(vovworld) ພາຍຫຼັງ 3 ປີ ແຫ່ງການປະຕິບັດຂໍ້ຕົກລົງ 193 ຂອງລັດຖະບານ ກ່ຽວກັບແຜນກຳນົດກໍ່ສ້າງຊົນນະບົດໃໝ່, ຈຳນວນຕາແສງສຳເລັດການອະນຸມັດຜ່ານແຜນກຳນົດຕາແສງຊົນນະບົດໃໝ່ບັນລຸເກືອບ 75%, ເພີ່ມຂຶ້ນ 50% ເມື່ອທຽບໃສ່ໄລຍະກ່ອນປີ 2010. ແຕ່ປະຈຸບັນ, ການຜັນຂະຫຍາຍແຜນກຳນົດຂອງຫຼາຍທ້ອງຖີ່ນບໍ່ທັນບັນລຸໄດ້ຄວາມຮຽກຮ້ອງຕ້ອງການ. ຍ້ອນເຫດນັ້ນ, ການກວດຄືນແຜນກຳນົດ ດ້ວຍການເຂົ້າຮ່ວມຂອງທົ່ວລະບົບການເມືອງ ແລະ ຄວາມເຫັນດີເຫັນພ້ອມຂອງປະຊາຊົນ ຈະແມ່ນມາດຕະການທີ່ແທດຈິງ ເພື່ອເຮັດໃຫ້ການຜັນຂະຫຍາຍແຜນກຳນົດກໍ່ສ້າງຊົນນະບົດໃໝ່ບັນລຸປະສິດທິຜົນສູງສຸດ.
(ພາບປະກອບ)
ຕາມຕົວເລກສະຖິຕິຂອງກະຊວງກໍ່ສ້າງແລ້ວ, ໃນຈຳນວນ 10.000 ຕາແສງຊົນນະບົດຂອງທົ່ວປະເທດນັ້ນ, ມີເກືອບ 75% ຈຳນວນຕາແສງໄດ້ສຳເລັດການອະນຸມັດຜ່ານແຜນກຳນົດກໍ່ສ້າງຊົນນະບົດໃໝ່ແລ້ວ. ທ່ານ ໂດແທງຕຸ່ງ, ຮອງຫົວໜ້າກົມສະຖາປັດຕະຍາກຳ, ວາງແຜນກຳນົດກໍ່ສ້າງ, ສັງກັດກະຊວງກໍ່ສ້າງ, ໃຫ້ຮູ້ວ່າ, ຍັງມີ 25% ຈຳນວນຕາແສງບໍ່ທັນຜັນຂະຫຍາຍການວາງແຜນກຳນົດນັ້ນ ແມ່ນຍ້ອນການປະສານສົມທົບລະຫວ່າງຫົວໜ່ວຍໃຫ້ຄຳປຶກສາກັບອຳນາດການປົກຄອງທ້ອງຖີ່ນບໍ່ທັນຄົບຊຸດ; ມີຫຼາຍທ້ອງຖີ່ນຍັງຂາດພະນັກງານວິຊາການໃນວຽກງານກວດຢັ້ງຢືນແຜນຮ່າງ. ທ່ານ ຟ້າມຮົ່ງຊິງ, ຮອງຫົວໜ້າສະຖາບັນວາງແຜນກຳນົດກໍ່ສ້າງ, ພະແນກກໍ່ສ້າງແຂວງວິງຟຸກ ໃຫ້ຮູ້ວ່າ, ຢູ່ແຂວງວິງຟຸກ, ນອກຈາກເລື່ອງຄວາມຮັບຮູ້ຂອງປະຊາຊົນໃນການວາງແຜນກຳນົດ ແລະ ການປະຕິບັດແຜນກຳນົດຍັງຈຳກັດແລ້ວ, ຄ່າຊົດເຊີຍທີ່ເກີດຂຶ້ນໃນການບຸກເບີກໜ້າພຽງ ເພື່ອກໍ່ສ້າງທາງໃນບ້ານ ກໍ່ແມ່ນສາຍເຫດທີ່ກໍ່ຄວາມຫຍຸ້ງຍາກໃຫ້ແກ່ການປະຕິບັດສຳເລັດແຜນກຳນົດ. ທ່ານ ຟ້າມຮົ່ງຊິງ ໃຫ້ຮູ້ວ່າ:
