(vovworld) - ບັນດາຮອຍຍີ້ມທີ່ສົດໄສ ແລະ ບັນດາວຽກງານທີ່ເຕັມໄປດ້ວຍຄວາມຮັກ, ແມ່ນຮູບພາບ, ແມ່ນຄວາມຮັບຮູ້ຂອງພໍ່ແມ່ປະຊາຊົນຢູ່ຕາແສງຊວນແລງ, ເມືອງດົ່ງຊວນ, ແຂວງຟູ໋ອຽນ ທີ່ມີຕໍ່ ນັກສຶກສາອາສາສະໝັກ ຂະແໜງສ້າງຄູ, ມະຫາວິທະຍາໄລຟູ໋ອຽນ. ເຂົາເຈົ້າແມ່ນບັນດາຜູ້ຊາຍ, ນາງສາວໄຮ້ດຽງສາທີ່ມີອາຍຸ 18, 20 ປີ, ແຕ່ເມື່ອປະຕິບັດວຽກງານຜູ້ໃດກໍ່ຫ້າວຫັນ, ສຸດຈິດສຸດໃຈ.
ພາບປະກອບ
ນັກສຶກສາກວ່າ 20 ຄົນ ທີ່ມາຕາແສງຊວນແລງໃນລະດູຮ້ອນນີ້, ມີບາງຄົນເຂົ້າຮ່ວມການເຄື່ອນໄຫວອາສາສະໝັກເທື່ອທຳອິດ, ດັ່ງນັ້ນຈຶ່ງບໍ່ຊິນເຄີຍ ແລະ ກັງວົນບໍ່ຮູ້ວ່າຈະເຮັດວຽກງານທີ່ວາງອອກໄດ້ຫຼືບໍ. ແຕ່ເມື່ອມາແຫ່ງນີ້, ຄວາມຮັກແພງ, ສະໜິດສະໜົມຂອງປະຊາຊົນ ໄດ້ຊ່ວຍພວກເພື່ອນເຊື່ອມຕົວເຂົ້າກັບການດຳລົງຊີວິດຢູ່ທີ່ນີ້ຢ່າງວ່ອງໄວ. ໂຮ່ສີຮ່າວ, ນັກສຶກສາປີທີ 4, ໃຫ້ຮູ້ວ່າ:
“ຂ້າພະເຈົ້າດີໃຈເມື່ອນຸ່ງເສື້ອສີຟ້າອາສາສະໝັກມາຊ່ວຍເຫຼືອປະຊາຊົນຢູ່ທີ່ນີ້. ວຽກງານຕົ້ນຕໍແມ່ນກໍ່ສ້າງທາງເບຕົງໃນເຂດຊົນນະບົດທີ່ມີລວງຍາວ 120 ມ. ຈັດຕັ້ງຊຸດບຳລຸງດ້ານວັດທະນະທຳໃຫ້ແກ່ພວກນ້ອງນັກຮຽນເພື່ອສຳເລັດການສຶກສາຊັ້ນປະຖົມພາກບັງຄັບ. ພິເສດແມ່ນໂຄສະນາກ່ຽວກັບເລື່ອງຮັບປະກັນອະນາໄມສິ່ງແວດລ້ອມ, ກຳຈັດຂີ້ເຫຍື່ອ...“
ແຜນການທີ່ໄດ້ວາງອອກແມ່ນຄືແນວນັ້ນ, ແຕ່ວຽກງານຕົ້ນຕໍຂອງບັນດານັກສຶກສາຂະແໜງສ້າງຄູແມ່ນບຳລຸງດ້ານວັດທະນະທຳໃຫ້ພວກນ້ອງຢູ່ຕາແສງຊວນແລງແຕ່ຊັ້ນອະນຸບານເຖິງໝົດຊັ້ນປະຖົມ. ຈິ້ງທິເຟືອງລວານ, ນັກສຶກສາປີທີ 4, ໃຫ້ຮູ້ວ່າ:
