກອນດ້ວຍມູນຄ່ານັບສິບຕື້ດົ່ງ, ກໍ່ສ້າງທາງຄົມມະນາຄົມລະຫວ່າງຕາແສງໄດ້ 80%. ຕາມແຜນການແລ້ວ, ຮອດທ້າຍປີ 2017, ດົ່ງນາຍ ຈະມີ 34 ຕາແສງປະຕິບັດສຳເລັດໂຄງການກໍ່ສ້າງຊົນນະບົດໃໝ່, ແລະ ນຳໜ້າເຂດຕາເວັນອອກພາກໃຕ້ກ່ຽວກັບຈຳນວນຕາແສງປະຕິບັດສຳເລັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່.