(vovworld) - ພາຍຫຼັງ 2 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ຕາແສງຮ່າມ່ອນ, ເມືອງດັກຮ່າ, ແຂວງກອນຕຸມ, ໄດ້ປະຕິບັດສຳເລັດ 19 ມາດຖານ, ກາຍເປັນຕາແສງບັນລຸມາດຖານຊົນນະບົດໃໝ່ແຫ່ງທຳອິດຂອງແຂວງ ແລະ ທົ່ວເຂດໄຕງວຽນ. ນັກຂ່າວວິທະຍຸກະຈາຍສຽງຫວຽດນາມມີບົດຂຽນທີ່ມີຫົວຂໍ້ວ່າ ”ແຂວງກອນຕຸມ ກໍ່ສ້າງຊົນນະບົດໃໝ່: ບົດຮຽນຈາກຕາແສງຮ່າມ່ອນ” ເຊິ່ງເຕື້ອງເຖິງວິທີປະຕິບັດ ແລະ ບົດຮຽນຂອງຮ່າມ່ອນ ໃນການກໍ່ສ້າງຊົນນະບົດໃໝ່. ເຊີນທ່ານຕິດຕາມຮັບຟັງ
ຫໍວັດທະນະທຳຕາແສງຮ່າມ່ອນ
(ພາບ: google.com.vn)
ນັບແຕ່ຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ທ້ອງຖີ່ນ, ອຳນາດການປົກຄອງຕາແສງຮ່າມ່ອນ ໄດ້ກຳນົດຢ່າງຈະແຈ້ງວ່າ, ປັດໃຈສຳຄັນເພື່ອປະຕິບັດໂຄງການ ນັ້ນແມ່ນຄວາມເຫັນດີເຫັນພ້ອມ, ຮ່ວມແຮງຮ່ວມໃຈຂອງປະຊາຊົນ. ດັ່ງນັ້ນວຽກງານໂຄສະນາໄດ້ຮັບການເອົາໃຈໃສ່ເປັນພິເສດ. ມີປະຊາຊົນກວ່າ 4.400 ກວ່າຄົນ ໃນເກືອບ 1.200 ຄອບຄົວຂອງຕາແສງ ໄດ້ເຫັນດີເປັນເອກະພາບ ແລະ ຮ່ວມແຮງຮ່ວມໃຈໃນການກໍ່ສ້າງຊົນນະບົດໃໝ່. ທ່ານ Dao Anh Thu ເລຂາອົງຄະນະພັກ, ຫົວໜ້າຄະນະຊີ້ນຳການກໍ່ສ້າງຊົນນະບົດໃໝ່ຕາແສງຮ່າມ່ອນ, ໃຫ້ຮູ້ວ່າ:
”ສິ່ງສຳຄັນທີ່ສຸດນັ້ນແມ່ນ ຄວາມເຫັນດີເຫັນພ້ອມຂອງປະຊາຊົນ, ທີ່ສອງແມ່ນຄວາມໂປ່ງໃສ, ເປີດເຜີຍ, ຈາກນັ້ນປະຊາຊົນຈະເຫັນດີເຫັນພ້ອມ. ທີສາມແມ່ນ ຖັນແຖວພະນັກງານການນຳ, ຈາກສະຫາຍເລຂາຕະຫຼອດຮອດພາລະກອນລ້ວນແຕ່ມີຄວາມສຸດຈິດສຸດໃຈໃນການຮັບໃຊ້ປະຊາຊົນ”
ໂສມໜ້າຂອງຕາແສງຮ່າມ່ອນໃນປະຈຸບັນ (ພາບ: google.com.vn)
