(vovworld)- ໂດຍປະຕິບັດຈຸດໝາຍຕົ້ນຕໍແມ່ນສ້າງໂຄງປະກອບພື້ນຖານເສດຖະກິດຫວຽດນາມ ຄືນໃຫມ່, ຄຽງຄູ່ກັບການສ້າງໂຄງປະກອບການລົງທຶນຂອງລັດຄືນໃຫມ່ ແລະ ສ້າງໂຄງປະກອບລັດວິສາຫະກິດຄືນໃຫມ່, ການສ້າງໂຄງປະກອບລະບົບທະນາຄານຄືນໃຫມ່ ພວມໄດ້ຮັບການຕີລາຄາຈາກຜູ້ຊ່ຽວຊານເສດຖະກິດວ່າ ມີການຫັນປ່ຽນຢ່າງເຫັນໄດ້ຊັດ ແລະ ຕັ້ງຫນ້າກວ່າ. ໃນນັ້ນ ຈຸດເດັ່ນແມ່ນບັນດາມາດຕະການກ່ຽວກັບອັດຕາດອກເບ້ຍ ແລະ ແກ້ໄຂຫນີ້ເສຍ. ປີ 2015, ຂະແຫນງທະນາຄານກຳນົດສຸມໃສ່ສ້າງໂຄງປະກອບທະນາຄານຄືນໃຫມ່ ແລະ ຖືວ່າ ນີ້ແມ່ນບາດກ້າວມີລັກສະນະບຸກທະລຸ, ປະກອບສ່ວນຈຳກັດໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ.
|
ຕິດຕາມການຜັນແປຂອງສະພາບການໂລກ ແລະ ຈຸດໝາຍພັດທະນາເສດຖະກິດສັງຄົມຂອງລັດຖະບານ, ໄລຍະຜ່ານມາ, ທະນາຄານແຫ່ງລັດຫວຽດນາມ ໄດ້ເປັນເຈົ້າການໃນການຜັນຂະຫຍາຍບັນດາມາດຕະການຢ່າງຄົບຊຸດ, ໃນນັ້ນ ພົ້ນເດັ່ນແມ່ນອັດຕາດອກເບ້ຍ ເພື່ອກຳນົດທິດ, ຈັດວາງອັດຕາດອກເບ້ຍໃນທ້ອງຕະຫລາດ, ຮັບປະກັນການເຕີບໂຕສິນເຊື່ອຢູ່ໃນລະດັບເໝາະສົມ ແລະ ຮັບປະກັນປະລິມານການຊຳລະໃຫ້ບັນດາອົງການສິນເຊື່ອ. ພ້ອມກັນນັ້ນ, ແຜນຮ່າງສ້າງໂຄງປະກອບຄືນໃຫມ່ ແລະ ແກ້ໄຂຫນີ້ເສຍ ສືບຕໍ່ໄດ້ຮັບການຜັນຂະຫຍາຍຕາມຂັ້ນຕອນ ດ້ວຍບັນດາບາດກ້າວເໝາະສົມ. ບັນດາມາດຕະການຕັ້ງຫນ້ານີ້ ໄດ້ປະກອບສ່ວນຕັ້ງຫນ້າເຂົ້າໃນການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ປີ 2014, ທະນາຄານແຫ່ງລັດ ໄດ້ປະຕິບັດການປັບປຸງຫລຸດຜ່ອນອັດຕາດອກເບ້ຍໃຫ້ເໝາະສົມກັບການຜັນແປຂອງໄພເງິນເຟີ້, ຍ້ອນເຫດນັ້ນ ຈຶ່ງມີການຫນູນຊ່ວຍ ແລະ ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຢ່າງທັນການ. ມາຮອດປະຈຸບັນ, ອັດຕາດອກເບ້ຍເງິນຝາກ ຫລຸດລົງ 1,5-2%/ປີ, ອັດຕາດອກເບ້ຍໃຫ້ກູ້ຢືມຫລຸດລົງປະມານ 2%/ປີ. ນະໂຍບາຍກ່ຽວກັບອັດຕາດອກເບ້ຍ ໄດ້ສ້າງເງື່ອນໄຂໃຫ້ແກ່ບັນດາອົງການສິນເຊື່ອ ລະດົມແຫລ່ງທຶນໄລຍະຍາວ ແລະ ເປັນປົກກະຕິກວ່າ, ຫລຸດຜ່ອນຄວາມຜິດດ່ຽງການກຳນົດເວລາ ລະຫວ່າງຊັບສິນ ແລະ ຫນີ້ສິນ, ຊ່ວຍໃຫ້ການຈັດແບ່ງທຶນໃນພື້ນຖານເສດຖະກິດຢ່າງມີປະສິດທິຜົນ. ທ່ານນາງ ຫງວຽນທິຮົ່ງ, ຮອງຜູ້ວ່າການທະນາຄານແຫ່ງລັດຫວຽດນາມ ໃຫ້ຮູ້ວ່າ:
