(vovworld) - ເມື່ອມາຢ້ຽມຢາມບັນດາຕາແສງຊົນນະບົດໃໝ່ຂອງແຂວງລອງອານ ໃນຊຸມມື້ຕົ້ນປີ, ຢູ່ບ່ອນໃດກໍ່ຮັບຟັງເລື່ອງລາວກ່ຽວກັບການປ່ຽນແປງໃນແຕ່ລະຄອບຄົວ, ແຕ່ລະບ້ານ. ນັ້ນແມ່ນເລື່ອງລາຍຮັບສະເລ່ຍໃສ່ຫົວຄົນຂຶ້ນເຖິງສິບລ້ານດົ່ງ/ປີ, ເລື່ອງລົດໃຫຍ່ສາມາດເຂົ້າທາງບ້ານໄດ້, ເລື່ອງບ້ານໃດກໍ່ມີຕົ້ນໄມ້ຂຽວອຸ່ມທູ່ມ ແລະ ດອກໄມ້ສົດໄສຫຼາຍປະເພດ... ການກໍ່ສ້າງຊົນນະບົດໃໝ່ໄດ້ຍົກສູງຊີວິດທາງດ້ານວັດຖຸ ແລະ ຈິດໃຈຂອງປະຊາຊົນ, ເຮັດໃຫ້ເຂົາເຈົ້າມີຄວາມຟົດຟື້ນມ່ວນຊື່ນ ແລະ ຕັ້ງໜ້າເຂົ້າໃນການກໍ່ສ້າງຊົນນະບົດໃໝ່.
ເສັ້ນທາງເຂົ້າບ້ານຢູ່ແຂວງລອງອານ
ເສັ້ນທາງພາໄປຍັງເຮືອນຂອງທ່ານ ຫງວຽນວັນອຸດ ຢູ່ບ້ານ 4, ຕາແສງຮ່ວາຟູ໋, ເມືອງເຈົາແທ່ງ, ແຂວງລອງອານ ໄດ້ຮັບການກໍ່ສ້າງສຳເລັດກ່ອນບຸນປີໃໝ່ປະຈຳຊາດ-ປີມະແມ, ເມື່ອຕາແສງຮ່ວາຟູ໋ ໄດ້ຮັບການຮັບຮອງວ່າແມ່ນຕາແສງຊົນນະບົດໃໝ່ ແລະ ໄດ້ຮັບລາງວັນ 300 ລ້ານດົ່ງ. ຕາແສງຮ່ວາຟູ໋ ໄດ້ຕົກລົງນຳໃຊ້ເງິນເຫຼົ່ານັ້ນເຂົ້າໃນການເປີດກວ້າງເສັ້ນທາງອອກ. ປະຊາຊົນຄືທ່ານ ອຸດ ຕ່າງກໍ່ພາກພູມໃຈທີ່ສຸດ. ທ່ານ ຫງວຽນວັນອຸດ ແບ່ງປັນວ່າ:
“ກ່ອນນີ້, ຍາມແດດຮ້ອນທາງເຕັມໄປດ້ວຍຂີ້ຝຸ່ນ, ຍາມຝົນຕົກທາງກໍ່ເປັນຂີ້ຕົມ. ແຕ່ປະຈຸບັນຍ້ອນກໍ່ສ້າງຊົນນະບົດໃໝ່ຈຶ່ງມີທາງເບຕົງ, ທາງປູຢາງແຕ່ຕາແສງລົງບ້ານຢ່າງກວ້າງຂວາງ, ອັນໄດ້ສ້າງຄວາມສະດວກໃຫ້ແກ່ການຂົນສົ່ງໄປມາ. ພໍ່ແມ່ປະຊາຊົນດີໃຈ ແລະ ສະໜັບສະໜູນທີ່ສຸດ. ມີບາງຄອບຄົວໄດ້ບໍລິຈາກດິນນາເພື່ອເປີດເສັ້ນທາງ, ບາງຄອບຄົວບໍລິຈາກເງິນນັບສິບລ້ານດົ່ງເພື່ອກໍ່ສ້າງທາງເບຕົງ. ຊີລິດຂອງປະຊາຊົນນັບມື້ນັບໄດ້ຮັບການປັບປຸງໃຫ້ດີຂຶ້ນ“.
