ដំណើរកម្សាន្តនិទាឃរដូវទៅតំបន់ដីដ៏ពិសិដ្ឋនៃរាជវង្ស Tran
(VOVWORLD) - ទីក្រុង Dong Trieu (ខេត្ត Quang Ninh) គឺជាតំបន់ដីពោពេញទៅដោយស្លាកស្នាមប្រវត្តិសាស្ត្រនិងវប្បធម៌នៃរាជវង្ស Tran (១២២៦-១៤០០) ដែលជារាជវង្សសក្តិភូមិដ៏ល្បីល្បាញមួយក្នុងប្រវត្តិសាស្ត្រវៀតណាម។ នៅទីនេះ ជាកន្លែងប្រមូលផ្តុំវត្ថុបុរាណវប្បធម៌និងសាសនាពិសេសជាច្រើនក្នុងសម័យរាជវង្ស Tran។ តាមរយៈការឡើងចុះនៃប្រវត្តិសាស្ត្រ ទីក្រុង Dong Trieu បានក្លាយជាគោលដៅដ៏ពិសិដ្ឋ ទាក់ទាញពុទ្ធបរិស័ទ ភ្ញៀវទេសចរនិងប្រជាជនយ៉ាងច្រើនកុះករ មកគោរពវិញ្ញាណក្ខន្ធនិងរំលឹកគុណូបការៈរបស់បណ្តាស្តេច Tran។
ស្ថិតនៅច្រកទ្វារខាងលិចនៃខេត្ត Quang Ninh មណ្ឌលកេរ្តិ៍ដំណែលប្រវត្តិសាស្ត្រជាតិពិសេសនៃរាជវង្ស Tran មានកេរ្តិ៍ដំណែលចំនួន ២៥ ។ ក្នុងនោះ មានកេរ្តិ៍ដំណែលទាំង ១៤ ត្រូវបានទទួលស្គាល់ជាកេរ្តិ៍ដំណែលប្រវត្តិសាស្ត្រជាតិពិសេស (ក្នុងនោះមានវិមានតម្កល់សពចំនួន ៧អង្គរបស់បណ្តាស្តេច Tran ប្រាសាទនិងទីសក្ការបូជាចំនួន ២ និងស្ថាបត្យកម្មសាសនាចំនួន ៥ ដែលបម្រើសម្រាប់ការប្រតិបត្តិ និងការបង្រៀនគម្ពីរព្រះពុទ្ធសាសនា)។
 ប្រាសាទ An Sinh ជាគោលដៅដំបូងក្នុងដំណើរទៅទស្សនា កេរ្តិ៍ដំណែលប្រវត្តិសាស្ត្រជាតិពិសេសចំនួន ១៤ នៃរាជវង្ស Tran ។ រូបថត៖ Vu Mien/VOV |
គោលដៅដំបូងក្នុងដំណើរកម្សាន្តនេះគឺប្រាសាទ An Sinh ដែលជាកន្លែងគោរពបូជានិងជាកន្លែងធ្វើពិធីសែនរបស់បណ្តាស្តេច Tran ហើយក៏ជាមជ្ឈមណ្ឌលសាសនាដ៏សំខាន់នៅក្រោមរាជវង្ស Tran និងរាជវង្សផ្សេងទៀតក្នុងប្រវត្តិសាស្ត្រវៀតណាមផងដែរ។ ទីធ្លានៃប្រាសាទ An Sinh មានដើមប្រង់ ចំនួនប្រាំបី ជានិមិត្តរូបនៃភាពគងវង្សរបស់ស្តេច Tran ទាំងប្រាំបីរូប ដែលត្រូវបានសក្ការបូជានៅទីនេះ។ លោកស្រី Nguyen Thi My Linh មគ្គុទ្ទេសក៍ទេសចរណ៍នៃគណៈកម្មការគ្រប់គ្រងកេរ្តិ៍ដំណែលប្រវត្តិសាស្ត្រជាតិនៃរាជវង្ស Tran បានឲ្យដឹងថា កម្មវិធីបុរាណវិទ្យាជាច្រើនត្រូវបានអនុវត្តដើម្បីធ្វើកំនាយ និងបញ្ជាក់ពីរចនាសម្ព័ន្ធ មាត្រដ្ឋាន រូបរាង និងតម្លៃផ្នែកបុរាណវិទ្យានៃកេរ្តិ៍ដំណែល៖ “តំបន់តាំងពិពណ៌កណ្តាលវាលនៅប្រាសាទ An Sinh មានវត្ថុបុរាណចំនួន ១០០ ដែលជាជើងបង្គោលថ្ម បង្ហាញពីប្រវត្តិនៃប្រាសាទ An Sinh ឆ្លងកាត់ដំណាក់កាលជាច្រើននៃការជួសជុល។ តំបន់នេះក៏មានវត្ថុបុរាណផ្សេងទៀតដូចជា៖ កំពែង បន្ទាយថ្ម គ្រឹះស្ថាបត្យកម្មជាដើម”។
