(vovworld) – ຫວຽດນາມ ແມ່ນປະເທດທີ່ມີມູນເຊື້ອປະຫວັດສາດ, ດ້ວຍ 54 ຊົນເຜົ່າທີ່ແຕກຕ່າງກັນ. ຍ້ອນເຫດນັ້ນ, ວັດທະນະທຳ ຫວຽດນາມ ຈຶ່ງມີຫຼາຍຮູບຫຼາຍສີ, ອຸດົມສົມບຸນ ແລະ ເປັນເອກະລັກສະເພາະ. ຫວຽດນາມ ຖືເປັນສຳຄັນການອະນຸລັກຮັກສາ, ແລະ ເສີມຂະຫຍາຍຄຸນຄ່າມໍລະດົກວັດທະນະທຳຕິດພັນກັບຍຸດທະສາດພັດທະນາແບບຍືນຍົງ, ໂດຍສະເພາະແມ່ນໃນສະພາບທີ່ ຫວຽດນາມ ພວມເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງ.
(ພາບປະກອບ)
ຫວຽດນາມ ມີສາງມໍລະດົກວັດທະນະທຳຢ່າງໃຫຍ່ຫຼວງ ດ້ວຍມໍລະດົກທີ່ມີຮູບຮ່າງປະມານ 40.000 ຢ່າງ ແລະ ມໍລະດົກບໍ່ມີຮູບຮ່າງ 60.000 ຢ່າງ. ມີມໍລະດົກທີ່ມີຮູບຮ່າງ ແລະ ບໍ່ມີຮູບຮ່າງຫຼາຍຢ່າງຂອງ ຫວຽດນາມ ໄດ້ຮັບການຮັບຮອງຈາກ UNESCO ວ່າເປັນມໍລະດົກໂລກ. ຕາມປະລິຍາເອກ ຫງວຽນເທ໋ຮຸ່ງ, ຫົວໜ້າກົມມໍລະດົກ (ກະຊວງວັດທະນະທຳ, ກິລາ ແລະ ທ່ອງທ່ຽວ) ແລ້ວ, ໃນຍຸດທະສາດພັດທະນາແບບຍືນຍົງ, ຫວຽດນາມ ມີບັນດານະໂຍບາຍທີ່ເໝາະສົມ, ພິເສດແມ່ນສ້າງກົນໄກເພື່ອໃຫ້ປະຊາຊົນ, ປະຊາຄົມສັງຄົມ, ວິສາຫະກິດໄດ້ເຂົ້າຮ່ວມການຂຸດຄົ້ນ, ຊົມໃຊ້ ແລະ ເສີມຂະຫຍາຍບັນດາຄຸນຄ່າມໍລະດົກນີ້.
“ມໍລະດົກວັດທະນະທຳ ແລະ ການພັດທະນາແບບຍືນຍົງມີສາຍພົວພັນຢ່າງແໜ້ນແຟ້ນ ແລະ ຂຶ້ນກັບກັນ. ການອະນຸລັກຮັກສາມໍລະດົກວັດທະນະທຳມີຄວາມໝາຍດຽວກັບການພັດທະນາແບບຍືນຍົງ. ກົງກັນຂ້າມ, ການພັດທະນາແບບຍືນຍົງຕ້ອງຖືເລື່ອງອະນຸລັກຮັກສາມໍລະດົກວັດທະນະທຳແມ່ນໜ້າທີ່, ແລະ ວຽກງານເປັນປະຈຳ. ລັດປັບປຸງລະບົບກົດໝາຍ, ສືບຕໍ່ປະຕິບັດນະໂຍບາຍເກື້ອກຸນສຳລັບນັກສິລະປະ, ເອົາໃຈໃສ່ເປັນພິເສດເຖິງວຽກງານບຳລຸງສ້າງ, ຄຸ້ມຄອງວັດທະນະທຳ”.
