(vovworld) - ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ, ທ່ານນາຍົກລັດຖະມົນຕີລາຊະອານາຈັກ ກຳປູເຈຍ Samdech Akka Moha Sena Padei Techo Hun Sen ພ້ອມກັບຄະນະຜູ້ແທນຂັ້ນສູງລັດຖະບານລາຊະອານາຈັກ ກຳປູເຈຍ ໄດ້ມາຢ້ຽມຢາມ ຫວຽດນາມ ຢ່າງເປັນທາງການໃນລະຫວ່າງວັນທີ 20 – 21/12/2016. ການຢ້ຽມຢາມຄັ້ງນີ້ ແນໃສ່ຢືນຢັນຄວາມຕັດສິນໃຈຂອງການນຳ 2 ປະເທດແມ່ນເພີ່ມທະວີ ແລະ ເປີດກ້ວາງການພົວພັນຖານບ້ານໃກ້ເຮືອນຄຽງມິດຕະພາບທີ່ເປັນມູນເຊື້ອອັນດີງາມ ແລະ ການຮ່ວມມືຮອບດ້ານລະຫວ່າງ ຫວຽດນາມ - ກຳປູເຈຍ ຢ່າງບໍ່ຢຸດຢັ້ງ.
ທ່ານນາຍົກລັດຖະມົນຕີລາຊະອານາຈັກ ກຳປູເຈຍ
Samdech Hun Sen ມາຢ້ຽມຢາມ ຫວຽດນາມ ຢ່າງເປັນທາງການ
(ພາບ: VGP)
ການພົວພັນ ຫວຽດນາມ - ກຳປູເຈຍ ໄດ້ແຕ່ດົນນານມາແລ້ວ, ຄວາມສະໜິດຕິດພັນກ່ຽວກັບພູມສາດພ້ອມດ້ວຍບັນດາຈຸດທີ່ຄ້າຍຄືກັນຂອງພື້ນຖານວັດທະນະທຳ ແລະ ຜົນປະໂຫຍດລວມ ກໍ່ແມ່ນປັດໃຈສ້າງເປັນການພົວພັນຮ່ວມມືຢ່າງເລິກເຊິ່ງກ້ວາງຂວາງລະຫວ່າງ 2 ປະເທດ. ໃນໄລຍະປະຈຸບັນ, ຫວຽດນາມ ແລະ ກຳປູເຈຍ ລ້ວນແຕ່ປະຕິບັດນະໂຍບາຍການຕ່າງປະເທດເປີດກ້ວາງ, ຫັນບັນດາການພົວພັນສາກົນເປັນຫລາຍຮູບຫລາຍແບບ ແລະ ຫລາຍຝ່າຍ, 2 ຝ່າຍລ້ວນແຕ່ຖືເລື່ອງປັບປຸງ, ເພີ່ມທະວີການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງ 2 ປະເທດເປັນສຳຄັນທີ່ສຸດ.
ຊຸກຍູ້ການພົວພັນຄູ່ຮ່ວມມືຮອບດ້ານ
ດ້ວຍຄວາມຕັດສິນໃຈ ແລະ ຄວາມມານະພະຍາຍາມລວມຂອງ 2 ປະເທດ, ໃນຊຸມປີ ຜ່ານມາ, ການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງ ຫວຽດນາມ - ກຳປູເຈຍ ໄດ້ມີບັນດາບາດກ້າວພັດທະນາອັນດີງາມທັງລວງກ້ວາງ ແລະ ລວງເລິກ, ກາຍເປັນປັດໃຈສຳຄັນຢ່າງແທ້ຈິງ, ປະກອບສ່ວນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບອັນຍາວນານ ເພື່ອຍູ້ແຮງການພັດທະນາເສດຖະກິດ - ສັງຄົມ, ຮັບປະກັນເອກະລາດ, ອະທິປະໄຕແຫ່ງຊາດຂອງແຕ່ລະປະເທດ. ມາຮອດປະຈຸບັນ, 2 ປະເທດໄດ້ກຳນົດຂອບເຂດການພົວພັນຮ່ວມມື “ຖານບ້ານໃກ້ເຮືອນຄຽງອັນດີງາມ, ຄວາມມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ໝັ້ນຄົງຍາວນານ”.
