(vovworld) - ພາຍຫຼັງກວ່າ 2 ປີ ແຫ່ງການຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່, ມາຮອດປະຈຸບັນ, ຕາແສງ ຊວນຮຶງ, ເມືອງ ຊວນໂລກ, ແຂວງ ດົ່ງນາຍ ສາມາດບັນລຸໄດ້ 5/19 ມາດຖານແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່. ອາດເວົ້າໄດ້ວ່າ, ການກໍ່ສ້າງຊົນນະບົດໃໝ່ຢູ່ຕາແສງ ຊວນຮຶງ ໄດ້ກ້າວເຂົ້າສູ່ແນວຄິດ, ວິທີທຳມາຫາກິນຂອງປະຊາຊົນ, ພະນັກງານແຕ່ລະຄົນ, ພິເສດແມ່ນປະຊາຄົມຊາວເຜົ່າຈຳ ພາກສ່ວນໜຶ່ງຢູ່ທີ່ນີ້. ການຮ່ວມແຮງຮ່ວມໃຈຂອງຊາວທ້ອງຖີ່ນ ພ້ອມກັບອຳນາດການປົກຄອງທຸກຂັ້ນໃນການປະຕິບັດບັນດາມາດຖານກ່ຽວກັບການກໍ່ສ້າງຊົນນະບົດໃໝ່ ໄດ້ປະກອບສ່ວນປ່ຽນໃໝ່ໂສມໜ້າຂອງແຕ່ລະໝູ່ບ້ານໃນຕາແສງ ຊວນຮືງ.
(ພາບປະກອບ)
ຊາວເຜົ່າ ຈຳ, ຕາແສງ ຊວນຮຶງ ດຳລົງຊີວິດຕົ້ນຕໍ່ຢູ່ ບ້ານ 4, ດ້ວຍພົນລະເມືອງກວ່າ 2000 ຄົນ ໃນ 400 ຄອບຄົວ. ເມື່ອມາຢ້ຽມຢາມປະຊາຊົນເຜົ່າຈຳ ຢູ່ບ້ານ 4 ຕາແສງ ຊວນຮຶງ, ພວກເຮົາສາມາດເຫັນໄດ້ໂສມໜ້າໃໝ່ຢູ່ທີ່ນີ້. ກ່ອນນີ້, ໃນລະດູຝົນ, ບັນດາເສັ້ນທາງພາເຂົ້າບ້ານລ້ວນແຕ່ຖືກນ້ຳຖ້ວມ. ໃນ 9 ເດືອນຕົ້ນປີ 2012, ຕາແສງຊວນຮຶງ ໄດ້ກໍ່ສ້າງທາງຄົມມະນາຄົມຊົນນະບົດ 11 ສາຍ ດ້ວຍຄວາມຍາວທັງໝົດ 4.520 ແມັດ. ສະເພາະບ້ານ 4 ໄດ້ກໍ່ສ້າງສຳເລັດ ແລະ ເປີດນຳໃຊ້ທາງ 7 ສາຍ, ລວມຄວາມຍາວກວ່າ 2.400 ແມັດ, ດ້ວຍຍອດຈຳນວນເງິນເກືອບ 3 ຕື້ດົ່ງ, ໃນນັ້ນປະຊາຊົນປະກອບ 400 ລ້ານດົ່ງ. ທ່ານ Noru Din, ເຈົ້າບ້ານ 4, ຕາແສງຊວນຮຶງ, ເມືອງຊວນໂລກ, ແຂວງ ດົ່ງນາຍ, ເວົ້າດ້ວຍຄວາມພາກພູມໃຈວ່າ:
“ເວົ້າລວມແລ້ວປະຊາຊົນໃນບ້ານພາກພູມໃຈຫຼາຍ, ຍ້ອນມີທາງໄປມາຢ່າງສະອາດ, ສວຍງາມ, ບໍ່ຖືກນ້ຳຖ້ວມໃນຍາມຝົນຕົກອີກ, ລູກຫຼານໄປຮຽນ, ແລະ ປະຊາຊົນໄປມາຫາກິນຢ່າງສະດວກສະບາຍ”.