(ພາບປະກອບ)
ການອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກແມ່ນເພື່ອຮັບໃຊ້ໃຫ້ແກ່ການພັດທະນາແບບຍືນຍົງ, ພ້ອມກັນນັ້ນ, ການພັດທະນາກໍ່ເພື່ອແນໃສ່ຮັບໃຊ້ໃຫ້ແກ່ການອະນຸລັກຮັກສາມໍລະດົກວັດທະນະທຳ. ສາສະດາຈານ, ປະລິຍາເອກ ຫງວຽນຈ້ອງຈວນ, ອະດີດຫົວໜ້າສະຖາບັນປັດສະຍາ - ສະພາມະຫາບັນດິດ ວິທະຍາສາດສັງຄົມ ຫວຽດນາມ, ໃຫ້ຮູ້ວ່າ:
“ສັງຄົມໜຶ່ງທີ່ທັນສະໄໝ, ຖ້າຫາກບໍ່ມີປັດໃຈວັດທະນະທຳ, ແມ່ນບໍ່ສາມາດເວົ້າເຖິງການພັດທະນາແບບຍືນຍົງໄດ້. ປະເທດໜຶ່ງຢາກພັດທະນາ, ໂດຍສະເພາະແມ່ນພັດທະນາແບບຍືນຍົງ ແມ່ນຕ້ອງມີການສືບທອດ, ເລືອກເຟັ້ນບັນດາສິ່ງທີ່ລ້ຳຄ່າໂດຍລຸ້ນກ່ອນປະດິດສ້າງ ແລະ ປະໄວ້. ວັດທະນະທຳແມ່ນໜຶ່ງໃນຈຳນວນ 4 ເສົາຄ້ຳຂອງການພັດທະນາແບບຍືນຍົງ, ໝາຍຄວາມວ່າຢູ່ຄຽງຂ້າງບັນດາເສົາຄ້ຳເສດຖະກິດ, ສັງຄົມ ແລະ ສິ່ງແວດລ້ອມ. ມໍລະດົກວັດທະນະທຳຮັກສາບົດບາດເປັນກຳລັງໜູນໃຫ້ແກ່ການພັດທະນາທຸກດ້ານຂອງປະເທດຊາດ, ມີບົດບາດສຳຄັນພິເສດສຳລັບການພັດທະນາເສດຖະກິດ, ສັງຄົມ”.
ເພື່ອອະນຸລັກຮັກສາ, ແລະ ເສີມຂະຫຍາຍຄຸນຄ່າມໍລະດົກວັດທະນະທຳຕິດພັນກັບຍຸດທະສາດພັດທະນາແບບຍືນຍົງຢ່າງມີປະສິດທິຜົນ, ສາສະດາຈານ, ປະລິຍາເອກ ຫວູມິງຢາງ, ຮອງປະທານສະພາມໍລະດົກແຫ່ງຊາດ, ເນັ້ນໜັກວ່າ:
“ເມື່ອຖືວັດທະນະທຳແມ່ນແຫຼ່ງຊັບພະຍາກອນແລ້ວ, ແມ່ນຕ້ອງຂຸດຄົ້ນຢ່າງເໝາະສົມ. ໂດຍສະເພາະ, ເມື່ອຖືວັດທະນະທຳເປັນຊັບພະຍາກອນພິເສດແລ້ວ ແມ່ນຕ້ອງມີຄວາມຮູ້ຢ່າງຄົບຖ້ວນ. ການກໍ່ສ້າງແຫຼ່ງຊັບພະຍາກອນມະນຸດ, ແລະ ບຳລຸງຄວາມຮູ້ແມ່ນມີຄວາມສຳຄັນທີ່ສຸດ. ຫວ່າງແລ້ວນີ້, ເລື່ອງ ຫວຽດນາມ ຍູ້ແຮງການຫັນເປັນສັງຄົມນັ້ນແມ່ນທ່າອ່ຽງທີ່ຈຳເປັນຂອງໂລກ. ພວກເຮົາເຫັນໄດ້ປະສິດທິຜົນຂອງການຫັນເປັນສັງຄົມຢ່າງຈະແຈ້ງ. ໄລຍະຜ່ານມາມີປູຊະນີຍະສະຖານຫຼາຍແຫ່ງໄດ້ຮັບການບຸລະນະ ປະຕິສັງຂອນ, ຟື້ນຟູ ໂດຍອີງໃສ່ແຫຼ່ງກຳລັງຂອງສັງຄົມ. ໄລຍະຈະມາເຖິງ, ພວກເຮົາຕ້ອງປັບປຸງ, ເພີ່ມເຕີມກົດໝາຍວ່າດ້ວຍມໍລະດົກ. ເພື່ອອະນຸລັກຮັກສາ, ເສີມຂະຫຍາຍຄຸນຄ່າຂອງມໍລະດົກ, ປະກອບສ່ວນໃຫ້ແກ່ການພັດທະນາແບບຍືນຍົງ ແມ່ນຕ້ອງກວດກາຄືນລະບົບເອກະສານນິຕິກຳຢ່າງຄົບຖ້ວນ”.
