(vovworld)- ໂຄສົກຂອງຂ້າຫລວງໃຫຍ່ສິດທິມະນຸດ ສປຊ ຫາກໍມີຄຳກ່າວປາໄສທີ່ຂາດຄວາມຊັດເຈນ, ບໍ່ມີຄວາມຈິງກ່ຽວກັບບັນດາກໍລະນີການເຕົ້າໂຮມຂອງຫລາຍຄົນ ຢູ່ຮ່າໂນ້ຍ ແລະ ນະຄອນ ໂຮ່ຈິມີນ ໃນໄລຍະມໍ່ໆມານີ້, ພາຍໃຕ້ຄັນຕະລະບັດ “ປົກປັກຮັກສາສິ່ງແວດລ້ອມ” ພາຍຫລັງເກີດເຫດທີ່ຜົນສະທ້ອນເຖິງສິ່ງແວດລ້ອມທະເລຢູ່ບັນດາແຂວງ ພາກກາງ ຫວຽດນາມ. ນີ້ແມ່ນການກະທຳມີຈຸດປະສົງແທ້ຈິງ ເພື່ອປະຕິເສດຄວາມຈິງວ່າ ຍາມໃດຫວຽດນາມກໍເຄົາລົບ ແລະ ປົກປ້ອງບັນດາສິດເສລີຢ່າງຊອບທຳຂອງປະຊາຊົນ, ນັບທັງດ້ານກົດໝາຍ ແລະ ຄວາມເປັນຈິງ. ບົດຂຽນຂອງນັກຂ່າວ ທູຮວາ.
ກອງປະຊຸມວິທະຍາສາດຜົນງານສິດທິມະນຸດຫວຽດນາມ
ໃນ 70 ປີຜ່ານມາ
ພາບ:edu.vn
|
ເລື່ອງໂຄສົກຂອງຂ້າຫລວງໃຫຍ່ ສິດທິມະນຸດ ສປຊ ໄດ້ກ່າວຫາຫວຽດນາມ “ມີການກະທຳໃຊ້ຄວາມຮຸນແຮງຕໍ່ບັນດາຜູ້ທີ່ເຕົ້າໂຮມກັນ, ໃນນັ້ນ ມີແມ່ຍິງ ແລະ ເດັກນ້ອຍ “ແມ່ນບໍ່ມີພື້ນຖານ ແລະ ຜິດກັບຄວາມຈິງຢ່າງສິ້ນເຊິງ. ນີ້ແມ່ນການຮັບຮູ້ທີ່ຂາດພາວະວິໄສ ແລະ ມີຈຸດປະສົງແທ້ຈິງ.
ການປົກປັກຮັກສາສິ່ງແວດລ້ອມຫລືກໍ່ຄວາມວຸ້ນວາຍ, ປຸກປັ່ນ, ຍຸແຍ່ໂຄ່ນລົ້ມລະບອບ
ບໍ່ຍາກເພື່ອເຫັນວ່າ: ໃນບັນດາກໍລະນີເຕົ້າໂຮມຂອງຫລາຍຄົນ ໃນນາມວ່າ: “ການເຄື່ອນໄຫວເພື່ອປົກປັກຮັກສາສິ່ງແວດລ້ອມ” ຢູ່ ຫວຽດນາມ, ບັນດາພວກຄົນບໍ່ດີ, ລວມທັງກຸ່ມກໍ່ການຮ້າຍ ຫວຽດເຕີນ, ໄດ້ຈັດຕັ້ງ ຫລືມີກົນອຸບາຍຈັດຕັ້ງບັນດາເຫດກໍ່ຄວາມວຸ້ນວາຍ ແລະ ປຸກປັ່ນຍຸແຍ່ກໍ່ການຈະລາຈົນໂຄ່ນລົ້ມ ຕາມແຜນການທີ່ເປັນລະບົບ. ເຂົາເຈົ້າໄດ້ຮ່ວມສຳພັນກັບບັນດາບຸກຄົນບໍ່ດີຢູ່ພາຍໃນ ແລະ ຕ່າງປະເທດ ສວຍໃຊ້ກໍລະນີຜົນສະທ້ອນເຖິງສິ່ງແວດລ້ອມເພື່ອຍຸ້ຍົງປະຊາຊົນດຳເນີນການແຫ່ຂະບວນປະທ້ວງ, ແກ່ດຶງນັບທັງຜູ້ອາຍຸບໍ່ເຖິງກະສຽນ, ຜູ້ຕິດຄະດີ, ….ກະກຽມວັດຖຸສິ່ງຂອງ, ໃຊ້ເງິນມາຈ້າງຜູ້ເຂົ້າຮ່ວມ, ນຳໃຊ້ເຄືອຂ່າຍສື່ສັງຄົມເພື່ອປຸກປັ່ນການກະທຳຕ້ານຄືນ, ຊ້ຳບໍ່ໜຳ ຕ້ານຄືນບັນດາກຳລັງທີ່ເຂົ້າຮ່ວມການຮັກສາຄວາມເປັນລະບຽບຮຽບຮ້ອຍ. ກຳລັງມີຫນ້າທີ່ຮັບຜິດຊອບ ຂອງຫວຽດນາມ ຫາກໍກັກຂັງ 2 ຄົນທີ່ໄດ້ຮັບເງິນຈາກອົງການປະຕິການ ຫວຽດເຕີນ ເພື່ອເກັບກຳ, ແຈກຢ່າຍເອກະສານ, ຮູບພາບທີ່ເສກສັ້ນປັ້ນແຕ່ງ, ປຸກປັ່ນປະຊາຊົນດຳເນີນການແຫ່ຂະບວນປະທ້ວງຕ້ານລັດຫວຽດນາມ. ກົນອຸບາຍແທ້ຈິງຂອງບັນດາພວກຄົນບໍ່ດີແມ່ນປຸກປັ່ນປະຊາຊົນທຳລາຍການເລືອກຕັ້ງສະມາຊິກສະພາແຫ່ງຊາດຊຸດທີ XIV ແລະສະມາຊິກສະພາປະຊາຊົນທຸກຂັ້ນ ຈະດຳເນີນໃນໄລຍະຈະມາເຖິງ, ກໍ່ຂາດສະຖຽນລະພາບ, ຄວາມສະຫງົບປອດໄພດ້ານການເມືອງຢູ່ ຫວຽດນາມ.
