ນາຂັ້ນໄດຂອງຊົນເຜົ່າມົ້ງ, ຢູ່ໝູ່ກັງຈ໋າຍ, ແຂວງ ອຽນບ໋່າຍ ໄດ້ສ້າງຄວາມງາມມະຫັດສະຈັນທາມກາງທັດສະນີຍະພາບທຳມະຊາດທີ່ໃຫຍ່ໂຕມະໂຫຖານ. ກ່ອນນີ້, ຍ້ອນ ການປູກຝັງທີ່ຫຼ້າຫຼັງ, ພໍ່ແມ່ປະຊາຊົນບໍ່ທັນເສີມຂະຫຍາຍທ່າແຮງຂອງນາຂັ້ນໄດໄດ້ເທື່ອ, ດັ່ງນັ້ນປະສິດທິຜົນດ້ານເສດຖະກິດບໍ່ທັນສູງປານໃດ. ໃນຊຸມປີມໍ່ໆມານີ້, ດ້ວຍການຊີ້ນຳຂອງອຳນາດການປົກຄອງທ້ອງຖິ່ນ, ການເຂົ້າຮ່ວມຂອງຖັນແຖວພະນັກງານກະສິກຳໃນວຽກງານກະເສດສູມ, ເພີ່ມລະດູການຜະລິດໃຫ້ນາຂັ້ນໄດ, ຍ້ອນເຫດນັ້ນ, ຊີວິດການເປັນຢູ່ຂອງປະຊາຊົນເຂດພູສູງຈຶ່ງມີການຫັນປ່ຽນຫຼາຍຢ່າງ. ບົດຂຽນຂອງນັກຂ່າວ ເທື່ອຊວນ.
ພາບປະກອບ
ຄອບຄົວທ່ານ ຄາງຊົວເຮີ່, ຢູ່ບ້ານ ຮ໋າງເຕົາເຢ, ຕາແສງ ເຈ໋ກູຍາ, ເມືອງ ໝູ່ກັງຈ໋າຍ ມີເນື້ອທີ່ນາຂັ້ນໄດກ່ວາ 1.000 ຕາແມັດ. ກ່ອນນີ້, ຍ້ອນຜະລິດພຽງລະດູການດຽວເທົ່ານັ້ນ, ຊີວິດການເປັນຢູ່ຂອງເຂົາເຈົ້າຈຶ່ງປະສົບກັບຄວາມຫຍຸ້ງຍາກຫຼາຍ. ນັບແຕ່ມື້ໄດ້ຮັບການຂົນຂວາຍ, ແນະນຳກ່ຽວກັບວິທີການເຮັດກະເສດສຸມ, ເພີ່ມລະດູການປູກຝັງໃນເນື້ອທີ່ນາຂັ້ນໄດ, ທ່ານ ເຮີ່ ສາມາດປູກເຂົ້າ 2 ລະດູການໃນເນື້ອທີ່ນາຂັ້ນໄດໄດ້ກ່ວາ 1.000 ຕາແມັດ ແລະ ລົງທຶນຊື້ຝຸ່ນ, ຢາຂ້າສັດຕູພືດ, ດັ່ງນັ້ນຊີວິດການເປັນຢູ່ຂອງຄອບຄົວທ່ານໄດ້ຫລຸດຜ່ອນຄວາມຫຍຸ້ງຍາກກ່ວາເກົ່າ. ທ່ານ ຄາງຊົວເຮີ່, ໃຫ້ຮູ້ວ່າ:
“ກ່ອນນີ້, ນາຂັ້ນໄດພຽງແຕ່ປູກໃນລະດູການດຽວເທົ່ານັ້ນ, ເຂົ້າສານບໍ່ພໍກິນ. ປະຈຸບັນ, ປູກເປັນ 2 ລະດູການເຂົ້າສານກໍ່ພໍກິນແລ້ວ”