“ມາບຳລຸງດ້ານວັດທະນະທຳໃຫ້ພວກນ້ອງຢູ່ທີ່ນີ້ຈຶ່ງຮູ້ໄດ້ວ່າ, ມີບາງຄົນມັກໄປຮຽນແຕ່ບໍ່ມີໃຜເຝົ້າເຮືອນ, ບໍ່ມີໃຜໄປລ້ຽງງົວ. ບໍ່ແມ່ນວ່າພວກນ້ອງຮຽນບໍ່ໄດ້, ຫາກຍ້ອນຄາວຽກຄອບຄົວຈຶ່ງບໍ່ໄດ້ໄປຮຽນ. ຜ່ານການເຄື່ອນໄຫວອາສາສະໝັກນີ້, ພວກຂ້າພະເຈົ້າໄດ້ຊ່ວຍພວກນ້ອງມີກຳລັງໜູນເພື່ອສູ້ຊົນ. ພວກນ້ອງດີໃຈຫຼາຍ ແລະ ໄປຮຽນຢ່າງດຸໝັ່ນ. ພວກນ້ອງຍັງພາຄະນະນັກສຶກສາໄປຢ້ຽມຢາມ, ຊອກຮູ້ກ່ຽວກັບການດຳລົງຊີວິດຢູ່ທີ່ນີ້, ອັນໄດ້ຊ່ວຍພວກຂ້າພະເຈົ້າມີຄວາມຮູ້, ແລະ ມີປະສົບການ ເພື່ອສາມາດຮັບໃຊ້ສັງຄົມໃນຕໍ່ໜ້າເປັນຢ່າງດີ“.
ພາບປະກອບ
ແຕ່ລະມື້, ພວກເພື່ອນນັກສຶກສາຂຶ້ນຫ້ອງ 2 ຄາບ, ຕອນເຊົ້າ ແລະ ຕອນບ່າຍ. ຕອນຄຳ່ແມ່ນຈັດຕັ້ງການເຄື່ອນໄຫວສິລະປະໃຫ້ພວກນ້ອງນ້ອຍ. ໃຕ້ແສງໄຟຟ້າຕໍ່ໜ້າເຮືອນຮ້ານ, ບ່ອນດຳເນີນຊີວິດປະຊາຄົມຕາແສງຊວນແລງ, ສຽງຮ້ອງເພງຂອງເດັກນ້ອຍໃນຕາແສງ ແລະ ພວກເພື່ອນນັກສຶກສາອາສາສະໝັກໄດ້ດັງກ້ອງກັງວານຢ່າງຟົດຟື້ນມ່ວນຊື່ນ. ເຂົ້າຮ່ວມການເຄື່ອນໄຫວຄືແນວນີ້, ເພື່ອນ ເຟືອງລວານ ຮູ້ສຶກວ່າຕົນເອງເຕີບໃຫຍ່ກວ່າຫຼາຍ.
“ຕອນຄຳ່ມື້ໃດ, ພວກຂ້າພະເຈົ້າກໍ່ເຂົ້າຮ່ວມການເຄື່ອນໄຫວຕ່າງໆກັບປະຊາຊົນຢູ່ທີ່ນີ. ສ່ວນປະຊາຊົນກໍ່ມີຄວາມສະໜິດສະໜົມ ແລະ ຮັກແພງພວກຂ້າພະເຈົ້າຫຼາຍ. ພາຍຫຼັງການເຄື່ອນໄຫວອາສາສະໝັກ, ນ້ອງກໍ່ເຂົ້າໃຈ ແລະ ຮຽນໄດ້ຫຼາຍສິ່ງຫຼາຍຢ່າງກ່ຽວກັບການພົວພັນໃນສັງຄົມ, ທັກສະດຳລົງຊີວິດ... ຖ້າມີໂອກາດນ້ອງຈະຂໍໄປເຄື່ອນໄຫວອາສາສະໝັກຕື່ມອີກ “.
