(vovworld)-ເລື່ອງຝ່າຍຄ້ານຢູ່ ຊີຣີ ຫວ່າງແລ້ວນີ້ໄດ້ຖອນອອກຈາກບັນດາການເຈລະຈາໂດຍສັນຕິຢ່າງເປັນທາງການຢູ່ ເຊີແນວ ປະເທດສະວິດ ດ້ວຍສາຍເຫດຄັດຄ້ານສະພາບຂາດຄວາມສະຫງົບປອດໄພ ແລະ ມະນຸດສະທຳໃນພື້ນທີ່ຕົວຈິງ. ການກະທຳຫວ່າງແລ້ວນີ້ໄດ້ເຮັດໃຫ້ວິວັດການຊອກຫາສັນຕິພາບໃຫ້ແກ່ ຊີຣີ ພາຍຫລັງ ເກີດສົງຄາມກາງເມືອງທີ່ແກ່ຍາວມາເປັນເວລາ ເກືອບ 6 ປີ ຕົກເຂົ້າສູ່ສະພາບຈົນຕາແຈຢ່າງສິ້ນເຊິງ ແລະ ມີຄວາມສ່ຽງເກີດສົງຄາມກາງເມືອງຄັ້ງໃຫມ່.
ຫົວຫນ້າຄະນະເຈລະຈາຂອງລັດຖະບານຊີຣີ Bashar al-Jaafari ທີ່ການປະຊຸມຂ່າວຢູ່ເຊີແນວເມື່ອວັນທີ 20/4
ພາບ: THX/TTXVN |
ໃນຖະແຫລງການອອກວັນທີ 18/4, ຜູ້ຕາງຫນ້າຝ່າຍຄ້ານ Riad Hijab ຖືວ່າ: ບໍ່ອາດສືບຕໍ່ການເຈລະຈາຢູ່ ເຊີແນວ ເມື່ອສະພາບການໃຊ້ຄວາມຮຸນແຮງຍັງສືບຕໍ່ເກີດຂຶ້ນ ໂດຍບໍ່ຫົວຊາຕໍ່ຄຳສັ່ງຢຸດຍິງທີ່ຫາກໍບັນລຸໄດ້. ເພາະສະນັ້ນ ຝ່າຍຄ້ານ ໄດ້ຕັດສິນຖອນອອກຈາກການເຈລະຈາຢ່າງເປັນທາງການ ພ້ອມທັງຖະແຫລງ ຈະດຳເນີນການບຸກໂຈມຕີຕ້ານຄືນທະຫານລັດຖະບານຢູ່ ເທດສະບານ Latakia ບົນແຄມທະເລເມດີຕາລາເນ. ດ້ວຍຄຳຖະແຫລງນີ້, ຝ່າຍຄ້ານສາມາດກັບຄືນສູ່ໂຕະເຈລະຈາປະຈຸບັນໄດ້, ໃນຂະນະນັ້ນ ການຜັນແປຢູ່ສະຫນາມຮົບພວມນັບມື້ນັບຊົ່ວຮ້າຍ ເຮັດໃຫ້ປະຊາຄົມສາກົນມີຄວາມວິຕົກກັງວົນວ່າ ສົງຄາມກາງເມືອງຄັ້ງໃຫມ່ອາດຈະເກີດຂຶ້ນຢູ່ຊີຣີ.
