(vovworld) - ກຳລັງຊາວຫນຸ່ມ ຫວຽດນາມ ໄດ້ ແລະ ພວມຕັ້ງຫນ້າເຂົ້າຮ່ວມໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃຫມ່. ໂດຍປະຕິບັດຕາມທິດນຳເຄື່ອນໄຫວ: “ຊາວຫນຸ່ມຄົນລະວຽກດີ, ຮາກຖານຊາວຫນຸ່ມມີການເຄື່ອນໄຫວແທດຈິງປະກອບສ່ວນເຂົ້າໃນການກໍ່ສ້າງຊົນນະບົດໃຫມ່” ຂອງສູນກາງຊາວຫນຸ່ມກອມມູນິດໂຮ່ຈິມີນ, ທົ່ວປະເທດໄດ້ປະກົດມີຫລາຍກິດຈະກຳຂອງຊາວຫນຸ່ມຄື: ຫັນປ່ຽນອົງປະກອບຜົນລະປູກ, ສັດລ້ຽງຢ່າງຖືກທິດ; ຫັນພື້ນຖານໂຄງລ່າງຄົມມະນາຄົມຢູ່ເຂດຊົນນະບົດເປັນທັນສະໄຫມ, ປະກອບສ່ວນປ່ຽນແປງໂສມຫນ້າຂອງເຂດຊົນນະບົດຫວຽດນາມ.
ຊາວຫນຸ່ມ ເຂົ້າຮ່ວມຂະບວນການກໍສ້າງຊົນນະບົດໃຫມ່
ພາບ: internet
|
ອ້າຍ ຮ່ວາງວັນຕວນ ຊາວຊົນເຜົ່ານຸ່ງ, ຢູ່ຄຸ້ມບ້ານເດັ່ນ, ຕາແສງ ດົ່ງລາກ, ເມືອງອຽນເທ, ແຂວງບັກຢາງ ເຄີຍເຮັດວຽກໝົດມື້ ທັງຫວ່ານອາຫານໃຫ້ປາກິນ ທັງເບິ່ງແຍງຝຸງໝູ... ເພື່ອບັນລຸໄດ້ຜົນງານຄືປະຈຸບັນ, ຄອບຄົວຂອງອ້າຍຕ້ອງເສຍເວລາເຖິງໜຶ່ງເດືອນເພື່ອຫັນທົ່ງນາທີ່ບໍ່ບັນລຸປະສິດທິຜົນຂອງຕົນໃຫ້ກາຍເປັນຫນອງລ້ຽງປາ. ອ້າຍຕວນເລົ່າສູ່ຟັງວ່າ: ພາຍຫລັງຫລາຍມື້ທີ່ຫຍຸ້ງຍາກລຳບາກ, ຄອບຄົວຂອງອ້າຍໄດ້ສ້າງເປັນຮູບແບບຟາມລ້ຽງປາ, ຄອກລ້ຽງສັດ, ສ້າງລາຍຮັບມາໄດ້ເກືອບ 100 ລ້ານດົ່ງ/ປີ.
“ນັບແຕ່ປະຕິບັດຕາມແຜນນະໂຍບາຍຂອງຕາແສງ ແມ່ນຫັນໄປສູ່ການລ້ຽງສິນໃນນ້ຳນັ້ນ, ຄອບຄົວຂອງຂ້າພະເຈົ້າໄດ້ກູ້ຢືມທຶນ ແລະ ລ້ຽງສັດຕາມການແນະນຳຂອງນັກວິສາວະກອນອາສາສະໝັກ. ມາຮອດປະຈຸບັນ, ລາຍຮັບຈາການລ້ຽງປູກສິນໃນນ້ຳບັນລຸປະສິດທິຜົນກວ່າເມື່ອທຽບໃສ່ການເຮັດນາ. ຊີວິດການເປັນຢູ່ຂອງຄອບຄົວຂ້າພະເຈົ້າກໍໄດ້ຮັບການປັບປຸງໃຫ້ດີຂຶ້ນ, ຊື້ໄດ້ໂທລະທັດ, ລົດຈັກ, ລູກເຕົ້າມີເງື່ອນໄຂເພື່ອຮ່ຳຮຽນ. ເວົ້າລວມແລ້ວ, ການກໍ່ສ້າງຊົນນະບົດໃຫມ່ໄດ້ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.”
