ດ້ວຍເວລາໃຫ້ກູ້ຢືນທີ່ແກ່ຍາວນັບສີບໆປີ ແລະ ອັດຕາດອກເບ້ຍກູ້ຢືມບຸລິມະສິດ, ແຫຼ່ງທຶນ ODA ໄດ້ປະກອບສ່ວນສ້າງພື້ນຖານເສດຖະກິດຫວຽດນາມ ໃຫ້ມີສົມໜ້າໃໝ່ຢ່າງແທ້ຈິງ. ພຽງແຕ່ໃນຮອບເວລາກວ່າ 1 ທົດສະວັດຜ່ານມາ, ແຫຼ່ງທຶນ ODA ໄດ້ສຸມໃສ່ລົງທຶນໃຫ້ບັນດາຂົງເຂດຈຸດສຸມຄື: ຄົມມະນາຄົມ, ພະລັງງານໄຟຟ້າ, ກະສິກຳ, ປ່າໄມ້ - ສິນໃນນ້ຳ, ສາທາລະນະສຸກ, ການສຶກສາກໍ່ສ້າງ, ວິທະຍາສາດ, ເຕັກໂນໂລຊີ, ການປະຕິຮູບດ້ານເສດຖະກິດ… ແຕ່ວ່າ, ຕາມການປະກາດຫວ່າງແລ້ວນີ້ຂອງກະຊວງການເງິນ, ນັບແຕ່ປີ 2010, ຫວຽດນາມ ໄດ້ກາຍເປັນປະເທດມີລາຍຮັບປານກາງ, ສະນັ້ນ, ບັນດາບ້ວງເງິນໃຫ້ກູ້ຢືມຂອງຄູ່ຮ່ວມມືພັດທະນາທີ່ສະຫງວນໃຫ້ແກ່ຫວຽດນາມ ພວມຖືກຫຼຸດລົງຢ່າງເຫັນໄດ້ຊັດ. ພ້ອມກັນນັ້ນ, ຮອດເດືອນ 07/2017, ທະນາຄານໂລກ (World Bank) ກໍຈະຢຸດຕິບ້ວງເງິນກູ້ຢືມ ODA ທີ່ບຸລິມະສິດໃຫ້ແກ່ຫວຽດນາມ ແລະ ຫວຽດນາມ ຕ້ອງຫັນມາກູ້ຢືມແຫຼ່ງທຶນດ້ວຍອັດຕາບຸລິມະສິດຕ່ຳກວ່າ ແລະ ກ້າວໄປເຖິງການກູ້ຢືມຕາມເງື່ອນໄຂຕະຫຼາດ. ພາຍຫຼັງທະນາຄານໂລກ, ທະນາຄານພັດທະນາອາຊີ (ADB) ກໍໃຫ້ຮູ້ວ່າ, ຕາມແຜນການ, ນັບແຕ່ວັນທີ 01/01/2019 ເປັນຕົ້ນໄປ, ADB ຈະຢຸດຕິບຸລິມະສິດສ່ວນໜຶ່ງບ້ວງເງິນອຸປະຖຳພັດທະນາຢ່າງເປັນທາງການ (ODA) ໃຫ້ແກ່ຫວຽດນາມ. ທ່ານ Eric Sidgwick, ຜູ້ອຳນວຍການແຫ່ງຊາດຂອງ ADB ປະຈຳຫວຽດນາມ ໃຫ້ຮູ້ວ່າ.
“ຂໍ້ຕົກລົງຢຸດຕິບ້ວງເງິນກູ້ຢືມບຸລິມະສິດຈາກກອງທຶນພັດທະນາອາຊີ ໃຫ້ແກ່ຫວຽດນາມ ຈະອີ່ງໃສ່ການຕີລາຄາກ່ຽວກັບທີ່ຕັ້ງຂອງຫວຽດນາມ ພວມຢູ່ໃສ ແລະ ແງ່ຫວັງຂອງຫວຽດນາມ ຈະຄືແນວໃດ. ແຕ່ວ່າ, ສິ່ງທີ່ແນ່ນອນນັ້ນແມ່ນ ໃນຈຸດເວລາໃດໜຶ່ງ, ຫວຽດນາມ ກໍຈະບໍ່ໄດ້ກູ້ຢືມທຶນບຸລິມະສິດຈາກກອງທຶນພັດທະນາອາຊີໄດ້”.
