(vovworld) - ເຟືອກເຮົ້າ ທີ່ຂຶ້ນກັບເມືອງ ນິງເຟືອກ, ແຂວງ ນິງທ້ວນ, ແມ່ນຕາແສງທີ່ມີຊາວຊົນເຜົ່າຈຳຮ່ວມດຳລົງຊີວິດ. ໂດຍປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຊາວເຜົ່າຈຳຢູ່ທີ່ນີ້ ໄດ້ຮ່ວມແຮງຮ່ວມໃຈພ້ອມກັບອຳນາດການປົກຄອງທ້ອງຖິ່ນກໍ່ສ້າງທາງຄົມມະນາຄົມຊົນນະບົດດ້ວຍເບຕົງນັບພັນແມັດ, ກໍ່ ສ້າງທາງຖາວອນລະຫວ່າງເຂດຊຸມຊົນກັບທົ່ງນາ… ອັນໄດ້ປະກອບສ່ວນປ່ຽນໃໝ່ໂສມໜ້າຢູ່ເຂດຊົນນະບົດ, ໝູ່ບ້ານ ແລະ ພັດທະນາການຜະລິດ
.
ທ່ານປະທານປະເທດ Trương Tấn Sangໄປຢ້ຽມຢາມທົ່ງນາຂອງຕາແສງເຟືອກເຮົ້າ
(ພາບ: baotintuc.vn)
ຕາແສງເຟືອກເຮົ້າ ມີກວ່າ 3.500 ຄອບຄົວ, ດ້ວຍປະຊາກອນກວ່າ 19.200 ຄົນ, ໃນນັ້ນຊາວເຜົ່າຈຳ ກວມເກືອບເຄິ່ງໜຶ່ງ… ກ່ອນນີ້, ບັນດາເສັ້ນທາງຕົ້ນຕໍທີ່ເຊື່ອມຕໍ່ 7 ໝູ່ບ້ານໃນຕາແສງເຄີຍເປັນຂີ້ຕົມໃນຍາມຝົນຕົກ, ແລະ ຂີ້ຝຸ່ນໃນຍາມແລ້ງ, ແຕ່ປະຈຸບັນບັນດາສາຍທາງນີ້ໄດ້ຮັບການປູຢາງທັງໝົດ. ບັນດາເສັ້ນທາງລະຫວ່າງທົ່ງນາກໍ່ໄດ້ຮັບການບຸລະນະ, ຍົກລະດັບ, ກໍ່ສ້າງແບບຖາວອນ, ອັນໄດ້ສ້າງຄວາມສະດວກໃຫ້ການຂົນສົ່ງຜະລິດຕະພັນກະເສດ. ໃນ 3 ປີຜ່ານມາ, ຈາກຈຳນວນເງິນລົງທຶນຂອງລັດ, ຕາແສງເຟືອກເຮົ້າສາມາດປູຢາງ, ແລະ ກໍ່ສ້າງທາງດ້ວຍເບຕົງລະຫວ່າງຕາແສງໄດ້ກວ່າ 17 ກມ ຕາມທິດນຳ ລັດ ແລະ ປະຊາຊົນພ້ອມກັນເຮັດ. ປະດາປະຕູໂຂງຂອງໝູ່ບ້ານກໍ່ໄດ້ຮັບການກໍ່ສ້າງຢ່າງຮຽບຮ້ອຍ, ສວຍງາມ, ສະເພາະບັນດາໝູ່ບ້ານເຜົ່າຈຳແມ່ນໄດ້ຮັບການຕິດໂລໂກທາດ ຈຳ, ທີ່ສະຫຼັກຊື່ໝູ່ບ້ານດ້ວຍຕົວໜັບສືຈຳຕື່ມອີກ. ຄຽງຂ້າງນັ້ນ, ບັນດາທາງອຳນາດການປົກຄອງກໍ່ມີຄວາມເອົາໃຈໃສ່ເຖິງບັນດາຂໍ້ກຳນົດຂອງບ້ານຈຳໃນການຈັດຕັ້ງພິທີງານສົບ, ງານດອງ, ບັນດາງານບຸນປະເພນີຂອງຊາວເຜົ່າຈຳ. ຄວາມສາມັກຄີລະຫວ່າງເຜົ່າຈຳກັບເຜົ່າກິງນັບມື້ນັບແໜ້ນແຟ້ນ, ສະຖຽນລະພາບທາງການເມືອງ, ຄວາມເປັນລະບຽບຮຽບຮ້ອຍທາງສັງຄົງໄດ້ຮັບການຮັກສາໄວ້ຢ່າງໝັ້ນຄົງ.
