(vovworld) - ການນຳໜ້າ, ຄວາມສຸດຈິດສຸດໃຈ ແລະ ຫົວຄິດປະດິດສ້າງ,. ກຳລັງສະມາຊິກຊາວໜຸ່ມ, ຊາວໜຸ່ມແຂວງລາຍເຈົາ ໄດ້ສ້າງຂີດໝາຍຜ່ານບັນດາກິດຈະກຳ, ຮູບແບບ, ວຽກງານທີ່ຫຍຸ້ງຍາກໃນການປະຕິບັດໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່. ດ້ວຍຜົນງານຂອງຕົນ, ສະມາຊິກຊາວໜຸ່ມ, ຊາວໜຸ່ມໃນແຂວງໄດ້ປະກອບສ່ວນຢ່າງຕັ້ງໜ້າເຂົ້າໃນການປັບປຸງບັນດາມາດຖານກໍ່ສ້າງຊົນນະບົດໃໝ່.
ຕາແສງຊານທ່າງ, ນະຄອນລາຍເຈົາ ແມ່ນໜຶ່ງໃນສອງນະຄອນທ້ອງຖີ່ນທຳອິດຂອງແຂວງລາຍເຈົາໄດ້ຮັບການຮັບຮອງວ່າ ແມ່ນຕາແສງຊົນນະ
ບົດໃໝ່. ໄດ້ຮັບຜົນງານດັ່ງກ່າວ, ບໍ່ພຽງແຕ່ມີການເຂົ້າຮ່ວມຢ່າງຕັ້ງໜ້າຂອງອຳນາດການປົກຄອງທ້ອງຖີ່ນ, ຄວາມເຫັນດີເຫັນພ້ອມຂອງປະຊາຊົນບັນດາເຜົ່າໃນບໍລິເວນເທົ່ານັ້ນ, ຫາກຍັງມີການປະກອບສ່ວນບໍ່ໜ້ອຍຂອງກຳລັງໄວໜຸ່ມອີກດ້ວຍ. ດ້ວຍ 11 ບ້ານ, 5 ຊົນເຜົ່າ. ເພື່ອເຮັດໃຫ້ປະຊາຊົນຮ່ວມແຮງຮ່ວມໃຈ, ໃນຊຸມມື້ທຳອິດແຫ່ງການຜັນຂະຫຍາຍໂຄງການ, ກຳລັງສະມາຊິກຊາວໜຸ່ມ, ຊາວໜຸ່ມຕາແສງ ໄດ້ນຳໜ້າໃນການໂຄສະນາ, ຂົນຂວາຍປະຊາຊົນໃຫ້ເຂົ້າໃຈແຜນນະໂຍບາຍ, ນະໂຍບາຍຂອງພັກ ແລະ ລັດກ່ຽວກັບໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່. ໃນ 4 ປີ ແຫ່ງການຜັນຂະຫຍາຍ, ມີສະມາຊິກຊາວໜຸ່ມ, ຊາວໜຸ່ມ 200 ກວ່າເທື່ອຄົນໃນຕາແສງ ໄດ້ເຂົ້າຮ່ວມການສ້ອມແປງ, ກໍ່ສ້າງທາງຄົມມະນາຄົມຊົນນະບົດ, ຄອງເໝືອງ, ເຮັດອະນາໄມ ແລະ ປະຕິບັດບັນດາຮູບແບບພັດທະນາເສດຖະກິດ ເພື່ອໃຫ້ປະຊາຊົນປະຕິບັດຕາມ. ທ່ານ ໂດວັນແທ່ງ, ເລຂາຄະນະຊາວໜຸ່ມຕາແສງຊານທ່າງ, ແບ່ງປັນວ່າ:
“ພວກຂ້າພະເຈົ້າລະດົມສະມາຊິກຊາວໜຸ່ມ, ຊາວໜຸ່ມເຂົ້າຮ່ວມການພັດທະນາເສດຖະກິດ, ສັງຄົມ, ກໍ່ສ້າງທາງຄົມມະນາຄົມຊົນນະບົດ, ປັບປຸງມາດຖານທາງຄົມມະນາຄົມຊົນນະບົດ. ປີ 2015, ຄະນະບໍລິຫານງານຊາວໜຸ່ມຕາແສງລະດົມສະມາຊິກຊາວໜຸ່ມ, ຊາວໜຸ່ມສືບຕໍ່ຮັກສາບັນດາມາດຖານທີ່ບັນລຸໄດ້ແລ້ວ, ພະຍາຍາມສູ້ຊົນເພື່ອປະຕິບັດສຳເລັດບັນດາມາດຖານທີ່ບໍ່ທັນບັນລຸໄດ້, ເພື່ອສຳເລັດ 19 ມາດຖານກໍ່ສ້າງຊົນນະບົດໃໝ່ຂອງຕາແສງຊານທ່າງ“.
ເມືອງສິ່ນໂຮ່ ເຊິ່ງແມ່ນໜຶ່ງໃນບັນດາທ້ອງຖີ່ນປະສົບກັບຄວາມຫຍຸ້ງຍາກທີ່ສຸດຂອງແຂວງລາຍເຈົາ. ປະຈຸບັນບໍ່ທັນມີຕາແສງໃດໃນເມືອງບັນລຸມາດຖານກໍ່ສ້າງຊົນນະບົດໃໝ່ໄດ້ເທື່ອ. ເຖິງຢ່າງໃດກໍ່ຕາມ, 21 ຕາແສງໃນເມືອງບັນລຸໄດ້ 9/19 ມາດຖານກ່ຽວກັບການກໍ່ສ້າງຊົນນະບົດໃໝ່ແລ້ວ. ເພື່ອປະກອບສ່ວນພ້ອມກັບອຳນາດການປົກຄອງທ້ອງຖີ່ນຍູ້ແຮງຄວາມຄືບໜ້າໃນການກໍ່ສ້າງຊົນນະບົດໃໝ່, ກຳລັງ ສະມາຊິກຊາວໜຸ່ມ, ຊາວໜຸ່ມເມືອງສິ່ນໂຮ່ ໄດ້ລົງບັນດາຕາແສງປະສົບກັບຄວາມຫຍຸ້ງຍາກເປັນພິເສດ, ສົມທົບກັບປະຊາຊົນບັນດາເຜົ່າໃນທ້ອງຖີ່ນສຸມໃສ່ເຂົ້າໃນການສ້ອມແປງ, ຍົກລະດັບ, ທາງຄົມມະນາຄົມ. ໃນ 4 ປີແຫ່ງການຜັນຂະຫຍາຍ, ສະມາຊິກຊາວໜຸ່ມ, ຊາວໜຸ່ມໃນເມືອງກໍ່ສ້າງທາງໄດ້ເກືອບ 100 ກມ, ສ້າງຄວາມສະດວກໃຫ້ປະຊາຊົນໄປ-ມາ, ແລກປ່ຽນສິນຄ້າ, ພັດທະນາເສດຖະກິດ, ເພີ່ມລາຍຮັບໃຫ້ປະຊາຊົນ, ຍູ້ຄວາມທຸກຍາກອຶດຫິວໃຫ້ຖອຍໄປ. ພິເສດ, ປະຈຸບັນໄດ້ມີ ສະມາຊິກຊາວໜຸ່ມ, ຊາວໜຸ່ມ 3000 ກວ່າຄົນພວມລົງຮາກຖານ, ເພີ່ມທະວີການໂຄສະນາຈຸດປະສົງ, ຄວາມໝາຍຂອງໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່. ອ້າຍ ດົ່ງມິງທັ໋ງ, ຮອງເລຂາຄະນະຊາວໜຸ່ມເມືອງ ສິ່ນໂຮ່, ໃຫ້ຮູ້ວ່າ:
“ນອກຈາກສ້ອມແປງທາງໃນເຂດຊົນນະບົດແລ້ວ, ພວກຂ້າພະເຈົ້າຍັງຂົນຂວາຍສະມາຊິກຊາວໜຸ່ມ, ຊາວໜຸ່ມຊ່ວຍກໍ່ສ້າງເຮືອນຢູ່ໃຫ້ຄອບຄົວທຸກຍາກຕາມໂຄງການ 167 ຂອງລັດຖະບານ ແລະ ສົມທົບກັບທະນາຄານນະໂຍບາຍຍູ້ແຮງແຫຼ່ງທຶນໃຫ້ສະມາຊິກຊາວໜຸ່ມ, ຊາວໜຸ່ມກູ້ຢືມ, ດ້ວຍຈຳນວນທຶນ 41 ຕື້ດົ່ງ. ໄລຍະຈະມາເຖິງ, ຊາວໜຸ່ມສືບຕໍ່ກໍ່ສ້າງທາງຊົນນະບົດໃໝ່, ແລະ ສົມທົບກັບທະນາຄານນະໂຍບາຍສັງຄົມເພື່ອປ່ອຍເງິນໃຫ້ຊາວໜຸ່ມກູ້ຢືມ“.
