(vovworld) ພາຍຫຼັງ 5 ປີແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ໂສມໜ້າເຂດຊົນນະບົດເມືອງເກາະ ໂກໂຕ, ແຂວງ ກວາງນີງ ໄດ້ມີການປ່ຽນແປງພໍສົມຄວນ. ທ່ານນາຍົກລັດຖະມົນຕີ ຫາກໍ່ຮັບຮອງເມືອງບັນລຸມາດຖານຊົນນະບົດໃໝ່ ແລະ ກາຍເປັນເມືອງເກາະແຫ່ງທຳອິດຂອງທົ່ວປະເທດບັນລຸມາດຖານຊົນນະບົດໃໝ່. ນັກຂ່າວ ຟ້າມຟອງ ມີບົດຂຽນ: ເມືອງເກາະ ໂກໂຕ ບັນລຸມາດຖານຊົນນະບົດໃໝ່.
ທະເລ ໂກໂຕ (ພາບຈາກອີນເຕີເນັດ)
ກ່ອນນີ້ພຽງ 5 ປີເທົ່ານັ້ນ, ຊີວິດການເປັນຢູ່ຂອງປະຊາຊົນໃນເມືອງເກາະ ໂກໂຕ, ຂຶ້ນກັບແຂວງ ກວາງນີງ ຂາດແຄນຫຼາຍຢ່າງຄື: ຂາດໄຟຟ້າ, ຂາດນ້ຳຈືດ, ທາງຄົມມະນາຄົມໄປມາກໍ່ຫຍຸ້ງຍາກ… ໄລຍະປະຈຸບັນ, ພາບພົດເມືອງເກາະ ໂກໂຕ ໄດ້ມີການປ່ຽນແປງດ້ວຍເສັ້ນທາງປູຢາງທີ່ຮາບພຽງ, ນ້ຳສະອາດໄດ້ທົ່ວເຖິງແຕ່ລະຄອບຄົວ, ໄຟຟ້າໄດ້ທົ່ວເຖິງແຕ່ລະແຫ່ງ, ເຮືອນຕຶກຫຼາຍຊັ້ນໄດ້ຮັບການກໍ່ສ້າງເປັນຈຳນວນຫຼວງຫຼາຍດ້ວຍບັນດາການບໍລິການຮັບໃຊ້ແຂກທ່ອງທ່ຽວຢ່າງຄົບຖ້ວນ. ທ່ານ ດ່ວານດືກບົ່ງ, ອາຍຸ 76 ປີ, ຢູ່ເຂດ 1, ເທດສະບານໂກໂຕ ໃຫ້ຮູ້ວ່າ: ພໍ່ແມ່ປະຊາຊົນຢູ່ທ້ອງຖິ່ນ, ໃຜໆກໍ່ກຽມພ້ອມເຂົ້າຮ່ວມໂຄງການກໍ່ສ້າງຊົນນະບົດໃໝ່. ຜູ້ປະກອບເຫ່ືອແຮງ, ຜູ້ປະກອບເງິນຄຳດ້ວຍຄວາມປາດຖະໜາຢາກປັບປຸງໂສມໜ້າບ້ານເກີດເມືອງນອນ:
“ຂ້າພະເຈົ້າດຳລົງຊີວິດຢູ່ແຫ່ງນີ້ 40 ປີແລ້ວ, ກ່ອນນີ້, ປະຊາຊົນຍັງທຸກຍາກຫຼາຍ, ບໍ່ມີທາງປູຢາງຈັກແມັດເລີຍ. ປະຈຸບັນ, ມີໄຟຟ້າ, ເສັ້ນທາງດ້ວຍເບຕົງກໍ່ຂະຫຍາຍໄປຍັງແຕ່ລະຮ່ອມບ້ານ. ນອກຈາກນັ້ນ, ປະຈຸບັນຍັງມີໂຮງຮຽນບັນລຸມາດຕະຖານແຫ່ງຊາດອີກ. ກ່ອນນີ້, 2 ຕາແສງຈຶ່ງມີສຸກສາລາແຫ່ງໜຶ່ງ. ຍາມຖືກເຈັບໜັກຕ້ອງສົ່ງເຂົ້າປິ່ນປົ່ວຢູ່ເຂດດິນຕໍ່ແຜ່ນແມ່ນປະສົບກັບຄວາມຫຍູ້ງຍາກທີ່ສຸດ, ແຕ່ປະຈຸບັນພວກຂ້າພະເຈົ້າໄດ້ມີສູນການແພດ, ມີທ່ານໝໍ 4,5 ຄົນ, ທັງເສນາຮັກ ແລະ ການແພດປະຊາຊົນສົມທົບກັນກວດ, ປິ່ນປົວພະຍາດ. ຊີວິດການເປັນຢູ່ໃນປະຈຸບັນມີການປ່ຽນແປງຄືແນວນັ້ນແມ່ນນອກເໜືອຈາກແນວຄວາມຄິດຂອງພວກຂ້າພະເຈົ້າ.”