ນັບແຕ່ຜັນຂະຫຍາຍການກໍ່ສ້າງຊົນນະບົດໃໝ່ມາຮອດປະຈຸບັນ, ຕາແສງເຟືອກເຮົ້າລະດົມເງິນໄດ້ກວ່າ 10 ຕຶ້ດົ່ງເພື່ອປະກອບໃຫ້ແກ່ຂະບວນການ. ພໍ່ຕູ້ Ba Dinh Loi, ຊາວເຜົ່າຈຳຢູ່ໝູ່ບ້ານເຟືອກດົ່ງ, ເຖິງວ່າປີນີ້ມີ ອາຍຸ 76 ປີ ແລ້ວກໍ່ຕາມ ແຕ່ພໍ່ຕູ້ຍັງຄົງຕັ້ງຫນ້າປະກອບສ່ວນພ້ອມກັບອຳນາດການປົກຄອງກໍ່ສ້າງໝູ່ບ້ານຂອງຕົນ. ນອກຈາກປະກອບເນື້ອທີ່ດິນ 100 ຕາລາງແມັດ ແລະ ເງິນເດືອນໜຶ່ງເດືອນແລ້ວ, ພໍ່ຕູ້ຍັງລະດົມລູກຫຼານ, ຍາດຕິພີ່ນ້ອງໃນວົງຕະກຸນພ້ອມກັນເຂົ້າຮ່ວມອີກດ້ວຍ. ໃນເບື້ອງຕົ້ນ, ຍ້ອນບໍ່ທັນເຂົ້າໃຈໝົດຄວາມໝາຍຂອງຂະບວນການທົ່ວປວງຊົນກໍ່ສ້າງຊົນນະບົດໃໝ່, ດັ່ງນັ້ນເຂົາເຈົ້າຈຶ່ງເມີນເສີຍຢູ່. ແຕ່ເມື່ອໄດ້ຮັບການໂຄສະນາ, ຂົນຂວາຍ, ແລະ ໄດ້ຮັບຄວາມເອົາໃຈໃສ່ສະໜັບສະໜູນຈາກຜູ້ທີ່ມີອິດທິພົນຊື່ສຽງໃນໝູ່ບ້ານ, ໃນແຕລະວົງຕະກຸນ, ດັ່ງນັ້ນຊາວເຜົ່າຢູ່ທີ່ນີ້ຈຶ່ງມີຄວາມເຂົ້າໃຈຄວາມໝາຍຂອງຂະບວນການ ແລະ ພ້ອມກັນປະກອບສ່ວນກໍ່ສ້າງບ້ານເກີດເມືອງນອນ. ພໍ່ຕູ່ Ba Dinh Loi ເວົ້າວ່າ:
”ຂ້າພະເຈົ້າໄດ້ຮັບການກຳເນີດຈາກທົ່ງນາ ແລະ ເຕີບໃຫຍ່ຍ້ອນອາໄສເມັດເຂົ້າ, ເສັ້ນຜັກ. ຍິ່ງກວ່ານັ້ນ, ຜ່ານການຮ່ຳຮຽນ ແລະ ປະຕິບັດຕາມແບບຢ່າງຂອງລຸງໂຮ່, ເຫັນວ່າລຸງຍາມໃດກໍ່ໃກ້ສິດ, ຊ່ວຍເຫຼືອຊາວກະສີກອນ, ຂ້າພະເຈົ້າເຫັນວ່າ, ເຖິງວ່າລຸງແມ່ນຜູ້ນຳຄືແນວນັ້ນແຕ່ພັດສຸດຈິດສຸດໃຈກັບປະຊາຊົນ. ຈາກນັ້ນຂ້າພະເຈົ້າຈຶ່ງປະກອບກຳລັງທັງໝົດໃຫ້ແກ່ຂະບວນການ. ຂ້າພະເຈົ້າຕ້ອງເປັນແບບຢ່າງເພື່ອໃຫ້ທຸກຄົນປະຕິບັດຕາມ”.
