RCEP ແມ່ນປັດໄຈຊຸກຍູ້ດ້ານການຄ້າຢ່າງຍາວນານ ແລະ ຍືນຍົງຂອງ ກຳປູເຈຍ (ພາບປະກອບ)

        ທ່ານຜູ້ຟັງທີ່ເຄົາລົບ, ພາກພື້ນການຄ້າ RCEP ໄດ້ສວມບົດບາດສຳຄັນໃນການຊຸກຍູ້ການເຕີບໂຕເສດຖະກິດຂອງ ກຳປູເຈຍ ດ້ວຍວິທີດຶງດູດການລົງທຶນໂດຍກົງຈາກຕ່າງປະເທດ ແລະ ສ້າງບັນດາໂອກາດດຳເນີນທຸລະກິດໃໝ່. ໃນປີ 2024, ສະພາບການສົ່ງອອກສິນຄ້າຂອງ ກຳປູເຈຍ ໄປຍັງບັນດາປະເທດສະມາຊິກສັນຍາ RCEP ເພີ່ມຂຶ້ນນັ້ນ ໄດ້ຊີ້ໃຫ້ເຫັນຄວາມຕ້ອງການຂອງຕະຫຼາດພາກພື້ນ RCEP ສຳລັບບັນດາສິນຄ້າ ແລະ ຜະລິດຕະພັນທີ່ມາຈາກ ກຳປູເຈຍ, ກໍ່ຄືຄວາມໄວ້ເນື້ອເຊື່ອໃຈ ແລະ ຄວາມປະເອີບໃຈກ່ຽວກັບແງ່ຫວັງພັດທະນາເສດຖະກິດຂອງ ກຳປູເຈຍ.

        ນັບແຕ່ເມື່ອສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ມີຜົນສັກສິດຢ່າງເປັນທາງການໃນວັນທີ 01 ມັງກອນ 2022 ກໍ່ໄດ້ສ້າງກຳລັງໜູນຊຸກຍູ້ການຮ່ວມມືດ້ານການຄ້າພາກພື້ນ, ນຳມາໃຫ້ຜົນປະໂຫຍດຢ່າງໃຫຍ່ຫຼວງໃຫ້ທັງ 15 ປະເທດສະມາຊິກ, ລວມມີ 10 ປະເທດ ອາຊຽນ ແລະ 5 ປະເທດຄູ່ຮ່ວມມື, ໃນສະພາບລັດທິອາລັກຂາເພີ່ມຂຶ້ນ ແລະ ຄວາມຕ້ອງການທົ່ວໂລກຫຼຸດລົງ ຍ້ອນຜົນສະທ້ອນຈາກໂລກລະຍາດໂຄວິດ 19. ສຳລັບ ກຳປູເຈຍ ແລ້ວ, RCEP ໄດ້ສ້າງຄວາມສະດວກດ້ານການຄ້າຫຼາຍຢ່າງ, ກໍຄືດຶງດູດການລົງທຶນ, ຊ່ວຍປະເທດນີ້ມຸ່ງໄປເຖິງໄລຍະພັດທະນາຕໍ່ໄປຢ່າງວ່ອງໄວ ແລະ ເຂົ້າຮ່ວມລະບົບສະໜອງທົ່ວໂລກຫຼາຍກວ່າ. ໃນການແລກປ່ຽນກັບສື່ມວນຊົນຫວ່າງມໍ່ໆມານີ້, ທ່ານ Pen Sovicheat, ລັດຖະມົນຕີທັງເປັນໂຄສົກຂອງລັດຖະມົນຕີກະຊວງການຄ້າ ກຳປູເຈຍ, ເນັ້ນໜັກວ່າ:

        “ໃນ 11 ເດືອນຕົ້ນປີ 2024, ວົງເງິນການຄ້າລະຫວ່າງ ກຳປູເຈຍ ກັບບັນດາປະເທດສະມາຊິກ RCEP ບັນລຸກວ່າ 31,336 ຕື້ USD, ເພີ່ມຂຶ້ນ 18% ເມື່ອທຽບໃສ່ໄລຍະດຽວກັນຂອງປີ 2023. ການເພີ່ມຂຶ້ນນີ້ແມ່ນມາຈາກເລື່ອງ ກຳປູເຈຍ ໄດ້ເພີ່ມທະວີການສົ່ງອອກຜະລິດຕະພັນໃໝ່ຈຳນວນໜຶ່ງ, ຄື: ໝາກມ່ວງຫິມະພານ, ຢາງຕີນລົດ, ບັນດາຜະລິດຕະພັນເກີບ… ໄປຍັງບັນດາປະເທດ RCEP”.

