ຕາແສງ ອານົງ, ຫ່າງຈາກໃຈກາງເມືອງປະມານ 12 ກ.ມ, ໄດ້ຮັບເລືອກເປັນຕາແສງເພື່ອກໍ່ສ້າງທົດລອງຮູບແບບ “ຊົນນະບົດໃໝ່“. ກ່ອນທີ່ສູນກາງປຸກລະດົມໂຄງການກໍ່ສ້າງຊົນນະບົດໃໝ່, ເມືອງ ໄຕຢາງ ໄດ້ເລືອກຕາແສງ ອານົງ ເພື່ອປະຕິບັດທົດລອງໂຄງການ ”ກະສີກຳ, ຊາວກະສີກອນ ແລະ ຊົນນະບົດ” ນັບແຕ່ປີ 2008. ການລົງທຶນຂອງເມືອງ, ຂອງແຂວງໃຫ້ແກ່ຕາແສງ ອານົງ ແມ່ນເງື່ອນໄຂອຳນວຍຄວາມສະດວກ ເພື່ອໃຫ້ຕາແສງ ອານົງ ສືບຕໍ່ຜັນຂະຫຍາຍໂຄງການແຫ່ງຊາດວ່າດ້ວຍການກໍ່ສ້າງຊົນນະບົດໃໝ່. ພາຍຫຼັງ 1 ປີທີ່ໄດ້ຮັບເລືອກເປັນຕາແສງປະຕິບັດທົດລອງໂຄງການດັ່ງກ່າວແລ້ວ, ມາຮອດປະຈຸບັນ ເມື່ອທຽບໃສ່ 19 ມາດຖານແຫ່ງຊາດກ່ຽວກັບຊົນນະບົດໃໝ່ເຊັ່ນ: ການວາງແຜນກຳນົດ, ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ, ການຈັດຕັ້ງການຜະລິດ, ຈຳນວນຄອບຄົວທີ່ທຸກຍາກ..ນັ້ນ. ທົ່ວຕາແສງບັນລຸໄດ້ກວ່າ 60% ຈຳນວນຕົວເລກຄາດໝາຍ. ກ່ຽວກັບການຜະລິດກະສີກຳ - ປ່າໄມ້ ແມ່ນຂະຫຍາຍຟາມໄດ້ 5 ຮູບແບບ, ແລະ ບຸກເບີກ, ຂະຫຍາຍເນື້ອທີ່ປູກເຂົ້ານາທາມຈາກ 27 ເຮັກຕາ (ໃນປີ 2009) ຂຶ້ນເປັນເກືອບ 40 ເຮັກຕາ (ໃນປີ 2011) ແລະ ນຳເອົາວິທະຍາສາດ ເຕັກໂນໂລຢີ ເຂົ້າໝູນໃຊ້ໃນການຜະລິດ, ອັນໄດ້ຍົກສະມັດຕະພາບການຜະລິດເຂົ້າຂຶ້ນ 5,6 ໂຕນ/ເຮັກຕາ. ນອກນັ້ນ, ທາງຕາແສງ ແລະ ອຳນາດການປົກຄອງທຸກຂັ້ນ ກໍ່ໄດ້ຊ່ວຍເຫຼືອດ້ານເບ້ຍໄມ້ ແລະ ແນວພັນສັດລ້ຽງໃຫ້ແກ່ປະຊາຊົນ ເພື່ອເຮັດໃຫ້ຈຳນວນສັດລ້ຽງແລະຜົນລະປູກມີຄຸນນະພາບສູງກວ່າ, ອັນໄດ້ປະກອບສ່ວນເພີ່ມລາຍຮັບໃຫ້ແກ່ປະຊາຊົນ. ປະຈຸບັນ, ເສັ້ນທາງໄປຍັງຕາແສງ ອານົງ ໄດ້ຮັບການປູຢາງ, ແລະ ມີຂົວເບຕົງຖາວອນແລ້ວ. ທົ່ວຕາແສງມີເນື້ອທີ່ດິນປູກເຂົ້ານາທາມກວ່າ 140 ເຮັກຕາ, ເນື້ອທີ່ປູກຢາງພາລາກວ່າ 100 ເຮັກຕາ. ທ່ານ ອາລັງລ໋າຍ, ຮອງປະທານຄະນະກຳມະການປະຊາຊົນຕາແສງ ອານົງ, ໃຫ້ຮູ້ວ່າ:
”ໃນເມື່ອກ່ອນ ປະຊາຊົນເຄີຍຖາງປ່າເຮັດໄຮ່, ປະຈຸບັນເມື່ອຕາແສງ ອານົງ ປະຕິບັດທົດລອງກໍ່ສ້າງຊົນນະບົດໃໝ່, ປະຊາຊົນໄດ້ທຳການຜະລິດເຂົ້ານາທາມ, ປູກຢາງພາລາ. ທິດທາງຂອງເມືອງແມ່ນລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ດັ່ງນັ້ນປະຊາຊົນບໍ່ຖາງປ່າເຮັດໄຮ່ອີກ, ເຂົາເຈົ້າມີນາ, ມີເສັ້ນທາງຄົມມະນາຄົມ, ມີໂຮງຮຽນ, ສຸກສາລາ ແລະ ໃນໄລຍະຈະມາເຖິງແມ່ນມີໄຟຟ້າອີກ”.
