(vovworld)- ທ່ານນາຍົກລັດຖະມົນຕີ ຫງວຽນເຕີນຢູງ ຖືວ່າ ຄວນໝູນໃຊ້ດ້ານຕັ້ງຫນ້າຂອງສື່ຂ່າວຜ່ານ ອິນເຕີແນັດ ເພື່ອກຳນົດທິດໃຫ້ຫາງສຽງສັງຄົມ. ທີ່ກອງປະຊຸມຜັນຂະຫຍາຍວຽກງານປີ 2015 ຂອງຫ້ອງວ່າການລັດຖະບານດຳເນີນໄປ ຫວ່າງແລ້ວນີ້, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີໃຫ້ບັນດາອົງການກ່ຽວຂ້ອງ ຕ້ອງສະຫນອງຂໍ້ມູນຂ່າວຢ່າງຊັດເຈນ, ທັນການໃຫ້ແກ່ປະຊາຊົນ ແລະ ຖືວ່າ ນີ້ແມ່ນຫນ້າທີ່ຕ້ອງປະຕິບັດເປັນຢ່າງດີໃນປີ 2015.
່ທ່ານນາຍົກລັດຖະມົນຕີຫງວຽນເຕີນຢູງກ່າວຄຳເຫັນທີ່
ກອງປະຊຸມຜັນຂະຫຍາຍວຽກງານປີ 2015
ຂອງຫ້ອງວ່າການລັດຖະບານ
ພາບ:vov
|
ລັດຖະບານປະຕິບັດບົດບາດຫນ້າທີ່ຄຸ້ມຄອງບໍລິຫານແຫ່ງລັດ, ການຊີ້ນຳບໍລິຫານໃນທຸກຂົງເຂດເສດຖະກິດສັງຄົມຂອງປະເທດຊາດ. ຂໍ້ຕົກລົງທັງໝົດຂອງລັດຖະບານ, ນາຍົກລັດຖະມົນຕີ ລ້ວນແຕ່ໄດ້ໂຄສະນາເຖິງປະຊາຊົນປະຈຳວັນ. ວິວັດການສື່ຂ່າວເພື່ອສ້າງຄວາມເຫັນດີເຫັນພ້ອມໃນການຜັນຂະຫຍາຍບັນດາແຜນນະໂຍບາຍຂອງພັກ, ນະໂຍບາຍກົດໝາຍຂອງລັດ ດ້ວຍບັນດາການກະທຳຢ່າງແທດຈິງ, ລະອຽດ.
ປະຊາຊົນມີສິດໄດ້ຮັບຂໍ້ມູນຂ່າວ
ແຕ່ດົນນານແລ້ວ, ວິວັດການສື່ຂ່າວລະຫວ່າງ ລັດຖະບານ ແລະ ປະຊາຊົນ ລ້ວນແຕ່ໄດ້ຮັບການປະຕິບັດຜ່ານສື່ມວນຊົນ, ສື່ສານ. ເຖິງຢ່າງໃດກໍຕາມ, ປະຈຸບັນ ຂົງເຂດສື່ຂ່າວບໍ່ພຽງແຕ່ມີບັນດາຮູບການສື່ມວນຊົນຄື: ສື່ສິ່ງພິມ, ສື່ເອເລັກໂຕນິກ, ກະຈາຍສຽງ, ໂທລະພາບ.. ເທົ່ານັ້ນ ຫາກຍັງມີສື່ອອນໄລສັງຄົມອີກດ້ວຍ. ດ້ວຍຜູ້ນຳໃຊ້ກວ່າ 30 ລ້ານຄົນ, ສື່ອອນໄລສັງຄົມ ພວມກາຍເປັນຊ່ອງສື່ຂ່າວທີ່ຈຳເປັນຂອງປະຊາຊົນ. ດ້ວຍການແຜ່ລາມຢ່າງວ່ອງໄວ, ເປີດກວ້າງ, ສະນັ້ນ ຂໍ້ມູນຂ່າວສານດີ, ຊົ່ວ, ຊັດເຈນ ຫລືບໍ່ຊັດເຈນ ຈະສົ່ງຜົນສະທ້ອນໂດຍກົງເຖິງຜູ້ຮັບຂໍ້ມູນຂ່າວ . ຍ້ອນເຫດນັ້ນ ທ່ານນາຍົກລັດຖະມົນຕີ ຮຽກຮ້ອງໃຫ້ບັນດາອົງການຂຶ້ນກັບລັດຖະບານ ຕ້ອງປະຕິບັດທຸກວິທີເພື່ອຮັບປະກັນໃຫ້ປະຊາຊົນທຸກຄົນໄດ້ຮັບຂໍ້ມູນຂ່າວຢ່າງຊັດເຈນ ແລະ ທາງການ