ເຈ໋ກູຍາ ແມ່ນໜຶ່ງໃນຈຳນວນ 3 ຕາແສງທີ່ມີນາຂັ້ນໄດງາມທີ່ສຸດຢູ່ເມືອງ ໝູ່ກັງຈ໋າຍ. ໃນທົ່ວຕາແສງມີເກືອບ 540 ຄອບຄົວ, 100% ແມ່ນຊາວເຜົ່າມົ້ງ. ກ່ອນນີ້, ຍ້ອນຄວາມລື້ງເຄີຍປູກເຂົ້າພຽງລະດູການດຽວ/ປີ, ດັ່ງນັ້ນອັດຕາຄອບຄົວທຸກຍາກຍັງສູງຢູ່. ແຕ່ປີ 2010, ຕາແສງມີບັນດາເນື້ອທີ່ນາຂັ້ນໄດເລີ່ມປູກເຂົ້າເປັນ 2 ລະດູການໃນປີ ແລະ ມາຮອດປະຈຸບັນ, ເນື້ອທີນາຂັ້ນໄດກ່ວາ 80% ແມ່ນໄດ້ປູກເຂົ້າ 2 ລະດູໃນປີແລ້ວ, ນອກຈາກນັ້ນ, ຍັງມີບາງເນື້ອທີ່ປູກສາລີ ແລະ ພືດປະເພດຕ່າງໆອີກ. ດັ່ງນັ້ນ, ລາຍຮັບຂອງປະຊາຊົນກໍ່ຄ່ອຍໆເພີ່ມຂຶ້ນໃນແຕ່ລະປີ, ຊີວິດທາງດ້ານວັດຖຸ ແລະ ຈິດໃຈຂອງພໍ່ແມ່ປະຊາຊົນໄດ້ຮັບການປ່ຽນແປງພໍສົມຄວນ. ທ່ານ ເຮີ່ອາຍ່າ, ຮອງປະທານຄະນະກຳມະການປະຊາຊົນ ຕາແສງ ເຈ໋ກູຍາ, ຕີລາຄາວ່າ:
“ກ່ອນນີ້, ພໍ່ແມ່ປະຊາຊົນຢູ່ທີ່ນີ້ປະສົບກັບຄວາມຫຍຸ້ງຍາກຫຼາຍ. ແຕ່ເຖິງຢ່າງໃດກໍ່ຕາມ, ຍ້ອນຜັນຂະຫຍາຍການປູກ 2 ລະດູການ ແລະ ພິເສດແມ່ນປູກເຂົ້າແນວພັນປະສົມ, ປະຈຸບັດອັດຕາຄອບຄົວທີ່ທຸກຍາກອຶດຫິວກໍ່ຫລຸດລົງ ແລະ ທັນຍາຫານກໍ່ຮັບປະກັນກ່ວາເມື່ອທຽບໃສ່ຊຸມປີກ່ອນໆ.”
ພາບປະກອບ
ເພື່ອໃຫ້ພໍ່ແມ່ປະຊາຊົນຊາວເຜົ່າມົ້ງ ຢູ່ເຂດພູສູງປ່ຽນແປງຄວາມຮັບຮູ້, ຫັນຈາກການປູກລະດູການດຽວ ເປັນ 2 ລະດູການຄືໃນປະຈຸບັນ, ອຳນາດການປົກຄອງ ແລະ ຂະແໜງກະສິກຳເມືອງ ໝູ່ກັງຈ໋າຍ ໄດ້ຜັນຂະຫຍາຍຫຼາຍມາດຕະການຢ່າງຄົບຊຸດເພື່ອຊ່ວຍໃຫ້ພໍ່ແມ່ປະຊາຊົນຊາວກະສິກອນເພີ່ມລະດູການປູກຝັງ, ຍົກສູງປະສິດທິຜົນດ້ານເສດຖະກິດໃນການຜະລິດ. ການນຳເມືອງໄດ້ຂົນຂວາຍ, ແນະນຳບັນດາຄອບຄົວພະນັກງານປະຕິບັດກ່ອນ, ເມື່ອເຫັນວ່າມີປະສິດທິຜົນ, ບັນດາຄອບຄົວດັ່ງກ່າວຈະຂົນຂວາຍຍາດຕິພີ່ນ້ອງ, ພໍ່ແມ່ປະຊາຊົນພ້ອມກັນປະຕິບັດຕາມ. ພະນັກງານກະສິກຳເມືອງໄດ້ແນະນຳ, ກວດກາຢ່າງເປັນປະຈຳ… ທ່ານ ຮ່ວາງວັນງວຽນ, ຮອງຫົວໜ້າຫ້ອງກະສິກຳ - ພັດທະນາຊົນນະບົດເມືອງ ໝູ່ກັງຈ໋າຍ, ໃຫ້ຮູ້ວ່າ:
