(vovworld) - ເຄື່ອງປັ້ນດິນເຜົາເບົ່າຈຸກ ທີ່ມີຊື່ສຽງທັງພາຍໃນ ແລະ ຕ່າງປະເທດນັ້ນ ແມ່ນໄດ້ຮັບການຜະລິດຢູ່ເທດສະບານເຟືອກເຢິນ, ເມືອງນິງເຟືອກ, ແຂວງນິງທ້ວນ, ຫ່າງຈາກນະຄອນຟານຣາງ - ທາດຈ່າມ ໄປທາງໃຕ້ປະມານ 10 ກມ. ໃນການກໍ່ສ້າງຊົນນະບົດໃໝ່, ໝູ່ບ້ານອາຊີບຜະລິດເຄື່ອງປັ້ນດິນເຜົາເບົ່າຈຸກ ມີວິທີປະຕິບັດສະເພາະ ນັ້ນແມ່ນເສີມຂະຫຍາຍຄວາມສາມາດບົ່ມຊ້ອນຂອງໝູ່ບ້ານອາຊີບ, ປ່ຽນໃໝ່ເຕັກໂນໂລຢີຜະລິດ ດ້ວຍການກໍ່ສ້າງເຕົາເຜົາປະຢັດເຊື້ອເພີງ, ລົງທຶນໜ້ອຍ, ແຕ່ພັດເພີ່ມສະມັດຕະພາບ ແລະ ຄຸນນະພາບຜະລິດຕະພັນ, ຍົກສູງລາຍຮັບໃຫ້ແກ່ສະມາຊິກສະຫະກອນ.
ເຄື່ອງປັ້ນດິນເຜົາເບົ່າຈຸກໄດ້ຮັບຄວາມນິຍົມທັງພາຍໃນ ແລະຕ່າງປະເທດ
ເຄື່ອງປັ້ນດິນເຜົາເບົ່າຈຸກ ໄດ້ຮັບຄວາມນິຍົມຊົມຊອບຈາກຜູ້ໃຊ້ສອຍທັງຢູ່ພາຍໃນ ແລະ ຕ່າງປະເທດ, ຍ້ອນມັນບໍ່ພຽງແຕ່ມີຫຼາຍຮູບຫຼາຍແບບ ແລະ ອຸດົມສົມບູນກ່ຽວກັບປະເພດເທົ່ານັ້ນ, ຫາກຍັງມີສີສັນພິເສດຂອງວັດທະນະທຳເຜົ່າຈຳອີກດ້ວຍ. ກ່ອນນີ້, ຍ້ອນເຄື່ອງປັ້ນດິນເຜົາເກືອບທັງໝົດຢູ່ທີ່ນີ້ ໂດຍຊາວກະສີກອນຜະລິດຕາມປະສົບການ ແລະ ເຜົາຢູ່ກາງແຈ້ງຕາມວິທີ ທີ່ເປັນມູນເຊື້ອ, ດ້ວຍອຸນຫະພູມບໍ່ສູງ, ຜະລິດຕະພັນຈຶ່ງບໍ່ບັນລຸໄດ້ມາດຖານ. ແຕ່ພາຍຫຼັງວິວັດການສຳຫຼວດຢູ່ບາງໝູ່ບ້ານຜະລິດເຄື່ອງປັ້ນດິນເຜົາ, ເຫັນວ່າວິທີການຜະລິດເຄື່ອງປັ້ນດິນເຜົາຂອງໝູ່ບ້ານແທງຮ່າ, ແຂວງກວາງນາມ ແມ່ນເໝາະສົມກັບໝູ່ບ້ານອາຊີບເບົ່າຈຸກ. ສູນສົ່ງເສີມອຸດສາຫະກຳ, ການຄ້າແຂວງນິງທ້ວນ ຈຶ່ງສ້າງໂຄງການໜູນຊ່ວຍຮູບແບບເຕົາເຄື່ອງປັ້ນດິນເຜົາ ຕາມຮູບແບບຂອງໝູ່ບ້ານແທງຮ່າ. ທັງເຊີນນັກສິລະປະການ, ນາຍຊ່າງທີ່ມີປະສົບການຂອງໝູ່ບ້ານແທງຮ່າ ມາກໍ່ສ້າງ, ຖ່າຍຖອດວິທີເຜົາເຄື່ອງປັ້ນດິນເຜົາໃຫ້ ຮາກຖານຜະລິດເຄື່ອງປັ້ນດິນເຜົາ 2 ແຫ່ງຂອງໝູ່ບ້ານເບົ່າຈຸກ. ຄ່າໜູນຊ່ວຍການລົງທຶນກໍ່ສ້າງເຕົາເຜົາແຕ່ລະເຕົາແມ່ນ 30 ລ້ານດົ່ງ, ໃນນັ້ນແຕ່ລະຮາກຖານປະກອບ 10 ລ້ານດົ່ງ, ຕາມຮູບແບບທັງລັດ ແລະ ປະຊາຊົນພ້ອມກັນເຮັດ. ຮູບແບບເຕົາເຜົາຂອງໜູ່ບ້ານແທງຮ່າ, ກວາງນາມ ມີຂະໜາດນ້ອຍ, ວັດຖຸກໍ່ສ້າງສ່ວນຫຼາຍແມ່ນດິນຈີ່, ດັ່ງນັ້ນຈຶ່ງເໝາະສົມທີ່ສຸດກັບຮູບການຜະລິດຄອບຄົວຢູ່ໝູ່ບ້ານນິງທ້ວນ. ສິ່ງສຳຄັນກວ່ານັ້ນແມ່ນ, ວັດຖຸໃຊ້ເພື່ອເຜົາແມ່ນຂີ້ແກບ, ຫຼືເສດຈາກການຜະລິດກະສີກຳທີ່ມີຫຼາຍຢູ່ທ້ອງຖີ່ນ. ສິ່ງດັ່ງກ່າວໄດ້ປະກອບສ່ວນຮັກສາສິ່ງແວດລ້ອມ, ຫຼຸດລາຄາຜະລິດຕະພັນ. ທ່ານ ດ່າງແຊມ, ຢູ່ຮາກຖານຜະລິດເຄື່ອງປັ້ນດິນເຜົາເບົ່າຈຸກ ຕາມຮູບແບບດັ່ງກ່າວ, ໃຫ້ຮູ້ວ່າ. ໂຄງການເລີ່ມຜັນຂະຫຍາຍແຕ່ທ້າຍປີ 2014 ແລະ ໃນເບື້ອງຕົ້ນໄດ້ນຳມາເຊິ່ງຜົນປະໂຫຍດທີ່ແທດຈິງໃຫ້ບັນດາຮາກຖານຜະລິດ ເຄື່ອງປັ້ນດິນເຜົາເບົ່າຈຸກ.
“ປະສິດທິຜົນທີ່ໄດ້ຮັບຈາກຮູບແບບນີ້ແມ່ນ: ອັດຕາຜະລິດຕະພັນຖືກແຕກແມ່ນຫຼຸດລົງຍັງເຫຼືອພຽງປະມານແຕ່ 2% ເທົ່ານັ້ນ; ທີສອງແມ່ນ ຍາມຝົນຕົກ, ລົມແຮງກໍ່ບໍ່ສົ່ງຜົນສະທ້ອນເຖິງການຜະລິດ; ທີສາມແມ່ນເຄື່ອງປັ້ນດິນເຜົາມີຄຸນນະພາບສູງກວ່າ“.