ສ່ວນ ຮວີ່ງແທງຈຸກ, ນັກສຶກສາປີທີ 3 ຮູ້ສືກຮັກ ແລະ ເອັນດູປະຊາຊົນ ກໍ່ຄືເດັກນ້ອຍນັກຮຽນຢູ່ທີ່ນີ້. ເມື່ອເຫັນພວກນ້ອງບໍ່ໄດ້ໄປຮຽນ, ຈຸກ ພ້ອມກັບພວກເພື່ອນນັກສຶກສາໄດ້ໄປຍັງແຕ່ລະຄອບຄົວຂົນຂວາຍເພື່ອໃຫ້ພວກນ້ອງໄປຮຽນ. ການເຄື່ອນໄຫວນີ້ໄດ້ຊ່ວຍໃຫ້ ຈຸກ ເຕີບໃຫຍ່ກວ່າຫຼາຍ.
“ບົດຮຽນທຳອິດທີ່ຂ້າພະເຈົ້າທອດຖອນມາໄດ້ນັ້ນແມ່ນຄວາມສາມາດກຸ້ມຕົນເອງ, ຄວາມສາມັກຄີ, ຄວາມອົດທົນ. ພາຍຫຼັງຮຽນຈົບມະຫາວິທະຍາໄລຂ້າພະເຈົ້າຈະກາຍເປັນຄູສອນ, ດັ່ງນັ້ນການພົບປະ, ທຳຄວາມຊິນເຄີຍ ແລະ ການເຄື່ອນໄຫວຮ່ວມກັບພວກນ້ອງໃນຄັ້ງນີ້, ໄດ້ຊ່ວຍໃຫ້ຂ້າພະເຈົ້າມີຄວາມເຊື່ອໝັ້ນຕໍ່ອາຊີບເປັນຄູຂອງຂ້າພະເຈົ້າໃນຕໍ່ໜ້າ “.
ເມື່ອມາຕາແສງ ຊວນແລງ, ພວກເພື່ອນນັກສຶກສາມະຫາວິທະຍາໄລ ຟູ໋ອຽນ ຍັງຂົນຂວາຍອຳນາດການປົກຄອງ ແລະ ປະຊາຊົນບໍລິຈາກຊັບສິນເງິນທອງເພື່ອກໍ່ສ້າງບັນດາກິດຈະກຳນ້ອຍອີກ. ເຟືອງລວານ ໃຫ້ຮູ້ວ່າ:
“ເຖິງວ່າບໍ່ມີວັດຖຸເຄື່ອງຂອງ ແຕ່ພວກຂ້າພະເຈົ້າໄດ້ນຳເອົາຈິດໃຈຂອງຕົນມາຊ່ວຍປະຊາຊົນກໍ່ສ້າງທາງເພື່ອໄປມາຢ່າງສະດວກສະບາຍ. ພວກຂ້າພະເຈົ້າຍັງຂົນຂວາຍການບໍລິຈາກເພື່ອກໍ່ສ້າງໂຮງຮຽນປະຖົມ ແລະ ທາງເບຕົງຕໍ່ໜ້າໂຮງຮຽນ ເພື່ອຮັບໃຊ້ໃຫ້ພວກນ້ອງນັກຮຽນອີກ“
ເມື່ອລາຍການເຄື່ອນໄຫວອາສາສະໝັກສິ້ນສຸດລົງ, ຜູ້ໃດກໍ່ຮູ້ສຶກວ່າຕົນເອງເຕີບໃຫຍ່ກວ່າ. ແລະ ຮັບຮູ້ໄດ້ຄວາມຮັກແພງ, ຄວາມສາມັກຄີ, ການຊ່ວຍເຫຼືອເຊິ່ງກັນ ແລະ ກັນຂອງປະຊາຊົນເພື່ອຜົນປະໂຫຍດສ່ວນລວມ. ເມື່ອກັບຄືນນະຄອນ, ກັບຄືນໂຮງຮຽນ, ບັນດານັກສຶກສາມະຫາວິທະຍາໄລຟູ໋ອຽນບໍ່ສາມາດຫຼົງລືມລະດູຮ້ອນທີ່ເຕັມໄປດ້ວຍຄວາມໝາຍນີ້ໄດ້.