ຜູ້ຕາງໜ້າ ມອບໃບຢັ້ງຢືນ ໝູ່ບ້ານທ່ອງທ່ຽວດີທີ່ສຸດໃນປີ 2024 ໃຫ້ແກ່ໝູ່ບ້ານ ຈ່າເກ້ວ (ພາບ: VOV)

ອາທິດຜ່ານມາ, ພະແນກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍອີເມວ 432 ສະບັບ ແລະ ໂທລະສັບຫຼາຍສາຍຂອງທ່ານຜູ້ຟັງທີ່ມາຈາກ 32 ປະເທດ ແລະ ເຂດແຄ້ວນ, ໃນນັ້ນ ລາຍການພາກພາສາລາວ ໄດ້ຮັບຈົດໝາຍ 18 ສະບັບ. ໃນລາຍການໂອ້ລົມກັບເພື່ອນລາວມື້ນີ້ ພວກຂ້າພະເຈົ້າຂໍຄັດສະເໜີບາງຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ.

ກ່ອນເລີ່ມຕົ້ນລາຍການ, ພວກຂ້າພະເຈົ້າຂໍຝາກຄຳອວຍພອນປີໃໝ່ມາຍັງບັນດາທ່ານຜູ້ຟັງຂອງລາຍການພາກພາສາລາວ, ຂໍອວຍພອນໃຫ້ພວກເພື່ອນຈົ່ງມີສຸຂະພາບເຂັ້ມແຂງ, ມີໂຊກມີລາບ, ມີຄວາມຜາສຸກ ແລະ ປະສົບຜົນສຳເລັດຫຼາຍກວ່າອີກໃນການດຳລົງຊີວິດຂອງຕົນ, ຂໍອວຍພອນໃຫ້ປະເທດລາວນັບມື້ນັບພັດທະນາຢ່າງເຂັ້ມແຂງ, ວັດທະນາຖາວອນ, ຂໍອວຍພອນໃຫ້ການພົວພັນລະຫວ່າງສອງປະເທດ ຫວຽດນາມ - ລາວໝັ້ນຄົງທະນົງແກ່ນຊົ່ວກາລະນານ. ຕໍ່ໄປ, ແມ່ນບັນດາຄຳອວຍພອນໃນໂອກາດປີໃໝ່ຂອງທ່ານຜູ້ຟັງລາວທີ່ຝາກມາລາຍການໃນອາທິດຜ່ານມາ:

ເພື່ອນ ວິໄລວັນ ພວມຮຽນປີທີ 3 ຢູ່ມະຫາວິທະຍາໄລການເງິນ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນຄືດັ່ງນີ້: ເນື່ອງໃນໂອກາດປີໃໝ່, ຂ້າພະເຈົ້າຂໍອວຍພອນບັນດາບັນນາທິການພາກພາສາລາວ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ບັນລຸຜົນສຳເລັດຫຼາຍຢ່າງໃນການດຳລົງຊີວິດ. ເພື່ອ ຈັນທອງ, ຢູ່ນະຄອນຫຼວງວຽງຈັນ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນ: ສະບາຍດີປີໃໝ່, ໂຊກດີປີໃໝ່, ໃນໂອກາດນີ້ຂ້າພະເຈົ້າຂໍອວຍພອນໃຫ້ບັນດາບັນນາທິການພາກພາສາລາວ ເວົ້າສະເພາະ ແລະ ວິທະຍຸກະຈາຍສຽງ ຫວຽດນາມ ເວົ້າລວມ ຈົ່ງມີໂຊກມີໄຊໃນທຸກໜ້າທີ່ການງານ. ຂໍອວຍພອນໃຫ້ລາຍການພາກພາສາລາວ ນັບມື້ນັບມີຫຼາຍລາຍການທີ່ດີ, ມີປະໂຫຍດຫຼາຍກວ່າອີກເພື່ອສະໜອງໃຫ້ແກ່ທ່ານຜູ້ຟັງລາວ ກໍ່ຄືປະກອບສ່ວນນຳພາບພົດຂອງ ຫວຽດນາມ ທີ່ສວຍງາມໄປຍັງປະຊາຊົນລາວ ໃຫ້ນັບມື້ນັບຫຼາຍກວ່າເກົ່າ.

