(VOVWORLD) - ជារៀងរាល់ឆ្នាំ នៅថ្ងៃទី ៤ ខែទី ៤ (តាមច័ន្ទគតិ) ភូមិជនជាតិ Dao Thanh Phan ក្នុងឃុំ Dong Van ស្រុក Binh Lieu ខេត្ត Quang Ninh មានភាពអ៊ូអរជាមួយនឹងពណ៌ចម្រុះពិធីបុណ្យ ត្រណមខ្យល់ (Kiêng gió)។ មិនត្រឹមតែជាពិធីបុណ្យខាងវប្បធម៌វិញ្ញាណប៉ុណ្ណោះទេ ពិធីបុណ្យ ត្រណមខ្យល់ ក៏ជាទីជួបជុំរបស់ សហគមន៍ កន្លែងដែលប្រជាជនគ្រប់ជនជាតិបានជួបជុំគ្នាសប្បាយរីករាយ និងផ្សព្វផ្សាយស្មារតីសាមគ្គីភាព។
 យុវនារីជនជាតិ Dao Thanh Phan រៀបចំខ្លួនទៅពិធីបុណ្យត្រណមខ្យល់ (រូបថត៖ Hoang Gai/VOV) |
ពិធីបុណ្យ ត្រណមខ្យល់ មានប្រភពចេញពីទំនៀមទម្លាប់ជៀសវាងសត្វព្រៃ គ្រោះមហន្តរាយធម្មជាតិ និងបួងសួងសូមឲ្យរដូវអំណោយផល និងភាពសម្បូរធូធារនឹងចូលមកដល់ជាមួយប្រជាជន Dao Thanh Phan នៅឃុំ Dong Van ស្រុក Binh Lieu ខេត្ត Quang Ninh។ តាមទស្សនទានរបស់ប្រជាជននៅទីនេះ នៅថ្ងៃទី ៤ ខែទី ៤ តាមច័ន្ទគតិ រៀងរាល់ឆ្នាំ បើគ្មានមនុស្សនៅក្នុងផ្ទះទេ ទេវតាខ្យល់ នឹងមកដល់នាំចេញទៅនូវហានិភ័យ ទុក្ខកង្វល់ ហើយនាំលាភសំណាង ផលដំណាំដ៏ច្រើនសន្ធឹកសន្ធាប់ និងសុភមង្គលសម្រាប់គ្រួសារគ្រប់រូប។ ដូច្នេះតាំងពីព្រឹកព្រលឹម សមាជិកគ្រួសារបាននាំគ្នាចាកចេញពីផ្ទះ ហើយត្រឹមតែវិលត្រឡប់មកវិញនៅពេលព្រះអាទិត្យលិចប៉ុណ្ណោះ។
សម្រាប់ជនជាតិ Dao ក្នុងថ្ងៃនេះ គេមិនគួរចាប់ផ្តើម ឬប្រកបរបរអ្វីឡើយ តាំងពីធ្វើស្រែចម្ការ រហូតដល់សង់ផ្ទះ ព្រោះអាចជួបសំណាងអាក្រក់។ អ្នកភូមិទាំងមូលបានបបួលគ្នាទៅលេងផ្សារនៅថ្ងៃទី៤ ខែទី ៤ ឬហៅម្យ៉ាងទៀតថា បុណ្យត្រណមខ្យល់។
លោកស្រី Nguyen Truong Xuan និងលោកស្រី Chieu Moc Trang មកពីភូមិ Phai Lau ឃុំ Dong Van ស្រុក Binh Lieu ខេត្ត Quang Ninh ដែលបានចូលរួមពិធីបុណ្យត្រណមខ្យល់បានចែករំលែកថា៖ “ការមានពិធីបុណ្យបែបនេះធ្វើឱ្យមនុស្សម្នាក្នុងភូមិមានអារម្មណ៍សប្បាយរីករាយខ្លាំង ហើយបរិយាកាសក៏អ៊ូអរដែរ។ បើយើងប្រារព្ធពិធីនេះ ខ្យល់នឹងបក់ចូលផ្ទះ ហើយមនុស្សម្នារឹតតែរីករាយខ្លាំងណាស់”។
