ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 412 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 32 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 22 ສະບັບຈາກທ່ານຜູ້ຟັງລາວ.

(ພາບປະກອບ: VGP)

ເພື່ອນ ທິດາ ກິດຈະເລີນ, ດຳລົງຊີວິດຢູ່ແຂວງ ຄຳມ່ວນ, ໄດ້ສົ່ງຈົດໝາຍມາຍັງລາຍການ, ແບ່ງປັນວ່າ: ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ (ວັນທີ 22 ທັນວາ), ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ບັນດາປ້າລຸງ, ອາວອາ, ອ້າຍເອື້ອຍ - ບັນດາອະດີດນັກຮົບທີ່ໄດ້ເສຍສະຫຼະຄວາມໜຸ່ມແໜ້ນ, ເຫື່ອແຮງ ແລະ ເລືອດເນື້ອເພື່ອເອກະລາດ, ເສລີພາບຂອງຊາດ ຫວຽດນາມ. ໃນນັ້ນ, ມີບັນດານັກຮົບ, ທະຫານອາສາສະໝັກ ແລະ ຜູ້ຊ່ຽວຊານການທະຫານຊ່ວຍ ລາວ ໃນໄລຍະສົງຄາມໃນເມື່ອກ່ອນ ແລະ ໃນປະຈຸບັນ. ຂໍອວຍພອນໃຫ້ບັນດາສະຫາຍຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ເປັນແບບຢ່າງໃຫ້ລຸ້ນຕໍ່ໆໄປຮ່ຳຮຽນ, ປະຕິບັດຕາມ. ຂໍອວຍພອນໃຫ້ນ້ຳໃຈສາມັກຄີ ຫວຽດນາມ - ລາວ ຍືນຍົງຄົງຕົວຕະຫຼອດໄປ.

ເພື່ອນ ພອນແສງ, ຢູ່ແຂວງ ຫົວພັນ; ເພື່ອນ ດາລາວັນ ພິຈິດ, ຢູ່ແຂວງ ຈຳປາສັກ… ໄດ້ໂທລະສັບ, ສົ່ງອີເມວ ແລະ ມີຄຳເຫັນໃນສື່ສັງຄົມ Facebook ຂອງ VOV, ດ້ວຍເນື້ອໃນທີ່ວ່າ: ເນື່ອງໃນໂອກາດວັນບຸນຄຼິດສະມາດ 2024, ຂໍຝາກຄຳອວຍພອນເຖິງທຸກໆຄົນ ແລະ ບັນດາອ້າຍ, ເອື້ອຍ, ນ້ອງຂອງ VOV. ຂໍອວຍພອນໃຫ້ພວກເພື່ອນຕ້ອນຮັບວັນບຸນຄຼິດສະມາດດ້ວຍຄວາມສະຫງົບສຸກ, ມີຄວາມອົບອຸ່ນພ້ອມກັບຄອບຄົວ ແລະ ຄົນຮັກແພງ.