ໃນໄລຍະຜ່ານມາ, ການແລກປ່ຽນຄະນະຜູ້ແທນໄດ້ຮັບການຮັກສາທັງຢູ່ຂັ້ນສູງ ແລະ ບັນດາກະຊວງ, ຂະແໜງການ, ທ້ອງຖິ່ນ, ປັບປຸງຄວາມໄວ້ເນື້ອເຊື່ອໃຈລະຫວ່າງການນຳ ແລະ ປະຊາຊົນ 2 ປະເທດກ່ວາອີກ. ປີ 2016, 2 ຝ່າຍຕັ້ງໜ້າແລກປ່ຽນບັນດາຄະນະຜູ້ແທນຂັ້ນສູງຕື່ມອີກ. ການຮ່ວມມືດ້ານເສດຖະກິດລະຫວ່າງ 2 ປະເທດ ໄດ້ບັນລຸບັນດາຜົນງານທີ່ໜ້າຮັບຮອງ, ຫວຽດນາມ ແມ່ນນັກລົງທຶນໃຫຍ່ອັນດັບທີ 5 (ຖັດຈາກ ຈີນ, ສ.ເກົາຫຼີ, ສະຫະພາບ ເອີລົບ ແລະ ມາເລເຊຍ) ໃນຈຳນວນ 50 ປະເທດ ແລະ ເຂດແຄວ້ນທີ່ລົງທຶນເຂົ້າ ກຳປູເຈຍ ດ້ວຍ 183 ໂຄງການ ລວມຍອດຈຳນວນທຶນຈົດທະບຽນແມ່ນເກືອບ 3 ຕື້ USD. ກຳປູເຈຍ ມີ 12 ໂຄງການຍັງມີຜົນສັກສິດລົງທຶນເຂົ້າ ຫວຽດນາມ ດ້ວຍຍອດຈຳນວນທຶນຈົດທະບຽນກ່ວາ 54 ລ້ານ USD ຢື່ນອັນດັບທີ 49 ໃນຈຳຈວນ 103 ປະເທດ ແລະ ເຂດແຄ້ວນມີການເຄື່ອນໄຫວລົງທຶນເຂົ້າ ຫວຽດນາມ. ການເຄື່ອນໄຫວລົງທຶນຂອງ ຫວຽດນາມ ຢູ່ ກຳປູເຈຍ ແມ່ນໃນ 15 ຂົງເຂດ. ໃນນັ້ນ ສຸມໃສ່ຫລາຍທີ່ສຸດໃນຂົງເຂດກະສິກຳ, ປ່າໄມ້, ພະລັງງານ, ການເງິນ, ທະນາຄານ, ປະກັນໄພ, ໂທລະຄົມມະນາຄົມ, ການປຸງແຕ່ງ, ການຂົນສົ່ງ, ການສົ່ງອອກ - ນຳເຂົ້າ, ສາທາລະນະສຸກ, ການກໍ່ສ້າງ…
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ
ທ່ານນາຍົກລັດຖະມົນຕີລາຊະອານາຈັກ ກຳປູເຈຍ Samdech Hun Sen
(ພາບປະກອບ / TTXVN)
ຫວຽດນາມ ແລະ ຄູ່ຮ່ວມມືດ້ານການຄ້າໃຫຍ່ອັນດັບ 3 ຂອງ ກຳປູເຈຍ. ໄລ່ຮອດໝົດເດືອນ 10/2016, ວົງເງິນການຄ້າສອງຝ່າຍບັນລຸເກືອບ 2,4 ຕື້USD, ໃນນັ້ນວົງເງິນສົ່ງອອກຂອງ ຫວຽດນາມໄປຍັງ ກຳປູເຈຍ ບັນລຸ 1,8 ຕື້USD. ກ່ຽວກັບດ້ານການທ່ອງທ່ຽວ, ປີ 2015 ຈຳນວນນັກທ່ອງທ່ຽວ ຫວຽດນາມໄປ ກຳປູເຈຍ ແມ່ນປະມານ 1 ລ້ານເທື່ອຄົນ (ເພີ່ມຂຶ້ນ 9,9%), ໃນຂະນະນັ້ນ, ຈຳນວນນັກທ່ອງທ່ຽວ ກຳປູເຈຍ ມາ ຫວຽດນາມ ແມ່ນ 210.000 ເທື່ອຄົນ. ໃນ 10 ເດືອນຕົ້ນປີ 2016, ຈຳນວນນັກທ່ອງທ່ຽວ ກຳປູເຈຍມາ ຫວຽດນາມ ແລະ ຈຳນວນນັກທ່ອງທ່ຽວ ຫວຽດນາມ ໄປ ກຳປູເຈຍ ລ້ວນແຕ່ເພີ່ມຂຶ້ນຫຼາຍພໍສົມຄວນ. ຄຽງຂ້າງນັ້ນ, ບັນດາກົນໄກຮ່ວມມືສອງຝ່າຍເຊັ່ນ: ຄະນະກຳມະການປະສົມ ຫວຽດນາມ - ກຳປູເຈຍ ກ່ຽວກັບການຮ່ວມມືດ້ານເສດຖະກິດ, ວັດທະນະທຳ, ວິທະຍາສາດເຕັກນິກ, ກອງປະຊຸມຮ່ວມມື ແລະ ພັດທະນາບັນດາແຂວງຊາຍແດນ ຫວຽດນາມ - ກຳປູເຈຍ ໄດ້ຮັບການປະຊຸມເປັນປະຈຳ.