នៅក្នុងមណ្ឌលកេរ្តិ៍ដំណែលប្រវត្តិសាស្ត្រជាតិពិសេសនៃរាជវង្ស Tran ប្រាសាទ Thai Mieu ដើរតួនាទីជាមជ្ឈមណ្ឌល ត្រូវបានសាងសង់ឡើងដោយបណ្តាស្តេច Tran ដើម្បីគោរពបូជាបុព្វបុរស។ Thai Mieu ត្រូវបានរៀបចំយ៉ាងចុះសម្រុងគ្នា ដែលបង្ហាញពីទំនាក់ទំនងរវាងមេឃ ដី និងមនុស្ស។ យោងតាមលោក Pham Xuan Hoan ប្រធានក្រុមប្រឹក្សាភិបាលគ្រប់គ្រងមណ្ឌលកេរ្តិ៍ដំណែលរាជវង្ស Tran បានឲ្យដឹងថា Thai Mieu គឺជាគោលដៅដែលមិនគួររំលងបានក្នុងការធ្វើដំណើរទៅស្វែងយល់ពីប្រវត្តិសាស្ត្រនិងវប្បធម៌ Dong Trieu៖ “ភាពខុសគ្នារវាង Dong Trieu បើធៀបនឹងស្រុកកំណើតរបស់រាជវង្ស Tran នៅខេត្ត Nam Dinh ឬ Thai Binh គឺថា នៅទីនេះមានប្រាសាទ Thai Mieu របស់រាជវង្ស Tran។ មានតែស្រុកកំណើតដើមប៉ុណ្ណោះទើបបានសាងសង់ Thai Mieu ជាកន្លែងគោរពបូជាបុព្វការីជននិងបណ្តាស្តេច Tran ។ នេះក៏ជាកេរ្តិ៍ដំណែលកណ្តាល ដែលសក្ការបូជាបុព្វការីជននិងស្តេច Tran ទាំង ១៤អង្គ។ នៅជុំវិញប្រាសាទ Thai Mieu នៃរាជវង្ស Tran មានវត្តអារាម ប្រាសាទ និងវិមានតម្កល់សពបណ្តាស្តេច Tran នៅ Dong Trieu ផងដែរ”។
 វត្ត Ngoa Van ជាសំណង់ដ៏មានអត្ថន័យបំផុត នៅពេលបានមើលឃើញទិដ្ឋភាពដ៏ពិសិដ្ឋ នៃការ ចូលបរិនិព្វានរបស់ស្តេច Tran Nhan Tong ។ រូបថត៖ Vu Mien/VOV |
ចាប់តាំងពីចុងសតវត្សទី ១៣ មក មណ្ឌលស្ថាបត្យកម្មប្រវត្តិសាស្ត្រ និងវប្បធម៌ជាតិពិសេសនៃរាជវង្ស Tran នៅទីក្រុង Dong Trieu ត្រូវបានកំណត់យ៉ាងច្បាស់តាមមាត្រដ្ឋាន នៅពេលដែលស្តេច Tran Nhan Tong ជាអង្គស្តេចទីបីនៃរាជវង្ស Tran (ឈ្មោះពិត Tran Kham) បានមក Yen Tu ដើម្បីប្រតិបត្តិព្រះពុទ្ធសាសនា ហើយបានបង្កើតព្រះពុទ្ធសាសនានិកាយ Truc Lam Yen Tu ។ នេះជាមរតកខាងវិញ្ញាណដ៏អស្ចារ្យបំផុតដែលស្តេច Tran Nhan Tong បានបន្សល់ទុកមក ហើយត្រូវបានផ្សព្វផ្សាយយ៉ាងទូលំទូលាយនៅវត្ត Ngoa Van ។ នេះជាមណ្ឌលកេរ្តិ៍ដំណែលព្រះពុទ្ធសាសនាដ៏ធំមួយដែលមានសំណង់ជាច្រើនត្រូវបានសាងសង់ឡើងនៅជុំវិញកំពូលភ្នំ Ngoa Van