ລະດູການເກັບກ່ຽວເຂົ້າຂອງຊາວເຜົ່າຈຳ
(ພາບ: baoninhthuan.com.vn)
ຄຽງຂ້າງການລົງທຶນກໍ່ສ້າງ, ຍົກລະດັບພື້ນຖານໂຄງລ່າງແລ້ວ, ໃນປີຜ່ານມາ, ຕາແສງ ເຟືອກເຮົ້າໄດ້ສົມທົບກັບກົມປົກປັກຮັກສາພືດສາຂາແຂວງປະຕິບັດທົດລອງຮູບແບບນຳໃຊ້ແນວພັນເຂົ້າທີ່ໄດ້ຮັບການຮັບຮອງ, ເພື່ອຫຼຸດຜ່ອນແນວພັນເຂົ້າ, ຝຸ່ນ, ຢາຂ້າສັດຕູພືດ, ນ້ຳ ແລະ ການຮົ່ວໄຫຼສຳເລັດຜົນ. ຜ່ານສອງລະດູການປູກເຂົ້າທົດລອງໃນເນື້ອທີ່ກວ່າ 10 ເຮັກຕາ ຢູ່ບ້ານເຈື່ອງທໍ້, ສະມັດຕະພາບປູກເຂົ້າບັນລຸໄດ້ 9 ໂຕນ/ເຮັກຕາ, ເພີ່ມຂຶ້ນເມື່ອທຽບໃສ່ກ່ອນນີ້ເກືອບ 200 ກິໂລກຼາມ/ເຮັກຕາ. ຄຸນນະພາບເມັດເຂົ້າກໍ່ດີກວ່າ, ແລະ ບໍ່ສົ່ງຜົນສະທ້ອນເຖິງສິ່ງແວດລ້ອມອີກ. ປະຈຸບັນ, ຢູ່ທີ່ນີ້ໄດ້ສ້າງຕັ້ງບັນດາໜ່ວຍສະຫະກອນເພື່ອຮັບໃຊ້ໃຫ້ແກ່ການຜະລິດ. ນອກຈາກເນື້ອທີ່ປູກເຂົ້າ 900 ເຮັກຕາແລ້ວ, ຕາແສງເຟືອກເຮົ້າ ຍັງມີເນື້ອທີ່ປູກໝາກທັນກວ່າ 100 ເຮັກຕາອີກດອ້ຍ ແຕ່ລະປີລາຍຮັບສະເລ່ຍບັນລຸ 350 ລ້ານດົ່ງ/ເຮັກຕາ. ປະຈຸບັນ, ໃນຈຳນວນ 19 ມາດຖານກ່ຽວກັບການກໍ່ສ້າງຊົນນະບົດໃໝ່, ຕາແສງເຟືອກເຮົ້າບັນລຸໄດ້ 6 ມາດຖານແລ້ວ. ນັບແຕ່ນີ້ຮອດທ້າຍປີ, ທາງທ້ອງຖິ່ນສຸມໃສ່ຍູ້ໄວການວາງແຜນກຳນົດກໍ່ສ້າງສູນກາງບໍລິຫານຕາແສງຕິດພັນກັບແຜນກຳນົດກໍ່ສ້າງຊົນນະບົດໃໝ່, ຂົນຂວາຍປະຊາຊົນລົງທຶນກໍ່ສ້າງຕະຫຼາດຂອງຕາແສງ, ພ້ອມທັງສືບຕໍ່ຈັດຕັ້ງການຮ່ວມສຳພັນໃນການຜະລິດ... ເພື່ອຮອດປີ 2015, ສູ້ຊົນບັນລຸໃຫ້ໄດ້ 15/19 ມາດຕະຖານກໍ່ສ້າງຊົນນະບົດໃໝ່. ທ່ານ Hua Van Bao, ປະທານຕາແສງ ເຟືອກເຮົ້າ, ໃຫ້ຮູ້ວ່າ:
”ໃນໄລຍະຈະມາເຖິງ, ພວກຂ້າພະເຈົ້າຈະສືບຕໍ່ຈັດຕັ້ງການຮ່ຳຮຽນໃນໝູ່ປະຊາຊົນ ແລະ ໄປໂຄສະນາໃຫ້ປະຊາຊົນຢູ່ເຂດຊຸມຊົນ ກ່ຽວກັບຂະບວນການຊົນນະບົດໃໝ່. ເພື່ອໃຫ້ເຂົາເຈົ້າມີຄວາມເຂົ້າໃຈຕື່ມອີກວ່າ ການກໍ່ສ້າງຊົນນະບົດໃໝ່ບໍ່ພຽງແຕ່ມີການປະກອບສ່ວນຂອງລັດ ຫາກຍັງມີການປະກອບສ່ວນຂອງປະຊາຊົນ, ເພື່ອເຮັດໃຫ້ຂະບວນການປະຕິບັດສຳເລັດ”.
ດ້ວຍບັນດາທ່າສະດວກທີ່ມີຢູ່ແລ້ວ, ພ້ອມກັບຄວາມມານະພະຍາຍາມຂອງຄະນະພັກ, ອຳນາດການປົກຄອງ ແລະ ການສະໜັບສະໜູນຂອງປະຊາຊົນນັ້ນ ຈະແມ່ນພື້ນຖານທີ່ໝັ້ນຄົງເພື່ອໃຫ້ຕາແສງເຟືອກເຮົ້າ, ເມືອງນິງເຟືອກ, ແຂວງນິງທ້ວນ ກາຍເປັນຕາແສງຊົນນະບົດໃໝ່ໃນອະນາຄົດໂດຍໄວ.