នាយករដ្ឋមន្ត្រី លោក ហ្វាម មិញ ជិញ អញ្ជើញចូលរួមនិងថ្លែងមតិក្នុងពិធីប្រគល់ពានរង្វាន់ Vin Future ឆ្នាំ ២០២៤  (រូបថត៖ VOV)

ស្នាដៃឆ្នើមចំនួន ៤ បានឈ្នះលើស្នាដៃគួរឲ្យចាប់អារម្មណ៍ជិត ១.៥០០ មកពីប្រទេសនិងតំបន់ដែនដីចំនួន ៨០ ជុំវិញពិភពលោក។ ពានរង្វាន់ធំ VinFuture ឆ្នាំ ២០២៤ ដែលមានតម្លៃ ៣ លានដុល្លារអាមេរិកបានទៅអ្នកវិទ្យាសាស្ត្រចំនួន ៥ នាក់គឺ៖ សាស្ត្រាចារ្យ Yoshua Bengio និងសាស្រ្តាចារ្យ Geoffrey E. Hinton (កាណាដា); លោក Jen-Hsun Huang, សាស្រ្តាចារ្យ Yann LeCun និងសាស្រ្តាចារ្យ Fei-Fei Li (សហរដ្ឋអាមេរិក) សម្រាប់ការចូលរួមចំណែកដ៏លេចធ្លោក្នុងការលើកកម្ពស់វឌ្ឍនភាព នៃ “ការរៀនសូត្រជ្រៅជ្រះ”។

រង្វាន់ពិសេសចំនួន ៣ ដែលរង្វាន់នីមួយៗ មានតម្លៃ ៥០០.០០០ ដុល្លារអាមេរិកលើកតម្កើងដល់ស្នាដៃ៖ “ការច្នៃប្រឌិតដើម្បីកែលម្អវ៉ាក់សាំងប្រភេទផឹក បង្ការជំងឺអាសន្នរោគនៅក្នុងបណ្តាប្រទេសកំពុងអភិវឌ្ឍន៍" “វឌ្ឍនភាពក្នុងការរចនាសម្ភារៈវត្ថុធាតុ polymer និងវិធីសាស្រ្តផ្សេងទៀតសម្រាប់កម្មវិធីជីវវេជ្ជសាស្ត្រ" និង "ការអភិវឌ្ឍន៍វិធីព្យាបាលដោយប្រើប្រាស់ CAR T សម្រាប់ព្យាបាលជំងឺមហារីកនិងជំងឺផ្សេងៗ”។ ស្នាដៃដែលបានលើកតម្កើងលើកនេះ សុទ្ធតែជាគំនិតផ្តួចផ្តើមរបកគំហើញ មិនត្រឹមតែផ្តល់នូវដំណោះស្រាយ ចំពោះបញ្ហាប្រឈមសកលប៉ុណ្ណោះទេ ប៉ុន្តែថែមទាំងរួមចំណែកដល់ការកសាងអនាគតរបស់មនុស្សជាតិទៀត ផង។

ពានរង្វាន់ពិសេស VinFuture ២០២៤ សម្រាប់អ្នកវិទ្យាសាស្ត្រមកពីប្រទេសកំពុងអភិវឌ្ឍន៍ បានទៅបណ្ឌិត Firdausi Qadri មកពីប្រទេសបង់ក្លាដែស (រូបថត៖ VOV)

អញ្ជើញថ្លែងមតិក្នុងពិធីប្រគល់ពានរង្វាន់ នាយករដ្ឋមន្ត្រី លោក ហ្វាម មិញ ជីញ បានចាត់ទុកថា៖ ជាមួយនឹងសារ “របកគំហើញប្រកបដោយលក្ខណៈមោះមុត” VinFuture ២០២៤ គឺជាព្រឹត្តិការណ៍ដ៏សំខាន់ ដោយបន្តលើកតម្កើងការស្រាវជ្រាវ និងគំនិតផ្តួចផ្តើមមានលក្ខណទម្លោះទម្លាយ ផលប៉ះពាល់យ៉ាងទូលំទូលាយ ជួយមនុស្សជាតិយកឈ្នះលើការលំបាក និងឈានទៅកំពស់ថ្មី។

“ខ្ញុំសង្ឃឹមថា អ្នកវិទ្យាសាស្ត្រនិងសហគមន៍ធុរកិច្ច វិនិយោគិន ដៃគូអន្តរជាតិ និងក្នុងប្រទេសនឹងបន្តសហការយ៉ាងជិតស្និទ្ធ គាំទ្រ និងជួយឧបត្ថម្ភឱ្យកាន់តែមានប្រសិទ្ធភាព ដើម្បីវៀតណាមអាចបន្តមានការអភិវឌ្ឍឈានមុខគេក្នុងការលើកកំពស់សមត្ថភាពវិទ្យាសាស្ត្រ បច្ចេកវិទ្យា និងនវានុវត្តន៍។ អាស្រ័យហេតុនេះ រួមចំណែកក្នុងការបង្កើតរបកគំហើញ ដោយខិតខំប្រឹងប្រែងក្លាយជាប្រទេសកំពុងអភិវឌ្ឍន៍ដែលមានឧស្សាហកម្មទំនើប និងប្រាក់ចំណូលជាមធ្យមខ្ពស់នៅឆ្នាំ ២០៣០; ហើយដល់ឆ្នាំ ២០៤៥ នឹងក្លាយជាប្រទេសអភិវឌ្ឍន៍ មានប្រាក់ចំណូលខ្ពស់។ វៀតណាមប្តេជ្ញាបង្កលក្ខណៈងាយស្រួលបំផុតសម្រាប់វិទ្យាសាស្ត្រ បច្ចេកវិទ្យា និងនវានុវត្តន៍ឲ្យមានការអភិវឌ្ឍយ៉ាងខ្លាំងក្លា”។ នេះបើយោងតាមប្រសាសន៍របស់នាយករដ្ឋមន្ត្រីលោក ហ្វាម មិញ ជិញ។

ជាមួយនឹងភាពជោគជ័យនៃរដូវកាលជាប់ៗគ្នាទាំង ៤លើក ពានរង្វាន់ VinFuture កាន់តែបញ្ជាក់ជំហររបស់ខ្លួនថា ជាពានរង្វាន់វិទ្យាសាស្ត្រនិងបច្ចេកវិទ្យាដ៏មានកិត្យានុភាពបំផុតរបស់ពិភពលោក។ ជាពិសេស ម្ចាស់ពានរង្វាន់ VinFuture ជាច្រើននាក់បន្តទទួលបានការលើកតម្កើងនៅពានរង្វាន់អន្តរជាតិដ៏មានកិត្យានុភាពជុំវិញពិភពលោក៕