ພາບປະກອບ: VOV

ອາທິດຜ່ານມາ, ພະແນກກະຈາຍສຽງບັນດາພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 382 ສະບັບ ແລະ ໂທລະສັບຫຼາຍສາຍຈາກທ່ານຜູ້ຟັງທີ່ມາຈາກ 32 ປະເທດ ແລະ ເຂດແຄ້ວນ. ໃນລາຍການພາກພາສາລາວໄດ້ຮັບຈົດໝາຍ 22 ສະບັບ. ໃນລາຍການໂອ້ລົມກັບເພື່ອນລາວມື້ນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ, ເນື້ອໃນຈົດໝາຍເຊິ່ງທ່ານຜູ້ຟັງໄດ້ຝາກມາ VOV ໃນອາທິດຜ່ານມາ.

ທ່ານ Juan Diez  ຢູ່ Santander, ແອັດສະປາຍ ໄດ້ຄອມເມັ້ນວ່າ: ທ່ານເລຂາທິການໃຫຍ່ ໂຕເລິມ ພ້ອມກັບບັນດາສະຫາຍການນຳຂັ້ນສູງຂອງພັກ ແລະ ລັດ ຫວຽດນາມ ໄດ້ເນັ້ນໜັກເຖິງລະດັບຄວາມສຳຄັນຂອງວິທະຍາສາດເຕັກໂນໂລຢີ, ການຫັນເປັນດີຈີຕອນແມ່ນປັດໄຈຕັດສິນ ເພື່ອປັບປຸງພື້ນຖານການພັດທະນາແບບຍືນຍົງ. ປະສິດທິຜົນທາງດ້ານເສດຖະກິດ, ຄວາມກ້າວໜ້າຂອງວິທະຍາສາດເຕັກໂນໂລຢີປະເທດຊາດ ແລະ ຜົນສຳເລັດຂອງນັກສຶກສາຂັ້ນມະຫາວິທະຍາໄລໃນການສອບເສັງຕ່າງໆແມ່ນສິ່ງພິສູດໃຫ້ເຫັນການພັດທະນາຂອງວິທະຍາສາດເຕັກໂນໂລຢີ ມີຄວາມໝາຍແນວໃດສຳລັບ ຫວຽດນາມ. ດ້ວຍຄຳໝັ້ນສັນຍາກາຍເປັນປະເທດທີ່ທັນສະໄໝ, ນຳໜ້າ ແລະ ພັດທະນາວິທະຍາສາດນັບແຕ່ເວລາສ້າງຕັ້ງ, ຫວຽດນາມ ໄດ້ຍົກອອກການຄັດເລືອກທີ່ຖືກຕ້ອງ, ສະແດງໃຫ້ເຫັນຜ່ານບັນດາຜົນສຳເລັດດ້ານເສດຖະກິດ ແລະ ຄວາມກ້າວໜ້າດ້ານເຕັກໂນໂລຢີທີ່ເຮັດໃຫ້ບັນດາປະເທດ ອາຊີ ຕ້ອງເຄົາລົບນັບຖື.

ທ່ານຫຼີຈ້າງເຈິງ ຢູ່ ກ໋ວາງຊີ ໄດ້ສົ່ງອີເມວມາຍັງລາຍການພາກພາສາຈີນ ໂດຍໃຫ້ຮູ້ວ່າ: ປີນີ້ເປັນປີຂີດໝາຍ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຈີນ ແລະ ຫວຽດນາມ. ຂ້າພະເຈົ້າຂໍອວຍພອນໃຫ້ສອງປະເທດມີຄວາມຈະເລີນຮຸ່ງເຮືອງ ແລະ ເຕີບໃຫຍ່ເຂັ້ມແຂງ, ປະຊາຊົນສອງປະເທດພວກເຮົາ ມີນ້ຳໃຈມິດຕະພາບທີ່ຍາວນານ. ຂ້າພະເຈົ້າຮັບຟັງລາຍການຂອງວິທະຍຸກະຈາຍສຽງ ຫວຽດນາມ ເພື່ອເພີ່ມຄວາມຮູ້ ແລະ ເປີດກວ້າງວິໄສທັດ. ຂ້າພະເຈົ້າມີຄວາມສົນໃຈເຖິງຮີດຄອງປະເພນີ, ວັດທະນະທຳ ແລະ ທິວທັດທຳມະຊາດຂອງ ຫວຽດນາມ.

