(vovworld) – ໃນປະຊາຄົມບັນດາເຜົ່າຢູ່ເຂດໄຕງວຽນຂອງຫວຽດນາມ, ເຈົ້າກົກເຈົ້າເຫຼົ່າມີບົດບາດສຳຄັນພິເສດ, ແມ່ນຜູ້ມີອິດທິພົນກວ່າໝູ່ໃນບ້ານ. ໃນວຽກງານກໍ່ສ້າງຊົນນະບົດໃໝ່, ຍາມໃດບັນດາເຈົ້າກົກເຈົ້າເຫຼົ່າກໍ່ຕັ້ງໜ້າໂຄສະນາແຜນນະໂຍບາຍ, ນະໂຍບາຍຂອງລັດເຖິງປະຊາຊົນ; ຂົນຂວາຍປະຊາຊົນຮັກສາກຸ່ມກ້ອນມະຫາສາມັກຄີ, ຕັ້ງໜ້າອອກແຮງງານທຳການຜະລິດ ແລະ ເສີມຂະຫຍາຍກຳລັງພາຍໃນ ເພື່ອກໍ່ສ້າງບ້ານເກີດໃຫ້ນັບມື້ນັບມີຄວາມອິ່ມໜຳສຳລານ ແລະ ຮັ່ງມີສວຍງາມ. ບົດຂຽນຂອງ ເທ໋ທັ໋ງ, ນັກຂ່າວວິທະຍຸກະຈາຍສຽງຫວຽດນາມ ປະຈຳເຂດໄຕງວຽນ ທີ່ມີຫົວຂໍ້ວ່າ “ໄຕງວຽນ: ເສີມຂະຫຍາຍບົດບາດເຈົ້າກົກເຈົ້າເຫຼົ່າໃນການກໍ່ສ້າງຊົນນະບົດໃໝ່“ຈະແນະນຳກ່ຽວກັບຄວາມມານະພະຍາຍາມຂອງບັນດາເຈົ້າກົກເຈົ້າເຫຼົ່າ ເຊິ່ງໄດ້ພ້ອມກັບອຳນາດການປົກຄອງ ແລະ ປະຊາຊົນ ກໍ່ສ້າງຊົນນະບົດໃໝ່ຢູ່ເມືອງ Ea H’eo, ແຂວງດັກລັກ.
ເຈົ້າກົກເຈົ້າເຫຼົ່າທີ່ດີເດັ່ນຢູ່ເຂດໄຕງວຽນ
(ພາບ: ອິນເຕີແນດ)
ເຖິງວ່າໄດ້ມີອາຍຸ 70 ປີແລ້ວກໍ່ຕາມ, ແຕ່ເຈົ້າກົກເຈົ້າເຫຼົ່າ ມາເຍິດ ຢູ່ບ້ານ Chóa ຕາແສງ Dlyee Yang, ເມືອງ H’leo, ແຂວງ ດັກລັກ, ຍາມໃດກໍ່ຕັ້ງໜ້າເຂົ້າຮ່ວມບັນດາວຽກງານຂອງທ້ອງຖີ່ນ. ແຕ່ລະມື້, ທ່ານໄດ້ສະຫງວນເວລາໄປຢື້ຢາມຖາມຂ່າວ, ລະດົມກຳລັງໃຈບັນດາຄອບຄົວໃນໝູ່ບ້ານ. ເມື່ອມີແຜນນະໂຍບາຍກໍ່ສ້າງຊົນນະບົດໃໝ່, ເຈົ້າກົກເຈົ້າເຫຼົ່າ ມາເຍິດ ໄດ້ຕັ້ງໜ້າໂຄສະນາ, ປຸກລະດົມພໍ່ແມ່ປະຊາຊົນມານະພະຍາຍາມສູ້ຊົນ. ເຈົ້າກົກເຈົ້າເຫຼົ່າໄດ້ເປັນແບບຢ່າງນຳໜ້າໃນການປະກອບເງິນເພື່ອກໍ່ສ້າງທາງໃໝ່, ເຮັດໃຫ້ທຸກຄົນໃນບ້ານປະຕິບັດຕາມ. ນັບແຕ່ປີ 2011 ມາຮອດປະຈຸບັນ, ພ້ອມກັບແຫຼ່ງທຶນຂອງລັດ, ເກືອບ 200 ຄອບຄົວໃນບ້ານ Chóa ໄດ້ປະກອບເງິນກວ່າ 320 ລ້ານດົ່ງ ເພື່ອກໍ່ສ້າງທາງຄົມມະນາຄົມຊົນນະບົດ. ເຈົ້າກົກເຈົ້າເຫຼົ່າ ມາເຍິດ ຮູ້ສຶກເອກອ້າງທະນົງໃຈ ເພາະວ່າປະຈຸບັນບ້ານໄດ້ມີທາງປູຢາງ, ທາງເບຕົງ ແລະ ມີຫໍວັດທະນະທຳຫຼັງໃໝ່ຢ່າງໃຫຍ່ໂຕ ແລະ ສວຍງາມ, ທຸກຄົນຕ່າງກໍ່ເຂົ້າຮ່ວມການກໍ່ສ້າງຊົນນະບົດໃໝ່ດ້ວຍຄວາມພາກພູມໃຈ.