ເພື່ອນ Juan Diez, ຢູ່ ແອັດສະປາຍ ໄດ້ມີຄຳເຫັນກ່ຽວກັບການຮ່ວມມືດ້ານກະສິກຳລະຫວ່າງ ຫວຽດນາມ ແລະ ກຸຍບາ. ເພື່ອນຂຽນວ່າ: “ຫວຽດນາມ ແລະ ກຸຍບາ, 2 ຊາດທີ່ຍິ່ງໃຫຍ່ ດ້ວຍຄວາມສຸດຈິດສຸດໃຈ ແລະ ການຕໍ່ສູ້ຢ່າງຍືດເຫຍື້ອຍາວນານ ເພື່ອຊີວິດ ແລະ ໂລກທີ່ດີງາມກວ່າ, ພວມຍູ້ແຮງການຮ່ວມມືດ້ານກະສິກຳ. 2 ຝ່າຍລ້ວນແຕ່ມີພື້ນຖານກະສິກຳພັດທະນາ, ສາມາດຊ່ວຍຊຸກຍູ້ພື້ນຖານເສດຖະກິດຂອງເຈົາເຂົ້າ. ຕາມບົດລາຍງານຈຳນວນໜຶ່ງຢູ່ ລັດເຊຍ ແລ້ວ, ປະຈຸບັນ, ມີຫຼາຍໂຄງການນຳໃຊ້ເຕັກໂນໂລຊີກ້າວໜ້າທີ່ສຸດຢູ່ປະເທດນີ້ ເພື່ອສ້າງພື້ນຖານກະສິກຳໃໝ່. ຂ້າພະເຈົ້າເຊື່ອໝັ້ນວ່າ, ບັນດາການທົດລອງດ້ານວິທະຍາສາດກະສິກຳ ຍັງມີຄວາມສາມາດບົ່ມຊ້ອນຫຼາຍຢ່າງ ແລະ ສາມາດນຳມາເຊິ່ງຜົນປະໂຫຍດຢ່າງໃຫຍ່ຫຼວງ. ກຸຍບາ ແລະ ຫວຽດນາມ ແມ່ນບັນດາປະເທດໄດ້ຮັບຜົນປະໂຫຍດຢ່າງໃຫຍ່ຫຼວງຈາກການເຄື່ອນໄຫວຜະລິດກະສິກຳ, ພ້ອມທັງຊຸກຍູ້ການພັດທະນາປະເທດຊາດຫຼາຍພໍສົມຄວນ”.

ທີ່ງານວາງສະແດງ (ພາບ: TTXVN)

ແລະກໍ່ໃນອາທິດຜ່ານມາ, ເພື່ອນ ວິໄລສຸກ, ຢູ່ແຂວງ ຈຳປາສັກ ໄດ້ສົ່ງຂໍ້ຄວາມທາງ Facebook ໂດຍໃຫ້ຮູ້ວ່າ: ຂ້າພະເຈົ້າມັກຮັກຊອກຮູ້ບັນດາເຕັກໂນໂລຊີໃໝ່, ໂດຍສະເພາະແມ່ນດ້ານການທະຫານ. ຂ້າພະເຈົ້າໄດ້ຮູ້ຂ່າວວ່າ ໃນອາທິດທີ່ຜ່ານມາ, ຢູ່ ຫວຽດນາມ ໄດ້ຈັດງານວາງສະແດງປ້ອງກັນຊາດສາກົນ. ຂ້າພະເຈົ້າຢາກຮູ້ວ່າ ມີຫຼາຍປະເທດເຂົ້າຮ່ວມບໍ່ ແລະ ບັນດາເຄື່ອງອຸປະກອນໃດໄດ້ວາງສະແດງຢູ່ທີ່ນີ້ມີແນວໃດແດ່?

ເພື່ອນ ວິໄລສຸກ ທີ່ຮັກແພງ, ງານວາງສະແດງປ້ອງກັນຊາດສາກົນ ຫວຽດນາມ 2024 (Viet Nam Defence Expo 2024) ໂດຍກະຊວງປ້ອງກັນປະເທດ ຫວຽດນາມ ເປັນປະທານຈັດຂຶ້ນ ແຕ່ວັນທີ 19 – 22 ທັນວາ, ຢູ່ສະໜາມບິນການທະຫານ ຢາເລິມ, ເມືອງ ລອງບຽນ, ຮ່າໂນ້ຍ. ນີ້ແມ່ນການເຄື່ອນໄຫວນອນໃນພິທີສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ ແລະ 35 ປີແຫ່ງວັນທົ່ວປວງຊົນປ້ອງກັນຊາດ. ຕາມຄະນະຈັດຕັ້ງແລ້ວ, ງານວາງສະແດງມີການເຂົ້າຮ່ວມຂອງ 66 ຄະນະຜູ້ແທນສາກົນ ແລະ ກວ່າ 240 ວິສາຫະກິດອຸດສາຫະກຳປ້ອງກັນຊາດທີ່ມາຈາກ 38 ປະເທດ. ທີ່ງານວາງສະແດງ, ມີກວ່າ 440 ຮ້ານວາງສະແດງ, ດ້ວຍຫຼາຍຜະລິດຕະພັນ, ຄື: ເຮືອບິນຂັບໄລ່, ເຮືອບິນຂົນສົ່ງ; ເຮືອບິນເອລີກອບເຕີ, ເຮືອບິນບໍ່ມີຄົນຂັບ, ກຳປັ່ນ, ບັນດາລະບົບລູກປືນໃຫຍ່, ຣາດາ, ເຄື່ອງອຸປະກອນການສູ້ຮົບເອເລັກໂຕນິກ, ລະບົບບັນຊາ…