ນັບແຕ່ເມື່ອຜັນຂະຫຍາຍໂຄງການກໍ່ສ້າງຊົນນະບົດໃໝ່, ຍອດຈຳນວນທຶນເຊິ່ງເມືອງ ໂກໂຕ ລະດົມໄດ້ແມ່ນເກືອບ 3.000 ຕື້ດົ່ງ. ມາຮອດປະຈຸບັນ, 2/2 ຕາແສງໃນບໍລິເວນເມືອງໄດ້ປະຕິບັດສຳເລັດ 19/19 ມາດຖານ ດ້ວຍ 37/37 ຄາດໝາຍຕາມປະມວນມາດຖານແຫ່ງຊາດ ແລະ ຄະນະກຳມະການປະຊາຊົນແຂວງ ກວາງນິງ ຮັບຮູ້ວ່າແມ່ນຕາແສງບັນລຸມາດຖານຊົນນະບົດໃໝ່. ໃນນັ້ນມີບາງຄາດໝາຍ, ມາດຖານຂອງໂຄງການກໍ່ສ້າງຊົນນະບົດໃໝ່ຂອງເມືອງບັນລຸຄຸນນະພາບສູງຄື: ໂຄງປະກອບແຮງງານ ແລະ ລາຍຮັບຫັນປ່ຽນ, ການເຕີບໂຕແຮງດ້ວຍການປະກອບສ່ວນຂອງການບໍລິການທ່ອງທ່ຽວເພີ່ມຂຶ້ນ 20%/ປີ. ໂດຍໄດ້ດຳລົງຊີວິດ ແລະ ກໍ່ຮ່າງສ້າງຕົວຢູ່ເກາະໂກໂຕໄດ້ເປັນເວລາເກືອບ 20 ປີແລ້ວ, ທ່ານນາງ ເລທິເຍີ່ມ, ເຫັນແຈ້ງການປ່ຽນແປງແຕ່ລະຢ່າງຂອງເມືອງເກາະແຫ່ງນີ້:
“ຄອບຄົວຂ້າພະເຈົ້າມີຄວາມສະໜິດຕິດພັນ ແລະ ຮັກແພງກັບເກາະແຫ່ງນີ້ທີ່ສຸດ. ທຳມາຫາກິນຢູ່ນີ້ສະດວກຫຼາຍ ດັ່ງນັ້ນພວກຂ້າພະເຈົ້າຢາກດຳລົງຊີວິດເກາະ. ນັບແຕ່ເມື່ອຊົນນະບົດມີການປ່ຽນໃໝ່, ບໍ່ມີເສັ້ນທາງດ້ວຍດິນອີກ, ມີພຽງທາງເບຕົງ, ພວກຂ້າພະເຈົ້າຮູ້ສຶກພາກພູມໃຈທີ່ສຸດ.”