(ພິທີເຊັນສັນຍາຄູ່ຮ່ວມມືເສດຖະກິດຮອບດ້ານພາກພື້ນ)

        ໃນຈຳນວນບັນດາຜະລິດຕະພັນກະເສດສົ່ງອອກຕົ້ນຕໍ່ຂອງ ກຳປູເຈຍ, ໝາກມ່ວງຫິມະພານມີມູນຄ່າສົ່ງອອກໃຫຍ່ອັນດັບທີ 3, ຖັດຈາກເຂົ້າສານ ແລະ ມັນຕົ້ນ. ໄລ່ຮອດທ້າຍເດືອນ ຕຸລາ 2024, ກຳປູເຈຍ ຜະລິດໝາກມ່ວງຫິມະພານ ໄດ້ 840.000 ໂຕນ, ໃນນັ້ນ, ໝາກມ່ວງຫິມະພານ 790.000 ໂຕນສົ່ງອອກໄປຍັງ ຫວຽດນາມ, ເກັບລາຍຮັບກວ່າ 1,1 ຕື້ USD, ເພີ່ມຂຶ້ນ 36% ເມື່ອທຽບໃສ່ປີ 2023. ພ້ອມກັນນັ້ນ, ໝາກມ່ວງຫິມະພານຂອງ ກຳປູເຈຍ ກໍ່ພວມສ້າງທີ່ຕັ້ງຢູ່ຕະຫຼາດ ຈີນ ເທື່ອລະກ້າວ. ທ່ານ Suy Kokthean, ຮອງປະທານສະມາຄົມ ໝາກມ່ວງຫິມະພານ ກຳປູເຈຍ (CAC), ໃຫ້ຮູ້ວ່າ:

        “ຫວຽດນາມ ແມ່ນປະເທດສົ່ງອອກ ໝາກມ່ວງຫິມະພານໃຫຍ່ທີ່ສຸດໃນໂລກ ແລະ ກໍ່ແມ່ນປະເທດນຳເຂົ້າ ໝາກມ່ວງຫິມະພານດິບແຖວໜ້າຂອງ ກຳປູເຈຍ. ໃນຊຸມປີມໍ່ໆມານີ້, ຍ້ອນປະລິມານໝາກມ່ວງຫິມະພານດິບນຳເຂົ້າຈາກບັນດາປະເທດ ອາຟະລິກາ ຫຼຸດລົງ, ວິສາຫະກິດ ຫວຽດນາມ ໄດ້ຊອກຫາແຫຼ່ງສະໜອງຈາກບັນດາປະເທດອື່ນ, ພິເສດແມ່ນ ກຳປູເຈຍ. ດ້ານອື່ນ, ປະລິມານຈຳໜ່າຍ ໝາກມ່ວງຫິມະພານ ກຳປູເຈຍ ຢູ່ຕະຫຼາດ ຈີນ ກໍ່ເພີ່ມຂຶ້ນຢ່າງວ່ອງໄວໃນຊຸມປີມໍ່ໆມານີ້. ມີຊະນິດໝາກມ່ວງຫິມະພານຈຳນວນໜຶ່ງຂອງ ກຳປູເຈຍ ທີ່ລູກຄ້າ ຈີນ ນິຍົມທີ່ສຸດ ແລະ ນັບມື້ນັບມີທົ່ວໄປຢູ່ປະເທດນີ້”.