និងប្រាង្គ Phat Hoang ជាកន្លែងដែលរក្សាទុកព្រះសារីរិកធាតុរបស់ស្តេច Tran Nhan Tong ។ ព្រះតេជគុណ Thich Dao Hien អនុប្រធានគណៈអភិបាល និងជាលេខាធិការសមាគមន៍ព្រះពុទ្ធសាសនាវៀតណាម ខេត្ត Quang Ninh មានពុទ្ធដីការថា៖ “នៅប្រទេសវៀតណាម វត្ត Ngoa Van ក៏ត្រូវបានចាត់ទុកជាកន្លែងដ៏ពិសិដ្ឋបំផុត ខុសពីកេរ្តិ៍ដំណែលដទៃទៀតដែលត្រូវបានជួសជុល និងតុបតែងឡើងវិញក្នុងសម័យក្រោយៗទៀត។ វត្ត Ngoa Van នៅតែមានប្រព័ន្ធប៉ម ត្រូវបានរក្សាស្ទើរតែដដែលពីរាជវង្ស Tran ។ នាពេលថ្មីៗនេះ ហិបផ្កាឈូកមាសតាំងពីរាជវង្ស Tran ដែលត្រូវបានទទួលស្គាល់ជារតនសម្បត្តិជាតិ ក៏ត្រូវបានរកឃើញនៅតាមផ្លូវឡើងទៅវត្ត Ngoa Van ផងដែរ”។
 ផើងផ្កាសេរ៉ាមិចពណ៌ត្នោត តុបតែងដោយគំនូរសត្វនាគទាំង ៨ រូប សតវត្សទី ១៣ ជាវត្ថុបុរាណនៅប្រាសាទ Thai Mieu នៃរាជវង្សត្រាន។ រូបថត៖ Vu Mien/VOV |
មកដល់ Dong Trieu ក្នុងនិទាឃរដូវ ភ្ញៀវទេសចរណ៍មិនត្រឹមតែកោតសរសើរនូវតម្លៃវប្បធម៌ និងប្រវត្តិសាស្ត្រដ៏វិសេសវិសាលប៉ុណ្ណោះទេ ថែមទាំងទទួលអារម្មណ៍នៃយុគសម័យមាស ជាតំបន់ដីដែលសម្គាល់ជាមោទនភាពជាតិផងដែរ។ លោក Nguyen Van Cong លេខាគណៈកម្មាធិការបក្សទីក្រុង Dong Trieu បានឲ្យដឹងថា៖ "ចាប់ពីឆ្នាំ ២០២០ ដល់បច្ចុប្បន្ន Dong Trieu បានធ្វើសង្គមរូបនីយកម្ម និងទាក់ទាញការវិនិយោគទុនជាង ៣០០ ពាន់លានដុង (១២ លានដុល្លារអាមេរិក) ដើម្បីស្ដារឡើងវិញនូវមណ្ឌលកេរ្តិ៍ដំណែលនានា ជាពិសេសកេរ្តិ៍ដំណែលរបស់រាជវង្ស Tran ។ យើងបន្តយកចិត្តទុកដាក់ ពិនិត្យ ស្ដារ និងលើកកម្ពស់តម្លៃខាងសម្ភារៈនិងវិញ្ញាណនៃមណ្ឌលកេរ្តិ៍ដំ ណែល។ សំខាន់ជាងនេះទៅទៀត គឺត្រូវតភ្ជាប់ជាមួយតំបន់ជិតខាង ជាពិសេសមណ្ឌលកេរ្តិ៍ដំណែលដែលត្រូវបានដាក់ជូន UNESCO ទទួលស្គាល់ជាបេតិកភណ្ឌធម្មជាតិពិភពលោក និងតភ្ជាប់ដំណើរទេសចរណ៍ដើម្បីឱ្យ Dong Trieu ក្លាយជាផ្នែកមួយដែលមិនអាចកាត់ផ្តាច់បាននៃខ្សែសង្វាក់ផលិតផលទេសចរណ៍ខេត្ត Quang Ninh ក៏ដូចជាបណ្តាខេត្តជិតខាង”។
និទាឃរដូវមកដល់តំបន់ដីដ៏ពិសិដ្ឋនៃរាជវង្ស Tran ក៏ជាការត្រលប់មករកតម្លៃខាងវិញ្ញាណនិងវប្បធម៌ដ៏គួរឲ្យទាក់ទាញ ដែលបន្សល់ទុកនូវចំណាប់អារម្មណ៍យ៉ាងជ្រាលជ្រៅក្នុងប្រវត្តិសាស្ត្រវប្បធម៌វៀតណាម៕