ພາບປະກອບ: nghean.gov.vn/

ອາທິດຜ່ານມາ, ພະແນກ ກະຈາຍສຽງພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ ສືບຕໍ່ໄດ້ຮັບຈົດໝາຍ, ອີເມວ 374 ສະບັບ ແລະ ໂທລະສັບຫຼາຍສາຍຂອງບັນດາຜູ້ຟັງທີ່ມາຈາກ 36 ປະເທດ ແລະ ເຂດແຄ້ວນຄື: ແອັດສະປາຍ, ອັງກິດ, ຝລັ່ງ, ຍີ່ປຸ່ນ, ລາວ… ໃນນັ້ນ ລາຍການພາກພາສາລາວ ມີ 21 ສະບັບ. ໃນລາຍການ ໂອ້ລົມກັບເພື່ອນລາວມື້ນີ້, ພວກຂ້າພະເຈົ້າຂໍຄັດສະເໜີເນື້ອໃນຄຳເຫັນ, ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການໃນອາທິດຜ່ານມາ. ເຊີນທ່ານຕິດຕາມຮັບຟັງ.

ທ່ານ M Saleem, ຢູ່ປາກິດສະຖານ ໄດ້ສົ່ງຈົດໝາຍມາຍັງລາຍການພາກພາສາອັງກິດ ດ້ວຍເນື້ອໃນທີ່ວ່າ: “VOV ພາກພາສາອັງກິດ ໄດ້ກາຍເປັນສ່ວນໜຶ່ງໃນຊີວິດປະຈຳວັນຂອງຂ້າພະເຈົ້າ. ພວກເພື່ອນພວມສະໜອງບັນດາຂໍ້ມູນທີ່ມີຄ່າກ່ຽວກັບ ຫວຽດນາມ ແລະ ໃນນັ້ນ ມີວັດທະນະທຳທີ່ອຸດົມສົມບູນ ກໍ່ຄືແງ່ຫວັງທົ່ວໂລກຂອງ ຫວຽດນາມ. ພວກເພື່ອນພວມສວມບົດບາດແມ່ນຂົວເຊື່ອມຕໍ່ຜູ້ຟັງໃນທົ່ວໂລກ”.

ທ່ານຜູ້ຟັງ ອູໄລເຄືອ ມາຈາກແຂວງ ກ໋ວາງຕຸງ, ປະເທດ ຈີນ ໄດ້ຂຽນວ່າ: “ຂໍສະແດງຄວາມຂອບອົກຂອບໃຈມາຍັງພວກເພື່ອນ. ໃນຖານະເປັນຜູ້ຟັງມາແຕ່ດົນນານ, ລາຍການຂອງພວກເພື່ອນບໍ່ພຽງແຕ່ເຮັດໃຫ້ຈິດໃຈຂອງຂ້າພະເຈົ້າມີຄວາມອຸດົມສົມບູນກ່ວາອີກເທົ່ານັ້ນ, ຫາກຍັງເຮັດໃຫ້ຂ້າພະເຈົ້າຮູ້ສຶກໄດ້ເຖິງຄວາມອົບອຸ່ນ ແລະ ກຳລັງແຮງຂອງຄຶ້ນກະຈາຍສຽງອີກດ້ວຍ. ອີກຄັ້ງໜຶ່ງຂໍຂອບໃຈຍ້ອນທຸກສິ່ງທຸກຢ່າງທີ່ພວກເພື່ອນເຮັດໃຫ້ສຳລັບທ່ານຜູ້ຟັງ ແລະ ຂ້າພະເຈົ້າມີຄວາມປາດຖະໜາຢ່າງຍິ່ງວ່າ ພວກເພື່ອນຈະສືບຕໍ່ນຳບັນດາລາຍການກະຈາຍສຽງທີ່ມ່ວນກ່ວາອີກມາໃຫ້ທ່ານຜູ້ຟັງ”.

ທ່ານ ພອນສະຫວັນ ຢູ່ນະຄອນຫຼວງ ວຽງຈັນ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນຄືດັ່ງນີ້: ສັບປະດາຜ່ານມາ ເມື່ອຕິດຕາມຂ່າວ ຂ້າພະເຈົ້າໄດ້ຮູ້ວ່າ ກອງທັບ ຫວຽດນາມ - ລາວ - ກຳປູເຈຍ ຈັດການຝືກຊ້ອມກອບກູ້ໄພພິບັດ, ຂໍໃຫ້ທາງລາຍການສະໜອງຂໍ້ມູນຕື່ມອີກກ່ຽວກັບການຝືກຊ້ອມດັ່ງກ່າວ? ຂໍຂອບໃຈ.