ໄລຍະຜ່ານມາ, ກຳລັງ ສະມາຊິກຊາວໜຸ່ມ, ຊາວໜຸ່ມແຂວງລາຍເຈົາຍັງຈັດຕັ້ງການກວດ ແລະ ປິ່ນປົວພະຍາດໂດຍບໍ່ເສຍຄ່າໃຫ້ແກ່ຊາວຊົນເຜົ່າຢູ່ເຂດຫ່າງໄກສອກຫຼີກ, ເຂດຊາຍແດນນັບຮ້ອຍຄັ້ງ. ນອກນັ້ນ, ສະມາຊິກຊາວໜຸ່ມ, ຊາວໜຸ່ມໃນແຂວງຍັງບູລະນະສ້ອມແປງ ແລະ ກໍ່ສ້າງເຮືອນເຄິ່ງກິນນອນ, ຫໍວັດທະນະທຳບ້ານ, ເຮືອນຢູ່ໃຫ້ບັນດາຄອບຄົວນະໂຍບາຍເກືອບ 150 ຫຼັງອີກ. ອ້າຍ ຫງວຽນດິ່ງຕ໋ວານ, ຮອງຫົວໜ້າຄະນະຊາວໜຸ່ມແຂວງລາຍເຈົາ, ໃຫ້ຮູ້ວ່າ:
“ດ້ວຍການຮ່ວມແຮງຮ່ວມໃຈຂອງຄະນະຊາວໜຸ່ມ ໄດ້ເຮັດໃຫ້ການຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ຕາແສງບິ່ງລື, ເມືອງຕາມເດື່ອງ; ຕາແສງຊານທ່າງ, ນະຄອນລາຍເຈົາ; ຕາແສງເມື່ອງທານ, ເມືອງທານອວຽນໄດ້ຮັບຜົນດີ. ພວກຂ້າພະເຈົ້າກໍ່ເຂົ້າຮ່ວມການກໍ່ສ້າງຊົນນະບົດໃໝ່, ດ້ວຍທິດນຳທີ່ວ່າ, ສະມາຊິກຊາວໜຸ່ມແຕ່ລະຄົນມີການເຄື່ອນໄຫວແທດຈິງຢ່າງໜຶ່ງ ເພື່ອຂໍ່ານັບຊົມເຊີຍກອງປະຊຸມໃຫຍ່ພັກທຸກຂັ້ນ“.
ກໍ່ສ້າງຊົນນະບົດໃໝ່ແມ່ນແຜນນະໂຍບາຍທີ່ມີລະດັບຍຸດທະສາດສຳຄັນພິເສດຂອງພັກ ແລະ ລັດ ແນໃສ່ຫັນການປະຕິບັດມະຕິກ່ຽວກັບກະສິກຳ, ກະສິກອນ, ຊົນນະບົດເປັນອັນລະອຽດ. ດ້ວຍເຫດນັ້ນ ການກໍ່ສ້າງຊົນນະບົດໃໝ່ແມ່ນໜ້າທີ່ຂອງທັງລະບົບການເມືອງ ແລະ ທົ່ວສັງຄົມ, ໃນນັ້ນສະມາຊິກຊາວໜຸ່ມ, ຊາວໜຸ່ມແມ່ນກຳລັງປະຈັນບານນຳໜ້າ. ດ້ວຍການນຳໜ້າເຂົ້າຮ່ວມການເຄື່ອນກໍ່ສ້າງຊົນນະບົດໃໝ່, ກຳລັງສະມາຊິກຊາວໜຸ່ມ, ຊາວໜຸ່ມແຂວງລາຍເຈົາ ໄດ້ ແລະ ພວມຢັ້ງຢືນບົດບາດຂອງຕົນປະກອບສ່ວນເຂົ້າໃນການພັດທະນາລວມຂອງແຂວງ.