(vovworld) - ຕາແສງເຕິນຈ່າວ, ເມືອງເຊີນເຢືອງ, ແຂວງຕວຽນກວາງ ມີກວ່າ 1000 ຄອບຄົວ, ດ້ວຍກວ່າ 4000 ຄົນ, ລວມມີ 5 ຊົນເຜົ່າຄື: ໄຕ, ນຸ່ງ, ຢ້າວ, ກາວລານ, ກິງ ທີ່ດຳລົງຊີວິດຮ່ວມກັນ. ໂດຍປະຕິບັດໂຄງການຈຸດໝາຍແຫ່ງຊາດວ່າດ້ວຍການກໍ່ສ້າງຊົນນະບົດໃໝ່, ໃນໄລຍະຜ່ານມາ, ຄະນະພັກ, ອຳນາດການປົກຄອງຕາແສງເຕິນຈ່າວໄດ້ຍູ້ແຮງວຽກງານໂຄສະນາ, ຍົກສູງຄວາມຮູ້ ແລະ ສ້າງຄວາມເຫັນດີເຫັນພ້ອມສູງໃນໝູ່ປະຊາຊົນ ເພື່ອແນໃສ່ປະຕິບັດສຳເລັດໂຄງການກໍ່ສ້າງຊົນນະບົດໃໝ່ຢູ່ຕາແສງ.
ຕາແສງເຕິນຈ່າວໃນປະຈຸບັນ
ກ້າວເຂົ້າສູ່ໄລຍະກໍ່ສ້າງຊົນນະບົດໃໝ່, ຕາມທິດນຳ “ລັດ ແລະ ປະຊາຊົນພ້ອມກັນເຮັດ“, ຕາແສງເຕິນຈ່າວ, ເມືອງເຊີນເຢືອງ, ແຂວງຕວຽນກວາງໄດ້ກໍ່ສ້າງທາງເບຕົງຊົນນະບົດໄດ້ 21 ກມ, ດ້ວຍມູນຄ່າທັງໝົດກວ່າ 10 ຕຶ້ດົ່ງ. ນີ້ແມ່ນໜຶ່ງໃນບັນດາຈຸດທີ່ພົ້ນເດັ່ນໃນຂະບວນການກໍ່ສ້າງຊົນນະບົດໃໝ່ຢູ່ເຕິນຈ່າວ, ຜ່ານນັ້ນສ້າງທ່າແຮງເພື່ອພັດທະນາເສດຖະກິດ, ສັງຄົມ, ປ່ຽນໃໝ່ສົມໜ້າຊົນນະບົດ. ປະສິດທິຜົນໃນເບື້ອງຕົ້ນຂອງການຜັນຂະຫຍາຍໂຄງການກໍ່ສ້າງຊົນນະບົດໃໝ່ໄດ້ສ້າງຄວາມເຫັນດີເຫັນພ້ອມ, ແລະ ການສະໜັບສະໜູນສູງໃນໝູ່ປະຊາຊົນຕາແສງ. ທ່ານຮ່ວາງວັນຮຸ່ງ, ຊາວຕາແສງເຕິນຈ່າວ, ໃຫ້ຮູ້ວ່າ:
“ເມື່ອບໍ່ທັນມີທາງຄົມມະນາຄົມຊົນນະບົດ, ການໄປມາຂອງພວກຂ້າພະເຈົ້າຍາກຫຼາຍ, ຍາມຝົນຕົກທາງເປັນຂີ້ຕົມ, ຍາມຮ້ອນຂີ້ຝຸ່ນຫຼາຍ. ນັບແຕ່ໄດ້ຮັບການໜູນຊ່ວຍຈາກພັກ, ລັດ ແລະ ປະຊາຊົນໃນບ້ານ, ພວກຂ້າພະເຈົ້າໄດ້ມີທາງຄົມະນາຄົມລະຫວ່າງບ້ານແລ້ວ. ການໄປມາກໍ່ສະດວກສະບາຍກວ່າ“.
