ວັນບຸນ ຂວັນພະແມ່ຈົ່ວ ພູຊາມ (ພາບ: hcmcpv.org.vn)

ອາທິດຜ່ານມາ, ພະແນກກະຈາຍສຽງພາກບັນດາພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍອີເມວ ຫຼາຍສະບັບ ແລະ ໂທລະສັບຫຼາຍສາຍຈາກທ່ານຜູ້ຟັງທີ່ມາຈາກຫຼາຍປະເທດ ແລະ ເຂດແຄວ້ນຄື: ແອັດສະປາຍ, ອັງກິດ, ຍີ່ປຸ່ນ, ກຳປູເຈຍ, ໄທ ແລະ ລາວ. ໃນນັ້ນມີເພື່ອນລາວ  ໄດ້ສົ່ງຈົດໝາຍມາຍັງລາຍການ 20 ສະບັບ. ໃນລາຍການໂອ້ລົມກັບເພື່ອນລາວມື້ນີ້ ພວກຂ້າພະເຈົ້າຂໍຄັດສະເໜີບາງຄຳເຫັນ, ເນື້ອໃນ, ກໍ່ຄືຕອບບາງຄຳຖາມຂອງທ່ານຜູ້ຟັງທີ່ຝາກມາຍັງລາຍການໃນອາທິດຜ່ານມາ. ຂໍເຊີນບັນດາທ່ານຕິດຕາມຮັບຟັງ.

ເພື່ອນຕິງລູມາຈາກຈີນ ໄດ້ຂຽນວ່າ: “ເວລາຜ່ານໄປຢ່າງວ່ອງໄວ, ພຽງແຕ່ອີກໜຶ່ງເດືອນກໍ່ຈະໝົດປີ 2024 ແລ້ວ, ໃນປີຜ່ານມາ ຂ້າພະເຈົ້າໄດ້ພົວພັນແລກປ່ຽນກັບລາຍການພາກພາສາແອັດສະປາຍ ຂອງວິທະຍຸກະຈາຍສຽງຫວຽດນາມ ເປັນປະຈຳກ່ວາເມື່ອທຽບໃສ່ກັບປີ 2023. ຂ້າພະເຈົ້າກໍ່ຮູ້ສຶກໄດ້ເຖິງຄວາມຮັກແພງ ແລະ ມີການສະໜັບສະໜູນຂອງບັນດາຜູ້ເຮັດລາຍການ”.

ເພື່ອນ Juan Diez ຢູ່ Santander, ແອັດສະປາຍ ໄດ້ມີຄຳເຫັນວ່າ: “ສາມສັງກາດ ກໍ່ສ້າງຄືນໃໝ່, ປ່ຽນແປງໃໝ່ ແລະ ບຸກບືນຂອງຫວຽດນາມ ມີຄວາມສຳຄັນຍິ່ງ ແລະ ໄດ້ນຳເຊິ່ງຜົນສຳເລັດໃນການປັບປຸງພື້ນຖານການເມືອງ ແລະ ສັງຄົມຂອງ ຫວຽດນາມ. ສັງກາດບຸກບືນພວມດຳເນີນໄປໂດຍມີຄວາມໝາຍພິເສດ ຍ້ອນວ່າ ມັນໄດ້ນັບແຕ່ກອງປະຊຸມໃຫຍ່ທົ່ວປະເທດຄັ້ງທີ 14 ຂອງພັກກອມມູນິດ ຫວຽດນາມ ດ້ວຍສິ່ງທ້າທາຍຫຼາຍຢ່າງ. ພັກກອມມູນິດ ຫວຽດນາມ, ພາຍໃຕ້ການຊີ້ນຳປ່ຽນແປງໃໝ່ຢ່າງຂ້ຽວຂາດຂອງທ່ານເລຂາທິການໃຫຍ່ ໂຕເລິມ, ຈະຍົກອອກບັນດາມາດຕະການທີ່ເໝາະສົມເພື່ອປັບຕົວໃຫ້ແທດເໝາະກັບໂລກທີ່ພວມມີການປ່ຽນແປງ ແລະ ເຕັມໄປດ້ວຍສິ່ງທ້າທາຍຄືໃນປັດຈຸບັນ, ເຊິ່ງຕ້ອງມີບັນດານະໂຍບາຍທີ່ມີໄຫວພິບ, ປັບຕົວໃຫ້ແທດເໝາະກັບສິ່ງໃໝ່, ບໍ່ແຂງກະດ້າງ, ບໍ່ເປັນຄຳພີ”

