ກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຫວຽດນາມຊຸດທີ 13 ພວມດຳເນີນການປະຊຸມໃນມື້ສຸດທ້າຍກ່ອນທີ່ຈະສິ້ນສຸດອາຍຸການ 5 ປີໃນວັນທີ 12/4. ມາຮອດຈຸດເວລານີ້, ອາດຈະເວົ້າໄດ້ວ່າ ສະພາແຫ່ງຊາດໄດ້ສຳເລັດວຽກງານບຸກຄະລາກອນດ້ວຍການແຕ່ງຕັ້ງບັນດາຕຳແໜ່ງການນຳທີ່ຫຼັກແຫຼ່ງຂອງປະເທດຊາດ. ຜູ້ຄົນທັງຫຼາຍມີຄວາມຫວັງຕໍ່ຄະນະນຳຊຸດໃໝ່ ທີ່ຂະຫຍັນຂັ່ນເຄື່ອນຈະຍາດແຍ່ງທ່າໄດ້ປຽບໃໝ່ ເພື່ອພ້ອມກັບທົ່ວປວງຊົນສ້າງບາດກ້າວຫັນປ່ຽນຢ່າງແຂງແຮງໃຫ້ແກ່ໄລຍະພັດທະນາຕໍ່ໄປຂອງປະເທດຊາດ.
ທ່ານເຈີນດ້າຍກວາງກ່າວຕຳສາບານຕົວເຂົ້າດຳລົງຕຳແໜ່ງປະທານປະເທດຫວຽດນາມ |
ໃນເວລາປະມານ 10 ວັນທີ່ສະຫງວນໃຫ້ແກ່ວຽກງານບຸກຄະລາກອນ, ຊຶ່ງກວມເອົາເກືອບເຄິ່ງໜຶ່ງໄລຍະເວລາດຳເນີນກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຫວຽດນາມຊຸດທີ 13, ບັນດາສະມາຊິກສະພາແຫ່ງຊາດໄດ້ປ່ອນບັດເລືອກຕັ້ງບັນດາຕຳແໜ່ງທີ່ຫຼັກແຫຼ່ງ, ໃນນັ້ນມີປະທານສະພາແຫ່ງຊາດ, ບັນດາຮອງປະທານສະພາແຫ່ງຊາດ, ບັນດາກຳມະການຄະນະປະຈຳສະພາແຫ່ງຊາດ, ປະທານປະເທດ, ນາຍົກລັດຖະມົນຕີ; ໃຫ້ສັດຕະຍາບັນຂໍ້ສະເໜີຂອງນາຍົກລັດຖະມົນຕີກ່ຽວກັບການແຕ່ງຕັ້ງ 3 ຕຳແໜ່ງຮອງນາຍົກລັດຖະມົນຕີພ້ອມກັບ 18 ຕຳແໜ່ງ ລັດຖະມົນຕີເພື່ອບູລະນະຄະນະລັດຖະບານ.
ຄຳສາບານຕົວ
ຂີດໝາຍທີ່ເປັນໜ້າຈົດຈຳໃນ ວຽກງານບຸກຄະລາກອນໃນຊຸມມື້ທີ່ຜ່ານມາ ນັ້ນແມ່ນເປັນຄັ້ງທຳອິດ ບັນດາຜູ້ໄດ້ຮັບເລືອກຕັ້ງເຂົ້າດຳລົງບັນດາຕຳແໜ່ງເປັນຫົວໜ້າບັນດາອົງການນິຕິບັນຍັດ, ບໍລິຫານ ແລະ ຕຸລາການໄດ້ກ່າວຄຳສາບານຕົວຕໍ່ໜ້າສະພາແຫ່ງຊາດ ແລະ ປະຊາຊົນ, ຜູ້ມີສິດເລືອກຕັ້ງໃນທົ່ວປະເທດ. ນັ້ນແມ່ນຄຳສາບານຕົວທີ່ສັກກະຫຼະບູຊາໂດຍຢືນຢັນຄວາມຮັບຜິດຊອບ ແລະ ພັນທະຂອງບັນດາຜູ້ໄດ້ຮັບມອບໝາຍຈາກປະຊາຊົນເພື່ອປະຕິບັດສິດຄຸ້ມຄອງ, ບໍລິຫານປະເທດຊາດ, ໃຫ້ຄຳໝັ້ນໝາຍຈົ່ງຮັກພັກດີກັບລັດຖະທຳມະນູນ, ກັບປະຊາຊົນ ແລະ ປະເທດຊາດຢ່າງເດັດຂາດ, ເຄົາລົບຜົນປະໂຫຍດແຫ່ງຊາດໃນລະດັບສູງສຸດ. ພິທີສາບານຕົວເຂົ້າດຳລົງຕຳແໜ່ງ ດ້ວຍຄຳສາບານຕົວຂອງ ປະທານສະພາແຫ່ງຊາດ, ປະທານປະເທດ, ນາຍົກລັດຖະມົນຕີ ໄດ້ປະກອບສ່ວນປັບປຸງຄວາມເຊື່ອໝັ້ນຂອງປະຊາຊົນທີ່ມີຕໍ່ການມອບໝາຍໜ້າທີ່ຂອງຕົນພ້ອມທັງຮັບປະກັນວ່າ ສິດອຳນາດແຫ່ງລັດແມ່ນຕ້ອງຖືກນຳໃຊ້ຢ່າງຖືກຕ້ອງເພື່ອຜົນປະໂຫຍດແຫ່ງຊາດ.ບັນດາຄຳສາບານຕົວບໍ່ພຽງແຕ່ແມ່ນການທຳພິທີເທົ່ານັ້ນ, ຫາກ ຍັງແມ່ນຄຳໝັ້ນໝາຍກ່ຽວກັບຄວາມຮັບຜິດຊອບສ່ວນຕົວຕໍ່ໜ້າສະພາແຫ່ງຊາດ, ຕໍ່ໜ້າປະຊາຊົນ,ສ້າງພື້ນຖານສຳຄັນໃຫ້ແກ່ປະຊາຊົນເພື່ອປະຕິບັດສິດຕິດຕາມກວດກາຂອງຕົນທີ່ມີຕໍ່ບັນດາຜູ້ດຳລົງຕຳແໜ່ງຫຼັກແຫຼ່ງໃນກົງຈັກແຫ່ງລັດ. ທ່ານ ເຈີນຫງອກວິງ ສະມາຊິກສະພາແຫ່ງຊາດນະຄອນຫາຍຟ່ອງ ຖືວ່າ :
“ ຕາມພວກຂ້າພະເຈົ້າແລ້ວ, ຄວາມໝາຍຂອງຄຳສາບານຕົວແມ່ນສຳຄັນທີ່ສຸດ. ມັນສະແດງໃຫ້ເຫັນວ່າ ບັນດາຕຳແໜ່ງນັ້ນແມ່ນສຳຄັນທີ່ສຸດ ແລະ ບັນດາຜູ້ໄດ້ຮັບການມອບໝາຍໜ້າທີ່ເມື່ອສາບານຕົວແມ່ນຕ້ອງຕັກເຕືອນຕົນເອງປະຕິບັດວຽກງານໃຫ້ຖືກຕາມຄຳສາບານຕົວ. ນີ້ແມ່ນແມ່ນວຽກງານທີ່ມີຄວາມໝາຍທີ່ສຸດ ”
ຕັດສິນໃຈກະທຳ
ກ່າວຄຳເຫັນຕໍ່ໜ້າສະພາແຫ່ງຊາດ ພາຍຫຼັງສາບານຕົວເຂົ້າດຳລົງຕຳແໜ່ງ, ບັນດາຜູ້ນຳອົງການນິຕິບັນຍັດ, ບໍລິຫານ ແລະ ຕຸລາການ ຕ່າງກໍຊີ້ແຈ້ງບັນດາໜ້າທີ່ຊຶ່ງຈະເລັ່ງໃສ່ປະຕິບັດໃນຖານະຕຳແໜ່ງໃໝ່. ທ່ານນາງປະທານສະພາແຫ່ງຊາດຫງວຽນທິກິມເງິນ ຊີ້ແຈ້ງວ່າ ທ່ານນາງຈະພ້ອມກັບຄະນະປະຈຳສະພາແຫ່ງຊາດປະຕິບັດໜ້າທີ່ຂອງອົງການຕົວແທນສູງສຸດຂອງປະຊາຊົນຊຶ່ງເປັນອົງການສິດອຳນາດແຫ່ງລັດສູງສຸດຂອງປະທດ ສ.ສ ຫວຽດນາມເປັນຢ່າງດີ. ທ່ານປະທານປະເທດເຈີນດ້າຍກວາງໃຫ້ຮູ້ວ່າ ຈະເຮັດຈົນສຸດຄວາມສາມາດຂອງຕົນເພື່ອເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເດັດດ່ຽວຕໍ່ສູ້ປົກປັກຮັກສາເອກະລາດອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດໃຫ້ໝັ້ນຄົງໜັກແໜ້ນ. ຍູ້ແຮງກິດຈະການປ່ຽນແປງໃໝ່ຢ່າງຮອບດ້ານ, ເປັນເຈົ້າການຕັ້ງໜ້າເຊື່ອມໂຍງເຂົ້າກັບສາກົນ, ຍົກສູງທີ່ຕັ້ງບົດບາດ ແລະ ອິດທິພົນຊື່ສຽງຂອງຫວຽດນາມໃນເວທີສາກົນ. ທ່ານນາຍົກລັດຖະມົນຕີ ຫງວຽນຊວນຟຸກຢືນຢັນວ່າ ຈະມານະພະຍາຍາມກໍ່ສ້າງລັດຖະບານໃຫ້ໝັ້ນຄົງເຂັ້ມແຂງ, ມີການກະທຳຢ່າງຂ້ຽວຂາດ, ສຸມໃສ່ປະຕິຮູບການບໍລິຫານ, ສ້າງສະພາບແວດລ້ອມແຫ່ງການລົງທຶນ ດຳເນີນທຸລະກິດທີ່ສະດວກ; ເສີມຂະຫຍາຍປະຊາທິປະໄຕ, ຍົກສູງປະສິດທິຜົນວຽກງານປ້ອງກັນ ແລະ ຕ້ານການສໍ້ລາດບັງຫຼວງ, ການຟຸມເຟືອຍ. ໂດຍຖັດຈາກຄວາມຕັດສິນໃຈກະທຳຂອງບັນດາການນຳຫຼັກແຫຼ່ງຂອງລັດ, ລັດຖະບານ, ສະພາແຫ່ງຊາດນັ້ນ, ມີຫຼາຍຕຳແໜ່ງໂດຍສະພາແຫ່ງຊາດໃຫ້ສັດຕະຍາບັນຫຼາຍຈາກນັ້ນ ກໍໄດ້ສະແດງໃຫ້ເຫັນຄວາມຕັດສິນໃຈປະຕິບັດວຽກງານໃນຖານະຕຳແໜ່ງໃໝ່ຂອງຕົນ. ທ່ານລັດຖະມົນຕີ, ຫົວໜ້າກຳມາທິການຊົນເຜົ່າ ໂດ້ວັນຈ້ຽນ ຢືນຢັນວ່າ :
“ ຂ້າພະເຈົ້າຈະພ້ອມກັບບັນດາສະມາຊິກອື່ນໃນລັດຖະບານ ສຸມໃສ່ຜັນຂະຫຍາຍບັນດາເນື້ອໃນຂອງມະຕິກອງປະຊຸມໃຫຍ່ຄັ້ງທີ 12 ຂອງພັກທີ່ໄດ້ວາງອອກ. ໃນນັ້ນ, ຈະສືບຕໍ່ສ້າງບັນດາກົນໄກນະໂຍບາຍເພື່ອແນໃສ່ພັດທະນາເສດຖະກິດສັງຄົມຢູ່ເຂດປະຊາຊົນບັນດາເຜົ່າສ່ວນໜ້ອຍ ແລະ ເຂດພູດອຍ; ລົງທຶນປະຕິບັດໂຄງການລົບລ້າງຄວາມອຶດຫິວຫຼຸດຜ່ອນຄວາມທຸກຍາກ, ລົງທຶນໃຫ້ແກ່ການສຶກສາ, ສາທາລະນະສຸກ ແລະ ແຫຼ່ງຊັບພະຍາກອນມະນຸດເພື່ອສ້າງການຫັນປ່ຽນຢ່າງຈະແຈ້ງກ່ຽວກັບເສດຖະກິດ-ສັງຄົມຢູ່ເຂດປະຊາຊົນບັນດາເຜົ່າສ່ວນໜ້ອຍ, ເຂດພູດອຍ”
ສ່ວນທ່ານລັດຖະມົນຕີວ່າການກະຊວງອຸດສາຫະກຳ-ການຄ້າ ເຈີນຕ້ວນແອງ ໃຫ້ຮູ້ວ່າ :
“ ໃນໄລຍະທີ່ຍັງເຫຼືອຂອງປີ 2016, ຂ້າພະເຈົ້າຈະພ້ອມກັບຄະນະນຳກະຊວງອຸດສາຫະກຳການຄ້າສຸມໃສ່ຊີ້ນຳນຳພາເພື່ອບັນລຸບັນດາຄາດໝາຍການເຕີບໂຕທີ່ໄດ້ວາງອອກ ”
ປະເທດຊາດພວມຢືນຢູ່ຕໍ່ໜ້າໄລຍະພັດທະນາໃໝ່ດ້ວຍເປົ້າໝາຍ ແລະ ໜ້າທີ່ໃໝ່. ເລື່ອງຖັນແຖວພະນັກງານການນຳຮັບຮູ້ແຈ້ງກ່ຽວກັບໜ້າທີ່ກໍຄືຄວາມຕັດສິນໃຈນຳມາເຊິ່ງບັນດາຜົນງານທີ່ຍິ່ງໃຫຍ່ກວ່າເກົ່າໃຫ້ແກ່ການພັດທະນາຂອງປະເທດຊາດ ແລະ ແມ່ນປະຖົມປັດໄຈທີ່ສຳຄັນເພື່ອຊ່ວຍຫວຽດນາມປະສົບຜົນສຳເລັດຫຼາຍຢ່າງບົນເສັ້ນທາງແຫ່ງການສ້າງສາ ແລະ ປົກປັກຮັກສາປະເທດຊາດ.