ວີທີເຜົາເຄື່ອງປັ້ນດິນເຜົາຢູ່ກາງແຈ້ງໃນເມື່ອກ່ອນຂອງໝູ່ບ້ານເບົ່າຈຸກ
ສະມາຊິກໃນສະຫະກອນຜະລິດເຄື່ອງປັ້ນດິນເຜົາເບົ່າຈຸກ 26 ຄົນມີຄວາມພາກພູມໃຈທີ່ສຸດ ເມື່ອໄດ້ນຳໃຊ້ເຕົາເຜົາໂດຍສູນສົ່ງເສີມອຸດສາຫະກຳ ແລະ ການຄ້າແຂວງໜູນຊ່ວຍ, ຍ້ອນບັນດາຜົນປະໂຫຍດໂດຍຮູບແບບນີ້ນຳມາໃຫ້ແມ່ນສູງທີ່ສຸດເມື່ອທຽບໃສ່ຮູບແບບທີ່ເປັນມູນເຊື້ອຂອງໝູ່ບ້ານ. ທ່ານ ດົ່ງວັນໂລກ, ຫົວໜ້າສະຫະກອນຜະລິດເຄື່ອງປັ້ນດິນເຜົາເບົ່າຈຸກ, ໃຫ້ຮູ້ວ່າ
“ເມື່ອລັດໜູນຊ່ວຍກໍ່ສ້າງເຕົາເຜົາໃໝ່ນີ້, ໄດ້ສ້າງຄວາມສະດວກທີ່ສຸດໃຫ້ແກ່ປະຊາຊົນໃນການຜະລິດເຄື່ອງປັ້ນດິນເຜົາ. ກ່ອນນີ້ເມື່ອເຜົາ ຕາມຮູບແບບທີ່ເປັນມູນເຊື້ອ, ອັດຕາຜະລິດຕະພັນຖືກແຕກກວມເຖິງ 50%, ແຕ່ປະຈຸບັນຕົວເລກດັ່ງກ່າວມີພຽງ2%ເທົ່ານັ້ນ“.
ເຕົາເຜົາຕາມຮູບແບບຂອງໝູ່ບ້ານແທງຮ່າ
ເມື່ອຕີລາຄາກ່ຽວກັບຜົນປະໂຫຍດຂອງເຕົາເຜົາ, ທ່ານ ຫວໍວຽດຮ໋ຽວ, ຜູ້ອຳນວຍການ ສູນສົ່ງເສີມອຸດສາຫະກຳ ແລະ ການຄ້າແຂວງນິງທ້ວນ, ໃຫ້ຮູ້ຕື່ມອີກວ່າ:
“ເມື່ອທຽບໃສ່ການເຜົາຢູ່ກາງແຈ້ງ, ການເຜົາເຄື່ອງປັ້ນດິນເຜົາໃນເຕົາເຜົາຈະບໍ່ມີຄວັນ, ບໍ່ກໍ່ມົນລະພິດສິ່ງແວດລ້ອມ. ນອກນັ້ນຍັງປະຢັດ ເຊື້ອເພີງອີກ, ເພາະວ່າອຸນຫະພູມຈະຖືກຮັກສາໄວ້ເປັນປົກກະຕິໃນເຕົາເຜົາ… ນີ້ແມ່ນຈຸດດີ ແລະ ມີປະສິດທິຜົນທີ່ສຸດ, ສະນັ້ນຮາກຖານຕ່າງໆຄວນພະຍາຍາມກໍ່ສ້າງເຕົາເຜົາແບບນີ້ໃຫ້ໄດ້ແຕ່ໜຶ່ງເຖິງສອງເຕົາ“.
ຜະລິດຕະພັນທີ່ໄດ້ຮັບການເຜົາຕາມຮູບແບບຂອງໝູ່ບ້ານແທງຮ່າ ໃນທ່າອ່ຽງແຫ່ງການເຊື່ອມໂຍງ ແລະ ພັດທະນາຄືປະຈຸບັນ, ພິເສດແມ່ນໃນກິດຈະການກໍ່ສ້າງຊົນນະບົດໃໝ່, ເລື່ອງນຳເອົາບັນດາຮູບແບບເຕົາເຜົາໃໝ່ ເຂົ້າບັນດາຮາກຖານຜະລິດເຄື່ອງປັ້ນດິນເຜົາຢູ່ໝູ່ບ້ານອາຊີບເບົ່າຈຸກ ຂອງສູນສົ່ງເສີມອຸດສາຫະກຳ ແລະ ການຄ້າແຂວງນິງທ້ວນ ແມ່ນວຽກງານທີ່ເໝາະສົມ. ນີ້ແມ່ນພື້ນຖານເພື່ອໃຫ້ບັນດາຮາກຖານຜະລິດ, ດຳເນີນທຸລະກິດເຄື່ອງປັ້ນດິນເຜົາແຂວງນິງທ້ວນ ສຳຜັດກັບແບບວິທີເຜົາທີ່ເໝາະສົມ, ມີປະສິດທິຜົນ ແລະ ຮັກສາສິ່ງແວດລ້ອມຢູ່ເຂດບ້ານນາທີ່ນັບມື້ນັບພັດທະນາໃນຂະບວນການກໍ່ສ້າງຊົນນະບົດໃໝ່.