ໂດຍມີແຫຼ່ງທຶນຈາກໂຄງການຈຸດໝາຍແຫ່ງຊາດວ່າດ້ວຍກໍ່ສ້າງຊົນນະບົດໃໝ່, ຕາແສງເຕິນຈ່າວ ໄດ້ໜູນຊ່ວຍ 9 ຮູບແບບລ້ຽງໝູ; 30 ກວ່າຮູບແບບລ້ຽງໄກ່ ແລະ ຍົກສູງຄຸນນະພາບຕົ້ນຊາ; ບຸລະນະ, ຍົກລະດັບຫໍວັດທະນະທຳຢູ່ບັນດາບ້ານ: ຕ່ຽນຟອງ, ວິ້ງເຕິນ, ລຸງບຸງ; ກໍ່ສ້າງຫໍວັດທະນະທຳບ້ານໝໍແຈ່... ຜ່ານນັ້ນສ້າງເງື່ອນໄຂສະດວກເພື່ອໃຫ້ປະຊາຊົນເຄື່ອນໄຫວ, ພົບປະແລກປ່ຽນສິລະປະວັດທະນະທຳ, ຍົກສູງຊີວິດທາງດ້ານຈິດໃຈ. ມາຮອດປະຈຸບັນ, ເຕິນຈ່າວບັນລຸໄດ້ 14/19 ມາດຖານກໍ່ສ້າງຊົນນະບົດໃໝ່, ເຊິ່ງລວມມີ: ການວາງແຜນກຳນົດ, ທາງຄົມມະນາຄົມ, ຊົນນະບົດ, ໄປສະນີ, ຮູບການຈັດຕັ້ງການຜະລິດ, ການສຶກສາ, ສາທາລະນະສຸກ, ວັດທະນະທຳ, ລະບົບການເມືອງ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ. ດັ່ງນັ້ນຊີວິດຂອງປະຊາຊົນໄດ້ຮັບການຍົກສູງຂຶ້ນ, ໂສມໜ້າຊົນນະບົດກໍ່ມີການປ່ຽນໃໝ່ຫຼາຍຢ່າງ. ທ່ານ ເຈືອງວັນເວິ່ນ, ຮອງເລຂາປະຈຳຄະນະພັກຕາແສງເຕິນຈ່າວ, ໃຫ້ຮູ້ວ່າ:
“ເລື່ອງຜັນຂະຫຍາຍການກໍ່ສ້າງຊົນນະບົດໃໝ່ໄດ້ປະກອບສ່ວນປ່ຽນໃໝ່ວິທີເຮັດວຽກຂອງພະນັກງານພັກ ແລະ ປະຊາຊົນ. ບົດຮຽນຂອງພວກຂ້າພະເຈົ້າສະແດງໃຫ້ເຫັນວ່າ, ເພື່ອຜັນຂະຫຍາຍເຖິງປະຊາຊົນທຸກຄົນ, ແມ່ນຕ້ອງໃຫ້ປະຊາຊົນເຂົ້າຮ່ວມວິວັດການກໍ່ສ້າງຊົນນະບົດໃໝ່ໂດຍກົງ. ຜ່ານນັ້ນເສີມຂະຫຍາຍກຳລັງຂອງປະຊາຊົນໃນການກໍ່ສ້າງຊົນນະບົດໃໝ່“.
ຕາແສງເຕິນຈ່າວໃນປະຈຸບັນ ເພື່ອປະຕິບັດສຳເລັດ 19 ມາດຖານກໍ່ສ້າງຊົນນະບົດໃໝ່ໃນປີ 2015, ຕາແສງເຕິນຈ່າວພວມມານະພະຍາຍາມ, ສຸມໃສ່ປະຕິບັດບັນດາມາດຖານທີ່ຍັງເຫຼືອເຊັ່ນ: ກໍ່ສ້າງຕະຫຼາດຊົນນະບົດ, ເຮືອນຢູ່, ບັນລຸອັດຕາສ່ວນຄົນງານຊົນນະບົດມີວຽກເຮັດງານທຳເປັນປົກກະຕິ ແລະ ປົກປັກຮັກສາສິ່ງແວດລ້ອມ. ທ່ານ ຫວຽນວັນຮ່ວາ, ປະທານຄະນະກຳມະການປະຊາຊົນຕາແສງເຕິນຈ່າວ, ໃຫ້ຮູ້ວ່າ: ໄລຍະຈະມາເຖິງ, ຕາແສງຈະສຸມໃສ່ຜັນຂະຫຍາຍບັນດາແຜນກຳນົດ, ແຜນຮ່າງພັດທະນາການຜະລິດ, ຍົກສູງລາຍຮັບໃຫ້ແກ່ປະຊາຊົນ:
“ພວກຂ້າພະເຈົ້າຈະສຸມໃສ່ການໂຄສະນາຂົນຂວາຍປະຊາຊົນຕັ້ງໜ້າເຂົ້າຮ່ວມການພັດທະນາກະສີກຳ ເພື່ອປະກອບສ່ວນຍົກສູງຊີວິດການເປັນຢູ່ຂອງປະຊາຊົນ, ຍົກສູງສະຕິປັບປຸງສິ່ງແວດລ້ອມ. ບັນດາຄອບຄົວເພີ່ມທະວີການບຸລະນະສ້ອມແປງເຮືອນຊານ, ສວນ, ສ້າງໂສມໜ້າໃໝ່ໃຫ້ແກ່ຕາແສງ. ເພື່ອປະຕິບັດມາດຖານຄົນງານຊົນນະບົດມີວຽກເຮັດງານທຳເປັນປົກກະຕິ, ພວກຂ້າພະເຈົ້າໄດ້“ຈັດຊຸດບຳລຸງສ້າງວິຊາຊີບໃຫ້ແກ່ຄົນງານຊົນນະບົດ, ເພື່ອຜະລິດບັນດາຜະລິດຕະພັນສິລະປະຫັດຖະກຳ, ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ປະຊາຊົນໃນຕາແສງ“.
ຕາແສງເຕິນຈ່າວ, ເມືອງເຊີນເຢືອງ, ແຂວງຕວຽນກວາງບັນລຸໄດ້ບັນດາຜົນງານທີ່ໜ້າຊື່ນຊົມບົນເສັ້ນທາງກໍ່ສ້າງຊົນນະບົດໃໝ່. ໄລຍະຈະມາເຖິງ, ຕາແສງເຕິນຈ່າວ ສືບຕໍ່ສຸມໃສ່ປະຕິບັດບັນດາໜ້າທີ່, ມາດຕະການຍູ້ແຮງການພັດທະນາເສດຖະກິດ, ຫຼຸດຜ່ອນຄວາມທຸກຍາກຢ່າງໝັ້ນຄົງ ແລະ ເພີ່ມທະວີວຽກງານຮັບປະກັນອະນາໄມສິ່ງແວດລ້ອມ ເພື່ອຮອດປີ 2015, ຕາແສງຈະປະຕິບັດສຳເລັດ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່.