ຮູບແບບຫັນທົ່ງນາບໍ່ບັນລຸປະສິດທິຜົນໃຫ້ເປັນຫນອງລ້ຽງປາແມ່ນເລີ່ມມາຈາກສະພາບຕົວຈິງຢູ່ຕາແສງ ດົ່ງລາກ. ເມ່ືອເຫັນວ່າ ຢູ່ທ້ອງຖິ່ນນີ້ ການເຮັດນາປະສົບກັບຄວາມຫຍຸ້ງຍາກຫລາຍ, ຊາວຫນຸ່ມອາສາສະໝັກແຂວງ ບັກຢາງ ໄດ້ສະເຫນີຕໍ່ການນຳຕາແສງຫັນປ່ຽນເນື້ອທີ່ນາດັ່ງກ່າວເປັນໜອງລ້ຽງປາ ແລະ ປູກໝາກກວ້ຍ. ມາຮອດປະຈຸບັນ, ເນື້ອທີ່ໜອງລ້ຽງປາທັງໝົດໃນຕາແສງແມ່ນເກືອບ 70 ເຮັກຕາ. ໄລ່ສະເລ່ຍແຕ່ລະເຮັກຕາ, ສ້າງລາຍຮັບ ໄດ້ 100 -120 ລ້ານດົ່ງ; ສວນໝາກກ້ວຍແຕ່ລະເຮັກຕາກໍສ້າງລາຍຮັບໄດ້ກວ່າ 100 ລ້ານດົ່ງ/ປີ. ທ່ານ ນັງເທທູຍ, ປະທານ ສະມາຄົມຊາວກະສິກອນ ຕາແສງດົ່ງລາກໃຫ້ຮູ້ວ່າ:
“ນອກຈາກຮູບແບບຫັນທົ່ງນາບໍ່ບັນລຸປະສິດທິຜົນເປັນໜອງລ້ຽງສິນໃນນ້ຳ, ປະຈຸບັນ ມີວິສາຫະກິດປູກຢາງພາລາແຫ່ງຫນຶ່ງ ພວມກໍ່ສ້າງເຂດວັດຖຸດິບຢູ່ທ້ອງຖິ່ນ. ນີ້ແມ່ນຮູບການປູກຕົ້ນໄມ້, ລ້ຽງສັດໃຫມ່, ສະນັ້ນ ພໍ່ແມ່ປະຊາຊົນດີໃຈຫລາຍ. ຮູບແບບນີ້ທັງສ້າງວຽກເຮັດງານທຳໃຫ້ແກ່ພໍ່ແມ່ປະຊາຊົນ ທັງພັດທະນາເຂດຊົນນະບົດແບບຍືນຍົງ.”
ພ້ອມກັບທ້ອງຖິ່ນຕ່າງໆໃນທົ່ວປະເທດພວມຕັ້ງຫນ້າປະຕິບັດໂຄງການສ້າງຊົນນະບົດໃຫມ່, ປີ 2011 ສູນກາງຊາວຫນຸ່ມກອມມູນິດ ໂຮ່ຈິມີນ ໄດ້ເລືອກເຟັ້ນຕາແສງ ດ້າຍແຈກ, ເມືອງ ໂບແຈກ ແຂວງ ກວ໋າງບິ່ງ ເພື່ອຜັນຂະຫຍາຍທົດລອງໂຄງການຈຸດໝາຍແຫ່ງຊາດກໍ່ສ້າງຊົນນະບົດໃຫມ່ ໂດຍສູນກາງຊາວຫນຸ່ມປຸກລະດົມ. ຊາວຫນຸ່ມໃນຕາແສງດ້າຍແຈກ ໄດ້ສ້າງຕັ້ງບັນດາຫນ່ວຍອາສາສະໝັກປົກປັກຮັກສາສິ່ງແວດລ້ອມ, ເຂົ້າຮ່ວມການກໍ່ສ້າງພື້ນຖານໂຄງລ່າງ, ຮັບປະກັນຄວາມເປັນລະບຽບຮຽບຮ້ອຍທາງຄົມມະນາຄົມ, ຍູ້ແຮງຂະບວນການຊາວຫນຸ່ມເຂົ້າຮ່ວມການພັດທະນາເສດຖະກິດ. ຈາກແຫລ່ງທຶນ ກວ່າ 2 ຕື້ດົ່ງ ໂດຍ ສູນກາງຊາວຫນຸ່ມ ແລະ ບັນດາອົງການຈັດຕັ້ງສັງຄົມຫນູນຊ່ວຍໃຫ້ນັ້ນ, ຊາວຫນຸ່ມໃນຕາແສງດ້າຍແຈກ ໄດ້ພັດທະນາການຜະລິດດຳເນີນທຸລະກິດ, ກໍ່ສ້າງເສັ້ນທາງຄົມມະນາຄົມ. ປະຈຸບັນ ຕາແສງດ້າຍແຈກ ບັນລຸ 12/19 ມາດຕະຖານກ່ຽວກັບການກໍ່ສ້າງຊົນນະບົດໃຫມ່. ທ່ານ ຫງວຽນວັນເຟືອງ, ປະທານຄະນະກຳມະການປະຊາຊົນຕາແສງ ດ້າຍແຈກ ເມືອງ ໂບແຈກ ແຂວງ ກວ໋າງບິ່ງ ໃຫ້ຮູ້ວ່າ:
“ອາດຢືນຢັນໄດ້ວ່າການເຄື່ອນໄຫວຂອງໄວຫນຸ່ມທົ່ວປະເທດໃນການຮ່ວມແຮງຮ່ວມໃຈກໍ່ສ້າງຊົນນະບົດໃຫມ່ ແມ່ນມີຄວາມໝາຍສຳຄັນພິເສດ, ປະກອບສ່ວນພ້ອມກັບທ້ອງຖີ່ນປະຕິບັດແຜນຮ່າງກໍ່ສ້າງຊົນນະບົດໃຫມ່. ການປະກອບສ່ວນຂອງໄວຫນຸ່ມໄດ້ຊ່ວຍໃຫ້ຄະນະພັກ ແລະ ປະຊາຊົນພວກຂ້າພະເຈົ້າບັນລຸໄດ້ໝາກຜົນຄືດັ່ງກ່າວ. ມາຮອດປະຈຸບັນ, ມີເສັ້ນທາງຫລາຍສາຍໄດ້ ແລະ ພວມໄດ້ຮັບການກໍ່ສ້າງສຳເລັດ, ເຮັດໃຫ້ໂສມຫນ້າຂອງຊົນນະບົດມີການປ່ຽນແປງ.”