 ເພື່ອນ ບຸນມີ ມາຈາກແຂວງ ຫົວພັນ ໄດ້ສົ່ງຈົດໝາຍມາຍັງລາຍກາຍຜ່ານທາງ facebook ດ້ວຍເນື້ອໃນຄືດັ່ງນີ້, ຂໍອວຍພອນ “ວັນບຸນຂວັນບ່າຈົ່ວພູຊາມ” ຂອງ ຫວຽດນາມ ໂດຍ UNESCO ຈົດຊື່ເຂົ້າເປັນມໍລະດົກວັດທະນະທຳບໍ່ເປັນວັດຖຸ ຕາງໜ້າຂອງມວນມະນຸດ. ຂ້າພະເຈົ້າ ເຊື່ອໝັ້ນວ່າ ດ້ວຍນາມມະຍົດດັ່ງກ່າວ, ຈະມີແຂກທ່ອງທ່ຽວສາກົນຫຼາຍຄົນຢາກມາຫວຽດນາມ ເພື່ອຊອກຮູ້ ແລະ ເຂົ້າຮ່ວມວັນບຸນນັ້ນ. ໃນໂອກາດນີ້, ຂ້າພະເຈົ້າກໍ່ຢາກຊອກຮູ້ກ່ຽວກັບຕົ້ນກຳເນີດຂອງວັນບຸນ ຂວັນບ່າ (ພະແມ່) ຈົ່ວພູຊາມ, ຫວັງວ່າບັນນາທິການພາສາລາວ ຈະສະໜອງຂໍ້ມູນກ່ຽວກັບວັນບຸນດັ່ງກ່າວໃຫ້ຂ້າພະເຈົ້າຕື່ມອີກ?

ເພື່ອນບຸນມີ ທີ່ຮັກແພງ! ວັນບຸນຂວັນພະແມ່ຈົ່ວ ມີຕົ້ນກຳເນີດແຕ່ກີ້ແຕ່ກ່ອນ, ເມື່ອຊາວທ້ອງຖິ່ນ ຊອກຫາຮູບປັ້ນຂອງພະແມ່ຈົ່ວ ທີ່ໄດ້ເຮັດດ້ວຍດິນດາກຢູ່ຈອມພູຊາມ ໃນໄລຍະກ່ອນສະຕະວັດທີ 18. ຕາມເທບນິຍາຍ, ເພື່ອແບກຮູບປັ້ນ ບ່າຈົ່ວ ລົງ ຕ້ອງມີສາວພົມມະຈາລີ 9 ຄົນຫາບ ແລະ ຮູບປັ້ນ ພະແມ່ຈົວພຽງແຕ່ອະນຸຍາດໃຫ້ແມ່ຍິງບູຊາເທົ່ານັ້ນ. ປະຊາຊົນກໍ່ເຊື່ອໝັ້ນວ່າ ຮູບປັ້ນຂອງພະແມ່ຈົ່ວ ແມ່ນຕົວແທນຂອງພະແມ່ - ເຊິ່ງແມ່ນພະແມ່ໃນການເຫຼື້ອມໃສເຊື່ອຖືພະແມ່ຂອງ ຫວຽດນາມ.  ຈາກນັ້ນ, ປະຊາຊົນໄດ້ກໍ່ສ້າງວິຫານນ້ອຍໆເພື່ອບູຊາພະແມ່ ແລະ ເອີ້ນວ່າ ພະແມ່ ຈົ່ວຊື໋ - ໝາຍຄວາມວ່າເທບທິດາເຂດດິນແດນແຫ່ງນີ້.

ຕາມການສົມມຸດຖານອື່ນ, ວິຫານ ພະແມ່ຈົ່ວໄດ້ຮັບການກໍ່ສ້າງພາຍຫຼັງ ທວ້າຍງອກເຮົ່າ - ນາຍພົນທ່ານໜຶ່ງຂອງ ລາຊະວົງຫງວຽນ - ກັບມາບ່ອນນີ້ດຳລົງຕຳແໜ່ງ ກໍ່ສ້າງຄອງເໝືອງ ວິງເຕ ໃນປີ 1824. ທ່ານ ທວ້າຍງອກເຮົ່າ ແລະ ເມຍແມ່ນທ່ານນາງ ເຈົ້າທິເຕ ໄດ້ໜູນຊ່ວຍກໍ່ສ້າງວິຫານພະແມ່ຈົ່ວດ້ວຍດິນຈີ່ ແລະ ຫີນເພື່ອສະແດງຄວາມຮູ້ບຸນຄຸນຕໍ່ພະແມ່ຈົ່ວ ທີ່ດົນບານດານຜົນປະໂຫຍດຫຼາຍຢ່າງໃຫ້ແກ່ເຂດດິນແດນແຫ່ງນີ້.