ເພື່ອນ ສົມເພັດ, ນັກສຶກສາມະຫາວິທະຍາໄລ ແພດສາດ ທ້າຍບິ່ງ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນທີ່ວ່າ: ໂດຍແມ່ນນັກສຶກສາຕ່າງປະເທດທີ່ຮ່ຳຮຽນຢູ່ ຫວຽດນາມ, ນ້ອງມີໂອກາດໄດ້ຊອກຮູ້ວັດທະນະທຳຮີດຄອງປະເພນີຫຼາຍຢ່າງຂອງ ຫວຽດນາມ. ໃນນັ້ນມີຮີດຄອງທີ່ນ້ອງເຫັນວ່າຄັກຫຼາຍນັ້ນແມ່ນ ການໃຫ້ອັງເປົາຍາມບຸນເຕັດປະຈຳຊາດ ຫວຽດນາມ.  ນ້ອງຢາກຮູ້ຄວາມໝາຍຂອງຮີດຄອງປະເພນີນີ້ແມ່ນຫຍັງ ແລະ ຫວັງວ່າບັນດາບັນນາທິການພາກພາລາລາວ ຈະສະໜອງຂໍ້ມູນກ່ຽວກັບຮີດຄອງປະເພນີດັ່ງກ່າວຕື່ມອີກ? ຂໍຂອບໃຈ.

ເພື່ອນ ສົມເພັດ ທີ່ຮັກແພງ! ການໃຫ້ອັງເປົາຍາມຕົ້ນປີໃໝ່ແມ່ນຈຸດວັດທະນະທຳທີ່ເປັນເອກະລັກພິເສດທີ່ບໍ່ສາມາດຂາດໄດ້ຍາມບຸນເຕັດປະຈຳຊາດຂອງຊາວ ຫວຽດນາມ. ເງິນອວຍພອນໄດ້ເອົາໃສ່ໄວ້ຢູ່ໃນຊອງອັງເປົາສີແດງ, ສີເຫຼືອງ, ສີບົວທີ່ງາມຕາ. ນີ້ກໍ່ແມ່ນໂອກາດເພື່ອໃຫ້ລູກຫຼານໃນຄອບຄົວອວຍພອນບຸນເຕັດໃຫ້ປູ່ຍ່າຕາຍາຍ, ພໍ່ແມ່ ແລະ ຮັບອັງເປົາ. ຜູ້ໃຫຍ່, ພໍ່ເຖົ້າແມ່ເຖົ້າ, ພໍ່ແມ່, ອາວອາ, ປ້າລຸງ, ອ້າຍເອື້ອຍ… ຈະໃຫ້ອັງເປົາໃຫ້ລູກຫຼານ, ນ້ອງໆໃນຄອບຄົວ ຫຼື ແຂກທີ່ມາອວຍພອນບຸນເຕັດຢູ່ເຮືອນກໍ່ໄດ້ຮັບອັງເປົາ. ສ່ວນລູກຫຼານຜູ້ທີ່ໄປເຮັດວຽກ ແລະ ມີລາຍຮັບແລ້ວ ກໍ່ຈະມອບອັງເປົາໃຫ້ພໍ່ແມ່, ປູ່ຍ່າຕາຍາຍ ເພື່ອຂໍໃຫ້ມີສຸຂະພາບແຂງແຮງ, ມີໂຊກມີລາບ, ມີຄວາມສະຫງົບສຸກ. ຮີດຄອງປະເພນີໃຫ້ອັງເປົາ ມີຄວາມໝາຍດີງາມທີ່ສຸດເພື່ອສະແດງໃຫ້ເຫັນຄວາມຮັກແພງເດັກນ້ອຍ, ເຄົາລົບນັບຖືຜູ້ເຖົ້າຜູ້ແກ່ ແລະ ປາດຖະໜາໃຫ້ປີໃໝ່ຈົ່ງມີແຕ່ຄວາມສະດວກ, ມີໂຊກມີລາບ. ເພາະສະນັ້ນ, ການໃຫ້ອັງເປົາຍາມຕົ້ນປີທີ່ໄດ້ປະຕິບັດກັນມານັບແຕ່ກີ້ແຕ່ກ່ອນມາຮອດປັດຈຸບັນ ຍັງຄົງແມ່ນໜຶ່ງໃນບັນດາສິ່ງທີ່ໄດ້ຮັບລໍຄອຍທີ່ສຸດຍາມບຸນເຕັດ.

ທ່ານ ບຸນທອງ ຢູ່ແຂວງ ຜົ້ງສາລີ ໄດ້ໂທລະສັບມາຫາລາຍການດ້ວຍເນື້ອໃນຢາກຊອກຮູ້ກ່ຽວກັບເຍື່ອງອາຫານຕ່າງໆໃນຍາມບຸນເຕັດຢູ່ ຫວຽດນາມ?

ເພື່ອນ ບຸນທອງ ທີ່ຮັກແພງ! ໃນໂອກາດບຸນເຕັດປະຈຳຊາດຂອງຊາວ ຫວຽດນາມ, ບັນດາເຍື່ອງອາຫານໄດ້ຮັບການຄວາມສົນໃຈເປັນພິເສດ ແລະ ມີລັກສະນະເປັນສັນຍາລັກ, ໄດ້ຖ່າຍທອດແຕ່ຄົນລຸ້ນນີ້ສູ່ຄົນລຸ້ນຕໍ່ໄປ ແມ່ນອີງຕາມຮີດຄອງປະເພນີຂອງແຕ່ລະເຂດພາກ. ຄາບເຂົ້າຍາມບຸນເຕັດຄືຈຸດວັດທະນະທຳທີ່ໃກ້ຊິດສະໜິດສະໜົມ, ຄວາມຮັກແພງ, ຕິດພັນກັບຮີດຄອງຂອງແຕ່ລະຄອບຄົວຜ່ານຫຼາຍລຸ້ນຄົນ. ສຳລັບຫຼາຍຄົນ, ພິເສດແມ່ນຄົນທີ່ມີອາຍຸສູງ, ວັນບຸນເຕັດຈະບໍ່ສົມບູນຖ້າວ່າບໍ່ມີບັນດາເຍື່ອງອາຫານເຫຼົ່ານີ້.

