 រដ្ឋមន្ត្រីការពារជាតិអាមេរិក Pete Hegseth ថ្លែងក្នុងសន្និសីទសារព័ត៌មាននៅទីក្រុង Warsaw ប្រទេសប៉ូឡូញ ថ្ងៃទី ១៤ ខែកុម្ភៈ ឆ្នាំ ២០២៥ (រូបថត៖ PAP/TTXVN) |
នៅពេលបានសួរថា តើកងកម្លាំងអាមេរិកអាចដាក់ពង្រាយនៅអ៊ុយក្រែនឬយ៉ាងណា លោក Hegseth បានឲ្យដឹងថា លោកបាននិយាយច្បាស់ណាស់អំពីរឿងនេះថា យោធាអាមេរិកនឹងមិនមានវត្តមាននៅលើទឹកដីអ៊ុយក្រែនទេ។ ប្រមុខមន្ទីរបញ្ចកោណក៏បានកត់សម្គាល់ផងដែរថា នៅទ្វីបអឺរ៉ុប អឺរ៉ុបគួរតែនាំមុខក្នុងការធានាសន្តិសុខ។
មុននេះ កាសែត Wall Street Journal បានដកស្រង់ប្រភពមួយដែលនិយាយថា នាយករដ្ឋមន្ត្រីអង់គ្លេស Keir Starmer អាចបញ្ជូនសេចក្តីព្រាងផែនការដាក់ពង្រាយកងកម្លាំងរក្សាសន្តិភាពរបស់អង់គ្លេសនិងបារាំងនៅអ៊ុយក្រែន ទៅកាន់ប្រធានាធិបតីអាមេរិក Donald Trump នៅថ្ងៃទី ២៧ ខែកុម្ភៈ។ ប្រភពបានឲ្យដឹងថា ទីក្រុងឡុងដ៍និងប៉ារីស ចង់ទទួលបានការគាំទ្រផ្នែកយោធាពីទីក្រុងវ៉ាស៊ីនតោន ប្រសិនបើកងកម្លាំងរក្សាសន្តិភាពរបស់ពួកគេស្ថិតក្នុងគ្រោះថ្នាក់។ នៅក្រោមផែនការនេះ បារាំង និងអង់គ្លេសចង់ដាក់ពង្រាយកងទ័ព ទ័ពអាកាស និងកងទ័ពជើងទឹក។
ក្នុងពេលជាមួយគ្នានោះ អនុរដ្ឋមន្ត្រីការបរទេសរុស្ស៊ី Alexander Grushko បានឲ្យដឹងថា រុស្ស៊ីមានអាកប្បកិរិយាអវិជ្ជមានចំពោះគំនិតនៃការដាក់ពង្រាយកងកម្លាំងរក្សាសន្តិភាពអឺរ៉ុបនៅអ៊ុយក្រែន។ តាមលោកថា នេះជាជំហាននាំឱ្យមានភាពតានតឹងកាន់តែខ្លាំងឡើង៕