ປະຈຸບັນເຖິງວ່າທາງໄດ້ສະອາດແລ້ວ, ແຕ່ປະຊາຊົນຍັງຢາກເຮັດໃຫ້ທາງສວຍງາມກວ່າອີກ. ແຕ່ລະບ້ານໄດ້ຂົນຂວາຍປະຊາຊົນຮັກສາອະນາໄມສິ່ງແວດລ້ອມແລະ ປູກຕົ້ນໄມ້, ດອກໄມ້ຢູ່ລຽບຕາມເສັ້ນທາງແຄມຄອງເໝືອງ. ວຽກງານດັ່ງກ່າວເຮັດໃຫ້ຕາແສງຍິ່ງຂຽວ, ສະອາດ ແລະ ສວຍງາມກວ່າ. ທ່ານ ບູ່ຍວັນຮ່ອນ, ປະທານຄະນະກຳມະການປະຊາຊົນຕາແສງຮ່ວາຟູ໋, ໃຫ້ຮູ້ວ່າ:
“ຜ່ານການກໍ່ສ້າງຊົນນະບົດໃໝ່ພວກຂ້າພະເຈົ້າຖອດຖອນບົດຮຽນໄດ້ວ່າ, ຕ້ອງປະຕິບັດເນື້ອໃນ “ປະຊາຊົນຮູ້, ປະຊາຊົນເຮັດ ແລະ ປະຊົນກວດກາ“ເປັນຢ່າງດີ. ເມື່ອພວກຂ້າພະເຈົ້າປະຕິບັດວຽກງານຜັນຂະຫຍາຍເປັນຢ່າງດີ, ປະຊາຊົນກໍ່ຮູ້ໄດ້ວ່າ ແຜນນະໂຍບາຍກໍ່ສ້າງຊົນນະບົດໃໝ່ແມ່ນສິດຜົນປະໂຫຍດອັນຊອບທຳຂອງເຂົາເຈົ້າ, ຮັບໃຊ້ຊີວິດທາງດ້ານວັດຖຸ ແລະ ຈິດໃຈຂອງເຂົາເຈົ້າ, ຈາກນັ້ນເຂົາເຈົ້າຈະເຂົ້າຮ່ວມວຽກງານທັງໝົດໃນການກໍ່ສ້າງຊົນນະບົດໃໝ່, ນັບແຕ່ການກໍ່ສ້າງແຜນຮ່າງ, ການຜັນຂະຫຍາຍ, ການປະຕິບັດ ແລະ ການຕິດຕາມກວດກາ“.
ສ່ວນຢູ່ຕາແສງເຢືອງຊວນໂຫ້ຍ, ຕິດກັບຕາແສງຮ່ວາຟູ໋, ປະຈຸບັນປະຊາຊົນໃນຕາແສງບໍ່ພຽງແຕ່ຮັກສາບັນດາມາດຖານຊົນນະບົດໃໝ່ທີ່ບັນລຸໄດ້ເທົ່ານັ້ນ, ຫາກຍັງມານະພະຍາຍາມຍົກສູງບັນດາມາດຖານທີ່ຍັງຕຳ່ຕື່ມອີກ, ເພາະເຂົາເຈົ້າເຂົ້າໃຈໄດ້ວ່າ: ການກໍ່ສ້າງຊົນນະບົດໃໝ່ຈະເຮັດໃຫ້ຊີວິດຂອງແຕ່ລະຄອບຄົວໄດ້ດີກວ່າ. ປະຈຸບັນລາຍຮັບສະເລ່ຍໃສ່ຫົວຄົນບັນລຸ 46 ລ້ານດົ່ງ. 100% ຈຳນວນຄອບຄົວນຳໃຊ້ນຳ້ສະອາດ ແລະ ໄຟຟ້າ, ຈຳນວນຄອບຄົວທຸກຍາກຍັງເຫຼືອພຽງ 0,6% ເທົ່ານັ້ນ... ທ່ານ ຮວີ່ນວັນໄຕ, ປະຊາຊົນຕາແສງເຢືອງຊວນໂຫ້ຍ, ໃຫ້ຮູ້ວ່າ:
“ທັງສອງພາກທາງໃນຕາແສງເຢືອງຊວນໂຫ້ຍ ລ້ວນແຕ່ປູກຕົ້ນໄມ້ຂຽວ. ແລະທາງເຂົ້າບ້ານທັງໝົດແມ່ນກໍ່ສ້າງດ້ວຍເບຕົງ. ບຸນປີໃໝ່ນີ້ລູກຫຼານໄດ້ເຕົ້າໂຮມກັນຢ່າງເບີກບານມ່ວນຊື່ນ “.