ຈາກຜົນສຳເລັດໃນເບື້ອງຕົ້ນຂອງຕາແສງ ອານົງ, ເມືອງ ໄຕ ຢາງ ໄດ້ເລືອກເຝັ້ນ 3 ຕາແສງຕື່ມອີກແມ່ນ ຕາແສງ ອາຊາງ, ອາຕຽງ, ອາເວືອງ ເພື່ອຜັນຂະຫຍາຍໂຄງການກໍ່ສ້າງ “ຊົນນະບົດໃໝ່“. ປະຈຸບັນ, ທາງຕາແສງພວມສູມໃສ່ເຂົ້າໃນການຜັນຂະຫຍາຍບັນດາຮູບແບບຜະລິດກະສີກຳ, ຖ່າຍທອດເຕັກນິກໃນການປູກຝັງ ແລະ ລ້ຽງສັດໃຫ້ແກ່ປະຊາຊົນ, ກໍ່ຄືຮັກສາ, ປັບປຸງບັນດາລະບຽບການດ້ານວັດທະນະທຳຢູ່ຂັ້ນຮາກຖານ, ຖືເປັນສຳຄັນການຮັກສາສີສັນວັດທະນະທຳຂອງຊາດ.
ແຜນນະໂຍບາຍກໍ່ສ້າງຊົນນະບົດໃໝ່ ໄດ້ຮັບການສະໜັບສະໜູນຈາກປະຊາຊົນ. ພິເສດແມ່ນ ຢູ່ບາງແຫ່ງ ປະຊາຊົນໄດ້ມອບດິນ, ມອບຕົ້ນໄມ້ດ້ວຍຄວາມສະໝັກໃຈເພື່ອກໍ່ສ້າງເສັ້ນທາງ ແລະ ຂົວ ໂດຍບໍ່ຮຽກຮ້ອງຄ່າຊົດເຊີຍ. ເຂົາເຈົ້າຮັບຮູ້ໄດ້ວ່າ, ໃນເງື່ອນໄຂທີ່ເງິນລົງທຶນຂອງລັດຖືກຈຳກັດນັ້ນ, ເລື່ອງປະຊາຊົນຮ່ວມແຮງຮ່ວມໃຈພ້ອມກັນພັດທະນາແມ່ນຄວາມຈຳເປັນທີ່ສຸດ. ທ່ານ ອາລັງໂຕ໋ຍ, ຢູ່ຕາແສງ ອາຊານ, ເມືອງ ໄຕຢາງ ໃຫ້ຮູ້ວ່າ:
”ພັກ ແລະ ລັດມີແຜນນະໂຍບາຍລົງທຶນໃຫ້ແກ່ ໄຕຢາງ ເພື່ອກໍ່ສ້າງຊົນນະບົດໃໝ່, ພໍ່ແມ່ປະຊາຊົນ ຜູ້ໃດກໍ່ຮູ້ສຶກເບີກບານມ່ວນຊື່ນຫຼາຍ. ປະຊາຊົນຕອບສະໜອງແຜນນະໂຍບາຍທັງໝົດ ແລະ ພ້ອມແລ້ວທີ່ປະກອບທີ່ດິນ ແລະໄມ້ເພື່ອກໍ່ສ້າງເສັ້ນທາງ ແລະ ຂົວ. ຫວັງວ່າ, ລັດຈະສືບຕໍ່ມີນະໂຍບາຍບຸລິມາສິດໃຫ້ພໍ່ແມ່ປະຊາຊົນຢູ່ເຂດພູດອຍ ເພື່ອໃຫ້ເຂົາເຈົ້າສາມາດສ້າງຊີວິດດ້ານວັດທະນະທຳໃນໝູ່ບ້ານຕາແສງໃຫ້ດີ ກວ່າ”.
