(vovworld) - ແຂວງຈ່າວິງ ມີຊາວເຜົ່າຂະແມກວມກວ່າ 30% ຈຳນວນພົນລະເມືອງໃນແຂວງ, ເຊິ່ງດຳເນີນຊີວິດຕົ້ນຕໍຢູ່ເຂດຊົນນະບົດ. ຜ່ານກວ່າ 4 ປີແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່, ຈ່າວິງ ໄດ້ມີ 13/85 ຕາແສງປະຕິບັດສຳເລັດມາດຖານແຫ່ງຊາດກໍ່ສ້າງຊົນນະບົດໃໝ່. ບັນລຸໄດ້ຜົນງານດັ່ງກ່າວ ແມ່ນຍ້ອນມີວິທີເຮັດຢ່າງມີຫົວຄິດປະດິດສ້າງຂອງອຳນາດການປົກຄອງ ແລະ ໄດ້ຮັບຄວາມເຫັນດີເຫັນພ້ອມສູງຈາກປະຊາຊົນ, ໃນນັ້ນມີຊາວເຜົ່າຂະແມ.
ຊາວເຜົ່າຂະແມຢູ່ເມືອງຈ່າກູ໋ບໍລິຈາກທີ່ດິນກໍ່ສ້າງທາງຄົມມະນາຄົມ
(ພາບ: ອິນເຕີແນດ)ງອກບຽນ ແມ່ນຕາແສງຢູ່ເຂດຫ່າງໄກສອກຫຼີກຂອງເມືອງຈ່າກູ໋, ໃນນັ້ນຊາວເຜົ່າຂະແມ ກວມ 81%. ປະຊາຊົນຢູ່ທີ່ນີ້ດຳລົງຊີວິດດ້ວຍອາຊີບກະສິກຳເປັນຕົ້ນ, ປະຈຸບັນຊີວິດຍັງປະສົບກັບຄວາມຫຍຸ້ງຍາກຫຼາຍ, ອັດຕາສ່ວນຄອບຄົວທຸກຍາກຍັງສູງພໍສົມຄວນ… ແຕ່ຍ້ອນເຮັດວຽກງານໂຄສະນາ, ຂົນຂວາຍເປັນຢ່າງດີ, ດັ່ງນັ້ນປະຊາຊົນ ງອກບຽນ ຈຶ່ງສະໝັກໃຈບໍລິຈາກທີ່ດີນ, ພືດ, ຕົ້ນໄມ້ກິນໝາກ ເພື່ອກໍ່ສ້າງບັນດາກິດຈະກຳສະຫວັດດີການ. ດ້ວຍທິດນຳ “ປະຊາຊົນຮູ້, ປະຊາຊົນປຶກສາຫາລື ແລະ ປະຊາຊົນກວດກາ“, ປະຊາຊົນຈຶ່ງມີຄວາມເຫັນດີເຫັນພ້ອມສູງ ແລະ ປະກອບສ່ວນຢ່າງຕັ້ງໜ້າ. ພິເສດແມ່ນໃນການກໍ່ສ້າງລະບົບຊົນລະປະທານ ແລະ ທາງຄົມມະນາຄົມ, ໄດ້ມີ 519 ຄອບຄົວບໍລິຈາກທີ່ດິນກວ່າ 145.000 ຕາແມັດ, ດ້ວຍມູນຄ່າເກືອບ 6,5 ຕື້ດົ່ງ. ນອກນັ້ນ, ເຂົາເຈົ້າຍັງປະກອບເງິນ 500 ລ້ານກວ່າດົ່ງ ເພື່ອພ້ອມກັບລັດກໍ່ສ້າງຂົວຊົນນະບົດ 8 ແຫ່ງອີກ. ທ່ານ ກິມໄຣ, ຜູ້ນຳໜ້າໃນຂະບວນການບໍລິຈາກທີ່ດິນໃຫ້ແກ່ການກໍ່ສ້າງທາງຄົມມະນາຄົມ, ໃຫ້ຮູ້ວ່າ:
“ຍ້ອນມີການຮ່ວມແຮງຮ່ວມໃຈຂອງປະຊາຊົນ, ບັນດາເສັ້ນທາງປູຢາງ, ທາງເບຕົງທັງໝົດໃນຕາແສງຈຶ່ງໄດ້ຮັບການກໍ່ສ້າງສຳເລັດ, ອັນໄດ້ສ້າງຄວາມສະດວກໃຫ້ປະຊາຊົນໄປມາຢ່າງສະດວກສະບາຍ. ກ່ອນນີ້ບໍ່ມີທາງທີ່ເຊື່ອມຕໍ່ກັບທາງແຂວງ, ການໄປມາປະສົບກັບຄວາມຫຍຸ້ງຍາກຫຼາຍ. ປະຈຸບັນ, ເມື່ອບັນດາເສັ້ນທາງໄດ້ຮັບການກໍ່ສ້າງສຳເລັດ, ເຮັດໃຫ້ການໄປມາຂົນສົ່ງພືກ ແລະ ເຂົ້າຂອງປະຊາຊົນສະດວກສະບາຍມີ່ສຸດ“.
