បេសកកម្ម Chadrayaan-3 មានគោលបំណងធ្វើការរុករកផ្ទៃព្រះច័ន្ទ។ រូបភាព៖ indiatoday.in

ជោគជ័យនេះ បានធ្វើឲ្យឥណ្ឌាក្លាយជាប្រទេសទី៤នៅលើពិភពលោកដែលបានបញ្ចូនយានអវកាសចុះចតដោយសុវត្ថិភាពនៅលើឋានព្រះចន្ទ បន្ទាប់ពីអាមេរិក ចិន និងសហភាពសូវៀត។

អង្គការស្រាវជ្រាវអវកាសឥណ្ឌា (ISRO) បានបញ្ជាក់ថា Vikram បានចុះចតជាមួយមនុស្សយន្តតូចមួយដែលមានឈ្មោះថា Pragyan ។ ម៉ាស៊ីនដើរដោយថាមពលពន្លឺព្រះអាទិត្យទាំងពីរនេះ នឹងធ្វើការរុករកផ្ទៃព្រះច័ន្ទ ក្នុងរយៈពេលមួយថ្ងៃនៅលើព្រះច័ន្ទ  (ប្រហែល ១៤ ថ្ងៃនៅភពផែនដី) មុនពេលរាត្រីព្រះច័ន្ទមកដល់ហើយធ្វើឱ្យពួកវាអស់ថ្ម។

មុននោះ នាថ្ងៃទី ១៤ ខែកក្កដា ឥណ្ឌាបានបាញ់បង្ហោះយានអាវកាស Chandrayaan-3 ពីមជ្ឈមណ្ឌលអវកាសក្នុងរដ្ឋ Andhra Pradesh ភាគខាងត្បូងប្រទេសឥណ្ឌា។ យានអាវកាសនេះត្រូវបានអភិវឌ្ឍដោយការវិនិយោគប្រហែល ៧៥ លានដុល្លារ។ នេះគឺជាបេសកកម្មធំ ដំបូងគេចាប់តាំងពីរដ្ឋាភិបាលរបស់នាយករដ្ឋមន្ត្រី Narendra Modi បានប្រកាសពីគោលនយោបាយជំរុញការវិនិយោគលើការរុករកអវកាសដោយឯកជន និងគំរូអាជីវកម្មទាក់ទងនឹងការអភិវឌ្ឍន៍និងការបង្ហោះផ្កាយរណប៕