ບັນດາຄວາມບໍ່ລົງລອຍກັນຍາກທີ່ຈະຜ່ານຜ່າໄດ້
ຕາມສາຍເຫດຊື່ງຝ່າຍຄ້ານຍົກອອກມາເມື່ອປະຕິເສດການເຈລະຈາ ແມ່ນຍ້ອນວ່າ ບັນດາການເຈລະຈາສ່ວນຫລາຍບໍ່ບັນລຸຄວາມຄືບຫນ້າໃດກ່ຽວກັບການປົດສິດອຳນາດຂອງປະທານາທິບໍດີ Assad. ນອກນັ້ນ ຝ່າຍນີ້ຍັງກ່າວຫາອຳນາດການປົກຄອງ ຊີຣີ ບໍ່ເຄົາລົບຄຳໝັ້ນສັນຍາຢຸດຍິງ ເມື່ອປະຕິບັດການເຄື່ອນໄຫວດ້ານການທະຫານຫລາຍຄັ້ງຢູ່ແຂວງ Aleppo. ຝ່າຍຄ້ານກ່າວຫາວ່າ: ກອງທັບ ຊີຣີໄດ້ຮັບການຫນູນຫລັງຈາກກອງທັບອາກາດ ລັດເຊຍ ດຳເນີນບັ້ນບຸກໂຈມຕີຈາກ 3 ຝ່າຍ ເຂົ້າເຂດອ້ອມຂ້າງນະຄອນ Aleppo, ນາບຂູ່ທຳລາຍຄຳສັ່ງຢຸດຍິງປະຈຸບັນ. ປະຕິກິລິຍາຕໍ່ຄຳຕັດສິນຂອງຝ່າຍຄ້ານ, ລັດຖະບານ ຊີຣີ ໄດ້ຕຳຫນິຕິຕຽນ ຕວກກີ, ອິດສະຣາແອນ ແລະ ຊາອຸດີ ອາຣັບບີ ຢືນຢູ່ເບື້ອງຫລັງການລົ້ມລະລາຍນີ້. ຜູ້ຕາງຫນ້າລັດຖະບານ ຊີຣີ ຢືນຢັນວ່າ: ນີ້ແມ່ນການພິສູດໃຫ້ເຫັນວ່າ ຝ່າຍຄ້ານບໍ່ມີເຈດຈຳນົງດ້ານການເມືອງຢ່າງພຽງພໍເພື່ອໃຫ້ການເຈລະຈາສາມາດດຳເນີນໄປຢ່າງເຂັ້ມງວດ ແລະ ມີຄວາມຮັບຜິດຊອບ.
ຮອບເຈລະຈາຄັ້ງໃຫມ່ກ່ຽວກັບສັນຕິພາບຢູ່ ຊີຣີ ໄດ້ຮັບການເຊື່ອມຕໍ່ຄືນໃຫມ່ ພາຍຫລັງຢຸດຕິຊົ່ວຄາວໃນເວລາ 1 ເດືອນ ແລະ ເກືອບ 2 ເດືອນ ນັບແຕ່ເມື່ອຮອບເຈລະຈາຄັ້ງທຳອິດບໍ່ບັນລຸໝາກຜົນ ຫາກສາຍເຫດຕົ້ນຕໍກໍແມ່ນຍ້ອນຝ່າຍຄ້ານຖອນອອກຈາກໂຕະເຈລະຈາເພື່ອຄັດຄ້ານສະພາບໃຊ້ຄວາມຮຸນແຮງເກີດຂຶ້ນຢ່າງລຽນຕິດຢູ່ພື້ນທີ່ຕົວຈິງ. ມາຮອດປະຈຸບັນ, ບັນດາຝ່າຍກ່ຽວຂ້ອງຍັງບໍ່ທັນສາມາດເຈລະຈາໂດຍກົງ ຫາກພຽງແຕ່ປຶກສາຫາລືພາຍໃຕ້ຮູບການທາງອ້ອມ, ຜ່ານ ສປຊ. ທູດພິເສດ ສປຊ, ທ່ານ Staffan de Mistura ຍອມຮັບວ່າ, ຊ່ອງຫວ່າງລະຫວ່າງບັນດາຝ່າຍ ແມ່ນໃຫຍ່ຫລວງ. ມາຮອດປະຈຸບັນ ພາຍຫລັງມີຄວາມມານະພະຍາຍາມຫລາຍຢ່າງ, ລັດຖະບານ ແລະ ຝ່າຍຄ້ານຢູ່ ຊີຣີ ພຽງແຕ່ບັນລຸຂໍ້ຕົກລົງຮ່ວມຫນຶ່ງດຽວກ່ຽວກັບການສ້າງວິວັດການມອບໂອນດ້ານການເມືອງ, ໃນຂະນະຄວາມແຕກຕ່າງໃຫຍ່ສຸດແມ່ນການອະທິບາຍຂໍ້ຕົກລົງ, ພິເສດ ແມ່ນບົດບາດຂອງປະທານາທິບໍດີ Al Assad. ຝ່າຍຄ້ານ ແລະ ອຳນາດການປົກຄອງ Damascus ພ້ອມກັບການຫນູນຫລັງຂອງເຂົາເຈົ້ານັ້ນແມ່ນລັດເຊຍ ແລະ ອາເມລິກາ ນັບແຕ່ດົນນານແລ້ວໄດ້ເກີດຄວາມຂັດແຍ້ງໃນບັນຫາອະນາຄົດຂອງປະທານາທິບໍດີ Bashar al Assad. ກ່ອນຫນ້ານັ້ນ ລັດເຊຍ ໄດ້ຍົກອອກເງື່ອນໄຂຕ້ອງຮັກສາລັດຖະບານລັດຖະທຳມະນູນປະຈຸບັນໄວ້, ໃນຂະນະທີ່ອາເມລິກາ ພັດບໍ່ເຫັນດີຢ່າງເດັດຂາດ. ຄະນະກຳມະການເຈລະຈາຂັ້ນສູງ, ຜູ້ຕາງຫນ້າຝ່າຍຄ້ານຕົ້ນຕໍຢູ່ ຊີຣີ ໄດ້ເຂົ້າຮ່ວມການເຈລະຈາຢູ່ ເຊີແນວ ໄດ້ຮຽກສິດສ້າງຕັ້ງ “ສະພາຂ້າມຜ່ານ” ເພື່ອບໍລິຫານປະເທດຊາດໃນ 18 ເດືອນ ກ່ອນທີ່ດຳເນີນ ເລືອກຕັ້ງປະທານາທິບໍດີຄົນໃຫມ່ ແລະ ປະທານາທິບໍດີ Bashar al Assad ຕ້ອງລາອອກຈາກຕຳແຫນ່ງ.
ຄວາມເຄັ່ງຕຶງປີນຂັ້ນໄດ
ໃນຂະນະນັ້ນ, ສະພາບການຮົບນັບມື້ນັບປີນຂັ້ນໄດຢ່າງຮ້າຍແຮງ. ຕາມອົງການຕິດຕາມສິດທິມະນຸດ ຊີຣີ ແລ້ວ, ຈຳນວນສາມັນຊົນຖືກເສຍຊີວິດໃນບັນດາເຫດປະທະກັນຄັ້ງໃຫມ່ຢູ່ Aleppo ໃນຊຸມມື້ຜ່ານມາແມ່ນຢູ່ໃນລະດັບສູງສຸດນັບແຕ່ເມື່ອຂໍ້ຕົກລົງຢຸດຍິງເລີ່ມມີຜົນສັກສິດ ແຕ່ວັນທີ 27/2. ໄລ່ສະເພາະວັນທີ 19/4, ມີສາມັນຊົນຢ່າງຫນ້ອຍສຸດ 44 ຄົນຖືກເສຍຊີວິດໃນບັນດາເຫດບຸກໂຈມຕີທາງອາກາດຂອງອຳນາດການປົກຄອງເລັ່ງໃສ່ຕະຫລາດສອງແຫ່ງຢູ່ ແຂວງ Idlip ທາງທິດຕາເວັນຕົກສ່ຽງເຫນືອຂອງປະເທດນີ້, ຊື່ງແມ່ນກຸ່ມແນວໂຮມ Al- Nusra ພວມຄວບຄຸມ. ໄລ່ລວມແລ້ວ, ສົງຄາມກາງເມືອງທີ່ແກ່ຍາວເກືອບ 6 ປີ ຢູ່ ຊີຣີ ໄດ້ເຮັດໃຫ້ກວ່າ 270.000 ຄົນຖືກເສຍຊີວິດ ແລະ ນັບລ້ານໆຄົນຕ້ອງອອກຈາກບ້ານເກີດເມືອງນອນໄປລົບໄພ, ອັນໄດ້ກໍ່ໃຫ້ເກີດວິກິດການຊາວອົບພະຍົບຄັ້ງໃຫຍ່ສຸດຢູ່ ເອີລົບ.