ເພື່ອນ ພອນສະຫວັນ ທີ່ຮັກແພງ! ໂດຍໄດ້ດຳເນີນແຕ່ວັນທີ 18 – 25 ພະຈິກ, ການຝືກຊ້ອມຮ່ວມລະຫວ່າງກອງທັບສາມປະເທດຫວຽດນາມ - ລາວ - ກຳປູເຈຍ ໂດຍກອງທັບລາຊະອານາຈັກ ກຳປູເຈຍ ເປັນເຈົ້າພາບຈັດຂຶ້ນພາຍໃຕ້ຫົວຂໍ້ “ປະຕິບັດການຊ່ວຍເຫຼືອກອບກູ້ໄພພິບັດອາຄານຖະຫຼົ່ມລົງ”. ກອງທັບ 3 ປະເທດໄດ້ຈັດເປັນແຕ່ລະກຸ່ມເພື່ອປະຕິບັດການຊ່ວຍເຫຼືອຄົ້ນຫາ ແລະ ນໍາສົ່ງຜູ້ບາດເຈັບໄປປິ່ນປົວຢູ່ຕາມໂຮງໝໍຂັ້ນ 1, 2, 3.

ການຝືກຊ້ອມຮ່ວມລະຫວ່າງກອງທັບ 3 ປະເທດ ກຳປູເຈຍ - ລາວ - ຫວຽດນາມ ມີຂອບຂະໜາດໃຫຍ່, ເພື່ອແນໃສ່ຮັບມືກັບບັນດາໄພພິບັດທີ່ອາດຈະເກີດຂຶ້ນ, ນາບຂູ່ການດຳລົງຊີວິດຂອງປະຊາຊົນສາມປະເທດ. ໂດຍກະຊວງປ້ອງກັນປະເທດ ຫວຽດນາມ ມອບໜ້າທີ່ໃຫ້ທະຫານເຂດ 5 ເປັນປະທານການສົມທົບກັບອົງການຂອງກະຊວງ ຈັດສົ່ງກຳລັງ, ພາຫະນະຕາງໜ້າໃຫ້ແກ່ກອງທັບປະຊາຊົນ ຫວຽດນາມ ເຂົ້າຮ່ວມການຝືກຊ້ອມ. ກຳລັງເຂົ້າຮ່ວມແມ່ນຖັນແຖວພະນັກງານໄດ້ຮັບການຄັດເລືອກຈາກໂຮງໝໍການແພດທະຫານ 13, 17, ກອງພົນນ້ອຍທະຫານຊ່າງ 270 ແລະ ໄດ້ຮັບການປະກອບພາຫະນະ, ວັດຖຸອຸປະກອນກອບກູ້ທີ່ທັນສະໄໝ.

ທ່ານພົນຕີ Pen Sokrethvithyea, ຫົວໜ້າສຳນັກງານເຝີກອົບຮົມ, ກອງບັນຊາການໃຫຍ່, ກອງທັບລາຊະອານາຈັກ ກຳປູເຈຍ ຢັ້ງຢືນວ່າ: ບັ້ນຝືກຊ້ອມແມ່ນໂອກາດອັນລ້ຳຄ່າເພື່ອໃຫ້ກອງທັບສາມປະເທດແລກປ່ຽນຄວາມຮູ້, ບົດຮຽນປະສົບການ, ເພີ່ມທະວີນ້ຳໃຈມິດຕະພາບທີ່ເປັນມູນເຊື້ອ, ຊຸກຍູ້ການຮ່ວມມືລະຫວ່າງກະຊວງປ້ອງກັນປະເທດສາມປະເທດ, ບົນຫຼັກການຮັກສາເອກະລາດ, ອະທິປະໄຕ ແລະ ເຄົາລົບຊຶ່ງກັນແລະກັນ.

ເພື່ອນຈຳປາ ມາຈາກແຂວງ ຫົວພັນ ຢາກຊອກຮູ້ກ່ຽວກັບການໝູນໃຊ້ AI ໃນການຜະລິດກະສິກຳຢູ່ ຫວຽດນາມ