ເພື່ອນ ຄຳພັນ ມາຈາກແຂວງ ຊຽງຂວາງ, ລາວ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນທີ່ວ່າ ອາທິດຜ່ານມາ, ເມື່ອຕິດຕາມຂ່າວຂ້າພະເຈົ້າໄດ້ຮູ້ຈັກເຖິງ ວັນບຸນການທ່ອງທ່ຽວ - ວັດທະນະທຳ - ສົ່ງເສີມການຄ້າ ລາວ - ຫວຽດນາມ 2024” ດຳເນີນຢູ່ນະຄອນ ໂຮ່ຈີມິນ. ອາດເວົ້າໄດ້ວ່າ ນີ້ແມ່ນເຫດການທີ່ມີຄວາມໝາຍສຳຄັນຍິ່ງ, ບໍ່ພຽງແຕ່ໂຄສະນາພາບພົດຂອງປະເທດລາວ ໄປຍັງປະຊາຊົນນະຄອນໂຮ່ຈີມິນ ເທົ່ານັ້ນ ຫາກຍັງແມ່ນໂອກາດເພື່ອໃຫ້ວິສາຫະກິດສອງປະເທດ ໄດ້ຊອກຮູ້, ຊອກຫາກາລະໂອກາດຮ່ວມມືອີກດ້ວຍ. ໄປຄຽງຄູ່ກັນນັ້ນ, ຂ້າພະເຈົ້າກໍ່ປາດຖະໜາຫວັງຢາກໃຫ້ລາຍການສະໜອງຂໍ້ມູນໃຫ້ແກ່ຂ້າພະເຈົ້າຕື່ມອີກກ່ຽວກັບເຫດການນີ້? ຂໍຂອບໃຈ.

ເພື່ອນ ຄຳພັນ ທີ່ຮັກແພງ! ອາທິດຜ່ານມາ ວັນບຸນ ການທ່ອງທ່ຽວ - ວັດທະນະທຳ - ການສົ່ງເສີມການຄ້າ ລາວ - ຫວຽດນາມ 2024 ໄດ້ໄຂຂຶ້ນຢູ່ ນະຄອນໂຮ່ຈີມິນ. ນີ້ແມ່ນເຫດການເຊື່ອມຕໍ່, ສະແດງໃຫ້ເຫັນການພົວພັນແບບພິເສດ ແລະ ຍາວນານ, ໄດ້ຮັບການກໍ່ສ້າງບົນພື້ນຖານນ້ຳໃຈມິດຕະພາບ, ຄວາມສາມັກຄີ, ການຮ່ວມມື ແລະ ໜູນຊ່ວຍເຊິ່ງກັນແລະກັນ ລະຫວ່າງສອງປະເທດ ຫວຽດນາມ - ລາວ. ກ່່າວຄຳເຫັນໄຂເຫດການ, ທ່ານ ວັນສີ ກົວມົວ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ  ແລະ ທ່ອງທ່ຽວ ລາວ ແບ່ງປັນບັນດາຜົນສຳເລັດທີ່ສອງປະເທດບັນລຸໄດ້ ແລະ ຕີລາຄາສູງບັນດາໝາກຜົນໃນການຮ່ວມມືສອງຝ່າຍໃນຂົງເຂດວັດທະນະທຳ, ການຄ້າ ແລະ ການລົງທຶນໃນໄລຍະຜ່ານມາ.

ໂດຍຕາງໜ້າການນຳນະຄອນໂຮ່ຈີມິນ, ທ່ານຮອງປະທານຄະນະກຳມະການປະຊາຊົນນະຄອນໂຮ່ຈີມິນ ຫງວຽນວັນຢຸງ ຮູ້ສຶກເອກອ້າງທະນົງໃຈຕໍ່ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ຫວຽດນາມ - ລາວ ທີ່ນັບມື້ນັບພັດທະນາ ແລະ ແຕກດອກອອກຜົນ. ເຫດການໄດ້ດຳເນີນແຕ່ວັນທີ 27 – 31 ທັນວາ 2024 ໂດຍມີຮ້ານວາງສະແດງສິນຄ້າທ່ອງທ່ຽວ ແລະ ອາຫານການກິນກ່ວາ 100 ແຫ່ງ. ໃນນັ້ນ ມີວິສາຫະກິດລາວກ່ວາ 30 ແຫ່ງ ແລະ ວິສາຫະກິດຫວຽດນາມ 70 ແຫ່ງ.