        ກໍ່ຕາມທ່ານ Pen Sovicheat, ລັດຖະມົນຕີທັງເປັນໂຄສົກຂອງລັດຖະມົນຕີກະຊວງການຄ້າ ກຳປູເຈຍ ແລ້ວ, ທາງກະຊວງຍັງຖືຜົນປະໂຫຍດຈາກສັນຍາການຄ້າກັບ RCEP ແມ່ນກຸນແຈແກ່ການເຕີບໂຕພື້ນຖານເສດຖະກິດແຫ່ງຊາດ, ຍ້ອນວ່າ ນອກຈາກການພົວພັນດ້ານການຄ້າແລ້ວ, ສັນຍາຍັງມືບັນດາການຮ່ວມມືອື່ນ, ຄື: ໜູນຊ່ວຍເຊິ່ງກັນແລະກັນໃນຂົງເຂດອອກແຮງງານເຕັກນິກ, ຖ່າຍທອດເຕັກໂນໂລຊີ ແລະ ດຶງດູດເງິນລົງທຶນ… ໃນ 6 ເດືອນຕົ້ນປີ 2024, ກຳປູເຈຍ ໄດ້ດຶງດູດເງິນລົງທຶນໂດຍກົງຈາກຕ່າງປະເທດ (FDI) ປະມານ 1,6 ຕື້ USD, ກວມເອົາເກືອບ 50% ຍອດເງິນລົງທຶນໃໝ່ຢູ່ປະເທດນີ້. ບັນດານັກລົງທຶນຕ່າງປະເທດແຖວໜ້າຢູ່ ກຳປູເຈຍ ສ່ວນຫຼາຍລ້ວນແຕ່ແມ່ນສະມາຊິກຂອງ RCEP, ຄື: ຈີນ, ສິງກະໂປ, ຫວຽດນາມ, ສ.ເກົາຫຼີ. ບັນດາໂຄງການ FDI ກໍ່ປະກອບສ່ວນຍົກສູງກຳລັງແກ່ງແຍ້ງຂອງບັນດາວິສາຫະກິດຢູ່ພາຍໃນປະເທດ, ພິເສດແມ່ນວິສາຫະກິດຂະໜາດກາງ ແລະ ນ້ອຍ, ກໍຄືຍົກສູງຄຸນນະພາບແຫຼ່ງຊັບພະຍາກອນມະນຸດ, ມຸ່ງໄປເຖິງເປົ້າໝາຍຫັນພື້ນຖານເສດຖະກິດ ກຳປູເຈຍ ເປັນສີຂຽວ, ໂດຍອີງໃສ່ການສົ່ງອອກວັດຖຸດິບໄປສູ່ການຜະລິດບັນດາຜະລິດຕະພັນເຄິ່ງສຳເລັດຮູບ ແລະ ເປັນຜະລິດຕະພັນ ເພື່ອສະໜອງໃຫ້ຕະຫຼາດພາຍໃນປະເທດ ແລະ ສົ່ງອອກ. ທ່ານ Pen Sovicheat, ໃຫ້ຮູ້ວ່າ:

        “ເປົ້າໝາຍຂອງພວກຂ້າພະເຈົ້າແມ່ນພັດທະນາບັນດາຜະລິດຕະພັນ, ລວມມີບັນດາວັດຖຸດິບທຳມະຊາດຂອງ ກຳປູເຈຍ, ຄື: ເຂົ້າສານ, ມັນຕົ້ນ, ໝາກມ່ວງຫິມະພານ... ແລະ ບັນດາຜະລິດຕະພັນອື່ນໆທີ່ໄດ້ຜະລິດຢູ່ ກຳປູເຈຍ, ນັບທັງຢູ່ຕະຫຼາດພາຍໃນ ແລະ ຕ່າງປະເທດ. ໃນອະນາຄົດ, ກຳປູເຈຍ ຈະບໍ່ເອື່ອຍອີງການນຳເຂົ້າບັນດາຜະລິດຕະພັນອຸປະໂພກຫຼາຍອີກ, ຫາກຍັງຈະຍູ້ແຮງການພັດທະນາບັນດາຜະລິດຕະພັນທີ່ຜະລິດຢູ່ ກຳປູເຈຍ. ເຮັດແນວໃດເພື່ອໃຫ້ຜູ້ບໍລິໂພກຢູ່ພາຍໃນປະເທດ ແລະ ຕ່າງປະເທດໄດ້ຟັງ, ໄດ້ເຫັນ ແລະ ມີຄວາມເຂົ້າໃຈກ່ຽວກັບຄຸນນະພາບສິນຄ້າ "Made in Cambodia”.

        ຕາມຄຳເຫັນຂອງນັກຊ່ຽວຊານຫຼາຍທ່ານ, RCEP ແມ່ນປັດໄຈຊຸກຍູ້ດ້ານການຄ້າຢ່າງຍາວນານ ແລະ ຍືນຍົງຂອງ ກຳປູເຈຍ. ສັນຍາການຄ້າເສລີໃຫຍ່ທີ່ສຸດໃນໂລກນີ້ໄດ້ຮັບຄວາມຫວັງວ່າ ສາມາດຊ່ວຍໃຫ້ ກຳປູເຈຍ ຫຼຸດພົ້ນອອກຈາກປ້າຍ “ປະເທດດ້ອຍພັດທະນາ” ໃນປີ 2028, ແລະ ບັນລຸເປົ້າໝາຍກາຍເປັນປະເທດມີລາຍຮັບ ປານກາງຂຶ້ນໄປໃນປີ 2030.