ຕາມກົນໄກຕີລາຄາການປະຕິບັດສົນທິສັນຍາສະຫະປະຊາຊາດກ່ຽວກັບການປ້ອງກັນ ແລະ ຕ້ານການສໍ້ລາດບັງຫຼວງນັ້ນ, ຫວຽດນາມຖືກຈັດຢູ່ໃນກຸ່ມປະເທດສຳເລັດວິວັດການຕີລາຄາເທື່ອທີ 1 ຂອງສະຫະປະຊາຊາດກ່ຽວກັບການປ້ອງກັນ ແລະ ຕ້ານການສໍ້ລາດບັງຫຼວງ. ວຽກງານປ້ອງກັນ ແລະ ຕ້ານການສໍ້ລາດບັງຫຼວງຂອງຫວຽດນາມກໍໄດ້ຮັບການຕີລາຄາສູງ ຄືດັ່ງເປັນຕົວແບບກ່ຽວກັບການປະຕິບັດກົນໄກຕີລາຄາການປະຕິບັດຂອງສະຫະປະຊາຊາດກ່ຽວກັບການປ້ອງກັນ ແລະ ຕ້ານການສໍ້ລາດບັງຫຼວງ, ພິເສດແມ່ນວິວັດການປະຕິບັດເທື່ອທີ 1. ສິ່ງດັ່ງກ່າວແມ່ນໝາກຜົນແຫ່ງຄວາມຕັດສິນໃຈຂອງພັກ, ລັດ, ລັດຖະບານ ແລະ ພິເສດແມ່ນການປະກອບສ່ວນຢ່າງຕັ້ງໜ້າຂອງປະຊາຊົນ, ວົງຄະນະຍາດໃນວຽກງານຕໍ່ສູ້ປ້ອງກັນ ແລະ ຕ້ານການສໍ້ລາດບັງຫຼວງ.
ການໂອ້ລົມສົນທະນາ "ຮ່ວມແຮງຮ່ວມໃຈປ້ອງກັນ ແລະ ຕ້ານການສໍ້ລາດບັງຫຼວງເພື່ອການພັດທະນາ" |
ວັນທີ 29/11/2005, ກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫຼວງໄດ້ຮັບການຮັບຮອງເອົາໃນກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຫວຽດນາມຊຸດທີ 11 ແລະ ມີຜົນສັກສິດນັບແຕ່ວັນທີ 1/6/2006 ເພື່ອແນໃສ່ສະແດງໃຫ້ເຫັນຄວາມຕັດສິນໃຈຢ່າງສູງຂອງພັກ, ລັດ ແລະ ປະຊາຊົນຫວຽດນາມໃນການຕໍ່ສູ້ປ້ອງກັນ ແລະ ຕ້ານການສໍ້ລາດບັງຫຼວງ. ໃນນັ້ນ, ການສະກັດກັ້ນການສໍ້ລາດບັງຫຼວງແມ່ນເສົາຄ້ຳ, ມີບົດບາດສຳຄັນໃນກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫຼວງ. ກົດໝາຍຫວຽດນາມໃນປະຈຸບັນ ໄດ້ກຳນົດຢ່າງຄົບຖ້ວນກ່ຽວກັບ ບັນດາມາດຕະການສະກັດກັ້ນທີ່ພວມນຳໃຊ້ຢູ່ຫຼາຍປະເທດໃນໂລກ.
ປະຊາຊົນແມ່ນປັດໄຈສຳຄັນ ແລະ ຕັ້ງໜ້າໃນການປ້ອງກັນ ແລະ ຕ້ານການສໍ້ລາດບັງຫຼວງ
ໃນໄລຍະທີ່ຜ່ານມາ, ວຽກງານປ້ອງກັນ ແລະ ຕ້ານການສໍ້ລາດບັງຫຼວງຂອງຫວຽດນາມໄດ້ມີການປົວແປງທີ່ດີພໍສົມຄວນ , ນີ້ແມ່ນຍ້ອນມີການຮ່ວມແຮງຮ່ວມໃຈຂອງທັງພາກລັດ, ເອກະຊົນ, ບັນດາອົງການທີ່ບໍ່ຂຶ້ນກັບລັດຖະບານ, ອົງການຈັດຕັ້ງສັງຄົມ, ບັນດາອົງການສື່ມວນຊົນ ແລະ ປະຊາຊົນ. ທ່ານນາງ ດາວທິງາ ຜູ້ອຳນວຍການບໍລິຫານອົງການ ເຮື້ອງເຕີ້ຍມິນແບກ ຢືນຢັນວ່າ :
“ ປະຊາຊົນສາມາດຮ້ອງຟ້ອງບັນດາການກະທຳສໍ້ລາດບັງຫຼວງ, ຊ່ວຍຕິດຕາມກວດກາການເຄື່ອນໄຫວຂອງອົງການທີ່ມີໜ້າທີຮັບຜິດຊອບ, ຈາກນັ້ນ ຈະຊ່ວຍເພີ່ມທະວີຄວາມຮັບຜິດຊອບໃນການອະພິປາຍຂອງບັນດາອົງການສຳນັກງານແຫ່ງລັດ, ປະກອບສ່ວນສ້າງບັນດານະໂຍບາຍ, ເອກະສານນິຕິກຳຂອງລັດ. ແຕ່ລະຄົນຕ້ອງເຫັນແກ່ສ່ວນລວມ, ບໍ່ເຫັນແກ່ສວ່ນຕົວ ກໍຄືສົ່ງເສີມຍາດພີນ້ອງເຮັດຕາມ, ເປັນອັນວ່າປະຊາຊົນແຕ່ລະຄົນໄດ້ປະກອບສ່ວນຢ່າງຕັ້ງໜ້າເຂົ້າໃນການສະກັດກັ້ນບັນດາການກະທຳສໍ້ລາດບັງຫຼວງ”
ການນຳພັກ, ລັດຫວຽດນາມຍາມໃດກໍເຊີດຊູ ແລະ ຜັນຂະຫຍາຍບັນດາວິທີການແກ້ໄຂເພີ່ມທະວີບົດບາດ ແລະ ການເຂົ້າຮ່ວມຂອງປະຊາຊົນໃນການປ້ອງກັນ ແລະ ຕ້ານການສໍ້ລາດບັງຫຼວງ, ຍ້ອນແນວນັ້ນ, ລະດັບຄວາມຮັບຮູ້ຂອງປະຊາຊົນກ່ຽວກັບບົດບາດ, ສິດຜົນປະໂຫຍດ ແລະ ຄວາມຮັບຜິດຊອບຂອງຕົນໃນການປ້ອງກັນ ແລະ ຕ້ານການສໍ້ລາດບັງຫຼວງ ໄດ້ເພີ່ມຂຶ້ນຫຼາຍພໍສົມຄວນ. ທ່ານຮີ່ງຟອງແຈງ ຫົວໜ້າອົງການກວດກາລັດຖະບານຖືວ່າ :
“ ຄວນຮັບປະກັນໃຫ້ປະຊາຊົນໄດ້ຮັບຂໍ້ມູນຂ່າວສານຢ່າງຄົບຖ້ວນຕາມລະບຽບກົດໝາຍ. ດຳເນີນການເຄື່ອນໄຫວຕ່າງໆເພື່ອໃຫ້ປະຊາຊົນ, ພາກສ່ວນ, ຂົງເຂດຕ່າງໆໃນສັງຄົມອາດຈະເຂົ້າຮ່ວມປະກອບຄຳເຫັນ, ຂໍ້ລະເລີ່ມ, ແນວຄວາມຄິດທີ່ແທດຈິງກ່ຽວກັບການປ້ອງກັນ ແລະ ຕ້ານການສໍ້ລາດບັງຫຼວງ. ບັນດາການກະທຳເຫຼົ່ານັ້ນ, ແມ່ນປະກົດການສູງສຸດຂອງການສະໜັບສະໜູນຂອງປະຊາຊົນທີ່ມີຕໍ່ພັກ ແລະ ລັດ, ຄວາມເຫັນດີເຫັນພ້ອມຂອງທັງລະບົບການເມືອງ ແນໃສ່ຮ່ວມແຮງຮ່ວມໃຈປ້ອງກັນ,ຕ້ານ, ສະກັດກັ້ນ ແລະ ຍູ້ໄພສໍ້ລາດບັງຫຼວງໃຫ້ຖອຍໄປ ”
ຫັນບົດບາດຂອງປະຊາຊົນເປັນລະອຽດຜ່ານບັນດາຂໍ້ລິເລີ່ມປ້ອງກັນ ແລະ ຕ້ານການສໍ້ລາດບັງຫຼວງ
ວັນປະດິດຄິດສ້າງຫວຽດນາມ ປີ 2009 (VID) ດ້ວຍຫົວຂໍ້ “ ຍົກສູງຄວາມຮັບຜິດຊອບ ແລະ ຄວາມກະຈ່າງແຈ້ງ, ຫຼຸດຜ່ອນການ ສໍ້ລາດບັງຫຼວງ ” ແມ່ນການເຄື່ອນໄຫວທຳອິດ ໂດຍອົງການກວດກາລັດຖະບານສົມທົບກັບທະນາໂລກປະຈຳຫວຽດນາມຈັດຂຶ້ນ ດ້ວຍຈຸດປະສົງສ້າງກາລະໂອກາດເພື່ອໃຫ້ປະຊາຊົນປະກອບຄຳເຫັນ, ຂໍ້ລິເລີ່ມ, ແນວຄວາມຄິດ ປະກອບສ່ວນຢ່າງແທດຈິງເຂົ້າໃນການພັດທະນາຂອງທ້ອງຖິ່ນ ແລະ ຂອງວົງຄະນະຍາດ ແລະ ເຮັດໃຫ້ຄວາມມານະພະຍາຍາມຕໍ່ສູ້ປ້ອງກັນ ແລະ ຕ້ານການສໍ້ລາດບັງຫຼວງມີປະສິດທິຜົນກວ່າເກົ່າ.