ທະເລ ໂກໂຕ ດຶງດູດແຂກມາທ່ຽວຊົມເປັນຈຳນວນຫຼວງຫຼາຍ
ບັນດາເສັ້ນທາງເຊື່ອມຕໍ່ບ້ານຮ່ອມບ້ານໄດ້ຮັບການກໍ່ສ້າງດ້ວຍເບຕົງ 100% ຍ້ອນປະຊາຊົນປະກອບທີ່ດິນ, ປະກອບເຫື່ອແຮງ, ກໍ່ສ້າງໃໝ່, ຍົກລະດັບອ່າງເກັບນ້ຳ 9 ແຫ່ງ, 9/10 ໂຮງຮຽນໃນບໍລິເວນເມືອງບັນລຸມາດຖານ, ຈາກເມືອງເສດຖະກິດໃໝ່, ລາຍຮັບຂອງປະຊາຊົນຍັງຕ່ຳຢູ່ ມາຮອດປະຈຸບັນລາຍຮັບສະເລ່ຍໃສ່ຫົວຄົນບັນລຸກ່ວາ 45 ລ້ານດົ່ງ/ປີ. ຊີວິດການເປັນຢູ່ຂອງພໍ່ແມ່ປະຊາຊົນໃນບໍລິເວນມີການປ່ຽນແປງເມື່ອທຽບໃສ່ກ່ອນນີ້. ຈຸດພົ້ນເດັ່ນທີ່ສຸດນັ້ນແມ່ນໄດ້ຜັນຂະຫຍາຍກຳລັງແຮງຂອງປະຊາຊົນ. ດ້ວຍບັນດາວິທີເຮັດທ່ີເໝາະສົມ, ໂກໂຕ ມີການພັດທະນາຢ່າງແຮງ, ບັນດາຜະລິດຕະພັນ, ການບໍລິການທ່ອງທ່ຽວໄດ້ຮັບການລົງທຶນ, ເປີດກ້ວາງຢ່າງບໍ່ຢຸດຢັ້ງ. ປະຕິບັດໂຄງການ “ແຕ່ລະຕາແສງມີຜະລິດຕະພັນໜຶ່ງ” (OCOP), ບັນດາຜະລິດຕະພັນຂອງເມືອງ ໂກໂຕ ພວມຄ່ອຍໆຢັ້ງຢືນທີ່ຕັ້ງບົດບາດ ແລະ ເຄື່ອງໝາຍການຄ້າຜະລິດຕະພັນຂອງຕົນຢູ່ເຂດດິນຕໍ່ແຜ່ນ ແລະ ບັນດາແຂວງ, ນະຄອນໃນທົ່ວປະເທດ. ທ່ານນາງ ຟ້າມທິມັງ, ເຂດ 4 ເທດສະບານ ໂກໂຕໄດ້ແບ່ງປັນວ່າ:
“ມີໄຟຟ້າ ແລະ ການພັດທະນາຊົນນະບົດໃໝ່ແມ່ນບັນຫາໄດ້ຮັບຄວາມເອົາໃຈໃສ່ຈາກບັນດາການນຳ. ພວກຂ້າພະເຈົ້າຫາກໍ່ສ້າງຕັ້ງສະຫະສະມາຄົມສິນໃນນ້ຳ, ລົງທຶນວັດຖຸອຸປະກອນ, ວິທະຍາສາດເຕັກນິກ, ລົງທຶນໃຫ້ການປຶກສາເພື່ອເຮັດແນວໃດຍົກສູງຄຸນນະພາບເພື່ອພັດທະນາເຄື່ອງໝາຍການຄ້າ. ປະຈຸບັນ, ເມືອງ ໂກໂຕ ໄດ້ຜັນຂະຫຍາຍ 2 ເຄື່ອງໝາຍການຄ້າໃຫຍ່ໃຫ້ແກ່ປາ ໂກໂຕ. ໂຄງການ OCOP ໜູນຊ່ວຍໃຫ້ປະຊາຊົນຈາກກາໝາຍ, ຮຸ້ມຫໍ່, ຫຼັງຈາກນັ້ນແມ່ນການຂົນສົ່ງຈຳໜ່າຍຜະລິດຕະພັນ. ການນຳເມືອງກໍ່ໄປໜູນຊ່ວຍການຄ້າຂາຍສິນຄ້າ ແລະ ໂຄສະນາບັນດາເຄືື່ອງໝາຍການຄ້າ. ດັ່ງນັ້ນ,ເຄື່ອງໝາຍການຄ້າໃນເບື້ອງຕົ້ນໄດ້ຮັບຄວາມຮູ້ຈັກໃນແຂວງ ກວາງນີງ ເທົ່ານັ້ນ, ມາຮອດປະຈຸບັນ ເຄື່ອງໝາຍການຄ້າຂອງ ໂກໂຕໄດ້ຮັບຄວາມຮູ້ຈັກໃນທ່ົວປະເທດ.”