“ເຈົ້າກົກເຈົ້າເຫຼົ່າຫວັງວ່າຈະກ້າວຂຶ້ນເທື່ອລະກ້າວ ແລະ ຕ້ອງເຮັດແນວໃດໃຫ້ປະຊາຊົນເຫັນອົກເຫັນໃຈ ແລະ ປະຕິບັດຕາມ. ນັ້ນກໍ່ແມ່ນແຜນະໂຍບາຍຂອງພັກ, ກົດໝາຍຂອງລັດ“.
ເຈົ້າກົກເຈົ້າເຫຼົ່າລົງແຕ່ລະຄອບຄົວເພື່ອຂົນຂວາຍປະຊາຊົນເຂົ້າຮ່ວມການກໍ່ສ້າງຊົນນະບົດໃໝ່
(ພາບ: ອິນເຕີແນດ) ຢູ່ບ້ານ Đung A, ຕາແສງ Ea Khal, ເມືອງ Ea H’leo ເຈົ້າກົກເຈົ້າເຫຼົ່າ ມາອານ ກໍ່ແມ່ນຜູ້ນຳໜ້າໃນບັນດາຂະບວນການແຂ່ງຂັນ, ພ້ອມກັບທົ່ວປວງຊົນສາມັກຄີກໍ່ສ້າງຊົນນະບົດໃໝ່. ຕາມເຈົ້າກົກເຈົ້າເຫຼົ່າ ມາອານ ແລ້ວ, ເພື່ອໃຫ້ທຸກຄົນໃນບ້ານຟັງຕາມ, ກ່ອນອື່ນໝົດຄອບຄົວຂອງຕົນຕ້ອງສ້າງຄວາມຮັ່ງມີໃຫ້ໄດ້ ແລະ ເປັນແບບຢ່າງນຳໜ້າໃນການປະກອບສ່ວນໃຫ້ປະຊາຄົມ. ຄິດຄືແນວໃດ ກໍ່ເຮັດຄືແນວນັ້ນ, ເຈົ້າກົກເຈົ້າເຫຼົ່າ ມາອານ ໄດ້ພ້ອມກັບລູກ, ຫຼານຕັ້ງໜ້າອອກແຮງງານທຳການຜະລິດ. ດ້ວຍເນື້ອທີ່ປູກກາເຟ, ໝາກຜິກໄທ ແລະ ໜອງລ້ຽງປາ 3 ເຮັກຕາ, ແຕ່ລະປີຄອບຄົວເຈົ້າກົກເຈົ້າເຫຼົ່າ ມາອານ ສາມາດສ້າງລາຍຮັບໄດ້ກວ່າ 600 ລ້ານດົ່ງ. ໂດຍປະຕິບັດຕາມເຈົ້າກົກເຈົ້າເຫຼົ່າ ມາອານ, ຫຼາຍຄອບຄົວຢູ່ບ້ານ Đung A ກໍ່ບືນຕົວຂຶ້ນພັດທະນາເສດຖະກິດ, ມີຫຼາຍຄອບຄົວໄດ້ກາຍເປັນຄອບຄົວຮັ່ງມີພໍສົມຄວນ... ຈາກນັ້ນເຂົາເຈົ້າພ້ອມແລ້ວທີ່ຈະປະກອບສ່ວນກໍ່ສ້າງບັນດາກິດຈະກຳສາທາລະນະໃນບ້ານ. ເຈົ້າກົກເຈົ້າເຫຼົ່າ ມາອານ, ໃຫ້ຮູ້ວ່າ:
“ການຊ່ວຍເຫຼືອປະຊາຊົນຢູ່ອ້ອມພັດທະນາເສດຖະກິດ ກໍ່ແມ່ນແຜນນະໂຍບາຍທີ່ພັກ, ລັດໄດ້ວາງອອກ. ຂ້າພະເຈົ້າຈຶ່ງຄິດວ່າຕ້ອງຊ່ວຍເຫຼືອເຂົາເຈົ້າ ເພື່ອໃຫ້ທັງບ້ານພ້ອມກັນພັດທະນາ. ເຮົາປູກຢາງພາລາ, ກາເຟ, ກໍ່ສ້າງຊົນນະບົດໃໝ່... ເຮົາກໍ່ຕ້ອງປຸກລະດົມ, ໂຄສະນາໃຫ້ພໍ່ແມ່ປະຊາຊົນພ້ອມກັນເຮັດ, ພ້ອມທັງປຸກລະດົມລູກຫຼານໄປຮຽນຢ່າງຄົບຖ້ວນ ແລະ ກາຍເປັນຄົນດີ. ນີ້ແມ່ນວຽກງານທີ່ເຮົາປະຕິບັດເປັນປະຈຳ. ປະຈຸບັນມີຫຼາຍຄອບຄົວໄດ້ຮູ້ວິທີທຳມາຫາກິນ ແລະ ລ້ຽງລູກຮຳ່ຮຽນໄດ້ດີ“
ເຈົ້າກົກເຈົ້າເຫຼົ່າແມ່ນຜູ້ທີ່ມີອິດທິພົນໃນເຂດໄຕງວຽນ
(ພາບ: ອິນເຕີແນດ) ທ່ານ ເຈິ່ນວິງ, ຮອງເລຂາຜູ້ປະຈຳການຄະນະພັກເມືອງ Ea H’leo ຢືນຢັນວ່າ. ບັນດາເຈົ້າກົກເຈົ້າເຫຼົ່າ ແລະ ບັນດາຜູ້ທີ່ມີອິດທິພົນຊື່ສຽງໃນເມືອງ Ea H’leo ໄດ້ເສີມຂະຫຍາຍບົດບາດ, ຄວາມຮັບຜິດຊອບເປັນຢ່າງດີ, ກາຍເປັນບ່ອນອີງດ້ານຈິດໃຈ ເພື່ອໃຫ້ບັນດາຄອບຄົວໃນບ້ານມານະພະຍາຍາມບືນຕົວຂຶ້ນ, ປະກອບສ່ວນກໍ່ສ້າງທ້ອງຖີ່ນໃຫ້ນັບມື້ນັບພັດທະນາ:
“ເສີມຂະຫຍາຍບັນດາໝາກຜົນທີ່ບັນລຸໄດ້ໃນໄລຍະຜ່ານມາ, ພວກຂ້າພະເຈົ້າສືບຕໍ່ເອົາໃຈໃສ່, ກຳນົດທິດທາງ ເພື່ອໃຫ້ເຈົ້າກົກເຈົ້າເຫຼົ່າ, ເຈົ້າບ້ານ, ເຊິ່ງແມ່ນຜູ້ທີ່ມີອິດທິພົນຊື່ສຽງໃນບ້ານ, ປຸກລະດົມທຸກຄົນອອກແຮງງານ ທຳການຜະລິດ, ຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍໃນໝູ່ບ້ານ, ຈາກນັ້ນຍົກສູງຊີວິດຂອງປະຊາຊົນ, ປະກອບສ່ວນພັດທະນາເມືອງໃຫ້ເປັນປົກກະຕິ“.
ເມືອງ Ea H’leo ມີ 53 ບ້ານຊົນເຜົ່າສ່ວນໜ້ອຍ. ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງໃນການກໍ່ສ້າງຊົນນະບົດໃໝ່ກໍ່ຕາມ ແຕ່ດ້ວຍຄວາມຮັບຜິດຊອບ ແລະ ຄວາມມານະພະຍາຍາມຂອງຕົນ, ບັນດາເຈົ້າກົກເຈົ້າເຫຼົ່າຢູ່ທີ່ນີ້ ພວມພ້ອມກັບປະຊາຊົນທຸກຄົນໃນເມືອງກໍ່ສ້າງຊົນນະບົດໃໝ່, ເຮັດໃຫ້ຊີວິດຂອງປະຊາຊົນນັບມື້ນັບພັດທະນາ.