(ລົດຖີບສາທາລະນະ TNGo)

ເພື່ອນ ມີນາ ແກ້ວມະລີວົງ, ໄດ້ໂທລະສັບມາຫາລາຍການດ້ວຍເນື້ອໃນທີ່ວ່າ: ຂ້າພະເຈົ້າໄດ້ຮູ້ຂ່າວວ່າ, ຢູ່ນະຄອນໃຫຍ່ຈຳນວນໜຶ່ງ, ຄື: ຮ່າໂນ້ຍ, ນະຄອນ ໂຮ່ຈີມິນ, ດ່ານັ້ງ… ມີການບໍລິການໃຫ້ປະຊາຊົນ, ແຂກທ່ອງທ່ຽວເຊົ່າລົດຖີບ. ນີ້ໄດ້ຮັບຖືວ່າແມ່ນຮູບແບບທີ່ດີເພື່ອປົກປັກຮັກສາສິ່ງແວດລ້ອມ ແລະ ຍົກສູງສຸຂະພາບ. ຂ້າພະເຈົ້າຢາກຮູ້ວ່າ, ການເຊົ່າ ແລະ ສົ່ງຄືນລົດຖີບມີຄວາມສະດວກບໍ່? ລາຄາການບໍລິການໃຫ້ເຊົ່າລົດຖີບຄືແນວໃດ?

ເພື່ອນ ມີນາ ແກ້ວມະລີວົງ ທີ່ຮັກແພງ, ການບໍລິການເຊົ່າລົດຖີບສາທາລະນະ TNGo (TN-Go) ໄດ້ສ້າງຮູບແບບຄົມມະນາຄົມເຂດຕົວເມືອງໃໝ່ທີ່ສິວິໄລ, ສະດວກ, ດີຕໍ່ສຸດຂະພາບ ແລະ ເປັນມິດກັບສິ່ງແວດລ້ອມ. ພຽງແຕ່ນຳໃຊ້ແອັບທີ່ໄດ້ຕິດຕັ້ງໃນໂທລະສັບມືຖື, ຜູ້ເຂົ້າຮ່ວມການສັນຈອນສາມາດເຊົ່າລົດຖີບຢ່າງງ່າຍດ່າຍ, ຂີ່ ແລະ ສົ່ງລົດຖີບຢູ່ບັນດາສະຖານທີ່ຂອງ TNGo ຢູ່ບໍ່ວ່າແຫ່ງໃດໃນບໍລິເວນນະຄອນ. TNGo ຈະຊ່ວຍເຊື່ອມຕໍ່ບັນດາລະບົບຄົມມະນາຄົມສາທາລະນະອື່ນ, ຄື: ລົດເມ, ລົດໄຟຟ້າ… ຊ່ວຍການໄປມາໃນເຂດຕົວເມືອງຢ່າງງ່າຍດ່າຍກວ່າ. ລາຄາເຊົ່າລົດຖີບ 60 ນາທີແມ່ນ 10.000 ດົ່ງ, ຖ້າເຊົ່າເປັນມື້ 450 ນາທີແມ່ນ 50.000 ດົ່ງ. ປະຈຸບັນ, TNGo ມີຢູ່ 6 ແຂວງ, ນະຄອນຂອງ ຫວຽດນາມ, ຄື: ນະຄອນ ຮ່າໂນ້ຍ, ຫາຍຟ່ອງ, ດ່ານັ້ງ, ກຸຍເຍິນ, ຫວູງເຕົ່າ, ໂຮ່ຈີມິນ.