ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ພົບປະເຈລະຈາ ກັບທ່ານປະທານສະພາແຫ່ງຊາດ ສິງກະໂປ Seah Kian Peng (ພາບ: VOV)

ທີ່ການພົບປະເຈລະຈາ, ທ່ານປະທານສະພາແຫ່ງຊາດສິງກະໂປ Seah Kian Peng ແລະ ທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບບັນດາການກຳນົດທິດໃຫຍ່ ແລະ ມາດຕະການເພື່ອແນໃສ່ເພີ່ມທະວີການຮ່ວມມື ແລະ ຍົກສູງການພົວພັນໃນໄລຍະຈະມາເຖິງ. ການນຳສອງທ່ານໄດ້ເຫັນດີເປັນເອກະພາບຮ່ວມມືດ້ານການເມືອງ, ການຕ່າງປະເທດສືບຕໍ່ມີບົດບາດຫຼັກແຫຼ່ງ, ກຳນົດທິດສັງລວມການພົວພັນສອງປະເທດ, ຜ່ານການເພີ່ມທະວີການແລກປ່ຽນຄະນະຜູ້ແທນ, ພົບປະຂັ້ນສູງ ແລະ ທຸກຂັ້ນ. ການນຳສອງທ່ານໄດ້ຢັ້ງຢືນວ່າການຮ່ວມມືດ້ານເສດຖະກິດ - ການຄ້າ ສືບຕໍ່ແມ່ນເສົາຄ້ຳສຳຄັນໃນການພົວພັນສອງຝ່າຍ, ເຫັນດີເປັນເອກະພາບກອບນິຕິກຳທີ່ອຳນວຍຄວາມສະດວກ ແລະ ຍູ້ແຮງການຕິດຕາມກວດກາບັນດາກະຊວງ, ຂະແໜງການ, ທ້ອງຖິ່ນ, ບັນດາວິສາຫະກິດໃນການຜັນຂະຫຍາຍບັນດາສັນຍາ, ຂໍ້ຕົກລົງທີ່ໄດ້ຮັບການລົງນາມ, ເປັນຕົ້ນແມ່ນບັນດາຂົງເຂດໃນການເຕີບໂຕໃໝ່ຄື: ເສດຖະກິດສີຂຽວ, ເສດຖະກິດດີຈີຕອນ, ພະລັງງານສະອາດ, ຄວາມປອດໄພທາງເຄືອຂ່າຍອິນເຕີແນັດ, ນະວັດຕະກຳ…

ເພື່ອຊຸກຍູ້ການຮ່ວມມືຢ່າງແທດຈິງລະຫວ່າງສອງສະພາແຫ່ງຊາດ, ການນຳສອງທ່ານໄດ້ເຫັນດີເປັນເອກະພາບຕ້ອງສືບຕໍ່ຜັນຂະຫຍາຍຂໍ້ຕົກລົງຮ່ວມມືລະຫວ່າງສະພາແຫ່ງຊາດສອງປະເທດຢ່າງມີປະສິດທິຜົນ, ປະກອບສ່ວນນຳການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປໃຫ້ນັບມື້ນັບພັດທະນາ ແລະ ຍົກສູງຂຶ້ນສູ່ລະດັບສູງໃຫຍ່, ເພີ່ມທະວີການແລກປ່ຽນຂໍ້ມູນຂ່າວ, ສານແບ່ງປັນບົດຮຽນປະສົບການຂອງແຕ່ລະປະເທດກ່ຽວກັບການບູລະນະລະບອບລະບຽບການ, ນະໂຍບາຍ, ລະບົບກົດໝາຍ…

    

ທ່ານປະທານສະພາແຫ່ງຊາດ ເຈີ່ນແທງເໝີນ ພົບປະກັບທ່ານນາຍົກລັດຖະມົນຕີ ສິງກະໂປ Lawrence Wong

     ຕອນບ່າຍວັນດຽວກັນນີ້, ໃນຂອບເຂດການຢ້ຽມຢາມສິງກະໂປຢ່າງເປັນທາງການ, ທ່ານປະທານສະພາແຫ່ງຊາດ ເຈີ່ນແທງເໝີນ ໄດ້ມີການພົບປະກັບທ່ານນາຍົກລັດຖະມົນຕີ ສິງກະໂປ Lawrence Wong.

    ທີ່ການພົບປະ, ການນຳສອງທ່ານໄດ້ສະແດງຄວາມເພິ່ງພໍໃຈຕໍ່ໝາກຜົນແຫ່ງການຮ່ວມມືດ້ານເສດຖະກິດ, ພິເສດແມ່ນສິງກະໂປຮັກສາຖານະເປັນນັກລົງທຶນໃຫຍ່ອັນດັບ 2 ຢູ່ຫວຽດນາມ ດ້ວຍກ່ວາ 3.800 ໂຄງການ, ຍອດຈຳນວນທຶນສະສົມ 81 ຕື້ ກວ່າ USD; ມີເຄືອຂ່າຍ 18 ເຂດອຸດສາຫະກຳຫວຽດນາມ - ສິງກະໂປ (VSIP) ຢູ່ 13 ແຂວງ, ນະຄອນຂອງຫວຽດນາມ, ແມ່ນສັນຍາລັກແຫ່ງການຮ່ວມມືດ້ານເສດຖະກິດລະຫວ່າງ 2 ປະເທດທີ່ສຳເລັດຜົນ.

    ກ່ຽວກັບບັນຫາສາກົນ ແລະ ພາກພື້ນ, 2 ຝ່າຍເຫັນດີຈະສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສ ແລະ ອົງການຈັດຕັ້ງຫຼາຍຝ່າຍ, ພະຍາຍາມຮັກສາ ຄວາມສາມັກຄີ, ເປັນເອກະພາບ ບົດບາດ ໃຈກາງຂອງ ອາຊຽນ ໃນບັນຫາຍຸດທະສາດ ທີ່ກະທົບເຖິງຄວາມໝັ້ນຄົງ ແລະ ການພັດທະນາຂອງປະຊາຄົມອາຊຽນ ແລະ ບັນດາປະເທດໃນພາກພື້ນ, ໃນນັ້ນມີບັນຫາທະເລຕາເວັນອອກ.