“ບັນດາອົງການຄື: ໜ່ວຍສົ່ງເສີມກະສິກຳ, ໜ່ວຍປົກປ້ອງພືດ ແລະ ໜ່ວຍງານກະສິກຳ ໄດ້ສ້າງບັນດາຮູບຈຳລອງ ແລະ ແນະນຳໃຫ້ປະຊາຊົນຢ່າງລະອຽດ, ຊ້ຳບໍ່ໜຳ, ພະນັກງານຍັງລົງປະຕິບັດຕົວຈີງເພື່ອແນະນຳໃຫ້ປະຊາຊົນ. ຜ່ານ 1, 2 ປີຈຶ່ງປະຕິບັດຕາມ ແລະ ຜ່ານນັ້ນເນື້ອທີ່ດິນປູກເຂົ້າລະດູໜາວຕໍ່ລະດູບານໃໝ່ຈຶ່ງຄ່ອຍໆເພີ່ມຂຶ້ນໃນແຕ່ລະປີ.”
ປະຈຸບັນ, ເມືອງ ໝູ່ກັງຈ໋າຍ, ແຂວງ ອຽນບ໋າຍ ມີເນື້ອທີ່ນາຂັ້ນໄດ 4.300 ເຮັກຕາ, ນອນໃນບໍລິເວນຂອງ 14 ຕາແສງ, ເທດສະບານໜຶ່ງ. ໃນບັນດາໜ້າທີ່ພັດທະນາເສດຖະກິດ ສັງຄົມທີ່ໄດ້ວາງອອກໃຫ້ແຕ່ລະປີ, ເມືອງໄດ້ກຳນົດວ່າການເຮັດກະເສດສູມ, ເພີ່ມລະດູການຜະລິດໃນນາຂັ້ນໄດແມ່ນໜຶ່ງໃນບັນດາໜ້າທີ່ອັນດັບໜຶ່ງ. ພາຍຫຼັງເກືອບ 5 ປີແຫ່ງການປະຕິບັດ, ມາຮອດປະຈຸບັນ, ທົ່ວເມືອງມີເນື້ອທີຜະລິດ, ປູກເຂົ້າ 2 ລະດູ 1.300 – 1.800 ເຮັກຕາ. ສ່ວນຍັງເຫຼືອແມ່ນກ່ວາ 2.000 ເຮັກຕາ ແມ່ນບໍ່ເໝາະສົມກັບການປູກເຂົ້າ, ໄດ້ຫັນໄປການປູກພືດປະເພດອື່ນໆຄື: ສາລີ, ມັນຝຣັ່ງ, ເຂົ້າບະເລ, ຂີງ ແລະ ໃນເບື້ອງຕົ້ນໄດ້ຮັບຜົນງານທີ່ດີ.
ນາຂັ້ນໄດບໍ່ພຽງແຕ່ນຳມາເຊິ່ງກາລະໂອກາດພັດທະນາການທ່ອງທ່ຽວ, ໂຄສະນາພາບພົດໃຫ້ເມືອງ ໝູ່ກັງຈ໋າຍ ເທົ່ານັ້ນ, ຫາກຍັງຊ່ວຍໃຫ້ຊາວກະສິກອນເຂດພູສູງບື່ນຕົວຂຶ້ນ, ຫລຸດພົ້ນອອກຈາກຄວາມທຸກຍາກເທື່ອລະກ້າວ, ປັບປຸງຊີວິດການເປັນຢູ່ຍ້ອນໄດ້ປະຕິບັດການເຮັດກະເສດສຸມ, ເພີ່ມລະດູການຜະລິດຢ່າງຖືກຕ້ອງຕາມທິດທາງທີ່ໄດ້ວາງອອກ.