អគ្គលេខាបក្ស លោក Nguyen Phu Trong និងសមាជិករដ្ឋសភានៃទីក្រុងហាណូយ ជួបសំណេះសំណាលជាមួយអ្នកបោះឆ្នោតនាព្រឹកថ្ងៃទី ១ កក្កដា។ (រូបថត៖ VOV)

នាព្រឹកថ្ងៃទី ១ កក្កដា អគ្គលេខាបក្សកុម្មុយនិស្តវៀតណាម លោក Nguyen Phu Trong និងគណៈប្រតិភូសមាជិករដ្ឋសភាទីក្រុងហាណូយ មណ្ឌលបោះឆ្នោតលេខ ១ បានជួបសំណេះសំណាលជាមួយអ្នកបោះឆ្នោតនៅខ័ណ្ឌ Dong Da, Ba Dinh និង Hai Ba Trung ដើម្បីជូនដំណឹងពីលទ្ធផលនៃសម័យប្រជុំលើកទី ៥ រដ្ឋសភានីតិកាលទី១៥ ហើយឆ្លើយតបចំពោះមតិយោបល់របស់អ្នកបោះឆ្នោតដែលបានផ្ញើទៅកាន់រដ្ឋសភា។

អ្នកបោះឆ្នោតបានវាយតម្លៃខ្ពស់ចំពោះលទ្ធផលនៃសម័យប្រជុំនៅពេលបានសម្រេចលើបញ្ហាសំខាន់ៗជាច្រើនរបស់ប្រទេសជាតិដោយមានលក្ខណៈជាយុទ្ធសាស្ត្រយូរអង្វែង បង្កើតមូលដ្ឋានគ្រឹះដ៏សំខាន់សម្រាប់ប្រតិបត្តិការរបស់រដ្ឋាភិបាល សកម្មភាពរបស់ក្រសួង ស្ថាប័ន និងមូលដ្ឋាន។ ក្នុងឱកាសនេះ អ្នកបោះឆ្នោតបានស្នើឱ្យរដ្ឋសភាបន្តយកចិត្តទុកដាក់ដល់ការអនុវត្តសិទ្ធិឃ្លាំមើលកំពូលលើខ្លឹមសារសំខាន់ពិសេស លើវិស័យដែលនៅតែមានបញ្ហាជាច្រើនដូចជា៖ ឃ្លាំមើលការអនុវត្តបទប្បញ្ញត្តិនៃច្បាប់និងប្រសិទ្ធភាពក្នុងការគ្រប់គ្រង និងការធ្វើអាជីវកម្មនៃវិស័យអគ្គិសនី វិស័យប្រេងឧស្ម័ន វិស័យធ្យូងថ្មនិងរ៉ែ; បង្កើនការឃ្លាំមើល ត្រួតពិនិត្យ អធិការកិច្ចលើការដោះស្រាយសំណុំរឿងធំៗ; វិស័យដែលងាយកើតមានអំពើពុករលួយនិងភាពអសកម្ម។

រីឯខ្លួនវិញ អគ្គលេខាបក្ស លោក Nguyen Phu Trong បានអះអាងថា ក្រុមសមាជិករដ្ឋសភានឹងស្រូបយកយ៉ាងពេញលេញ សំយោគមតិយោបល់របស់អ្នកបោះឆ្នោតដើម្បីផ្ញើទៅកាន់រដ្ឋសភា ស្នើឱ្យស្ថាប័នមានសមត្ថកិច្ចឆ្លើយតបអ្នកបោះឆ្នោត។លោកអគ្គលេខាបក្សជឿជាក់ថា បក្សភាគ អាជ្ញាធរ និងប្រជាជនរដ្ឋធានីហាណូយនឹងធ្វើជាគំរូ នាំមុខគេក្នុងការកសាង និងអភិវឌ្ឍប្រទេសជាតិ នាំរដ្ឋធានីឱ្យកាន់តែរីកចម្រើនពីមួយថ្ងៃទៅមួយថ្ងៃ៕