(vovworld) - ໃນສະພາບການຕະຫຼາດປະຈຸບັນນີ້, ຊາວກະສີກຳຜູ້ປູກເຂົ້າແມ່ນເປົ້າໝາຍຖືກຜົນສະທ້ອນຈາກລາຄາສົ້ນເຂົ້າແຮງກວ່າໝູ່, ແຕ່ເມື່ອລາຄາເຂົ້າເພີ່ມຂຶ້ນເຂົາເຈົ້າພັດບໍ່ໄດ້ຮັບຜົນປະໂຫຍດຢ່າງຄົບຖ້ວນ, ເມື່ອລາຄາເຂົ້າຖືກຫຼຸດລົງ, ຊາວກະສີກອນຈະແມ່ນເປົ້າໝາຍທຳອິດທີ່ຖືກຮັບຜົນສະທ້ອນ. ຍ້ອນເຫດນັ້ນ, ເລື່ອງຊາວກະສີກອນຢູ່ເຂດທົ່ງພຽງແມ່ນຳ້ຂອງຊື້ໃບຫຸ້ນຂອງວິສາຫະກິດນັ້ນ ແມ່ນວິທີເຮັດທີ່ຕັ້ງໜ້າເພື່ອສ້າງທີ່ຕັ້ງໃໝ່ໃຫ້ແກ່ເຂົາເຈົ້າ. ເຊີນທ່ານຮັບຟັງບົດຂຽນຂອງແທງຕຸ່ງ, ນັກຂ່າວວິທະຍຸກະຈາຍສຽງຫວຽດນາມທີ່ມີຫົວຂໍ້ວ່າ: ”ເມື່ອຊາວກະສີກອນບືນຕົວຂຶ້ນເປັນເຈົ້າຂອງ”
ຊາວກະສີກອນເຊັນສັນຍາຊື້ໃບຫຸ້ນກັບວິສາຫະກິດ
ຫວ່າງແລ້ວນີ້, ບໍລິສັດຫຸ້ນສ່ວນປົກປ້ອງທັນຍາຫານອານຢາງ ຫາກໍ່ມອບປຶ້ມຫຸ້ນສ່ວນໃຫ້ຊາວກະສີກອນກວ່າ 1.720 ຄົນຢູ່ທ້ອງຖີ່ນຕ່າງໆໃນເຂດທົ່ງພຽງແມ່ນ້ຳຂອງ - ເຊິ່ງແມ່ນຜູ້ກຳມະຊີບໃບຫຸ້ນເກືອບ 1,9 ລ້ານໃບຢູ່ວິສາຫະກິດນີ້. ນີ້ແມ່ນການເຄື່ອນໄຫວຂອງບໍລິສັດຫຸ້ນສ່ວນປົກປ້ອງທັນຍາຫານອານຢາງ ເພື່ອປະຕິບັດແຜນການຂາຍໃບຫຸ້ນວິສາຫະກິດໃຫ້ຊາວກະສີກອນຢູ່ເຂດທົ່ງພຽງແມ່ນຳ້ຂອງ 6000 ຄົນ. ດ້ວຍເລື່ອງຊື້ໃບຫຸ້ນທີ່ມີລາຄາພິເສດ ແລະ ກາຍເປັນຫຸ້ນສ່ວນຂອງບໍລິສັດຫຸ້ນສ່ວນປົກປ້ອງທັນຍາຫານອານຢາງ. ຊາວກະສີກອນໄດ້ກາຍເປັນເຈົ້າຂອງກຳມະຊີບໃໝ່ຂອງບໍລິສັດ ແລະ ເຂົາເຈົ້າຈະໄດ້ຊົມໃຊ້ຫຼາຍກວ່າຈາກລະບົບມູນຄ່າເຊິ່ງບໍລິສັດພວມປະຕິບັດ. ນັບແຕ່ນີ້ເປັນຕົ້ນໄປຊາວກະສີກອນຈະມີຄວາມສະດວກຫຼາຍຢ່າງເມື່ອໄດ້ຮັບການໜູນຊ່ວຍຈາກບໍລິສັດຄື: ການເລືອກເຟັ້ນແນວພັນ, ການຊື້ຢາຂ້າສັດຕູພືດ, ຝຸ່ນເຄມີ, ການບໍລິການກະສີກຳ, ການຜະລິດປຸງແຕ່ຜະລິດຕະພັນກະເສດ, ການຈຳໜ່າຍຜະລິດຕະພັນ...
ໂດຍຕິດພັນກັບທົ່ງນາມາເປັນເວລາຫຼາຍປີແລ້ວ, ປະຈຸບັນ, ທ່ານ ເລແທງເຊີນ, ຢູ່ເຂດວັດຖຸດິບ ວິ້ງຮຶງ, ແຂວງລອງອານ ມີຄວາມເຊື່ອໝັ້ນຫຼາຍກວ່າຕໍ່ໂອກາດບືນຕົວຂຶ້ນສ້າງຄວາມຮັ່ງມີຈາກຕົ້ນເຂົ້າ. ພາຍຫຼັງປູກເຂົ້າໃນເຂດວັດຖຸດິບໃຫ້ໂຮງງານສອງ, ສາມລະດູ, ທ່ານເຊີນ ແລະ ປະຊາຊົນຫຼາຍຄົນຢູ່ເຂດທົ່ງພຽງແມ່ນຳ້ຂອງເຫັນວ່າວຽກງານນີ້ນັບມື້ນັບເປັນປົກກະຕິ: ເມື່ອຜະລິດຕາມຂັ້ນຕອນ, ຜູ້ປູກເຂົ້າບໍ່ຕ້ອງເປັນຫ່ວງຕໍ່ຄ່າໃຊ້ຈ່າຍ ແລະ ຮອດລະດູການເກັບກ່ຽວ, ລາຄາຂາຍເຂົ້າຈະສູງກວ່າຢູ່ທົ່ງນາອື່ນໆ. ສິ່ງດັ່ງກ່າວໄດ້ສ້າງຄວາມໄວ້ເນື້ອເຊື່ອໃຈເພື່ອໃຫ້ຊາວກະສີກອນຄືທ່ານຕົກລົງຊື້ໃບຫຸ້ນຂອງບໍລິສັດຫຸ້ນສ່ວນປົກປ້ອງທັນຍາຫານອານຢາງ ກວ່າ 1.000 ໃບ ດ້ວຍຈຸດໝາຍຢາກທຳມາຫາກິນ, ຕິດພັນຢ່າງໝັ້ນຄົງ, ຍາວນານກັບວິສາຫະກິດ. ທ່ານ ເຊີນແບ່ງປັນວ່າ, ໃນເບື້ອງຕົ້ນ, ເມື່ອລົງທຶນກ້ອນໃຫຍ່ເຂົ້າໃນການຊື້ໃບຫຸ້ນຂອງບໍລິສັດຫຸ້ນສ່ວນປົກປ້ອງທັນຍາຫານອານຢາງ, ທ່ານກໍ່ຄິດໄລ່ຊັ່ງຊາຫຼາຍ.
”ບໍລິສັດມີບາດກ້າວພັດທະນາໃໝ່ນັ້ນແມ່ນໜູນຊ່ວຍຊາວກະສີກອນຊື້ໃບຫຸ້ນ. ກ່ອນນີ້, ພວກຂ້າພະເຈົ້າບໍ່ທັນເຂົ້າໃຈກ່ຽວກັບໃບຫຸ້ນ. ແຕ່ເມື່ອໄດ້ຮັບການໜູນຊ່ວຍ, ໃຫ້ຄຳປຶກສາຈາກບໍລິສັດ, ພວກຂ້າພະເຈົ້າເຫັນວ່າລາຍການນີ້ດີຫຼາຍ. ”
ພິທີມອບໃບຫຸ້ນໃຫ້ຊາວກະສີກອນ
ປະຈຸບັນ, ລະບົບມູນຄ່າເຂົ້າສານຢູ່ເຂດທົ່ງພຽງແມ່ນ້ຳຂອງແມ່ນລະບົບເຊື່ອມຕໍ່ບັນດາຂັ້ນຕອນການຜະລິດ, ນັບແຕ່ສົ້ນເຂົ້າ, ການປຸງແຕ່ງ ແລະ ຈຳໜ່າຍຜະລິດຕະພັນ. ເຂົ້າຮ່ວມລະບົບນີ້ມີຊາວກະສີກອນ, ພໍ່ຄ້າຊາວຂາຍ, ໂຮງງານສີເຂົ້າ, ບໍລິສັດສະໜອງ, ບໍລິສັດສົ່ງອອກ, ເຄືອຂ່າຍແຈກຢາຍ. ໃນນັ້ນ, ຊາວກະສີກອນສວມບົດບາດສຳຄັນ. ຍ້ອນເຫດນັ້ນ, ການກໍ່ສ້າງທົ່ງນາຂະໜາດໃຫຍ່ ແລະ ຂາຍໃບຫຸ້ນໃຫ້ຊາວກະສີກອນແມ່ນວິທີໃໝ່, ນຳມາເຊິ່ງປະສິດທິຜົນຢ່າງຈະແຈ້ງ. ທ່ານ ລ້າຍຊວນມົນ, ຮອງປະທານສະມາຄົມຊາວກະສີກອນຫວຽດນາມ, ຖືວ່າ:
”ດ້ວຍວິທີເຮັດຄືແນວນັ້ນ, ທັງລະບົບການເມືອງໄດ້ເຂົ້າຮ່ວມ. ນີ້ແມ່ນບາດກ້າວບຸກທະລຸໃນການສ້າງໂຄງປະກອບພື້ນຖານກະສີກຳ ແລະ ປະຕິບັດຕາມຄຳເຫັນຊີ້ນຳຂອງທ່ານນາຍົກລັດຖະມົນຕີນັ້ນແມ່ນຊາວກະສີກອນຕ້ອງມີກຳໄລ. ນີ້ແມ່ນຮູບແບບທີ່ດີຄວນໄດ້ຮັບການສົ່ງເສີມ. ຈຸດປະສົງສຸດທ້າຍແມ່ນຍົກສູງລາຍຮັບໃຫ້ແກ່ຊາວກະສີກອນ. ຖ້າຫາກຮູບແບບນີ້ໄດ້ຮັບການຜັນຂະຫຍາຍຢ່າງກວ້າງຂວາງ, ຊາວກະສີກອນຈະຜະລິດຕາມທິດເປັນສິນຄ້າ ແລະ ໝັ້ນຄົງ”.