 បរិយាកាសដ៏រំភើបនៅការប្រកួតទាញព្រ័ត្ររវាងភូមិនានាក្នុងពិធីបុណ្យត្រណមខ្យល់ (រូបថត៖ កាសែត Nhan Dan) |
“ជាថ្ងៃដ៏មានអត្ថន័យសម្រាប់ប្រជាជនជនជាតិ Dao ពិធីបុណ្យត្រណមខ្យល់គឺជាឱកាសសម្រាប់អ្នកភូមិជួបប្រាស្រ័យជាមួយគ្នា។ អ្នកភូមិគេអាចអង្គុយជជែកគ្នា ហូបចុក ផឹកស៊ី និងលេងល្បេងសប្បាយ រួមចំណែកពង្រឹងសាមគ្គីភាពក្នុងសហគមន៍”។
កន្លែងដែលមានមនុស្សច្រើនបំផុតក្នុងពិធីបុណ្យគឺផ្សារ។ តូបសាមញ្ញលក់ទំនិញគ្រប់ប្រភេទដូចជា៖ ទំពាំងព្រៃ នំប្រទាល នំទឹកឃ្មុំ ក្រណាត់ចរបាប់ ឪឡឹកឆ្មា...។ ផ្សារនេះមិនត្រឹមតែជាកន្លែងលក់ដូរប៉ុណ្ណោះទេ ថែមទាំងជា "សារមន្ទីររស់" នៃវប្បធម៌ជនជាតិ Dao ទៀតផង។
បុណ្យត្រណមខ្យល់ ក៏ជាឱកាសសម្រាប់មនុស្សជំនាន់ក្រោយ ជាពិសេសយុវជនជនជាតិ Dao បានជួបជុំគ្នា រាប់អានមិត្តភ័ក្តិ ច្រៀងចម្រៀងស្នេហា និងឆ្លើយឆ្លងគ្នាតាមរយៈបទភ្លេងប្រពៃណី...។
លោកស្រី Chiu Pa Mui ភូមិ Phat Chi ឃុំ Dong Van ស្រុក Binh Lieu ខេត្ត Quang Ninh បានឲ្យដឹងថា៖
“ក្នុងនាមជាកុលបុត្រទឹកដីនេះ ខ្ញុំមានអារម្មណ៍ថា ប្រជាជនរបស់ខ្ញុំមានលក្ខណៈវប្បធម៌ពិសេសណាស់។ ខ្ញុំពិតជារីករាយ និងរំភើបដែលបានចូលរួមក្នុងពិធីបុណ្យនេះ នៅពេលដែល លក្ខណៈវប្បធម៌របស់ប្រជាជនយើង ត្រូវបានផ្សព្វផ្សាយដល់មនុស្សគ្រប់គ្នា”។
 គណៈកម្មាធិការបក្ស អាជ្ញាធរមូលដ្ឋាន និងប្រជាជនគ្រប់ជនជាតិនៅស្រុក Binh Lieu បានទទួលសេចក្តីសម្រេចរបស់ក្រសួងវប្បធម៌ កីឡា និងទេសចរណ៍ស្តីពីការប្រកាសបញ្ជីបេតិកភណ្ឌវប្បធម៌អរូបីជាតិ “ទំនៀមទម្លាប់នៃពិធីបុណ្យត្រណមខ្យល់” (រូបថត៖ Vu Mien/VOV) |
ពិធីបុណ្យនេះក៏មានសកម្មភាពវប្បធម៌ កីឡា និងទេសចរណ៍ពិសេសជាច្រើនដូចជា៖ មហោស្រពសិល្បៈ; ការប្រកួតក្នុងកីឡាប្រពៃណីដូចជា រុញដំបង ទាញព្រ័ត្រ និងបោះបាល់ទះ; ណែនាំផលិតផលសិប្បកម្ម ផលិតផល OCOP (ផលិតផលឃុំមួយផលិតផលមួយ) ឬមុខម្ហូបប្រពៃណីជាដើម។