“ບັນດາຕົວເລກຄາດໝາຍທັງໝົດກ່ຽວກັບເງິນຕາຄື: ເຄື່ອງມືຊຳລະ, ການເຕີບໂຕດ້ານສິນເຊື່ອ, ອັດຕາດອກເບ້ຍສືບຕໍ່ຫລຸດລົງ, ອັດຕາແລກປ່ຽນເງິນຕາເປັນປົກກະຕິ, ການສະສົມເງິນຕາຕ່າງປະເທດເພີ່ມຂຶ້ນ, ສິນເຊື່ອປະຕິບັດຕາມການກຳນົດທິດທີ່ໄດ້ວາງອອກ, ນະໂຍບາຍເງິນຕາ ໄດ້ປະກອບສ່ວນຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ ແລະ ຫນູນຊ່ວຍການເຕີບໂຕເສດຖະກິດໃນປີຜ່ານມາໃຫ້ບັນລຸລະດັບ 5,93% ສູງກວ່າລະດັບ ທີ່ວາງອອກແມ່ນ 5,8%. ນີ້ແມ່ນປະຖົມປັດໄຈສຳຄັນເພື່ອໃຫ້ ບັນດາບໍລິສັດຈັດອັນດັບສາກົນຍົກລະດັບຄວາມໄວ້ວາງໃຈແກ່ໃຫ້ຫວຽດນາມໃນໄລຍະຜ່ານມາ.”
ຄຽງຄູ່ກັບນະໂຍບາຍ, ມາດຕະການ ກ່ຽວກັບອັດຕາດອກເບ້ຍ, ວິວັດການສ້າງໂຄງປະກອບລະບົບທະນາຄານຄືນໃຫມ່ ແລະ ການແກ້ໄຂຫນີ້ເສຍ ແມ່ນຈຸດຕັ້ງຫນ້ານັ້ນ. ມາຮອດປະຈຸບັນ, ທະນາຄານແຫ່ງລັດ ໄດ້ຄວບຄຸມຄືນສະພາບການຂອງທະນາຄານທີ່ອ່ອນດ້ອຍຈຳນວນຫນຶ່ງ, ຊັບສິນຂອງລັດ, ສິດຜົນປະໂຫຍດຂອງຜູ້ຝາກເງິນ ໄດ້ຮັບປະກັນ, ຄ່ອຍໆປະຕິບັດຕາມທຳນຽມສາກົນ. ບົນພື້ນຖານນີ້ ບັນດາອົງການສາກົນ Moody Fitch ໄດ້ຍົກລະດັບໄວ້ວາງໃຈຂອງຫວຽດນາມ,ຮັບຮູ້ຄວາມມານະພະຍາຍາມຮັກສາເສດຖະກິດມະຫາພາກເປັນປົກກະຕິຂອງຫວຽດນາມ, ຄວາມມານະພະຍາຍາມປັບປຸງຄຸນນະພາບ, ຄວາມປອດໄພໃນການເຄື່ອນໄຫວ ແລະ ລັກສະນະໂປ່ງໃສຂອງບັນດາທະນາຄານການຄ້າ. ທ່ານ ຫງວຽນກວກຮຸ່ງ, ປະທານສະພາສະມາຊິກ ບໍລິສັດຄຸ້ມຄອງບັນດາອົງການສິນເຊື່ອ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າກຳນົດ ສືບຕໍ່ຫນ້າທີ່ຂອງຕົນດ້ວຍທຸກມາດຕະການຊື້ຫນີ້ເສຍຢ່າງໄວ ແລະ ມີປະສິດທິຜົນທີ່ສຸດ, ມີຄຸນນະພາບ. ຄຽງຄູ່ກັນນັ້ນ ພວກຂ້າພະເຈົ້າຍັງສ້າງໂຄງປະກອບຫນີ້ຄືນໃຫມ່ໃຫ້ບັນດາວິສາຫະກິດ, ອົງການສິນເຊື່ອ, ແຕ່ຕ້ອງແກ້ໄຂບັນດາບ້ວງຫນີ້ເຮັດແນວໃດໃຫ້ຖືກກັບຈຸດປະສົງຂອງຕົນ ແມ່ນຊື້ຫນີ້ເສຍໃຫ້ບໍລິສັດ, ແກ້ໄຂບັນດາບ້ວງຫນີ້ເສຍຜ່ານການສ້າງໂຄງປະກອບວິສາຫະກິດຄືນໃຫມ່.”
ໃນປີ 2015, ສອງບັນຫາສ້າງໂຄງປະກອບຄືນໃຫມ່ ແລະ ແກ້ໄຂຫນີ້ເສຍໄດ້ຮັບການກຳນົດວ່າແມ່ນຫນ້າທີ່ຈຸດສຸມຂອງຂະແຫນງທະນາຄານ. ຕາມນັ້ນແລ້ວ, ທະນາຄານແຫ່ງລັດ ປະຕິບັດຕາມຂໍ້ກຳນົດຂອງກົດໝາຍເພື່ອແກ້ໄຂບັນດາທະນາຄານອ່ອນດ້ອຍຢ່າງເຖິງຖອງ ແລະ ບັນດາອົງການສິນເຊື່ອໃຫຍ່ ຈະພ້ອມກັນເຂົ້າຮ່ວມວິວັດການນີ້. ທ່ານ ຫງວຽນວັນບີງ, ຜູ້ວ່າການທະນາຄານແຫ່ງລັດ ຫວຽດນາມ ໃຫ້ຮູ້ວ່າ:
“ດ້ວຍບັນດາຫນ້າທີ່ຕົວເລກຄາດໝາຍຊື່ງພັກ, ສະພາແຫ່ງຊາດ, ລັດຖະບານ ໄດ້ວາງອອກໃຫ້ພື້ນຖານເສດຖະກິດເວົ້າລວມ ການເຕີບໂຕເສດຖະກິດ ແລະ ການເຕີບໂຕສິນເຊື່ອ ອາດຈະເພີ່ມຂຶ້ນສູງ ເວລານັ້ນ ຄວາມຕ້ອງການກ່ຽວກັບທຶນຮອນ ຈະເພີ່ມຂຶ້ນ ແລະ ກຳລັງດັນເພີ່ມອັດຕາດອກເບ້ຍກໍສູງຂຶ້ນ, ສະນັ້ນ ທະນາຄານແຫ່ງລັດ ກຳນົດ ການບໍລິຫານນະໂຍບາຍເງິນຕາ ແລະ ການສະຫນອງສິນເຊື່ອຕ້ອງມີຄວາມໄຫວພິບ ເພື່ອຈຸດໝາຍຄວບຄຸມໄພເງິນເຟີ້ ແລະ ຮັກສາເສດຖະກິດມະຫາພາກເປັນປົກກະຕິ.”
ຕາມຜູ້ວ່າການທະນາຄານແຫ່ງລັດຫວຽດນາມ ແລ້ວ, ມາຮອດປະຈຸບັນ ລະບົບອົງການສິນເຊື່ອ ຈະກ້າວເຂົ້າສູ່ໄລຍະ 2 ຂອງວິວັດການສັບຊ້ອນ ແລະ ສ້າງໂຄງປະກອບຄືນໃຫມ່ . ທະນາຄານແຫ່ງລັດ ກໍຢືນຢັນຄືນ ຈະສືບຕໍ່ສ້າງເງື່ອນໄຂຍູ້ໄວການເຄື່ອນໄຫວໂຮມເຂົ້າເປັນຫນຶ່ງດຽວ, ຊຶ້ື້ບັນດາອົງການສິນເຊື່ອບົນພື້ນຖານສະໝັກໃຈ ແລະ ຖືກກັບກົດໝາຍ.