ເຖິງວ່າຕາມການສົມມຸດຖານໃດກໍ່ຕາມ, ວັນບຸນ ຂວັນພະແມ່ຈົ່ວ ກໍ່ມີຄວາມໝາຍສະແດງຄວາມເຄົາລົບນັບຖື ແລະ ສະແດງຄວາມຮູ້ບຸນຄຸນຕໍ່ພະແມ່ ທີ່ໄດ້ເບິ່ງແຍງດູແລ ແລະ ອຸປະຖຳຄ້ຳຊູໃຫ້ແກ່ປະຊາຊົນດິນແດນແຫ່ງນີ້. ວັນບຸນກໍ່ແມ່ນໂອກາດເພື່ອໃຫ້ປະຊາຊົນສະແດງຈິດໃຈສາມັກຄີ, ຄວາມສະໜິດຕິດພັນ ແລະ ໂຄສະນາເຜີຍແຜ່ວັດທະນະທຳທາງດ້ານຄວາມສັດທາເຫຼື້ອມໃສທີ່ເປັນເອກະລັກສະເພາະຂອງ ແດນພາກໃຕ້ຕອນຕາເວັນຕົກ.

ເພື່ອນ ໜູເພັດ ຢູ່ແຂວງຫຼວງພະບາງ ໄດ້ສົ່ງຂໍ້ຄວາມມາຍັງລາຍການຜ່ານທາງ ອີເມວ ດ້ວຍເນື້ອໃນທີ່ວ່າ: ອາທິດຜ່ານມາ, ເມື່ອຕິດຕາມຂ່າວຢູ່ເວັບໄຊ vovworld.vn, ຂ້າພະເຈົ້າອ່ານໄດ້ຂ່າວຄາວກ່ຽວກັບການພົບປະໂອ້ລົມລະຫວ່າງສູນກາງຊາວໜຸ່ມສອງປະເທດ ຫວຽດນາມ - ລາວ, ຂ້າພະເຈົ້າຮູ້ສຶກດີໃຈຕໍ່ບັນດາຜົນງານ ເຊິ່ງຄະນະຊາວໜຸ່ມສອງປະເທດເຮັດໄດ້ໃນໄລຍະຜ່ານມາ. ໄປຄຽງຄູ່ກັນນັ້ນ, ຂ້າພະເຈົ້າກໍ່ປາດຖະໜາ ຢາກຊອກຮູ້ຕື່ມອີກກ່ຽວກັບແຜນການຮ່ວມມືລະຫວ່າງສອງຝ່າຍໃນໄລຍະຈະມາເຖິງ.

ເພື່ອນ ໜູນເພັດ ທີ່ຮັກແພງ! ອາທິດຜ່າມາ, ຢູ່ຮ່າໂນ້ຍ, ສະຫາຍ ບຸຍກ໋ວາງຮຸຍ - ກຳມະການສຳຮອງ ສູນກາງພັກກອມມູນິດ ຫວຽດນາມ, ເລຂາຜູ້ທີໜຶ່ງສູນກາງຄະນະຊາວໜຸມພັກກອມມູນິດ ໂຮ່ຈີມິນ ໄດ້ມີການໂອ້ລົມສົນທະນາ ກັບ ສະຫາຍ ມອນໄຊ ລາວມົວຊົ່ງ ກຳມະການສຳຮອງສູນກາງພັກປະຊາຊົນປະຕິວັດລາວ, ເລຂາສູນກາງຊາວໜຸ່ມປະຊາຊົນປະຕິວັດລາວ.