ຕໍ່ຈາກ VID ປີ 2009, ບັນດາລາຍການຂໍ້ຄິດລິເລີ່ມກ່ຽວກັບ ການປ້ອງກັນ ແລະ ຕ້ານການສໍ້ລາດບັງຫຼວງຢູ່ຫວຽດນາມ(VACI 2011, VACI 2013, VACI 2014 )ໄດ້ຮັບການສ້າງຂຶ້ນໂດຍມີການອຸປະຖຳຈາກທະນາຄານໂລກ, ກະຊວງພັດທະນາສາກົນອັງກິດ…ດ້ວຍຈຸດໝາຍປຸກລະດົມການເຂົ້າຮ່ວມຢ່າງຕັ້ງໜ້າຂອງວົງຄະນະຍາດແນໃສ່ຫັນບັນດາວິທີການປ້ອງກັນ ແລະ ຕ້ານການສໍ້ລາດບັງຫຼວງຈາກຂັ້ນຮາກຖານໃຫ້ປະກົດຜົນເປັນຈິງ. ທ່ານຫງວຽນຮິ້ວລົກ, ຜູ້ຮັກສາການຫົວໜ້າກົມຮ່ວມມືສາກົນ ສັງກັດອົງການກວດກາລັດຖະບານ ໃຫ້ຮູ້ວ່າ :
“ VID 2009 ແລະ VACI ແມ່ນການເຄື່ອນໄຫວທະວີຄູນບັນດາຂໍ້ລິເລີ່ມຂອງວົງຄະນະຍາດ; ໄດ້ພິສູດໃຫ້ເຫັນລັກສະນະຫົວຄິດປະດິດສ້າງ, ແທດຈິງ, ຜ່ານນັ້ນ,ເພີ່ມທະວີການເຂົ້າຮ່ວມຢ່າງຕັ້ງໜ້າ ແລະ ມີປະສິດທິຜົນຂອງປະຊາຊົນ ແລະ ສັງຄົມເຂົ້າໃນວຽກງານປ້ອງກັນ ແລະ ຕ້ານການສໍ້ລາດບັງຫຼວງ ”
ວຽກງານຖະແຫຼງຂ່າວ, ໂຄສະນາກໍເພື່ອແນໃສ່ຍົກສູງລະດັບຄວາມຮັບຮູ້ໃຫ້ແກ່ປະຊາຊົນກ່ຽວກັບ ສໍ້ລາດບັງຫຼວງ, ສົ່ງເສີມການເຂົ້າຮ່ວມຢ່າງຕັ້ງໜ້າ, ເປັນເຈົ້້າການຂອງປະຊາຊົນສວມບົດບາດສຳຄັນໃນວຽກງານປ້ອງກັນ ແລະ ຕ້ານການສໍ້ລາດບັງຫຼວງ. ຍ້ອນມີການປະກອບສ່ວນຢ່າງຕັ້ງໜ້າຂອງປະຊາຊົນຜ່ານບັນດາຂໍ້ລິເລີ່ມ, ແນວຄວາມຄິດທີ່ມີຫົວຄິດປະດິດສ້າງ, ບັນດາການເຄື່ອນໄຫວຂອງບັນດາອົງການສຳນັກງານແຫ່ງລັດ, ອຳນາດການປົກຄອງຂັ້ນຕ່າງໆ ໄດ້ມີຄວາມກະຈ່າງແຈ້ງກວ່າ, ມີຄວາມຮັບຜິດຊອບໃນການອະພິປາຍສູງກວ່າ, ຮັບປະກັນກົນໄກສົນທະນາຢ່າງເປີດອົກເປີດໃຈກັບປະຊາຊົນເປັນປະຈຳຫຼາຍກວ່າ, ກໍລະນີທີ່ຜິດພາດຫຼາຍກໍລະນີໄດ້ຮັບການແກ້ໄຂ ແລະ ລົງໂທດຢ່າງເຂັ້ມງວດ, ອັນໄດ້ປະກອບສ່ວນນຳມາເຊິ່ງຄວາມກະຈ່າງແຈ້ງໃຫ້ແກ່ສັງຄົມ.