ພ້ອມກັບການໜູນຊ່ວຍຂອງກຳລັງກອງທັບໃນບໍລິເວັນຕາແສງ, ຄະນະຊາວໜຸ່ມ, ບັນດາອົງການຈັດຕັ້ງມະຫາຊົນຢູ່ທ້ອງຖີ່ນ, ຊາວເຜົ່າຈຳຢູ່ບ້ານ 4 ໄດ້ອອກແຮງຂຸດຄອງເໝືອງລະບາຍນ້ຳ, ກໍ່ສ້າງທາງ, ເຮັດອະນາໄມ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວດຳເນີນຊີວິດ ແລະ ການໄປມາຂອງປະຊາຊົນໃນຍາມຝົນຕົກ. ມາຮອດປະຈຸບັນ, ຊາວຈຳຢູ່ທີ່ນີ້ ໄດ້ມີລະບົບນ້ຳສະອາດຮັບໃຊ້ໃຫ້ແກ່ການດຳລົງຊີວິດຂອງປະຊາຊົນແລ້ວ. ສະເພາະປີ 2012, ອຳນາດການປົກຄອງຢູ່ທີ່ນີ້ໄດ້ລົງທຶນກໍ່ສ້າງວິດຖ່າຍໃຫ້ 70 ຄອບຄົວທີ່ທຸກຍາກ. ເອື້ອຍ Mari Yam, ຊາວຈຳໃນບ້ານ 4 ໃຫ້ຮູ້ວ່າ:
“ພວກຂ້າພະເຈົ້າດີໃຈຫຼາຍທີ່ໄດ້ຮັບຄວາມເອົາໃຈໃສ່ຊ່ວຍເຫຼືອຈາກພັກ ແລະ ລັດ, ເຊິ່ງໄດ້ລົງທຶນກໍ່ສ້າງທາງເບຕົງ, ທາງປູຢາງ, ໄຟຟ້າ, ນ້ຳສະອາດ, ວິດຖ່າຍ ໃຫ້ແກ່ປະຊາຊົນ.”
(ພາບປະກອບ)
ດ້ວຍທິດນຳທີ່ວ່າ, ລັດ ແລະ ປະຊາຊົນພ້ອມກັນເຮັດ, ພາຍໃນເວລາອັນສັ້ນໆເທົ່ານັ້ນ, ແຕ່ທາງຊົນນະບົດຫຼາຍສາຍໃນຕາແສງ ຊວງຮຶງ ໄດ້ຮັບການກໍ່ສ້າງດ້ວຍເບຕົງສຳເລັດ, ອັນໄດ້ສ້າງເງື່ອນໄຂສະດວກໃຫ້ປະຊາຊົນໃນເຂດໄປມາ, ຂົນສົ່ງສິນຄ້າ. ເຖິງຢ່າງໃດກໍ່ຕາມ, ບັນຫາທົ່ວສັງຄົມເຂົ້າຮ່ວມການກໍ່ສ້າງທາງຄົມມະນາຄົມໃນເຂດຊົນນະບົດຢູ່ທີ່ນີ້ຍັງຄົງຈຳກັດຢູ່. ທ່ານ ຫງວຽນຫວຽດຮ່ວາງ, ຮອງປະທານຄະນະກຳມະການປະຊາຊົນຕາແສງ ຊວນຮຶງ, ເມືອງ ຊວນໂລກ, ແຂວງດົ່ງນາຍ, ໃຫ້ຮູ້ວ່າ:
“ພວກເຮົາພວມສືບຕໍ່ຂົນຂວາຍປະຊາຊົນປະກອບເງິນເພື່ອກໍ່ສ້າງທາງຢູ່ເຂດຊົນນະບົດ. ສະເພາະການປະກອບແຮງງານ, ປະຊາຊົນປະຕິບັດຢ່າງຕັ້ງໜ້າ. ສ່ວນການປະກອບເງິນພັດຈຳກັດຢູ່, ຊາວເຜົ່າຢູ່ທີ່ນີ້ຍັງຫຍຸ້ງຍາກຫຼາຍ”.