ເພື່ອພັດທະນາພື້ນຖານໂຄງລ່າງ, ຮັບປະກັນບັນດາມາດຖານໃນການກໍ່ສ້າງຊົນນະບົດໃໝ່, ດ້ວຍທິດນຳ ”ປະຊາຊົນເຮັດ, ລັດໜູນຊ່ວຍ”, ອຳນາດການປົກຄອງຕາແສງຮ່າມ່ອນ ໄດ້ລະດົມຄວາມເຫັນດີເຫັນພ້ອມ, ຮ່ວມແຮງຮ່ວມໃຈຈາກປະຊາຊົນ. ທ່ານ Nghiem Xuan Tiep, ບ້ານບິ່ງມິງ, ໃຫ້ຮູ້ວ່າ:
”ປະຊາຊົນ ກໍ່ຄືຄອບຄົວຂ້າພະເຈົ້າໄດ້ຮັບຜົນປະໂຫຍດຫຼາຍຢ່າງຈາກໂຄງການ, ຖະໜົນຫົນທາງມີຄວາມສະອາດກວ່າ, ບັນດາກິດຈະກຳສະຫວັດດີການສັງຄົມໄດ້ນຳມາເຊິ່ງຜົນປະໂຫຍດໃຫ້ປະຊາຊົນໃນທ້ອງຖີ່ນ ກໍ່ຄືໃຫ້ຄອບຄົວຂ້າພະເຈົ້າ. ໃນການກໍ່ສ້າງຊົນນະບົດໃໝ່, ພໍ່ແມ່ປະຊາຊົນໄດ້ພ້ອມກັນປະກອບສ່ວນເຂົ້າໃນການກໍ່ສ້າງຫໍປະຊຸມ, ທາງບ້ານ, ລະບົບໄຟຟ້າ… ພໍ່ແມ່ປະຊາຊົນພວກຂ້າພະເຈົ້າເບິກບານມ່ວນຊື່ນ ແລະ ສະໜັບສະໜູນໂຄງການກໍ່ສ້າງຊົນນະບົດໃໝ່ນີ້”
ປະທານປະເທດ Truong Tan Sng ໄປຢ້ຽມຢາມຕາແສງຮ່າມ່ອນ
(ພາບ: google.com.vn)
ໂດຍກຳນົດໄດ້ວ່າ ”ປະຊາຊົນຮັ່ງມີ ປະເທດຊາດຈຶ່ງເຂັ້ມແຂງ”, ດັ່ງນັ້ນ, ຍາມໃດຄະນະຊີ້ນຳການກໍ່ສ້າງຊົນນະບົດໃໝ່ຕາແສງຮ່າມ່ອນ ກໍ່ມີຄວາມເອົາໃຈໃສ່ເຖິງການຍົກສູງລາຍຮັບໃຫ້ແກ່ປະຊາຊົນໃນຕາແສງ. ເພື່ອແກ້ໄຂບັນຫານີ້, ອຳນາດການປົກຄອງໄດ້ຄັດເລືອກບາດກ້າວບຸກທະລຸ ນັ້ນແມ່ນຍົກສູງປະລິມານການຜະລິດ, ຄຸນນະພາບຕົ້ນໄມ້. ທ່ານ Truong Quang Thu, ປະທານສະມາຄົມຊາວກະສີກອນຕາແສງຮ່າມ່ອນ, ໃຫ້ຮູ້ວ່າ:
”ປະຊາຊົນໄດ້ເຂົ້າໃຈວ່າ ວິທະຍາສາດເຕັກນິກແມ່ນບັນຫາທີ່ຂາດບໍ່ໄດ້. ດັ່ງນັ້ນພາຍຫຼັງໄປຮຽນແລ້ວ, ເຂົາເຈົ້າໄດ້ນຳໃຊ້ວິທະຍາສາດ ແລະ ເຕັກນິກເຂົ້າໃນວຽກງານກະສີກອນ ແລະ ເຫັນວ່າໄດ້ບັນລຸປະສິດທິຜົນສູງ, ຈາກນັ້ນເຂົາເຈົ້າຈຶ່ງໂຄສະນາ ແລະ ແນະນຳວິທີເຮັດໃຫ້ກັນຊາບ”.