ປະຈຸບັນ ໂດຍບໍ່ຫົວຊາຕໍ່ບັນດາການນຳຝ່າຍຄ້ານຢູ່ ຊີຣີ ໄດ້ອອກຈາກການເຈລະຈາ, ບັນດາຄວາມມານະພະຍາຍາມທາງການທູດຍັງຄົງສືບຕໍ່ດຳເນີນໄປ. ທູດພິເສດ ສປຊ Staffan de Mistura ພວມສືບຕໍ່ດຳເນີນການພົບປະລະຫວ່າງຝ່າຍຕ່າງໆ ເພື່ອເຊື່ອມຕໍ່ການເຈລະຈາຄືນໃຫມ່ ໃນອາທິດນີ້. ລັດຖະມົນຕີການຕ່າງປະເທດລັດເຊຍ Seigey Lavrov ຢືນຢັນວ່າ: ການເຈລະຈາປະຈຸບັນ ຢູ່ ເຊີແນວ ບໍ່ທັນສິ້ນສຸດເທື່ອ ພ້ອມທັງເຊື່ອໝັ້ນວ່າ ຄຳສະເຫນີຂອງອຳນາດການປົກຄອງ Damascus ກ່ຽວກັບການສ້າງຕັ້ງລັດຖະບານເປີດກວ້າງ ຊື່ງລວມມີ ຜູ້ຕາງຫນ້າບັນດາຝ່າຍ ໂດຍປະທານາທິບໍດີ Assad ນຳຫນ້າ ຈະຊ່ວຍຫລຸດຜ່ອນຄວາມເຄັ່ງຕຶງປະຈຸບັນ ຢູ່ ຊີຣີ. ເຖິງຢ່າງໃດກໍຕາມ ຄຳສະເຫນີນີ້ພັດບໍ່ໄດ້ຮັບການສະຫນັບສະຫນູນຈາກ ຄະນະກຳມະການເຈລະຈາຂັ້ນສູງ, ຜູ້ຕາງຫນ້າໃຫ້ບັນດາກຸ່ມຝ່າຍຄ້ານຕົ້ນຕໍ ຢູ່ ຊີຣີ ເມື່ອ ຄະນະກຳມະການນີ້ຖະແຫລງວ່າພ້ອມແລ້ວແບ່ງປັນທີ່ນັ່ງໃນລັດຖະບານຂ້າມຜ່ານກັບບັນດາສະມາຊິກລັດຖະບານໃນປະຈຸບັນ ແຕ່ບໍ່ແມ່ນກັບປະທານາທິບໍດີ Bashar al Assad.
ຄຳຖາມພວມວາງອອກໃນຈຸດເວລານີ້ ແມ່ນເຮັດແນວໃດເພື່ອຢຸດຕິສົງຄາມກາງເມືອງທີ່ແກ່ຍາວມາຮອດປະຈຸບັນ ເມື່ອທັດສະນະຂອງບັນດາຝ່າຍ ກ່ຽວກັບອະນາຄົດຂອງປະທານາທິບໍດີ Bashar al Assad ຍັງມີຄວາມແຕກຕ່າງກັນຫລາຍ. ເບິ່ງຄືວ່າມາດຕະການການເມືອງໃຫ້ແກ່ ຊີຣີ ຍາກທີ່ເປັນໄປໄດ້.