ເລື່ອງຊາວກະສີກອນຊື້ ແລະ ຂາຍຫຸ້ນສ່ວນຂອງວິສາຫະກິດ ໄດ້ຮັບຖືວ່າແມ່ນຂີດໝາຍໃນການສ້າງສາຍສຳພັນລະຫວ່າງຜູ້ຜະລິດ ແລະ ຜູ້ຈຳໜ່າຍ. ດັ່ງນັ້ນສຳລັບບໍລິສັດຫຸ້ນສ່ວນປົກປ້ອງທັນຍາຫານອານຢາງ, ຜົນປະໂຫຍດທີ່ບັນລຸໄດ້ບໍ່ພຽງແຕ່ແມ່ນແຫຼ່ງລາຍຮັບກວ່າ 56 ຕື້ດົ່ງຈາກການຂາຍຫຸ້ນສ່ວນເທົ່ານັ້ນ, ຫາກທິດທາງຍາວນານນັ້ນແມ່ນການຕິດພັນລະຫວ່າງວິສາຫະກິດກັບຊາວກະສີກອນ. ທ່ານ ຮວີ່ງວັນທ່ອນ, ຜູ້ອຳນວຍການໃຫຍ່ບໍລິສັດຫຸ້ນສ່ວນປົກປ້ອງທັນຍາຫານອານຢາງ, ໃຫ້ຮູ້ວ່າ:
”ໃນວິວັດແຫ່ງການກ້າວຂຶ້ນຂອງພື້ນຖານກະສີກຳຜະລິດເປັນສິນຄ້າຕາມກົນໄກການຕະຫຼາດ, ນີ້ແມ່ນເສັ້ນທາງແທນໃຫ້ສະຫະກອນ. ເພາະວ່າເລື່ອງໃຫ້ຊາວກະສີກອນຝາກເຂົ້າຢູ່ໃນໂຮງງານແມ່ນຮູບການທຸລະກຳ. ຈາກນັ້ນແມ່ນເຮັດວຽກງານການເງິນ, ຄິດໄລ່ກ່ຽວກັບປະສິດທິຜົນດຳເນີນທຸລະກິດ, ການເງິນ... ນີ້ແມ່ນບາດກ້າວທົດລອງເພື່ອມີການຮ່ວມມືສູງກວ່າ. ປະຊາຊົນຈະເປັນເຈົ້າດ້ວຍເລື່ອງຊື້ຫຸ້ນສ່ວນ”.
ເປັນເທື່ອທຳອິດທີ່ຊາວກະສີກອນຢູ່ເຂດທົ່ງພຽງແມ່ນຳ້ຂອງເປັນເຈົ້າຜະລິດຕະພັນຂອງຕົນ, ຜ່ານຮູບແບບໃໝ່ແມ່ນຊື້ຫຸ້ນສ່ວນຂອງວີສາຫະກິດໃຫຍ່. ນີ້ໄດ້ຮັບຖືວ່າແມ່ນຮູບແບບທີ່ກ້າວໜ້າ, ແກ້ໄຂຄວາມຫຍຸ້ງຍາກໃຫ້ແກ່ຊາວກະສີກອນ ແລະ ຂະແໜງກະສີກຳ, ມຸ້ງໄປເຖິງການຜະລິດເຂົ້າສານທີ່ທັນສະໄໝຕາມທ່າອ່ຽງການຕະຫຼາດ.