ODA ໄດ້ຮັບຖືວ່າແມ່ນແຫຼ່ງກຳລັງສຳລັບການພັດທະນາລວມຂອງພື້ນຖານເສດຖະກິດຫວຽດນາມ. ທ່ານ ເຈືອງຮຸ່ງລອງ, ຫົວໜ້າກົມຄຸ້ມຄອງໜີ້ ແລະ ການເງິນຕ່າງປະເທດ, ກະຊວງການເງິນຫວຽດນາມ ໃຫ້ຮູ້ວ່າ, ເມື່ອປະເທດໃດໜຶ່ງມີການຫັນປ່ຽນຈາກປະເທດມີລາຍຮັບຕ່ຳເປັນປະເທດທີ່ມີລາຍຮັບປານກາງ, ບັນດາຂໍ້ມາດຕາ ແລະ ດອກເບ້ຍເຊິ່ງເຂົ້າເຈົ້າໄດ້ຮັບຈາກບັນດາແຫຼ່ງທຶນ ODA ຈະມີການປ່ຽນແປງ. ຕາມທຳມະດາແລ້ວ, ນະໂຍບາຍ ODA ໃຫ້ປະເທດນັ້ນຈະມີການຫັນປ່ຽນຈາກການໜູນຊ່ວຍພັດທະນາໄປສູ່ການພົວພັນຄູ່ຮ່ວມມື. ຄາດວ່າ, ມີຫຼາຍຂົງເຂດຫຼັກແຫຼ່ງຂອງປະເທດຈະບໍ່ໄດ້ຮັບການກູ້ຢືມ ODA ອີກ, ໃນນັ້ນມີຂະແໜງຄົມມະນາຄົມ, ພະລັງງານ, ການສະໜອງລະບາຍນຳ້, ການປ່ຽນແປງຂອງດິນຟ້າອາກາດ ແລະ ການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ.
“ຖ້າຫາກກ່ອນນີ້, ໃນໄລຍະກ່ອນປີ 2010, ບ້ວງເງິນກູ້ຢືມຕາມປົກກະຕິແມ່ນແຕ່ 30 – 40 ປີ, ໃນໄລຍະປະຈຸບັນມີພຽງແຕ່ 20 – 25 ປີ ແລະ ສຳລັບນັກອຸປະຖຳຫຼາຍຄົນບາງເທື່ອພຽງ 10 ປີເທົ່ານັ້ນ. ປະຈຸບັນ, ເວລາກູ້ຢືມກໍ່ສັ້ນກວ່າ, ລາຍຈ່າຍເພື່ອມີບັນດາບ້ວງເງິນ ODA ກໍໃນລະດັບ 2%, ແມ່ນແພງກວ່າຫຼາຍ. ໃນໄລຍະຍາວ, ສຳລັບບັນດາຂົງເຂດມີຄວາມສາດຫັນເປັນຂອງສັງຄົມ ຫຼື ສົ່ງຄືນທຶນໂດຍກົງຂອງໂຄງການ ຈະຕ້ອງຫັນໄປສູ່ກົນໄກການຕະຫຼາດ. ຕ້ອງກູ້ຢືມທຶນການຄ້າ, ແນ່ນອນວ່າບັນດາໂຄງການລົງທຶນທີ່ບໍ່ຂຶ້ນກັບງົບປະມານແຫ່ງລັດແມ່ນຕ້ອງລະດົມແຫຼ່ງທຶນຈາກການຄ້າ”.
ຖ້າບໍ່ມີແຫຼ່ງທຶນ ODA, ຫວຽດນາມ ຈະຂາດທຶນເພື່ອແກ້ໄຂບັນດາຄວາມຕ້ອງການອັນຮີບດ່ວນຂອງພື້ນຖານເສດຖະກິດ. ແຕ່ວ່າ, ເມື່ອຄຸນນະພາບຂອງພື້ນຖານເສດຖະກິດໄດ້ຮັບການປັບປຸງ, ຫວຽດນາມ ຈະໄດ້ຮັບການຍົກລະດັບໄວ້ເນື້ອເຊື່ອໃຈ ຈາກນັ້ນສາມາດສຳພັດກັບບັນດາບ້ວງເງິນກູ້ຢືມສາກົນດ້ວຍອັດຕາດອກເບ້ຍຕ່ຳກວ່າ. ໂດຍແມ່ນປະເທດພວມມີລະດັບລາຍຮັບປານກາງ, ຫວຽດນາມ ຈະມີກຳລັງຄວາມສາມາດດ້ານເງິນດີກວ່າ, ມີຄວາມສາມາດສຳພັດກັບຕະຫຼາດສາກົນຫຼາຍກວ່າ, ຂໍ້ມາດຕາກ່ຽວກັບດອກເບ້ຍກໍຈະມີການປ່ຽນແປງ. ທ່ານ ຫງວຽນດຶກໂດ້, ຮອງຫົວໜ້າສະຖາບັນເສດຖະກິດ - ການເງິນ ຖືວ່າ, ສາມາດເຫັນໄດ້ຄວາມຕັ້ງໜ້າເມື່ອຫວຽດນາມ ບໍ່ຂຶ້ນກັບແຫຼ່ງທຶນ ODA ອີກ, ຍ້ອນການກູ້ຢືມການຄ້າ, ອັນຕາດອກເບ້ຍສູງ, ຄວາມດັນຈາກການໃຊ້ໜີ້ນັ້ນ ໄດ້ບັງຄັບໃຫ້ຜູ້ກູ້ຢືມທຶນຕ້ອງຄິດໄລ່ເພື່ອນຳໃຊ້ແຫຼ່ງທຶນຄືແນວໃດໃຫ້ມີປະສິດທິຜົນທີ່ສຸດ.