ໄວຫນຸ່ມຢູ່ແຂວງ ກວ໋າງບິ່ງ ກໍໄດ້ປະກອບກຳລັງເຫື່ອແຮງ, ຍົກລະດັບບັນດາເສັ້ນທາງຄົມມະນາຄົມຢູ່ເຂດຊົນນະບົດ, ກໍ່ສ້າງໃຫມ່ ແລະ ສ້ອມແປງເຮືອນແຫ່ງສາຍຈິດມິດໃຈ ກໍ່ຄືຫໍວັດທະນະທຳໃນໝູ່ບ້ານ ໄດ້ເກືອບ 200 ຫລັງ, ຊາວຫນຸ່ມແຂວງ ກວ໋າງບິ່ງ ກໍ່ໄດ້ສົມທົບກັບທ້ອງຖິ່ນຕ່າງໆສົ່ງເສີມຫນູນຊ່ວຍຊາວຫນຸ່ມພັດທະນາເສດຖະກິດຄອບຄົວ; ເພີ່ມທະວີວຽກງານສອນວິຊາຊີບ, ແນະນຳອາຊີບ ແລະ ວຽກເຮັດງານທຳໃຫ້ແກ່ຊາວຫນຸ່ມ. ອ້າຍ ເຈີນກວກຕວນ ຮອງເລຂາທີຫນຶ່ງຊາວຫນຸ່ມແຂວງ ກວ໋າງບິ່ງ ໃຫ້ຮູ້ວ່າ:
“ໂດຍແມ່ນຕາແສງທີ່ເປັນແບບຢ່າງໃນການປະຕິບັດໂຄງການກໍ່ສ້າງຊົນນະບົດໃຫມ່, ສະຕິຄວາມຮັບຮູ້ຂອງໄວຫນຸ່ມຕາແສງດ້າຍແຈກ ໄດ້ຮັບການຍົກສູງຂຶ້ນບາດກ້າວຫນຶ່ງ. ຜ່ານການເຄື່ອນໄຫວຂອງຊາວຫນຸ່ມ, ປະຊາຊົນໄດ້ບໍລິຈາກເງິນເພື່ອກໍ່ສ້າງເສັ້ນທາງຄົມມະນາຄົມໃນຕາແສງເປັນທາງເປຕົງຕາມມາດຕະຖານກໍ່ສ້າງຊົນນະບົດໃຫມ່. ”
ໂດຍແມ່ນກຳລັງ ທີ່ຕັ້ງຫນ້າໃນການຮັບເອົາ, ໝູນໃຊ້ຄວາມກ້າວຫນ້າດ້ານເຕັກນິກເຂົ້າໃນການຜະລິດ, ປະກອບສ່ວນຫັນປ່ຽນອົງປະກອບເສດຖະກິດ, ຜົນລະປູກ, ສັດລ້ຽງ ແລະ ພາລະກິດຫັນປະເທດ, ຊົນນະບົດເປັນອຸດສາຫະກຳ ແລະ ທັນສະໄຫມ, ຊາວຫນຸ່ມ ຫວຽດນາມ ພວມຢືນຢັນຈະເຮັດໃຫ້ພາລະກິດກໍ່ສ້າງເຂດຊົນນະບົດໃຫມ່ປະສົບຜົນສຳເລັດ. ໃນອະນາຄົດໃກ້ໆນີ້ ໂສມຫນ້າຊົນນະບົດໃຫມ່ຂອງຫວຽດນາມ ແມ່ນມີການປະກອບກຳລັ ງເຫື່ອແຮງບໍ່ຫນ້ອຍຂອງໄວຫນຸ່ມຫວຽດນາມ