ເຂົ້າຕົ້ມ: ເຂົ້າຕົ້ມມີປະຫວັດສາດມາແຕ່ດົນນານໃນວັດທະນະທຳອາຫານການກິນ ຫວຽດນາມ ແລະ ແມ່ນເຍື່ອງອາຫານສຳຄັນໃນໂອກາດບຸນເຕັດວຽນມາ ຫຼື ໃນຊຸມວັນບຸນໃຫຍ່ຂອງຊາວ ຫວຽດນາມ. ຕາມເທບນິຍາຍ ລາງລຽວ ແລ້ວ, ເຂົ້າຕົ້ມສີຂຽວສະແດງໃຫ້ເຫັນຄວາມຮູ້ບຸນຄຸນຕໍ່ບັນພະບູລຸດ, ເທວະດາຟ້າແຖນ, ເຈົ້າແມ່ທໍລະນີ ທີ່ໄດ້ດົນບັນດານໃຫ້ອາກາດເອື້ອຍອຳນວຍ, ນຳມາເຊິ່ງການດຳລົງຊີວິດທີ່ອີ່ມໜຳສຳລາມສົມບູນພູນສຸກໃຫ້ແກ່ມວນມະນຸດ. ນອກຈາກນັ້ນ, ມັນຍັງເນັ້ນໜັກເຖິງບົດບາດສຳຄັນຂອງຕົ້ນເຂົ້າ ແລະ ທຳມະຊາດໃນວັດທະນະທຳ ຫວຽດນາມ.

ໄກ່ຕົ້ມ: ໄກ່ຜູ້ແມ່ນສັດທີ່ສັກກະລະບູຊາໃນຄວາມເຊື່ອຖືທາງດ້ານສາສະໜາຕ່າງໆໂດຍເປັນເຄື່ອງບູຊາ. ໄກ່ຜູ້ຕົ້ມສີເຫຼືອງງາມຕາ ຍາມໃດກໍ່ແມ່ນເຄື່ອງບູຊາທີ່ຂາດບໍ່ໄດ້ໃນພິທີບູຊາຂອງຊາວຫວຽດ. ໃນຄາບເຂົ້າບຸນເຕັດ, ໄກ່ຕົ້ມຍັງແມ່ນສັນຍາລັກໃຫ້ແກ່ຄວາມສົມບູນພູນສຸກ.

 ເຂົ້າໜຽວໝາກເຂົ້າ: ຕາມວັດທະນະທຳຫວຽດນາມແລ້ວ, ສີແດງແມ່ນສີທີ່ນຳໂຊກ, ວັດທະນາຖາວອນ. ດັ່ງນັ້ນ, ບຸນປີໃໝ່ປະຈຳຊາດຂອງຊາວຫວຽດ ຍາມໃດກໍ່ເຕັມໄປດ້ວຍສີແດງທີ່ສວຍງາມເຈີດຈ້າ, ນັບແຕ່ບັນດາເຄື່ອງຂອງປະດັບປະດາ, ຊຸດເຄື່ອງນຸ່ງຕ່າງໆຕະຫຼອດຮອດເຍື່ອງອາຫານວັນບຸນເຕັດ. ເຂົ້າໜຽວໝາກເຂົ້າ ດ້ວຍສີແດງທຳມະຊາດໃນຄາບເຂົ້າບຸນເຕັດແມ່ນສັນຍາລັກໃຫ້ແກ່ຄວາມໂຊກດີ, ຄວາມດີງາມໃນປີໃໝ່. ການກິນເຂົ້າໜຽວໝາກເຂົ້າແມ່ນຄຳພາວະນາໃຫ້ຄອບຄົວ ໃນໂອກາດປີໃໝ່ຈົ່ງມີຄວາມສົມບູນພູນສຸກ, ຄວາມສະຫງົບສຸກ, ມີໂຊກມີລາບໃຫ້ແກ່ຄອບຄົວ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມານັ້ນແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນ ຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ບັນດາທ່ານກໍ່ສາມາດຝາກຈົດໝາຍມາຍັງລາຍການ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວlaovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວັບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມຜ່ານບັນດາລາຍການທີ່ໄດ້ເອົາລົງໃນເວັບໄຊດັ່ງກ່າວ. ຂໍຂອບໃຈ!