ຕ້ອງໃຫ້ຂ່າວຢ່າງຊັດເຈນ, ທັນການ
ວຽກງານສື່ຂ່າວໃນໄລຍະ ດີຈີຕອນ ຮຽກຮ້ອງຕ້ອງທັນການເພື່ອຕອບສະຫນອງສິດໄດ້ຮັບຂໍ້ມູນຂ່າວຂອງປະຊາຊົນ. ຖ້າຫາກໝູນໃຊ້ສື່ອອນໄລສັງຄົມເພື່ອໂຄສະນາຂ່າວການຊີ້ນຳ, ບໍລິຫານຂອງລັດຖະບານເຖິງ ປະຊາຊົນຢ່າງໄວທີ່ສຸດ ແລະ ຖືກຕ້ອງທີ່ສຸດ, ແນ່ນອນວ່າ ຂໍ້ມູນຂ່າວ ນັ້ນຈະໄດ້ຮັບຄວາມສົນໃຈຈາກປະຊາຊົນ, ກຳນົດທິດໃຫ້ຫາງສຽງກ່ອນທີ່ຫາງສຽງຖືກຜົນກະທົບຍ້ອນບັນດາຂໍ້ມູນຂ່າວຜິດເຂວ. ສະນັ້ນ ທີ່ກອງປະຊຸມຜັນຂະຫຍາຍວຽກງານປີ 2015 ຂອງຫ້ອງວ່າການລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ: “ ຕ້ອງເຮັດແນວໃດເພື່ອໃຫ້ຂໍ້ມູນຂ່າວ ທາງການຂອງພວກເຮົາຖືກເຜີຍແຜ່ທາງສື່ອອນໄລສັງຄົມ. ສິ່ງສຳຄັນ ນັ້ນແມ່ນຕ້ອງໃຫ້ຂ່າວຖືກຕ້ອງ, ຊັດເຈນ, ທັນການເພື່ອໃຫ້ປະຊາຊົນມີຄວາມໄວ້ເນື້ອເຊື່ອໃຈກັບຂໍ້ ມູນຂ່າວທາງການ.” ເປັນອັນວ່າ ທ່ານນາຍົກລັດຖະມົນຕີ ໄດ້ຕີລາຄາສູງດ້ານຕັ້ງຫນ້າຂອງສື່ອອນໄລສັງຄົມໃນຂົງເຂດສື່ຂ່າວ ແລະ ຮຽກຮ້ອງຕ້ອງມີວິທີສຳພັດໃຫມ່ເພື່ອຂຸດຄົ້ນບັນດາຄຸນຄ່າຕັ້ງຫນ້າ, ຈຳກັດບັນດາການກະທົບທີ່ຫຍໍ້ທໍ້ຂອງມັນ. ໃນກໍລະນີນີ້, ຖ້າຫາກບັນດາຂໍ້ມູນຂ່າວທາງການຂອງລັດຖະບານ ໄດ້ເຜີຍແຜ່ຢ່າງຊັດເຈນ, ທັນການ, ມີຄວາມຮັບຜິດຊອບ, ດ້ວຍລະຫັດຈະແຈ້ງໃນສື່ອອນໄລສັງຄົມ, ແນ່ນອນວ່າປະຊາຊົນຈະມີຄວາມໄວ້ເນື້ອເຊື່ອໃຈ. ໃນຍຸກສະໄຫມທີ່ເຕັກໂນໂລຊີພັດທະນານັ້ນ, ການເປີດເຜີຍ, ໂປ່ງໃສຍາມໃດກໍໄດ້ຮັບການຮັບຮູ້ຈາກສັງຄົມຢ່າງງ່າຍດາຍ.