ສ່ວນຕາແສງ ຮ໋ຽວຕື, ເມືອງ ຕຽວເກິ່ນ ແມ່ນຕາແສງຢູ່ເຂດຫ່າງໄກສອກຫຼີກ, ມີຊາວເຜົ່າຂະແມ ກວມ 67% ຈຳນວນພົນລະເມືອງໃນຕາແສງ. ພາຍຫຼັງ 4 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ໂສມໜ້າຂອງທ້ອງຖີ່ນໄດ້ມີການປ່ຽນແປງຢ່າງເຫັນໄດ້ຊັດ, ພິເສດແມ່ນຕາໜ່າງຄົມມະນາຄົມ. ໄດ້ຮັບຜົນງານດັ່ງກ່າວແມ່ນຍ້ອນມີການປະກອບກຳລັງເຫື່ອແຮງຂອງຊາວຕາແສງ, ພິເສດແມ່ນໃນການບໍລິຈາກທີ່ດິນເພື່ອກໍ່ສ້າງທາງ. ຕົວຢ່າງຄືຄອບຄົວທ່ານ ເຊີນອອນ, ຢູ່ບ້ານ ໂອຈອມ, ເຖິງວ່າບໍ່ແມ່ນຄອບຄົວຮັ່ງມີກໍ່ຕາມ, ແຕ່ທ່ານໄດ້ບໍລິຈາກທີ່ດິນກວ່າ 300 ຕາແມັດ ເພື່ອກໍ່ສ້າງທາງໃນທ້ອງຖີ່ນ. ຕາມທ່ານ ເຊີນອອນ ແລ້ວ, ການກໍ່ສ້າງຊົນນະບົດໃໝ່ນັ້ນ ແມ່ນເພື່ອຮັບໃຊ້ໃຫ້ທຸກຄົນ, ນຳມາເຊິ່ງຜົນປະໂຫຍດໃຫ້ທັງປະຊາຄົມ, ນີ້ກໍ່ແມ່ນໂອກາດເຮັດໃຫ້ໂສມໜ້າເຂດບ້ານນາມີການປ່ຽນແປງ, ປະກອບສ່ວນຍົກສູງຊີວິດການເປັນຢູ່ໃຫ້ປະຊາຊົນ, ໃນນັ້ນມີຄອບຄົວທ່ານ.
“ໂດຍໄດ້ຮັບການປຸກລະດົມຈາກອຳນາດການປົກຄອງທ້ອງຖີ່ນ. ຂ້າພະເຈົ້າດີໃຈຫຼາຍ ແລະ ພ້ອມແລ້ວທີ່ຈະບໍລິຈາກທີ່ດິນເພື່ອກໍ່ສ້າງທາງໃນບ້ານ, ສ້າງຄວາມສະດວກໃຫ້ປະຊາຊົນໄປມາ, ພັດທະນາເສດຖະກິດ, ໃນນັ້ນມີຄອບຄົວຂ້າພະເຈົ້າ“.
ບໍ່ພຽງແຕ່ຄືແນວນັ້ນ, ທ່ານ ເຊີນອອນ ຍັງຕັ້ງໜ້າໂຄສະນາເພື່ອໃຫ້ພຸດທະສາສະນິກະຊົນຮ່ວມແຮງຮ່ວມໃຈເຂົ້າຮ່ວມການກໍ່ສ້າງກິດຈະກຳຕ່າງໆຕາມທິດນຳ ລັດ ແລະ ປະຊາຊົນພ້ອມກັນເຮັດ. ດ້ວຍບົດບາດເປັນຫົວໜ້າຄະນະຄຸ້ມຄອງວັດ ໂອຈອມ ແລະ ດ້ວຍອິດທິພົນຂອງຕົນ, ທ່ານໄດ້ຂົນຂວາຍ 33 ຄອບຄົວ ສະໝັກໃຈບໍລິຈາກທີ່ດິນ 5000 ກວ່າຕາແມັດ, ດ້ວຍມູນຄ່າກວ່າ 40 ລ້ານດົ່ງ ເພື່ອພ້ອມກັບງົບປະມານຂອງລັດ ກໍ່ສ້າງສຳເລັດທາງລະຫວ່າງບ້ານ.