ທັງແຂວງລອງອານມີ 27 ຕາແສງບັນລຸມາດຖານຊົນນະບົດໃໝ່. ຍ້ອນຢູ່ໃນເຂດດົ່ງທາບເມື່ອຍ, ເຂດທົ່ງພຽງແມ່ນຳ້ຂອງ, ການຄົມມະນາຄົມໃນເຂດຊົນນະບົດປະສົບກັບຄວາມຫຍຸ້ງຍາກ. ດັ່ງນັ້ນ, ເມື່ອກໍ່ສ້າງຊົນນະບົດໃໝ່, ອຳນາດການປົກຄອງ ແລະ ປະຊາຊົນລອງອານ ຈຶ່ງເອົາໃຈໃສ່ເປັນພິເສດເຖິງການກໍ່ສ້າງຂົວທາງ. ເມື່ອມີທາງມີຂົວ, ການໄປມາ, ຮຳ່ຮຽນ, ພົວພັນຄ້າຂາຍຂອງປະຊາຊົນກໍ່ສະດວກສະບາຍກວ່າ, ຊີວິດຂອງປະຊາຊົນກໍ່ນັບມື້ນັບໄດ້ຮັບການຍົກສູງຂຶ້ນ.. ທ່ານ ຫງວຽນວັນຮ່ວາງ, ຫົວໜ້າພະແນກກະສີກຳ ແລະ ພັດທະນາຊົນນະບົດແຂວງລອງອານ, ໃຫ້ຮູ້ວ່າ:
“ຍ້ອນມີການພັດທະນາ, ລາຍຮັບ ແລະ ຊີວິດການເປັນຢູ່ຂອງປະຊາຊົນກໍ່ດີພໍສົມຄວນ. ປະຈຸບັນຂະບວນການກໍ່ສ້າງຊົນນະບົດໃໝ່ຂອງແຂວງມີຄວາມສະດວກກວ່າ. ປີ 2015, ພວກຂ້າພະເຈົ້າສູ້ຊົນປະຕິບັດສຳເລັດການກໍ່ສ້າງຊົນນະບົດໃໝ່ຕື່ມອີກຢູ່ 12-15 ຕາແສງ. ຕົວເລກຄາດໝາຍມະຕິກອງປະຊຸມໃຫຍ່ຄັ້ງທີ 9 ຂອງອົງຄະນະພັກແຂວງວາງອອກແມ່ນສຳເລັດການກໍ່ສ້າງຊົນນະບົດໃໝ່ໃຫ້ໄດ້ຢູ່ 36 ຕາແສງ, ແຕ່ພວກເຮົາສູ້ຊົນຈະສຳເລັດການກໍ່ສ້າງຊົນະບົດໃໝ່ ຢູ່ 39-40 ຕາແສງ “.
ໃນການຢ້ຽມຢາມຕາແສງຊົນນະບົດໃໝ່ເຕິນເລິນ, ເມືອງເກິ່ນເດືອກ, ແຂວງລອງອານ ຫວ່າງແລ້ວນີ້, ທ່ານປະທານປະເທດ ເຈືອງເຕິ໋ນຊາງ ສະແດງຄວາມພາກພູມໃຈທີ່ສຸດເມື່ອເຫັນວ່າ, ຊົນນະບົດໄດ້ມີການປ່ຽນໃໝ່, ແຕ່ຍັງຄົງຮັກສາສີສັນຂອງຕົນໄວ້ໄດ້. ທ່ານປະທານເນັ້ນໜັກເຖິງເລື່ອງຕາແສງຕ່າງໆຕ້ອງຮັກສາພື້ນຖານດ້ານວັດຖຸເພື່ອຮັບໃຊ້ຊີວິດ ແລະ ການຜະລິດຂອງປະຊາຊົນ ກໍ່ຄືສ້າງຄວາມເຫັນດີເຫັນພ້ອມໃນໝູ່ປະຊາຊົນ, ເຮັດໃຫ້ປະຊາຊົນເຂົ້າໃຈໄດ້ວ່າ, ການກໍ່ສ້າງຊົນນະບົດໃໝ່ແມ່ນເພື່ອໃຫ້ເຂົາເຈົ້າເອງ.
ລະດູບານໃໝ່ວຽນມາຢູ່ເຂດບ້ານນາໃນແຂວງລອງອານ, ດ້ວຍຄວາມເບີກບານມ່ວນຊື່ນ ແລະ ຄວາມເຊື່ອໝັ້ນຕໍ່ກິດຈະກຳກໍ່ສ້າງຊົນນະບົດໃໝ່. ບົນເສັ້ນທາງເບຕົງລະຫວ່າງບ້ານໃນເຂດບ້ານນາ, ສຽງເວົ້າ, ສຽງຫົວທີ່ເບີກບານມ່ວນຊື່ນຂອງປະຊາຊົນ, ພ້ອມກັບສຽງເຄື່ອງຈັກກະສີກຳປະເພດຕ່າງໆທີ່ກະກຽມໃຫ້ແກ່ລະດູການຜະລິດໃໝ່... ໄດ້ສະແດງໃຫ້ເຫັນການປ່ຽນແປງໃນຊີວິດຂອງປະຊາຊົນຢູ່ແຫ່ງນີ້.