“ຕົວຢ່າງຄືຢູ່ແຂວງວວິງຟຸກ, ໂຄງການປັກຫຼັກໝາຍຂອງຕາແສງໜຶ່ງທີ່ຂຶ້ນກັບນະຄອນວິງອຽນ ຖືກວາງອອກ ແລະ ໄດ້ຮັບອະນຸມັດຜ່ານ ດ້ວຍມູນຄ່າປະມານ 3 ຕື້ດົ່ງ/ຕາແສງ. ເປັນອັນວ່າ, ວິງຟຸກ ດ້ວຍ 112 ຕາແສງ, ຄ່າປັກຫຼັກໝາຍທັງໝົດຈະແມ່ນ 336 ຕື້ດົ່ງ. ໃນຂະນະນັ້ນຄ່າລົງທຶນກໍ່ສ້າງພື້ນຖານໂຄງລ່າງເຕັກນິກ ແລະ ພື້ນຖານໂຄງລ່າງສັງຄົມພັດໜ້ອຍສຸດ, ບໍ່ເໝາະສົມກັບສະພາບຕົວຈິງ”.
(ພາບປະກອບ) ຕາມທ່ານ ດ່າມກວາງຕ໋ວນ, ຫົວໜ້າສະຖາບັນສະຖາປັດຕະຍາກຳວາງແຜນຜັງຕົວເມືອງ ແລະ ຊົນນະບົດ, ສັງກັດກະຊວງກໍ່ສ້າງແລ້ວ, ເພື່ອແກ້ໄຂແຫຼ່ງທຶນສ້າງແຜນກຳນົດຊົນນະບົດໃໝ່, ຕ້ອງເພີ່ມທະວີແຫຼ່ງທຶນຈາກບັນດາລາຍການ, ໂຄງການໃນບໍລິເວນແຂວງ, ກ່ອນອື່ນໝົດແມ່ນສຸມໃສ່ໜູນຊ່ວຍໃຫ້ບັນດາຕາແສງປະຕິບັດທົດລອງ, ເພື່ອເປັນປະຖົມປັດໃຈໃຫ້ແກ່ການຜັນຂະຫຍາຍການປະຕິບັດບັນດາມາດຖານຊົນນະບົດໃໝ່. ທ່ານ ດ່າມກວາງຕ໋ວນ ໃຫ້ຮູ້ວ່າ:
“ມີແຜນກຳນົດທີ່ເປັນພື້ນຖານ 3 ຢ່າງຄື: ແຜນກຳນົດຜະລິດ, ແຜນກຳນົດນຳໃຊ້ທີ່ດິນ ແລະ ແຜນກຳນົດກໍ່ສ້າງ. ຄວາມຈິງແລ້ວບັນດາແຜນກຳນົດດັ່ງກ່າວບໍ່ຖືກວາງອອກໃນໄລຍະເວລາດຽວກັນ, ດັ່ງນັ້ນເມື່ອຕາແສງຮັບເອົາແຜນກຳນົດທັງ 3 ນັ້ນ ມັນບໍ່ຮັບປະກັນລັກສະນະຄົບຊຸດ, ສິ່ງດັ່ງກ່າວໄດ້ກໍ່ຄວາມຫຍຸ້ງຍາກໃຫ້ແກ່ການຄຸ້ມຄອງ, ກໍ່ສ້າງ ແລະ ພັດທະນາໃນທ້ອງຖີ່ນ”.