ເພື່ອນຈຳປາ ທີ່ຮັກແພງ! ໂດຍແມ່ນປະເທດນອນໃນ Top ບັນດາປະເທດສົ່ງອອກກະສິກຳຫຼາຍທີ່ສຸດໃນໂລກ, ຫວຽດນາມ ຍາມໃດກໍ່ມີຄວາມເອົາໃຈໃສ່ຕໍ່ການພັດທະນາຂົງເຂດນີ້, ພິເສດແມ່ນການໝູນໃຊ້ AI ເຂົ້າໃນການຜະລິດ ເພື່ອແນໃສ່ປັບປຸງສະມັດຕະພາບ ແລະ ຍົກສູງປະສິດທິຜົນຂອງການຜະລິດ, ພ້ອມທັງຫຼຸດຜ່ອນບັນດາຄວາມສ່ຽງ ແລະ ຄ່າໃຊ້ຈ່າຍໃນການຜະລິດ. ບັນດາຜົນປະໂຫຍດຂອງ AI ໄດ້ນຳເຊິ່ງຜົນປະໂຫຍດອັນໃຫຍ່ຫຼວງທີ່ສຸດມາໃຫ້ພື້ນຖານກະສິກຳ ຫວຽດນາມ. ເພາະສະນັ້ນ, ເຕັກໂນໂລຢີ ໄດ້ ແລະ ພວມນັບມື້ນັບໄດ້ຮັບການໝູນໃຊ້ເຂົ້າການຜະລິດ, ການປູກຝັງກະສິກຳ ຢູ່ ຫວຽດນາມ ໃນວົງກ້ວາງ.

ອາດເວົ້າເຖິງບາງແອັບທີ່ມີປະໂຫຍດຂອງ AI ເຂົ້າຂົງເຂດນີ້ຢູ່ ຫວຽດນາມ ຄື: ພະຍາກອນອາກາດ ແລະ ລາຄາ, ຕິດຕາມກວດກາການຂະຫຍາຍຕົວຂອງຕົ້ນໄມ້, ຫຸ່ນຍົນກະສິກຳ, ການສີດພົ່ນຢາແບບອັດສະລິຍະໂດຍອີງຕາມ AI, ບົ່ງມະຕິພະຍາດຕົ້ນໄມ້, ການປູກຝັງທີ່ຊັດເຈນ… ພິເສດລະບົບໜູນຊ່ວຍ AI ເພື່ອພົບເຫັນພະຍາດລະບາດໃນກະສິກຳ, ນີ້ໄດ້ຮັບຖືວ່າແມ່ນເຄື່ອງມືທີ່ສຳຄັນໃນການປົກປ້ອງຕົ້ນໄມ້ອອກຈາກບັນດາພະຍາດອັນຕະລາຍ ແລະ ແມງໄມ້ທຳລາຍຕົ້ນໄມ້.

ລະບົບນີ້ນຳໃຊ້ບັນດາເຕັກນິກ ແລະ ຮູບແບບວິໄຈວິເຄາະເພື່ອໄຈ້ແຍກບັນດາຂໍ້ມູນຈາກເຄື່ອງແຊນເຊີ.  ຫຼັງຈາກນັ້ນ, ລະບົບໄດ້ໄຈ້ແຍກຂໍ້ມູນເພື່ອຢັ້ງຢືນວ່າມີການປະກົດຂຶ້ນຂອງພະຍາດລະບາດທີ່ກໍ່ຜົນຮ້າຍຫຼືບໍ່, ຕີລາຄາລະດັບອັນຕະລາຍຂອງພະຍາດ ແລະ ຍົກອອກວິທີການແກ້ໄຂ.

ອາດເວົ້າໄດ້ວ່າ, ເຕັກໂນໂລຢີ AI ຢູ່ ຫວຽດນາມ ຈະສືບຕໍ່ໄດ້ຮັບການພັດທະນາ ແລະ ໝູນໃຊ້ຢ່າງແຮງເພື່ອໄຈ້ແຍກ, ຕິດຕາມກວດກາ ແລະ ຄາດຄະເນບັນດາຜົນກະທົບທາງດ້ານສິ່ງແວດລ້ອມທີ່ແຕກຕ່າງກັນຕໍ່ສະມັດຕະພາບ, ຄຸນນະພາບຕົ້ນໄມ້. ພ້ອມກັນນັ້ນ, ຕໍ່ກັບຜົນສະທ້ອນຕົວຈິງຈາກການປ່ຽນແປງຂອງດິນຟ້າອາກາດ, ການພະຍາກອນດິນຟ້າອາກາດຢ່າງຊັດເຈນ ໄດ້ຊ່ວຍຊາວກະສິກອນຍົກອອກບັນດາການຕັດສິນໃຈທີ່ຖືກຕ້ອງກ່ຽວກັບວັນເວລາ ແລະ ເປົ້າໝາຍໃນການປູກຝັງ ເພື່ອບັນລຸຜົນກຳໄລໃນການປູກຝັງຢູ່ລະດັບສູງທີ່ສຸດ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມານັ້ນແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນ ຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ບັນດາທ່ານກໍ່ສາມາດຝາກຈົດໝາຍມາຍັງລາຍການ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວັບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມຜ່ານບັນດາລາຍການທີ່ໄດ້ເອົາລົງໃນເວັບໄຊດັ່ງກ່າວ. ຂໍຂອບໃຈ.