ທີ່ການໂອ້ລົມສົນທະນາ, ສະຫາຍ ມອນໄຊ ລາວມົວຊົ່ງ ໄດ້ສະເໜີສອງຝ່າຍສືບຕໍ່ຜັນຂະຫຍາຍຈັດຕັ້ງບັນດາເນື້ອໃນຂໍ້ຕົກລົງຮ່ວມມືໄລຍະ 2022 – 2027, ສູນກາງຊາວໜຸ່ມກອມມູນິດ ໂຮ່ຈີມິນ ເອົາໃຈໃສ່, ຊຸກຍູ້ແຜນການກໍ່ສ້າງ ແລະ ພັດທະນາສູນບຳລຸງສ້າງຊາວໜຸ່ມ ລາວ - ຫວຽດນາມ ຢູ່ນະຄອນຫຼວງວຽງຈັນ (ລາວ). ສະຫາຍ ມອນໄຊ ລາວມົວຊົ່ງ ກໍ່ສະແດງຄວາມປາດຖະໜາສູນກາງຄະນະຊາວໜຸ່ມພັກກອມມູນິດ ໂຮ່ຈີມິນ ສືບຕໍ່ສົມທົບ, ໜູນຊ່ວຍບຳລຸງສ້າງ, ຝືກອົບຮົບຕໍ່ພະນັກງານເຮັດວຽກງານຊາວໜຸ່ມຂອງລາວ, ສະໜອງທຶນການສຶກສາໃຫ້ນັກສຶກສາລາວ ພວມຮ່ຳຮຽນຢູ່ ຫວຽດນາມ, ຊຸກຍູ້ການພົບປະແລກປ່ຽນ, ຮ່ວມມືນັກທຸລະກິດໜຸ່ມສອງປະເທດ…

ສ່ວນສະຫາຍ ບຸຍກ໋ວາງຮຸຍ ສະແດງຄວາມເຫັນດີຕໍ່ບັນດາຂໍ້ສະເໜີຂອງສະຫາຍ ມອນໄຊ ລາວມົວຊົ່ງ, ພ້ອມທັງເນັ້ນໜັກວ່າ ສູນກາງຊາວໜຸ່ມກອມມູນິດໂຮ່ຈີມິນ ໃຫ້ຄຳໝັ້ນສັນຍາ, ສືບຕໍ່ສົມທົບກັນຢ່າງແໜ້ນແຟ້ນ, ສຸມໃສ່ຜັນຂະຫຍາຍບັນດາເນື້ອໃນຂອງຂໍ້ຕົກລົງການຮ່ວມມືລະຫວ່າງຄະນະຊາວໜຸ່ມສອງປະເທດໃນໄລຍະ 2022 – 2027 ຢ່າງມີປະສິດທິຜົນ, ຄົບຊຸດ. ໃນນັ້ນ, ສືບຕໍ່ເພີ່ມທະວີບັນດາການເຄື່ອນໄຫວໂຄສະນາ, ຍົກສູງຄວາມຮັບຮູ້ໃຫ້ແກ່ຊາວໜຸ່ມເຍົາວະຊົນອະນຸຊົນສອງປະເທດກ່ຽວກັບການພົວພັນແບບພິເສດ ຫວຽດນາມ - ລາວ.

ໄປຄຽງຄູ່ກັນນັ້ນ, ສະຫາຍ ບຸຍກ໋ວາງຮຸຍ ກໍ່ສະເໜີປີ 2025, ສູນກາງຄະນະຊາວໜຸ່ມກອມມູນິດ ໂຮ່ຈີມິນ ແລະ ສູນກາງຊາວໜຸ່ມປະຊາຊົນປະຕິວັດລາວ ສືບຕໍ່ຜັນຂະຫຍາຍຮູບແບບພົບປະມິດຕະພາບ ລະຫວ່າງຊາວໜຸ່ມ ຫວຽດນາມ - ລາວ ຢູ່ ຫວຽດນາມ ແລະ ຢູ່ລາວ, ອາດຈະເປີດກວ້າງຕື່ມອີກເປົ້າໝາຍສຳລັບອະນຸຊົນ ເພື່ອໃຫ້ຊາວໜຸ່ມເຍົາວະຊົນອະນຸຊົນສອງປະເທດມີໂອກາດເພື່ອຄົ້ນຫາ, ແລກປ່ຽນ, ຊອກຮູ້ຕື່ມອີກກ່ຽວກັບມູນເຊື້ອອັນດີງາມ, ການພົວພັນແບບພິເສດ ໜຶ່ງດຽວໃນໂລກ ລະຫວ່າງ ຫວຽດນາມ ແລະ ລາວ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມານັ້ນແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນ ຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ບັນດາທ່ານກໍ່ສາມາດຝາກຈົດໝາຍມາຍັງລາຍການ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວັບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມຜ່ານບັນດາລາຍການທີ່ໄດ້ເອົາລົງໃນເວັບໄຊດັ່ງກ່າວ. ຂໍຂອບໃຈ.