ປະຊາຊົນຊົມແຜນກຳນົດກ່ຽວກັບການພັດທະນາຊົນນະບົດເພື່ອປະກອບຄຳເຫັນ
(ພາບອິນເຕີແນດ)
ທ່ານນາງຮອງລັດຖະມົນຕີກະຊວງກໍ່ສ້າງ ຟານທິມິລິງ ໃຫ້ຮູ້ວ່າ, ການວາງແຜນກຳນົດກໍ່ສ້າງຊົນນະບົດໃໝ່ ແມ່ນວຽກງານມີຫຼາຍຈຸດໃໝ່ ດ້ວຍລັກສະນະກຳນົດທິດ ແລະ ເປັນເອກະພາບສູງ. ຍ້ອນເຫດນັ້ນຄວນໄດ້ຮັບການປັບປຸງຜ່ານວິວັດແຫ່ງການຜັນຂະຫຍາຍຕົວຈິງຂອງແຕ່ລະເຂດ, ພາກ. ສິ່ງສຳຄັນທີ່ສຸດໃນການປະຕິບັດແຜນກຳນົດ ແມ່ນແນວຄວາມຄິດທີ່ມີລັກສະນະວິທະຍາສາດ, ມີຫຼັກຖານ, ມີວິໄສທັດໃນສັງລວມ, ແຕ່ຕ້ອງເໝາະສົມກັບບັນດາແຜນນະໂຍບາຍ, ນະໂຍບາຍຂອງພັກ, ລັດ, ຈຸດພິເສດທາງດ້ານວັດທະນະທຳ, ປະຫວັດສາດຂອງທ້ອງຖີ່ນ ແລະ ຖືກຕ້ອງກັບຈິດໃຈຂອງປະຊາຊົນ. ປະຈຸບັນ, ກະຊວງກໍ່ສ້າງພວມສົ່ງເສີມທ້ອງຖີ່ນຕ່າງໆເອົາໃຈໃສ່ກວ່າອີກເຖິງເລື່ອງສ້າງເງື່ອນໄຂໃຫ້ພະນັກງານຕາແສງເຂົ້າຮ່ວມຊຸດບຳລຸງສ້າງ, ຍົກສູງລະດັບຄວາມຮູ້ ເພື່ອໃຫ້ວຽກງານຜັນຂະຫຍາຍແຜນກຳນົດບັນລຸໄດ້ຜົນງານສູງສຸດ. ທ່ານນາງຮອງລັດຖະມົນຕີກະຊວງກໍ່ສ້າງ ຟານທິມິລິງ ໃຫ້ຮູ້ວ່າ:
“ກະຊວງກໍ່ສ້າງຈະລາຍງານກັບຄະນະຊີ້ນຳສູນກາງກ່ຽວກັບການປັບປຸງບັນດາເອກະສານດ້ານກົດໝາຍຢ່າງທັນການ. ທີສອງແມ່ນຈະມີລາຍການບຳລຸງສ້າງພະນັກງານຕາແສງ ເພື່ອຕອບສະໜອງຄວາມຮຽກຮ້ອງຕ້ອງການໃນວຽກງານຄຸ້ມຄອງການກໍ່ສ້າງຊົນນະບົດໃໝ່ ແລະ ສືບຕໍ່ພິຈາລະນາ, ປັງປຸງ 19 ມາດຖານໃຫ້ເໝາະສົມກັບແຕ່ລະທ້ອງຖີ່ນ”.
ວຽກງານວາງແຜນກຳນົດຊົນນະບົດໃໝ່ ບໍ່ພຽງແຕ່ກ່ຽວຂ້ອງເຖິງມາດຖານຕ່າງໆໃນຂະບວນການກໍ່ສ້າງຊົນນະບົດໃໝ່ເທົ່ານັ້ນ, ຫາກຍັງສົ່ງຜົນສະທ້ອນບໍ່ໜ້ອຍເຖິງການວາງແຜນກຳນົດພັດທະນາເສດຖະກິດ - ສັງຄົມຂອງທັງເຂດ ແລະ ທົ່ວປະເທດອີກດ້ວຍ. ຍ້ອນເຫດນັ້ນ ນັບແຕ່ການວາງແຜນກຳນົດຕະຫຼອດຮອດການອະນຸມັດຜ່ານ ຄວນໄດ້ຮັບການຈັດຕັ້ງປະຕິບັດຢ່າງລະອຽດ, ມີລັກສະນະວິທະຍາສາດ ແລະ ຊັດເຈນ, ເພື່ອຮັບປະກັນໃຫ້ຂະບວນການກໍ່ສ້າງຊົນນະບົດໃໝ່ສຳເລັດຜົນ, ເຮັດໃຫ້ຊົນນະບົດຫວຽດນາມ ນັບມື້ນັບພັດທະນາ.