“ກ່ຽວກັບດ້ານພື້ນຖານ, ຢາກຍົກສູງປະສິດທິຜົນການນຳໃຊ້ແຫຼ່ງທຶນກູ້ຢືມ, ຄວາມຮັບຜິດຊອບໃນການນຳໃຊ້ທຶນ ຕ້ອງຕິດພັນກັບຫົວໜ່ວຍ ແລະ ບຸກຄົນໃດໜຶ່ງ. ຫວ່າງແລ້ວນີ້, ລັດຖະບານຄາດຄະເນວ່າ ຈະໃຫ້ກູ້ຢືມທຶນ ODA ຫາກບໍ່ສະໜອງທຶນຄືກ່ອນນີ້ອີກ. ທ້ອງຖິ່ນກໍຈະຕ້ອງຄິດໄລ່ ຖ້າຫາກວ່າບັນດາແຫຼ່ງທຶນນັ້ນສາມາດນຳມາເຊິ່ງປະສິດທິຜົນຈາກການເກັບ, ຄ່າທຳນຽມ, ພາສີອາກອນ ເພື່ອສາມາດຊຳລະໜີ້ໄດ້ ເຂົ້າເຈົ້າຈະກູ້ຢືມ, ຖ້າໂຄງການບໍ່ນຳມາເຊິ່ງປະສິດທິຜົນ, ບໍ່ສາມາດຊຳລະໜີ້ໄດ້ ເຂົາເຈົ້າຈະກູ້ຢືມໜ້ອຍກວ່າ”.
ເພື່ອໃຫ້ພື້ຶ້ນຖານເສດຖະກິດຄ່ອຍໆຫຼຸດພົ້ນອອກຈາກການຂຶ້ນກັບແຫຼ່ງທຶນ ODA, ລັດຖະບານໄດ້ຍົກອອກບັນດາມາດຕະການແກ້ໄຂເພື່ອໃຫ້ເໝາະສົມກັບໄລຍະ “ພາຍຫຼັງ ODA”, ໂດຍສະເພາະີແມ່ນເມື່ອຫວຽດນາມ ພວມຕ້ອງການແຫຼ່ງທຶນເຖິງ 90 ຕື້ USD ຕໍ່ປີ ເພື່ອພັດທະນາເສດຖະກິດໃນໄລຍະ 2016 – 2020. ມາດຕະການທີ່ຈຳເປັນແມ່ນຕ້ອງສ້າງໂຄງປະກອບງົບປະມານແຫ່ງລັດຄືນໃໝ່, ຄິດໄລ່ລາຍຮັບ, ລາຍຈ່າຍຄືນໃໝ່ ເພື່ອຮັບປະກັນການລະດັບຂາດດຸນຢ່າງເໝາະສົມ, ຫຼຸດຜ່ອນໜີ້ສາທາລະນະລົງໃນລະດັບພໍດີ. ໃນໄລຍະສັ້ນ, ລັດຖະບານຫວຽດນາມ ຈະສ້າງໂຄງປະກອບກະແສທຶນ ODA ຄືນໃໝ່, ກຳນົດຂົງເຂດ, ຂະແໜງຈຸດສຸມໃຫ້ບຸລິມະສິດນຳໃຊ້ແຫຼ່ງທຶນ ODA ແລະ ບ້ວງເງິນກູ້ຢືມບຸລິມະສິດເພື່ອໜູຊວ່ຍການປະຕິບັດບັນດາຂົງເຂດບູລິມະສິດພັດທະນາ, ບັນດາບາດກ້າວບຸກທະລຸຍຸດທະສາດ.