ເພື່ອນ ຄຳຮຸ່ງ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນຢາກຊອກຮູ້ກ່ຽວກັບໝູ່ບ້ານຜັກ ຈ່າເກວ້ - ໝູ່ບ້ານເກົ່າແກ່ຢູ່ ໂຮ້ຍອານ.

ເພື່ອນ ຄຳຮຸ່ງ ທີ່ຮັກແພງ! ໂດຍຕັ້ງຢູ່ແຄມແມ່ນ້ຳໂກ໋ກທີ່ມິດງຽບນັ້ນແມ່ນໝູ່ບ້ານ ຜັກຈ່າເກວ້ ທີ່ຂຽວອຸ່ມທຸ່ມ. ສະຖານທີ່ແຫ່ງນີ້ຫ່າງຈາກນະຄອນ ໂຮ້ຍອານ ປະມານ 3 ກີໂລແມັດໄປທາງທິດຕາເວັນອອກສ່ຽງເໜືອ, ດ້ວຍເນື້ອທີ່ເຖິງ 40 ເຮັກຕາ. ບັນດາຄອບຄົວໄດ້ປູກຜັກສະຫຼັບກັນຕາມລະດູກ່ວາ 20ຊະນິດຜັກເປັນໃບ ແລະ ຜັກເຄື່ອງເທດທີ່ແຕກຕ່າງກັນ, ເຊິ່ງໄດ້ຮັບຖືວ່າແມ່ນອູ່ປູກຜັກໃຫຍ່ທີ່ສຸດຢູ່ເຂດ ກ໋ວາງນາມ - ດ່ານັ້ງ. ສະຖານທີ່ສະໜອງແຫຼ່ງຜັກສົດ, ປອດສານພິດຕະຫຼອດປີ, ພ້ອມທັງແມ່ນສະຖານທີ່ທີ່ເປັນເອກະລັກສະເພາະບໍ່ສາມາດພາດໄດ້ເມື່ອມາທ່ຽວ ໂຮ້ຍອານ. ໝູ່ບ້ານຜັກ ຈ່າເກວ້ ໄດ້ຮັບການສ້າງຕັ້ງຂຶ້ນມາເປັນເວລາກວ່າ 300 ປີ.

ໄປຄຽງຄູ່ກັນນັ້ນ, ໝູ່ບ້ານຜັກ ຈ່າເກວ້ ກໍ່ຍັງແມ່ນສະຖານທີ່ທ່ອງທ່ຽວກາງແຈ້ງ, ດັ່ງນັ້ນບັນດາປັດໄຈກ່ຽວກັບອາກາດໄດ້ຮັບຄວາມສົນໃຈເປັນພິເສດເພື່ອສາມາດລົງພຶດຕິກຳຕົວຈິງທີ່ເປັນໜ້າຈົດຈຳ ແລະ ເຕັມໄປດ້ວຍຄວາມໝາຍ. ຊ່ວງເວລາແຕ່ເດືອນ ກັນຍາ ຫາເດືອນ ເມສາ ແລະ ແຕ່ເດືອນ ສິງຫາ ຫາເດືອນ ທັນວາ ແມ່ນຈຸດເວລາເໝາະສົມທີ່ສຸດເພື່ອມາຢາມໝູ່ບ້ານນີ້. ຍ້ອນວ່ານີ້ແມ່ນຈຸດເວລາທີ່ມີອາກາດດີທີ່ສຸດ ແລະ ສວນຜັກຍາມໃດກໍ່ສວຍສົດງົດງາມ, ພັດທະນາດີທີ່ສຸດໃນປີ. ບັນຍາກາດຕອນນັ້ນແມ່ນປອດໂປ່ງບໍລິສຸດດີ, ເພື່ອນສາມາດລົງຕົວຈິງການດຳລົງຊີວິດທີ່ສະຫງົບງຽບ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມານັ້ນແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນ ຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ບັນດາທ່ານກໍ່ສາມາດຝາກຈົດໝາຍມາຍັງລາຍການ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວັບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມຜ່ານບັນດາລາຍການທີ່ໄດ້ເອົາລົງໃນເວັບໄຊດັ່ງກ່າວ. ຂໍຂອບໃຈ.