ຜົນຂອງການປູກກາເຟຢູ່ຮ່າມ່ອນ (ພາບ: google.com.vn)
ເພື່ອເຮັດໃຫ້ລາຍຮັບຂອງແຕ່ລະຄົນບັນລຸໄດ້ 38 ລ້ານດົ່ງ/ປີຄືໃນປະຈຸບັນ, ພ້ອມກັບການຜະລິດ, ການລ້ຽງສັດ, ປູກຕົ້ນໄມ້ທີ່ເປັນມູນເຊື້ອແລ້ວ, ຫຼາຍຄອບຄົວຢູ່ຕາແສງຮ່າມ່ອນ ຍັງກ້າລົງທຶນພັດທະນາບັນດາອາຊີບອຸດສາຫະກຳນ້ອຍຫັດຖະກຳຄື: ຕັດຫຍິບ, ກົນຈັກ, ເອເລກໂຕນິກ... ພັດທະນາອາຊີບລ້ຽງປູກສິນໃນນ້ຳ, ການປະມົງ…ການກໍ່ສ້າງຊົນນະບົດໃໝ່ໄດ້ສ້າງບັນຍາກາດໃໝ່ໃຫ້ແກ່ປະຊາຊົນໃນການອອກແຮງງານ ແລະ ການຜະລິດ. ທ່ານ Nguyen Ke Truong, ປະທານຄະນະກຳມະການປະຊາຊົນ, ຫົວໜ້າຄະນະຄຸ້ມຄອງການກໍ່ສ້າງຊົນນະບົດໃໝ່ຢູ່ຕາແສງຮ່າມ່ອນ, ໃຫ້ຮູ້ວ່າ:
”ປະຊາຊົນມີຄວາມພາກພູມໃຈ, ຕອບສະໜອງ ແລະ ສະໜັບສະໜູນໂຄງການກໍ່ສ້າງຊົນນະບົດໃໝ່. ປະຈຸບັນຊີວິດທາງດ້ານວັດທະນະທຳ, ແລະ ຈິດໃຈຂອງເຂົາເຈົ້າໄດ້ຮັບການຍົກສູງຂຶ້ນ, ແນວຄິດຂອງເຂົາເຈົ້າກໍ່ມີການປ່ຽນແປງໄປນຳ. ປະຊາຊົນໄດ້ຮູ້ນຳໃຊ້ວິທະຍາສາດ, ເຕັກນິກເຂົ້າໃນການຜະລິດເພື່ອບັນລຸປະສິດທິຜົນສູງ”.
ຜົນສຳເລັດ, ແລະ ບົດຮຽນທີ່ສຳຄັນໃນການກໍ່ສ້າງຊົນນະບົດໃໝ່ຢູ່ຕາແສງຮ່າມ່ອນ ນັ້ນແມ່ນ, ເສີມຂະຫຍາຍນ້ຳໃຈຄວາມຮັບຜິດຊອບຂອງແຕ່ລະຄົນຕໍ່ກັບປະຊາຄົມ. ໂດຍລະອຽດແມ່ນ, ປະຈຸບັນ ການກໍ່ສ້າງຊົນນະບົດໃໝ່ໄດ້ກາຍເປັນຄວາມຮັບຜິດຊອບລວມ, ຄວາມເອົາໃຈໃສ່ ແລະ ການກະທຳລວມຂອງປະຊາຊົນທຸກຄົນໃນຕາແສງ. ສິ່ງດັ່ງກ່າວໄດ້ຊ່ວຍໃຫ້ອຳນາດການປົກຄອງທ້ອງຖີ່ນປະຕິບັດສຳເລັດ 19 ມາດຖານ, ໃນນັ້ນມີບັນດາມາດຖານປະຕິບັດໄດ້ຍາກຄື ໂຄງປະກອບແຮງງານ, ຮູບການຈັດຕັ້ງການຜະລິດ…. ເພື່ອກາຍເປັນຕາແສງຊົນນະບົດໃໝ່ແຫ່ງທຳອິດຂອງແຂວງກອນຕຸມ ແລະ ຂອງທັງເຂດໄຕງວຽນ./.