(vovworld) - ພ້ອມກັບຂະບວນວິວັດແຫ່ງການຫັນໄປສູ່ພື້ນຖານເສດຖະກິດການຕະຫຼາດທີ່ມີຂອບຂະໜາດໃຫຍ່ ເພື່ອເໝາະສົມກັບກົນໄກການຕະຫຼາດນັ້ນ, ມັນຮຽກຮ້ອງໃຫ້ມີການຫັນປ່ຽນຮູບແບບສະຫະກອນ ເພື່ອເຮັດບົດບາດເປັນແກ່ນສານຂອງເສດຖະກິດລວມໝູ່ໃນການກໍ່ສ້າງຊົນນະບົດໃໝ່ໃຫ້ດີກວ່າອີກ. ກ່ຽວກັບບັນຫານີ້, ນັກຂ່າວວິທະຍຸກະຈາຍສຽງຫວຽດນາມໄດ້ມີບົດຂຽນທີ່ພາດຫົວເລື່ອງວ່າ ”ເສີມຂະຫຍາຍຮູບແບບສະຫະກອນໃນການກໍ່ສ້າງຊົນນະບົດໃໝ່” ເຊີນທ່ານຮັບຟັງ.
ສະຫະກອນແບບໃໝ່ ຖູ້ຍເຮືອງ
(ພາບ: nongthonmoi.gov.vn)
ມາຮອດປະຈຸບັນ, ທົ່ວປະເທດມີສະຫະກອນກະສີກຳກວ່າ 9.200 ແຫ່ງ, ດ້ວຍຈຳນວນສະມາຊິກປະມານ 7.3 ລ້ານຄົນ, ໃນນັ້ນ 70% ຈຳນວນສະຫະກອນແມ່ນເຮັດການບໍລິການເປັນຕົ້ນ. ໃນຊຸມປີກ່ອນນີ້, ຄວາມຮັບຮູ້ລວມກ່ຽວກັບຮູບແບບສະຫະກອນກະສີກຳນັ້ນແມ່ນຮ່ວມທຶນຮອນ, ຮ່ວມກຳລັງແຮງຂອງຊາວກະສີກອນ, ສະຫະກອນສ່ວນຫຼາຍແມ່ນເຮັດການບໍລິການໃຫ້ແກ່ຊາວກະສີກອນ. ໂດຍຜ່ານສະຫະກອນ, ຊາວກະສີກອນໄດ້ຊົມໃຊ້ຜົນປະໂຫຍດຈາກການບໍລິການຕ່າງໆ, ຊື້ຂາຍດ້ວຍລາຄາເໝາະສົມກວ່າ, ຖືກກວ່າ, ແຕ່ການຄຸ້ມຄອງພັດບໍ່ກະທັດລັດ, ຕ້ອງຜ່ານຂອດເປັນກາງ. ເມື່ອກ້າວເຂົ້າສູ່ໄລຍະຫັນກະສີກຳ ແລະ ຊົນນະບົດເປັນທັນສະໄໝ, ຜະລິດສິນຄ້າດ້ວຍຂອບຂະໜາດໃຫຍ່ນັ້ນ, ບັນດາຮູບແບບສະຫະກອນໃນເມື່ອກ່ອນ, ປະຈຸບັນບໍ່ເໝາະສົມກັບຕະຫຼາດອີກ. ດັ່ງນັ້ນຮູບແບບສະຫະກອນຈຳເປັນຕ້ອງໄດ້ຮັບການຫັນປ່ຽນເພື່ອເສີມຂະຫຍາຍບົດບາດເປັນແກ່ນສານໃນພາກສ່ວນເສດຖະກິດລວມໝູ່, ປະກອບສ່ວນຢ່າງຕັ້ງໜ້າກວ່າອີກເຂົ້າໃນໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ທ່ານ Le Huy Ngo, ອາດີດລັດຖະມົນຕີກະຊວງກະສີກຳ ແລະ ພັດທະນາຊົນນະບົດ, ປະຈຸບັນແມ່ນຜູ້ຊ່ຽວຊານໃຫ້ຄຳປຶກສາແກ່ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ຖືວ່າ:
”ຄວນຍົກສູງຄວາມຮູ້ກ່ຽວກັບບົດບາດ, ທີ່ຕັ້ງ ແລະຈຸດພິເສດໃນການດຳເນີນທຸລະກິດຂອງບັນດາສະຫະກອນກະສີກຳໃນສະໄໝໃໝ່, ສະໄໝເສດຖະກິດການຕະຫຼາດ, ແລະ ເຊື່ອມໂຍງ. ນັ້ນແມ່ນການຈັດຕັ້ງຄືນບັນດາສະຫະກອນຕາມຮູບການທັງເຮັດການບໍລິການ, ທັງດຳເນີນທຸລະກິດ ເພື່ອຫາກຳໄລໃຫ້ແກ່ສະມາຊິກສະຫະກອນ ແລະ ສະຫະກອນ. ສ້າງບັນດາສະຫະກອນທີ່ມີຄວາມສາມາດເປີດກວ້າງການຜະລິດ, ແລະ ສະຫະກອນນັ້ນຕ້ອງເປັນເຈົ້າການໃນການຮ່ວມສຳພັນກັບຕະຫຼາດ, ຮ່ວມສຳພັນກັບບັນດາວິສາຫະກິດ, ເມື່ອເຮັດໄດ້ຄືແນວນັ້ນຈຶ່ງສາມາດປົກປັກຮັກສາສິດຜົນປະໂຫຍດຂອງຊາວກະສີກອນ, ສ້າງເງື່ອນໄຂໃຫ້ພື້ນຖານຜະລິດເປັນສິນຄ້າດ້ວຍຂະໜາດໃຫຍ່, ແລະ ມີພື້ນຖານກະສີກຳພັດທະນາຢ່າງໝັ້ນຄົງຕິດພັນກັບຕະຫຼາດໄດ້”
ກໍ່ສ້າງຊົນນະບົດໃໝ່ຈາກຈີນຕະນາການສະຫະກອນໃໝ່
(ພາບ: google.com.vn)
ຄວາມແຕກຕ່າງທີ່ເປັນພື້ນຖານຂອງຮູບແບບສະຫະກອນແບບໃໝ່ (ຕາມກົດໝາຍວ່າດ້ວຍສະຫະກອນປີ 2003)ແລ້ວ, ສະມາຊິກສະຫະກອນ, ຜູ້ອອກແຮງງານໃນສະຫະກອນ, ສະຫະພັນສະຫະກອນ, ໜ່ວຍສະຫະກອນ ແມ່ນຜູ້ທີ່ມີສິດ ກຳມະສິດກ່ຽວກັບອຸປະກອນຜະລິດ, ປະກອບທຶນ, ປະກອບແຮງງານ, ພູມປັນຍາ, ບົດຮຽນໃນການດຳເນີນທຸລະກິດເຂົ້າໃນສະຫະກອນດ້ວຍຄວາມສະໝັກ. ຕາມຮູບແບບນີ້, ເສດຖະກິດລວມໝູ່, ສະຫະກອນ ບໍ່ກົງກັນຂ້າມກັບເສດຖະກິດເອກະຊົນ ຫາກມີການຮ່ວມສຳພັນ, ຮ່ວມມືລະຫວ່າງບັນດາຮູບການກຳມະສິດ, ບັນດາສິດນຳໃຊ້ທີ່ດິນ, ຊັບສົມບັດ, ກຳລັງແຮງງານ ດ້ວຍຮູບການຈັດຕັ້ງຢ່າງເໝາະສົມ, ຜະລິດແບບລວມສູນ, ເຮັດການບໍລິການສົ້ນເຂົ້າ, ສົ້ນອອກ, ຮັບຜະລິດບາງຂັ້ນຕອນໃນວິວັດການຜະລິດ ແລະ ປູກຝັງ, ຊ່ວຍຄອບຄົວສະມາຊິກສະຫະກອນຫຼຸດຜ່ອນຄ່າໃຊ້ຈ່າຍ, ຍົກສູງປະສິດທິຜົນແຫ່ງການນຳໃຊ້ບັນດາແຫຼ່ງກຳລັງ, ສ້າງວຽກເຮັດງານທຳ. ໃນຊຸມປີມໍ່ໆມານີ້, ພ້ອມກັບໂຄງການກໍ່ສ້າງຊົນນະບົດໃໝ່, ລັດຫວຽດນາມ ໄດ້ປະກາດໃຊ້ຫຼາຍກົນໄກນະໂຍບາຍເພື່ອແນໃສ່ສົ່ງເສີມຮູບແບບສະຫະກອນ, ໃນນັ້ນນະໂຍບາຍສຳຄັນທີ່ສຸດນັ້ນແມ່ນໜູນຊ່ວຍການກູ້ຢືມທຶນ. ທ່ານ Nguyen Van Bien , ຮອງປະທານສະຫະພັນບັນດາສະຫະກອນຫວຽດນາມ, ຖືວ່າ:
”ປະຈຸບັນ, ລັດມີແຜນນະໂຍບາຍຫັນກອງທຶນສິນເຊື່ອຂອງປະຊາຊົນເປັນທະນາຄານສະຫະກອນ ບົນພື້ນຖານລະບົບກອງທຶນສິນເຊື່ອຂອງປະຊາຊົນທີ່ມີຢູ່ແລ້ວໃນແຂວງ, ນະຄອນຕ່າງໆ. ການສ້າງຕັ້ງທະນາຄານສະຫະກອນຈະດຶງດູດການເຂົ້າຮ່ວມຂອງບັນດາສະຫະກອນ, ພ້ອມກັນນັ້ນ, ທະນາຄານນີ້ກໍ່ມີເປົ້າໝາຍຮັບໃຊ້ຢ່າງຈະແຈ້ງ, ນັ້ນແມ່ນຮັບໃຊ້ບັນດາສະຫະກອນ, ຜ່ານນັ້ນໜູນຊ່ວຍສະຫະກອນກູ້ຢືມທຶນໃຫ້ດີກວ່າ”
ສະຫະກອນຈັກສານ ແທ່ງເລີ້ຍ
(ພາບ: google.com.vn)
ປະຈຸບັນ, ໃນຈຳນວນ 19 ມາດຖານຂອງໂຄງການຈຸດໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່ຄື: ການລົງທຶນກໍ່ສ້າງພື້ນຖານໂຄງລ່າງ, ການວາງແຜນກຳນົດ, ການລວມດິນປ່ຽນໃໝ່ຜົນລະປູກສ້າງເປັນທົ່ງນາ, ຟາມ, ໝູ່ບ້ານອາຊີບທີ່ມີຂອບຂະໜາດໃຫຍ່… ເພື່ອນຳມາເຊິ່ງປະສິດທິຜົນ, ມູນຄ່າເສດຖະກິດສູງກວ່ານັ້ນ, ເລື່ອງກໍ່ສ້າງບັນດາສະຫະກອນກໍ່ເໝາະສົມກັບວິວັດແຫ່ງການພັດທະນານີ້. ໃນຊຸມປີຜ່ານມາ, ມີສະຫະກອນຫຼາຍແຫ່ງໄດ້ສະແດງໃຫ້ເຫັນບົດບາດສຳຄັນໃນການຖ່າຍທອດຄວາມກ້າວໜ້າດ້ານເຕັກນິກເຂົ້າໃນການຜະລິດ, ໜູນຊ່ວຍຊາວກະສີກອນຈຳໜ່ວຍຜະລິດຕະພັນ, ຊຸກຍູ້ການຫັນປ່ຽນໂຄງປະກອບຜົນລະປູກ, ສັດລ້ຽງ, ປະກອບສ່ວນສຳຄັນເຂົ້າໃນການຮັກສາການພັດທະນາການຜະລິດເປັນປົກກະຕິ. ມີສະຫະກອນຫຼາຍແຫ່ງຍັງມີບົດບາດສຳຄັນໃນການວາງແຜນກຳນົດ, ຊັບຊ້ອນການຜະລິດ, ນຳມູນຄ່າການຜະລິດຈາກ 31 ລ້ານດົ່ງ/ເຮັກຕາໃນປີ 2006, ຂຶ້ນເຖິງກວ່າ 50 ລ້ານດົ່ງ/ເຮັກຕາໃນປະຈຸບັນ. ມີສະຫະກອນຫຼາຍແຫ່ງ ທຳມາຫາກິນໄດ້ຮັບກຳໄລ ແລະ ໃຊ້ທຶນສະສົມສ່ວນໜຶ່ງເຂົ້າໃນການພັດທະນາການຜະລິດ ດຳເນີນທຸລະກິດ. ດ້ວຍການລົງທຶນເສີມຂະຫຍາຍຮູບແບບສະຫະກອນທີ່ເໝາະສົມໃນໄລຍະພັດທະນາໃໝ່, ແນ່ນອນວ່າຮູບແບບສະຫະກອນຈະມີບົດບາດດີກວ່າ, ປະກອບສ່ວນປ່ຽນໃໝ່ໂສມໜ້າຊົນນະບົດຫວຽດນາມ.