ພາຍຫຼັງເກືອບ 3 ປີ ແຫ່ງການຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່, ມາຮອດປະຈຸບັນ, ຕາແສງ ຊວນຮຶງ, ເມືອງ ຊວນໂລກ, ແຂວງດົ່ງນາຍ, ສາມາດບັນລຸໄດ້ 5/19 ມາດຖານແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ນອກຈາກຄາດໝາຍຂອງໂຄງການກໍ່ສ້າງຊົນນະບົດໃໝ່, ໃນໄລຍະຜ່ານມາ, ຊາວເຜົ່າຈຳຢູ່ຕາແສງ ຊວນຮຶງ ຍັງໄດ້ຮັບຄວາມເອົາໃຈໃສ່ລົງທຶນກໍ່ສ້າງພື້ນຖານໂຄງລ່າງທີ່ຈຳເປັນ, ຕອບສະໜອງຄວາມຕ້ອງການໃນຊີວິດການເປັນຢູ່ຂອງປະຊາຊົນ. ຊ່ວຍໃຫ້ປະຊາຊົນຊາວເຜົ່າມີຊີວິດເປັນປົກກະຕິ, ຍົກສູງລາຍຮັບ. ເຖິງຢ່າງໃດກໍ່ຕາມ, ການຜະລິດຂອງປະຊາຊົນເຜົ່າຈຳຍັງຢູ່ໃນຂະໜາດນ້ອຍ, ຂາດທີ່ດິນ ແລະ ທຶນ, ການຜະລິດຍັງມີລັກສະນະກຸ້ມຕົນເອງ, ການນຳໃຊ້ວິທະຍາສາດເຂົ້າໃນການຜະລິດຍັງຈຳກັດຢູ່. ທ່ານນາງ ຫງວຽນທິກາດຕຽນ, ຮອງປະທານເມືອງ ຊວນໂລກ, ແຂວງ ດົ່ງນາຍ, ໃຫ້ຮູ້ວ່າ:
“ໃນຂົງເຂດກໍ່ສ້າງ, ພວກຂ້າພະເຈົ້າສຸມໃສ່ເຂົ້າໃນການກໍ່ສ້າງພື້ນຖານໂຄງລ່າງຄືທາງຄົມມະນາຄົມໃນເຂດຊົນນະບົດ ແລະ ຍູ້ແຮງການປະກອບສ່ວນຂອງປະຊາຊົນ. ທີສອງແມ່ນຕິດຕັ້ງສາຍໄຟຟ້າ, ນອກຈາກນຳໄຟຟ້າມາສູ່ແຕ່ລະຄອບຄົວແລ້ວ, ພວກເຮົາຍັງຜັນຂະຫຍາຍການຕິດຕັ້ງໄຟຟ້າຢູ່ບັນດາທົ່ງນາຜະລິດແບບລວມສູນອີກດ້ວຍ, ເພື່ອສ້າງເງື່ອນໄຂສະດວກ ແລະ ຫຼຸດຜ່ອນຄ່າສົ້ນເຂົ້າໃຫ້ແກ່ພໍ່ແມ່ປະຊາຊົນ. ນອກນັ້ນພວກຂ້າພະເຈົ້າຍັງສະເໜີໃຫ້ແຂວງກໍ່ສ້າງບັນດາອ່າງເກັບນ້ຳຄືອ່າງ ຢາເມີນ, ຢາລາວ ອີກ, ເພື່ອຮັບປະກັບແຫຼ່ງນ້ຳໃຫ້ແກ່ການຜະລິດໃນບໍລິເວນ”
(ພາບປະກອບ)
ປະຈຸບັນ, ຕາແສງຊວນຮຶງ ພວມສູ້ຊົນຮອດປີ 2014 ຈະກາຍເປັນຕາແສງຊົນນະບົດໃໝ່. ຫວັງວ່າ, ດ້ວຍຈິດໜຶ່ງໃຈດຽວຂອງປະຊາຊົນ, ພ້ອມກັບການຊ່ວຍເຫຼືອຂອງອຳນາດການປົກຄອງທຸກຂັ້ນ, ຊີວິດກໍ່ຄືໂສມໜ້າຢູ່ບ້ານຊົນເຜົ່າຈຳ ຕາແສງ ຊວນຮຶງ, ເມືອງ ຊວນໂລກ, ແຂວງ ດົ່ງນາຍ, ນັບມື້ນັບມີການປ່ຽນໃໝ່ ແລະ ພັດທະນາ.