ດ້ວຍຄວາມມານະພະຍາຍາມຂອງອຳນາດການປົກຄອງທຸກຂັ້ນ ແລະ ການຮ່ວມແຮງຮ່ວມໃຈຂອງປະຊາຊົນ, ຕາແສງທີ່ທຸກຍາກ ຮ໋ຽວຕື ໄດ້ປະຕິບັດສຳເລັດມາດຖານກໍ່ສ້າງທາງຄົມມະນາຄົມຊົນນະບົດຢ່າງວ່ອງໄວ. ຈາກການເສີມຂະຫຍາຍປະຊາທິປະໄຕ, ໃຊ້ກຳລັງແຮງຂອງປະຊາຊົນເພື່ອສ້າງຜົນປະໂຫຍດໃຫ້ປະຊາຊົນນັ້ນ, ຫຼາຍມາດຖານກ່ຽວກັບການກໍ່ສ້າງຊົນນະບົດໃໝ່ໄດ້ຮັບການປະຕິບັດ. ລາຍຮັບສະເລ່ຍໃສ່ຫົວຄົນຂອງປະຊາຊົນຕາແສງບັນລຸ 29 ລ້ານດົ່ງ/ປີ, ຈຳນວນຄອບຄົວທຸກຍາກກໍ່ຫຼຸດລົງ 10% ເມື່ອທຽບໃສ່ປີ 2011. ທ່ານ ເລິມວັນຫ໋ຽວ, ປະທານຄະນະກຳມະການປະຊາຊົນຕາແສງ ຮ໋ຽວຕື, ເມືອງຕຽວເກິ່ນ, ໃຫ້ຮູ້ວ່າ:
“ພາຍຫຼັງ 3 ປີແຫ່ງການປຸກລະດົມຂະບວນການກໍ່ສ້າງຊົນນະບົດໃໝ່, ປະຊາຊົນສ່ວນຫຼາຍໄດ້ເຫັນດີ, ສະໜັບສະໜູນ, ພ້ອມແລ້ວທີ່ຈະບໍລິຈາກທີ່ດິນ, ຕົ້ນໄມ້, ພືດ… ເພື່ອກໍ່ສ້າງທາງຄົມມະນາຄົມ. ປະຈຸບັນ, ຍັງມີ 2 ເສັ້ນທາງໃນບ້ານ ໂອຈອມ, ແລະ ໂອຈາວ ພວມຜັນຂະຫຍາຍການກໍ່ສ້າງ. ຄະນະພັກ, ຄະນະກຳມະການປະຊາຊົນຕາແສງ ໄດ້ສະເໜີກັບເມືອງ, ແຂວງຈັດແບ່ງທຶນເພື່ອກໍ່ສ້າງເສັ້ນທາງດັ່ງກ່າວ“.
ໂດຍມີຄວາມເຫັນດີເຫັນພ້ອມສູງ, ພ້ອມກັບການຮ່ວມແຮງຮ່ວມໃຈຂອງປະຊາຊົນ, ກໍ່ຄືການລົງທຶນຈາກສູນກາງ, ດັ່ງນັ້ນ, ເຖິງວ່າຈະແມ່ນທ້ອງຖີ່ນທຸກຍາກກວ່າໝູ່ໃນເຂດກໍ່ຕາມ, ແຕ່ມາຮອດປະຈຸບັນ, ແຂວງຈ່າວິງ ໄດ້ມີ 13/85 ຕາແສງບັນລຸໄດ້ 19/19 ມາດຖານກໍ່ສ້າງຊົນນະບົດໃໝ່ແລ້ວ. ຈ່າວິງ ໄດ້ວາງຄາດໝາຍເຖິງທ້າຍປີນີ້ຈະມີ 7 ຕາແສງຕື່ມອີກສຳເລັດບັນດາມາດຖານກໍ່ສ້າງຊົນນະບົດໃໝ່. ສະເພາະ 65 ແຂວງທີ່ຍັງເຫຼືອຈະສູ້ຊົນເພື່ອບັນລຸໃຫ້ໄດ້ແຕ່ 10 ມາດຖານຂຶ້ນໄປ, ໃນນັ້ນ 100%ຈຳນວນຕາແສງປະຕິບັດສຳເລັດມາດຖານກໍ່ສ້າງທາງຄົມມະນາຄົມ.