(ພາບປະກອບ)
ບັນດານັກຄຸ້ມຄອງວັດທະນະທຳ ຫວຽດນາມ ພວມຍູ້ແຮງເລື່ອງຍົກສູງຄວາມຮັບຮູ້ກ່ຽວກັບຄວາມສຳຄັນຂອງມໍລະດົກວັດທະນະທຳໃນປະຊາຄົມ. ຖືມໍລະດົກວັດທະນະທຳແມ່ນແຫຼ່ງຊັບພະຍາກອນອັນລ້ຳຄ່າ, ບໍ່ສາມາດໝົດໄດ້ຂອງປະເທດຊາດ. ຮອງສາສະດາຈານ, ປະລິຍາເອກ ດັ້ງວັນບ່າຍ, ຮອງປະທານສະພາມໍລະດົກວັດທະນະທຳແຫ່ງຊາດ, ໃຫ້ຮູ້ວ່າ:
“ພວກຂ້າພະເຈົ້າຕ້ອງປ່ຽນໃໝ່ຄວາມຮັບຮູ້ກ່ຽວກັບມໍລະດົກວັດທະນະທຳ. ສ້າງ ແລະ ຫັນມໍລະດົກວັດທະນະທຳໃຫ້ກາຍເປັນບັນດາສູນສຶກສາດ້ານປະຫວັດສາດ, ວັດທະນະທຳ. ລົງທຶນຢ່າງແຮງເພື່ອຫັນມໍລະດົກເປັນບັນດາສະຖານທີ່ທ່ອງທ່ຽວຢ່າງຈັບອົກຈັບໃຈ”.
ຄຽງຂ້າງນັ້ນເລື່ອງນຳມໍລະດົກວັດທະນະທຳກັບຄືນສູ່ເຈົ້າວັດທະນະທຳ ແມ່ນການສ້າງເງື່ອນໄຂດີທີ່ສຸດເພື່ອໃຫ້ມັນຄົງຕົວ. ນີ້ແມ່ນຫຼັກການທີ່ UNESCO ແລະ ຫຼາຍປະເທດໃນໂລກໄດ້ສະເໜີ. ສາສະດາຈານ, ປະລິຍາເອກ ລືວເຈິ່ນຕຽວ, ປະທານສະພາມໍລະດົກວັດທະນະທຳແຫ່ງຊາດ, ປະທານສະມາຄົມມໍລະດົກວັດທະນະທຳ ຫວຽດນາມ, ໃຫ້ຮູ້ວ່າ:
“ສຳລັບການອະນຸລັກຮັກສາມໍລະດົກນັ້ນ, ສິ່ງສຳຄັນແມ່ນຮັກສາພະລັງຊີວິດຂອງມໍລະດົກ. ຕ້ອງແຜ່ຂະຫຍາຍບົດບາດສຳຄັນຂອງມໍລະດົກວັດທະນະທຳໃນທົ່ວສັງຄົມ. ການອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກວັດທະນະທຳມຸ່ງໄປເຖິງປະຊາຄົມ. ປະຊາຄົມເຂົ້າຮ່ວມການເສີມຂະຫຍາຍ, ຮັກສາມໍລະດົກວັດທະນະທຳ, ປະດິດສ້າງມໍລະດົກວັດທະນະທຳ”.
ມໍລະດົກວັດທະນະທຳແມ່ນພື້ນຖານດ້ານຈິດໃຈ, ເປັນກຳລັງໜູນໃຫ້ແກ່ການພັດທະນາແບບຍືນຍົງ. ຢາກໃຫ້ມໍລະດົກວັດທະນະທຳຮັບໃຊ້ໃຫ້ແກ່ການພັດທະນາແບບຍືນຍົງ ແລະ ຊຸກຍູ້ການພັດທະນາ ແມ່ນຕ້ອງອະນຸລັກຮັກສາ, ເສີມຂະຫຍາຍມັນຢ່າງມີປະສິດທິຜົນ. ການອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກຕິດພັນກັບການພັດທະນາແບບຍືນຍົງ ຈະປະກອບສ່ວນແຜ່ຂະຫຍາຍຄຸນຄ່າສາງວັດທະນະທຳຂອງຊາດ ແລະ ກໍ່ປະກອບສ່ວນໃຫ້ແກ່ການພັດທະນາລວມຂອງປະເທດຊາດ.