ຫັນລັດຖະບານເອເລັກໂຕນິກເປັນທັນສະໄຫມ
ເມື່ອເນັ້ນຫນັກເຖິງຜົນກະທົບຂອງຂໍ້ມູນຂ່າວທາງສື່ອອນໄລສັງຄົມ ສຳລັບການໂຄສະນາເຜີຍແຜ່ແຜນນະໂຍບາຍ, ກົດໝາຍຂອງລັດເຖິງປະຊາຊົນ, ທ່ານນາຍົກລັດຖະມົນຕີ ຫງວຽນເຕີນຢູງ ຮຽກຮ້ອງຕ້ອງຍູ້ແຮງການໝູນໃຊ້ເຕັກໂນໂລຊີຂໍ້ມູນຂ່າວ ໃນວິວັດການເຄື່ອນໄຫວຂອງກົງຈັກບໍລິຫານຄືແນວໃດໃຫ້ວ່ອງໄວ, ມີປະສິດທິຜົນທີ່ສຸດ. ຕາມທ່ານນາຍົກລັດຖະມົນຕີແລ້ວ, ເພື່ອໃຫ້ປະຊາຊົນເຂົ້າໃຈບັນດາວຽກງານທີ່ລັດຖະບານພວມເຮັດ ຕ້ອງຫັນລັດຖະບານເອເລັກໂຕນິກເປັນທັນສະໄຫມ. ໃນນັ້ນ ຂໍ້ມູນຂ່າວກ່ຽວກັບການຄຸ້ມຄອງບໍລິຫານຂອງລັດຖະບານ ຕ້ອງແນະນຳໃຫ້ປະຊາຊົນທາງເຄືອຂ່າຍອິນເຕີແນັດ. ຖ້າປະຕິບັດວຽກງານນີ້ໄດ້ດີ, ວິວັດການສື່ຂ່າວລະຫວ່າງລັດຖະບານ ກັບປະຊາຊົນທັງວ່ອງໄວ, ທັງປະຢັດລາຍຈ່າຍ, ທັງສະກັດກັ້ນບັນດາຂໍ້ມູນຂ່າວບໍ່ຊັດເຈນ, ສ້າງຄວາມໄວ້ເນື້ອເຊື່ອໃຈ ແລະ ຄວາມເຫັນດີເຫັນພ້ອມຂອງປະຊາຊົນ. ແລະ ຕາມທ່ານນາຍົກລັດຖະມົນຕີແລ້ວ, ສະມາຊິກລັດຖະບານແຕ່ລະຄົນ ແລະ ອົງການຊ່ວຍວຽກ ລ້ວນແຕ່ຕ້ອງມີຄວາມຮັບຜິດຊອບປະຕິບັດວຽກງານສື່ຂ່າວ ສື່ສານ, ສະຫນອງບັນດາຂໍ້ຕົກລົງຂອງລັດຖະບານໃນການຄຸ້ມຄອງບໍລິຫານຢ່າງທັນການເພື່ອໃຫ້ທົ່ວປວງຊົນຮູ້ຈັກເຖິງ, ເຂົ້າໃຈໄດ້ ແລະ ມີຄວາມເຫັນດີເຫັນພ້ອມ, ເປັນຈິດຫນຶ່ງໃຈດຽວໃນການຜັນຂະຫຍາຍປະຕິບັດແຜນນະໂຍບາຍ, ນະໂຍບາຍຂອງພັກ, ຂອງລັດ. ເປັນເຈົ້າການໃນການສະຫນອງຂໍ້ມູນຂ່າວທາງການ ເທົ່າໃດ, ຍິ່ງຮັບປະກັນສິດໄດ້ຮັບຂໍ້ມູນຂ່າວສານຂອງປະຊາຊົນເທົ່ານັ້ນ ແລະ ຍິ່ງກຳນົດທິດໃຫ້ຫາງສຽງສັງຄົມສຳພັດກັບສິ່ງທີ່ຖືກຕ້ອງທີ່ສຸດ, ມີຜົນປະໂຫຍດໃຫ້ແກ່ປະເທດຊາດທີ່ສຸດ.