ເຖິງວ່າຍັງມີຫຼາຍມາດຖານ ທີ່ບັນດາຕາແສງປະຕິບັດທົດລອງ ການກໍ່ສ້າງຊົນນະບົດໃໝ່ຢູ່ເມືອງ ໄຕຢາງ ຕ້ອງພະຍາຍາມເຮັດໃຫ້ສຳເລັດກໍ່ຕາມ, ແຕ່ທາງເມືອງ ໄຕຢາງ, ແຂວງ ກວາງນາມ ຈະຖອດຖອນທຸກສິ່ງທຸກຢ່າງທີ່ບັນລຸໄດ້ໃນການກໍ່ສ້າງຮູບແບບນີ້ ເພື່ອສືບຕໍ່ປະຕິບັດຢູ່ບັນດາຕາແສງອື່ນໆ. ທ່ານ ເບີຮີວບຽກ, ເລຂາຄະນະພັກເມືອງ ໄຕຢາງ, ຖືວ່າ:
”ຂ້າພະເຈົ້າປະຕິບັດຕາມມາດຖານຂອງລັດຖະບານກ່ຽວກັບຊົນນະບົດໃໝ່. ໃນຈຳນວນ 19 ມາດຖານ, ພວກເຮົາໄດ້ຄັດເລືອກມາດຖານໃດສຳຄັນແມ່ນຈະປະຕິບັດກ່ອນ. ການກໍ່ສ້າງຊົນນະບົດໃໝ່ຂອງ ໄຕຢາງ ແມ່ນແຕກຕ່າງກັບຢູ່ເມືອງຕ່າງໆໃນແຂວງ ກວາງນາມ, ຍ້ອນເງືອນໄຂທຳມະຊາດ. ເຖິງຢ່າງໃດກໍ່ຕາມ, ພວກເຮົາຈະອີງໃສ່ແຜນກຳນົດເພື່ອປະຕິບັດ”.
ທ່ານ ເບີຮີວບຽກ ໃຫ້ຮູ້ວ່າ ເມືອງ ໄຕຢາງ ໄດ້ວາງແຜນປູກປ່າເພື່ອແນໃສ່ຂະຫຍາຍເນື້ອທີ່ປ່າຕື່ມອີກ. ນອກນັ້ນ, ດ້ວຍທ່າແຮງຂອງເຂດພູດອຍ, ເມືອງ ໄຕຢາງ ກໍ່ຊີ້ນຳໃຫ້ທ້ອງຖີ່ນປູກຕົ້ນໄມ້ປະເພດຕ່າງໆທີ່ມີທ່າແຮງເຊັ່ນ: ຕົ້ນຢາງພາລາ, ກ້ວຍ, ໝາກນັດ.. ໃນ 4 ປັດໃຈຄື: “ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ“ນັ້ນ, ໄຟຟ້າຈະໄດ້ຮັບການກໍ່ສ້າງກ່ອນ ເພື່ອຮັບໃຊ້ໃຫ້ແກ່ວິວັດແຫ່ງການຫັນເປັນອຸດສາຫະກຳ ແລະ ທັນສະໄໝ. ດ້ວຍຄວາມເຫັນດີເຫັນພ້ອມ, ຮ່ວມແຮງຮ່ວມໃຈກໍ່ສ້າງຂອງພະນັກງານ ກໍ່ຄື ປະຊາຊົນແຕ່ລະຄົນ, ເມືອງ ໄຕຢາງ ຈະປະຕິບັດສຳເລັດໂຄງການກໍ່ສ້າງຊົນນະບົດໃໝ່ຢ່າງແນ່ນອນ.