(vovworld) - ໄລຍະມໍ່ໆມານີ້, ອາຊີບລ້ຽງເຜິ້ງເອົານຳ້ຢູ່ບັນດາທ້ອງຖິ່ນຂອງ ຫວຽດນາມ ນັບມື້ນັບພັດທະນາ, ພິເສດແມ່ນຢູ່ບັນດາແຂວງທົ່ງພຽງແມ່ນຳ້ຂອງທາງພາກໃຕ້ ຫວຽດນາມ. ແຕ່ລະປີ, ລາຍຮັບຈາກການສົ່ງອອກນຳ້ເຜິ້ງຂອງ ຫວຽດນາມ ຂຶ້ນເຖິງສອງສາມຮ້ອຍລ້ານ USD. ເຜິ້ງ ໄດ້ຮັບການເລືອກເຟັ້ນເປັນສັດລ້ຽງ ທີ່ເໝາະສົມທີ່ສຸດກັບເຂດທົ່ງພຽງແມ່ນຳ້ຂອງທາງພາກໃຕ້ຫວຽດນາມ. ບົດຂຽນ “ລ້ຽງເຜິ້ງສ້າງຄວາມຮັ່ງມີ ແລະ ຮັບມືກັບການປ່ຽນແປງຂອງດິນຟ້າອາກາດ” ຂອງແທງຕູ່ງ, ນັກຂ່າວ VOV.
ພາບປະກອບ |
ດ້ວຍການຮັບຮອງເຄື່ອງໝາຍການຄ້າລວມໝູ່, ມີອິດທິພົນຊື່ສຽງ, ເຄື່ອງໝາຍການຄ້ານຳ້ເຜິ້ງ ອູມີງຫ້າ, ແຂວງ ກາເມົາ ນັບມື້ນັບຂະຫຍາຍຢູ່ຕະຫຼາດພາຍໃນປະເທດ ແລະ ສົ່ງອອກ. ແຕ່ລະປີ, ຢູ່ປ່າຄາມ ອູມີງຫ້າ ມີຄອບຄົວທີ່ເຮັດອາຊີບລ້ຽງເຜິ້ງເອົານໍ້ານັບພັນຄອບຄົວ. ແຕ່ລະຄອບຄົວສາມາດລ້ຽງເຜິ້ງນັບຮ້ອຍຮັງ, ບັນດາຜູ້ເຮັດອາຊີບນີ້ມີລາຍຮັບສູງພໍສົມຄວນ. ທ່ານ ເຈີ່ນວັນຍີ່, ເມືອງ ອູມີງ, ແຂວງ ກາເມົາ, ໃຫ້ຮູ້ວ່າ:
“ຂ້າພະເຈົ້າເຮັດອາຊີບລ້ຽງເຜິ້ງມາເປັນເວລາ 39 ປີແລ້ວ. ນີ້ແມ່ນອາຊີບຕົ້ນຕໍຂອງຊາວກະສິກອນຢູ່ເຂດອູມີງຫ້າ. ຮັງເຜິ້ງ ໄດ້ປະມານ 15 ຫາ 20 ວັນ ກໍ່ ສາມາດ ເອົານໍ້າໄດ້ແລ້ວ ແລະ ບາງເທື່ອໄວທີ່ສຸດກໍ່ແມ່ນ 12 ວັນ. ”
ການສົ່ງອອກນໍ້າເຜິ້ງ, ຂີ້ເຜິ້ງຂອງຫວຽດນາມໄດ້ຮັບການຄາດຄະເນວ່າ ມີແງ່ຫວັງຫຼາຍພໍສົມຄວນ ເມື່ອຄວາມຕ້ອງການຂອງຕະຫຼາດໂລກເພີ່ມຂຶ້ນສູງ ແລະ ຢູ່ຕໍ່ໜ້າການເຊື່ອມໂຍງເຂົ້າກັບສາກົນ. ພິເສດເມື່ອສັນຍາຄູ່ຮ່ວມມືຂ້າມປາຊີຝິກ ( TPP ) ໄດ້ຮັບການລົງນາມ, ກາລະໂອກາດຂອງການສົ່ງອອກຜະລິດຕະພັນກະເສດຫວຽດນາມໄດ້ເພີ່ມຂຶ້ນຕື່ມ, ໃນນັ້ນມີປະເພດສິນຄ້ານໍ້າເຜິ້ງ. ທ່ານ ຟ້າມວັນດົງ ຫົວໜ້າກົມສັດຕະວະແພດ, ກະຊວງກະສິກຳ ແລະ ພັດທະນາຊົນນະບົດ ໃຫ້ຮູ້ວ່າ: “ມີບາງປີ ຫວຽດນາມໄດ້ສົ່ງອອກນໍ້າເຜິ້ງເຖິງ 50 ພັນໂຕນຄືປີ 2014. ສ່ວນປີ 2015 ຫວຽດນາມສົ່ງອອກກວ່າ 40 ພັນໂຕນ. ຕະຫຼາດສົ່ງອອກແມ່ນສະຫະພາບເອີລົບ, ທະວີບອາເມລິກາ ແລະ ຫຼາຍປະເທດອື່ນອີກ”
ການລ້ຽງເຜິ້ງຂອງປະຊາຊົນເຂດທົ່ງພຽງແມ່ນ້ຳຂອງ
|