ບັນດາກະຊວງ, ຂະແໜງການ, ທ້ອງຖີ່ນທີ່ກ່ຽວຂ້ອງຂອງສອງປະເທດກໍ່ໄດ້ຮັບຄວາມເອົາໃຈໃສ່ຊຸກຍູ້ການຮ່ວມມື, ໜູນຊ່ວຍເຊິ່ງກັນ ແລະ ກັນກ່ຽວກັບການພັດທະນາເສດຖະກິດ, ເພີ່ມທະວີການແລກປ່ຽນວັດທະນະທຳ, ການຮ່ວມມືດ້ານສາທາລະນະສຸກ ແລະ ການພົບປະແລກປ່ຽນປະຊາຊົນ, ຈັດການພົບປະເປັນປະຈຳ, ລົງນາມໃນແຜນການຮ່ວມມືປະຈຳປີ.
ເພີ່ມທະວີ ແລະ ພັດທະນາການພົວພັນຖານບ້ານໃກ້ເຮືອນຄຽງອັນດີງາມກວ່າອີກ
ການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບໄດ້ຮັບການເພີ່ມທະວີ, ສອງຝ່າຍສົມທົບກັນຢ່າງແໜ້ນແຟ້ນໃນການແລກປ່ຽນຂໍ້ມູນຂ່າວສານ, ແກ້ໄຂບັນດາເຫດການທີ່ເກີດຂຶ້ນຢູ່ເຂດຊາຍແດນ, ເພີ່ມທະວີການລາດຕະເວນລວມບົນທະເລ, ຮ່ວມມືກັນຢ່າງແໜ້ນແຟ້ນໃນວຽກງານຊອກຫາອັດຖິນັກຮົບອາສາສະໝັກ ຫວຽດນາມ ທີ່ເສຍສະຫຼະຊີວິດໃນໄລຍະສົງຄາມຢູ່ ກຳປູເຈຍ; ສືບຕໍ່ຢືນຢັນຫຼັກການບໍ່ອະນຸຍາດໃຫ້ບໍ່ວ່າກຳລັງທີ່ເປັນປໍລະປັກໃດໆນຳໃຊ້ຜືນແຜ່ນດິນຂອງປະເທດນີ້ເພື່ອຕ້ານ, ທຳລາຍຄວາມໝັ້ນຄົງ, ສະຖຽນລະພາບຂອງປະເທດອື່ນ. ສອງຝ່າຍສູ້ຊົນ ປະຕິບັດສຳເລັດວຽກງານຂີດເສັ້ນຊາຍແດນ, ປັກຫຼັກໝາຍຊາຍແດນທາງບົກໃນໄລຍະເວລາໄວທີ່ສຸດ ເພື່ອແນໃສ່ກໍ່ສ້າງເສັ້ນຊາຍແດນສອງປະເທດໃຫ້ເປັນເສັ້ນຊາຍແດນສັນຕິພາບ, ສະຖຽນລະພາບ, ຮ່ວມມື ແລະ ພັດທະນາຢ່າງໝັ້ນຄົງ.
ບົນພື້ນຖານສາຍພົວພັນອັນດີງາມນັ້ນ, ການຢ້ຽມຢາມ ຫວຽດນາມ ຄັ້ງນີ້ຂອງທ່ານນາຍົກລັດຖະມົນຕີ ກຳປູເຈຍ Samdech Hunsen ເພື່ອແນໃສ່ເພີ່ມທະວີ ແລະ ພັດທະນາການພົວພັນຖານບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ຫວຽດນາມ - ກຳປູເຈຍ. ນີ້ກໍ່ແມ່ນໂອກາດເພື່ອໃຫ້ບັນດາການນຳ ຫວຽດນາມ ແລະ ກຳປູເຈຍ ແຈ້ງໃຫ້ກັນຊາບ ກ່ຽວກັບສະພາບການຢູ່ແຕ່ລະປະເທດ ກໍ່ຄືແລກປ່ຽນບາງບັນຫາໃນການພົວພັນສອງຝ່າຍ. ການຢ້ຽມຢາມຈະນຳການພົວພັນ ຫວຽດນາມ - ກຳປູເຈຍໃຫ້ນັບມື້ນັບພັດທະນາ.