លោក Duong Cam Henh ជនជាតិ Dao នៅភូមិ Khe Tien ឃុំ Dong Van តែងតែទន្ទឹងរង់ចាំដល់ថ្ងៃចូលរួមរីករាយជាមួយពិធីបុណ្យ៖ “ខ្ញុំទន្ទឹងរង់ចាំពិធីបុណ្យ។ ដូច្នេះហើយ នៅពេលដែលឃុំបានប្រកាសថា ភូមិនឹងចូលរួមការផ្លាស់ប្តូរវប្បធម៌ សិល្បៈ និងកីឡា អ្នកភូមិនិងខ្ញុំបាននាំគ្នាត្រៀមកម្មវិធីសិល្បៈ និងកីឡាប្រពៃណី ដើម្បីអោយនៅថ្ងៃបុណ្យ ពួកយើងបានចូលរួមយ៉ាងពេញលេញ ថែមទាំងចូលរួមគ្រប់សកម្មភាពនៃពិធីបុណ្យទៀតផង”។
ឆ្នាំនេះ “ទំនៀមទម្លាប់ត្រណមខ្យល់របស់ប្រជាជន Dao នៅឃុំ Dong Van” ត្រូវបានក្រសួងវប្បធម៌ កីឡា និងទេសចរណ៍ ចាត់ថ្នាក់ជា បេតិកភណ្ឌវប្បធម៌អរូបីជាតិ។ នេះមិនត្រឹមតែជាកិត្តិយស និងមោទនភាពសម្រាប់ជនជាតិ Dao នៅ Binh Lieu ប៉ុណ្ណោះទេ ថែមទាំងបញ្ជាក់ពីតម្លៃវប្បធម៌គងវង្សជានិច្ចក្នុងវប្បធម៌ជាតិវៀតណាមទៀតផង។ លោក Tang Van Dao អនុប្រធានគណៈកម្មាធិការប្រជាជនឃុំ Dong Van ចែករំលែកដោយមោទនភាពថា៖ “ទំនៀមទម្លាប់ត្រណមខ្យល់របស់ជនជាតិ Dao ត្រូវបានទទួលស្គាល់ជាបេតិកភណ្ឌវប្បធម៌អរូបីជាតិ ដែលជាសមិទ្ធិផលរបស់សហគមន៍ Thanh Phan Dao ក្នុងឃុំ Dong Van និយាយរួម និងស្រុកទាំងមូលក្នុងការថែរក្សា ថែរក្សា និងអភិរក្សទំនៀមទម្លាប់ប្រពៃណីដ៏ល្អរបស់សហគមន៍ជនជាតិ Dao”។
លោក Vi Ngoc Nhat ប្រធានការិយាល័យវប្បធម៌ វិទ្យាសាស្ត្រ និងព័ត៌មានស្រុក Binh Lieu ខេត្ត Quang Ninh បានឲ្យដឹងថា៖ “យើងនឹងសម្របសម្រួលជាមួយស្ថាប័នជំនាញនៃថ្នាក់លើ ជាពិសេសមន្ទីរវប្បធម៌ កីឡានិងទេសចរណ៍ ដើម្បីបង្កើតផែនការលម្អិតនិងវិធីសាស្រ្ត បន្តផ្សព្វផ្សាយ “ទំនៀមទម្លាប់ត្រណមខ្យល់” នៅក្នុងសហគមន៍ជនជាតិ Dao និងបង្រៀនក្មេងៗជំនាន់ក្រោយយ៉ាងសកម្មអំពីបេតិកភណ្ឌវប្បធម៌ដ៏មានតម្លៃនេះ និងបង្កើតអត្តសញ្ញាណដែលទាក់ទងនឹងការអភិវឌ្ឍទេសចរណ៍ សហគមន៍នៅក្នុងស្រុក”។
“ទំនៀមទម្លាប់ត្រណមខ្យល់” របស់ជនជាតិ Dao Thanh Phan នៅខេត្ត Quang Ninh ឆ្លុះបញ្ចាំងយ៉ាងស៊ីជម្រៅអំពីភាពសុខដុមរមនារវាងមនុស្សនិងធម្មជាតិ រវាងពិភពពិត និងពិភពវិញ្ញាណ; គឺជានិមិត្តរូបនៃសាមគ្គីភាព សេចក្តីស្រឡាញ់រាប់អានគ្នា និងសេចក្តីប្រាថ្នា ដើម្បីការពារសុខសន្តិភាពសម្រាប់ជីវភាពរស់នៅរបស់ប្រជាជននៅទីនេះ៕