ບັນດາຜະລິດຕະພັນຈາກເຜິ້ງຄື: ນໍ້າເຜິ້ງ, ຂີ້ເຜິ້ງມີຄຸນຄ່າເປັນຢາປົວພະບາດ ແລະ ມີມູນຄ່າດ້ານເສດຖະກິດສູງ. ການຂຸດຄົ້ນທ່າແຮງຈາກທຳມະຊາດ, ສົມທົບກັບປະສົບການຂອງປະຊາຊົນ ແລະ ກັບວິທະຍາສາດເຕັກນິກທີ່ທັນສະໄໝ, ຊາວກະສິກອນຫຼາຍຄອບຄົວໄດ້ບືນຕົວຂຶ້ນສ້າງຄວາມຮັ່ງມີດ້ວຍຮູບການລ້ຽງເຜິ້ງເອົານຳ້ ສົມທົບກັບການປູກຕົ້ນໄມ້ປະດັບ. ຕາມກະຊວງກະສິກຳ ແລະ ພັດທະນາຊົນນະບົດແລ້ວ, ປະຈຸບັນ, ຄາດວ່າ ຫວຽດນາມ ມີຮັງເຜິ້ງກ່ວາ 1,5 ລ້ານຮັງ. ໃນນັ້ນ, ເຂດທົ່ງພຽງແມ່ນຳ້ຂອງທາງພາກໃຕ້ ຫວຽດນາມ ມີຮັງເຜິ້ງເກືອບ 120 ພັນຮັງ, ຜະລິດຕະພັນນຳ້ເຜິ້ງບັນລຸກ່ວາ 240 ໂຕນ/ປີ. ພາຍຫຼັງເກີດໄພແຫ້ງແລ້ງຫວ່າງມໍ່ໆມານີ້ຢູ່ເຂດທົ່ງພຽງແມ່ນ້ຳຂອງ, ທີ່ “ກອງປະຊຸມພັດທະນາການລ້ຽງສັດໃນເງື່ອນໄຂນຳ້ທະເລຊຶມເຂົ້າ, ເກີດໄພແຫ້ງແລ້ງ”, ພ້ອມກັບພັນສັດລ້ຽງອື່ນ, ເຜິ້ງໄດ້ຮັບການເລືອກເຝັ້ນວ່າ ແມ່ນສັດລ້ຽງທີ່ເໝາະສົມໃຫ້ແກ່ຊາວກະສິກອນ, ຍ້ອນວ່າມີລັກສະນະເໝາະສົມກັບອາກາດແດດຮ້ອນ, ແຫ້ງແລ້ງ, ໃຊ້ນຳ້ຈືດໜ້ອຍ. ຕາມທ່ານ ຫງວຽນວັນແຈງ, ຮອງຫົວໜ້າພະແນກກະສິກຳ ແລະ ພັດທະນາຊົນນນະບົດແຂວງ ກາເມົາ ແລ້ວ, ອາຊີບລ້ຽງເຜິ້ງ ໄດ້ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ຊາວກະສິກອນ:
“ສຳລັບເຜິ້ງຢູ່ປ່າ ອູມີງ ເຊິ່ງແມ່ນປ່າທຳມະຊາດ, ພຽງແຕ່ເບິ່ງແຍງດູແລ, ຮັກສາຮັງຢ່າງລະມັດລະວັງແມ່ນເອົານຳ້ເຜິ້ງໄດ້ຢ່າງແນ່ນອນ. ນີ້ແມ່ນທ່າແຮງໃນເງື່ອນໄຂທີ່ເກີດໄພແຫ້ງແລ້ງຢູ່ ກາເມົາ. ໃນຊຸມປີຜ່ານມາ, ຜ່ານການສະຫລຸບ ມີຮັງເຜິ້ງປະມານ 100.000 ຮັງ, ແຕ່ລະຮັງເກັບນຳ້ເຜິ້ງໄດ້ແຕ່ 4 – 6 ລິດ. ນີ້ແມ່ນແຫຼ່ງລາຍຮັບໃຫຍ່ພໍສົມຄວນ. ດ້ວຍລາຄາສະເລ່ຍແມ່ນ 300.000 ດົງ/ລິດ ສ້າງແຫຼ່ງລາຍຮັບໃຫຍ່ໃຫ້ປະຊາຊົນທີ່ດຳລົງຊີວິດຢູ່ເຂດໃນປ່າອູມິງຫ້າ.”
ປະຈຸບັນຫວຽດນາມ ນອນໃນຈຳນວນ 10 ປະເທດສົ່ງອອກນໍ້າເຜິ້ງແຖວໜ້າຂອງໂລກ. ພິເສດ, ຫວຽດນາມຖືກຈັດອັນດັບ 1 ກ່ຽວກັບປະລິມານນໍ້າເຜິ້ງສົ່ງອອກ ເຂົ້າຕະຫຼາດອາເມລິກາ.
ເລື່ອງເຜິ້ງໄດ້ຮັບການເລືອກເຝັ້ນເປັນໜຶ່ງໃນຈຳນວນສັດລ້ຽງທີ່ເໝາະສົມໃນເງື່ອນໄຂອາກາດແຫ້ງແລ້ງ, ນໍ້າເຄັມຊຶມເຂົ້າ ແມ່ນທິດທາງທີ່ຖືກຕ້ອງຂອງບາງທ້ອງຖິ່ນໃນເຂດທົ່ງພຽງແມ່ນໍ້າຂອງທາງພາກໃຕ້ຫວຽດນາມ. ເພາະວ່ານີ້ແມ່ນອາຊີບໜຶ່ງທີ່ເໝາະສົມກັບເງື່ອນໄຂເຂດພູດອຍ, ຕ້ອງການເນື້ອທີ່ຫຼາຍ, ເງິນລົງທຶນໃນເບື້ອງຕົ້ນກໍ່ບໍ່ຫຼາຍ ແລະ ຮັບປະກັນສິ່ງແວດລ້ອມແຫ່ງການດຳລົງຊີວິດຢູ່ອ້ອມຂ້າງ.