ມາຢ້ຽມຢາມເກາະໂກໂຕໃນປະຈຸບັນ, ແຂກທ່ອງທ່ຽວສາມາດເຂົ້າຮ່ວມລາຍການຕຶກປາມືກ, ດຳທະເລ, ຄົ້ນຫາບັນດາສະຖານທີ່ທ່ອງທ່ຽວຕ່າງໆ ເຊັນຫາດຫີນ ແລະ ປ່າດົ່ງດິບ… ມາຮອດປະຈຸບັນ, ໃນບໍລິເວນເມືອງມີຫ້ອງພັກສຳລັບແຂກທ່ອງທ່ຽວກ່ວາ 1.000 ຫ້ອງ. ເມືອງໄດ້ຂົນຂວາຍປະຊາຊົນກໍ່ສ້າງເຮືອນຕາມທິດ homestay, ທັງເປັນເຮືອນຢູ່, ທັງສາມາດຮັບໃຊ້ແຂກທ່ອງທ່ຽວພັກຜ່ອນ, ປະກອບສ່ວນຮັບໃຊ້ຄວາມຕ້ອງການຂອງແຂກທ່ອງທ່ຽວ, ຫລຸດຜ່ອນສະພາບການແຂກມາບໍ່ມີເຮືອນຢູ່ໃນໂອກາດງານບຸນຕ່າງໆ. ທ່ານ ແຮ່ວງບ໋ານາມ, ເລຂາຄະນະພັກເມືອງເກາະ ໂກໂຕ ໃຫ້ຮູ້ວ່າ:
“ປະຊາຊົນມີຄວາມປິຕິຊົມຊື່ນຕໍ່ໜ້າບັນດາໝາກຜົນທ່ີບັນລຸໄດ້ພາຍຫຼັງ 5 ປີແຫ່ງການປະຕິບັດໂຄງການຊົນນະບົດໃໝ່. ເມືອງ ໂກໂຕ ພວກຂ້າພະເຈົ້າສຸມໃສ່ແກ້ໄຂ 4 ບັນຫາ, ທີ່ໜຶ່ງແມ່ນວາງອອກຍຸດທະສາດກໍ່ສ້າງຊົນນະບົດໃໝ່ ແລະ ພວກຂ້າພະເຈົ້າສືບຕໍ່ກວດກາຄືນບັນດາແຜນການຍຸດທະສາດ, ຕິດພັນກັບການວາງແຜນການເພີ່ມທະວີວຽກງານຄຸ້ມຄອງ. ທີສອງແມ່ນສຸມໃສ່ເຂົ້າການສ້າງແຫຼ່ງຊັບພະຍາກອນມະນຸດມີຄຸນນະພາບສູງຈາກຖັນແຖວພະນັກງານ ເຖິງຖັນແຖວຜູ້ອອກແຮງງານເພື່ອຮັບໃຊ້ໃຫ້ແກ່ການຫັນປ່ຽນໂຄງປະກອບເສດຖະກິດ. ບັນຫາທີສາມ ນັ້ນແມ່ນສຸມໃສ່ປົກປັກຮັກສາສິ່ງແວດລ້ອມແກ້ໄຂບັນດາບັນຫາສິ່ງແວດລ້ອມ. ບັນຫາທີສີ່ແມ່ນສືບຕໍ່ສຸມໃສ່ການກໍ່ສ້າງໂຄງລ່າງ, ຮຽກຮ້ອງບັນດານັກລົງທຶນເຂົ້າມາລົງທຶນ.”
ບັນດາໝາກຜົນທີ່ບັນລຸໄດ້ໃນ 5 ປີແຫ່ງການປະຕິບັດໂຄງການກໍ່ສ້າງຊົນນະບົດໃໝ່ຈະແມ່ນກຳລັງໜູນໃຫ້ແກ່ເມືອງເກາະໂກໂຕ ສືບຕໍ່ຍົກສູງບັນດາມາດຖານ. ຈາກເມືອງກະສິກຳທີ່ທຸກຍາກ, ມາຮອດປະຈຸບັນ, ໄດ້ກາຍເປັນໃຈກາງທ່ອງທ່ຽວໃໝ່ຂອງແຂວງ ກວາງນີງ. ຜົນສຳເລັດຂອງ ໂກໂຕ ແມ່ນເສີມຂະຫຍາຍປະຊາທິປະໄຕ, ປຸກລຸກແຫລ່ງກຳລັງໃນໝູ່ປະຊາຊົນດ້ວຍທິດນຳປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາເພື່ອໃຫ້ປະຊາຊົນຊົມໃຊ້.