ຍາມໃດຫວຽດນາມກໍເຄົາລົບ, ຮັບປະກັນບັນດາສິດ ແລະ ຄວາມເສລີພື້ນຖານຂອງປະຊາຊົນ
ຄວາມຈິງ, ຫວຽດນາມ ຍາມໃດກໍເຄົາລົບ, ຮັບປະກັນບັນດາສິດ ແລະ ຄວາມເສລີພື້ນຖານຂອງປະຊາຊົນ, ໃນນັ້ນ ມີສິດເສລີໃນການໂຮມປະຊຸມ, ສິດເສລີໃນການປາກເວົ້າ, ສອດຄອ່ງກັບລັດຖະທຳມະນູນ ແລະ ບັນດາມາດຕະຖານສາກົນກ່ຽວກັບສິດທິມະນຸດ. ພາຍຫລັງກາຍເປັນສະມາຊິກ ສປຊ ເມື່ອປີ 1977, ຫວຽດນາມ ເຂົ້າຮ່ວມສົນທິສັນຍາສາກົນກ່ຽວກັບສິດທິມະນຸດເກືອບທັງໝົດ. ນອກນັ້ນ ຫວຽດນາມ ຍັງປະກາດໃຊ້ບັນດາຄຳສັ່ງ, ດຳລັດພ້ອມກັບບັນດາມາດຕະການສອດຄ່ອງກັບກົດໝາຍຫວຽດນາມ ແລະ ບັນດາມາດຕະຖານສາກົນ ເພື່ອຮັບປະກັນຄວາມໝັ້ນຄົງ ແລະ ຄວາມປອດໄພໃຫ້ແກ່ປະຊາຊົນ, ພິເສດ ແມ່ນຜູ້ເຖົ້າຜູ້ແກ່, ແມ່ຍິງ ແລະ ເດັກນອ້ຍ. ຫວຽດນາມ ໄດ້ ແລະ ພວມເປັນສະມາຊິກສະພາສິດທິມະນຸດ ສປຊ ອາຍຸການ 2014- 2016 ພ້ອມທັງມີຄວາມຕັ້ງຫນ້າຮ່ວມມືດ້ານສິດທິມະນຸດໃນຂອບເຂດປະຊາຄົມບັນດາປະເທດເວົ້າພາສາ ຝລັ່ງ, ເຂົ້າຮ່ວມຂອບເຂດການຮ່ວມມືພາກພື້ນກ່ຽວກັບສິດທິມະນຸດ, ໃນນັ້ນ ມີຄະນະກຳມະການລະຫວ່າງລັດຖະບານກ່ຽວກັບສິດທິມະນຸດ ອາຊຽນ. ດ້ວຍບັນດາຜົນງານສິດທິມະນຸດທີ່ພົ້ນເດັ່ນນັ້ນ, ຫວຽດນາມ ໄດ້ເປັນເຈົ້າການສ້າງບົດລາຍງານສຳຫລວດກວດຄືນດ້ານສິດທິມະນຸດປະຈຳໄລຍະຂອງສະພາສິດທິມະນຸດ ສປຊ ກ່ຽວກັບການປະຕິບັດສິດທິມະນຸດ ຢູ່ ຫວຽດນາມ, ເຂົ້າຮ່ວມການໂອ້ລົມສົນທະນາກ່ຽວກັບສິດທິມະນຸດກັບບັນດາປະເທດ ຄື: ອາເມລິກາ, ອົດສະຕາລີ, ສະວິດ ແລະ ອີຢູ. ການເຄົາລົບ, ຮັບປະກັນບັນດາສິດ ແລະ ຄວາມເສລີພື້ນຖານຂອງປະຊາຊົນຢູ່ ຫວຽດນາມ ໄດ້ຮັບການພິສູດໃຫ້ເຫັນໃນຄວາມຈິງ ແລະ ໄດ້ຮັບການຮັບຮູ້ຈາກສາກົນ.
ເສລີພາບ, ປະຊາທິປະໄຕໃນຂອບເຂດກົດໝາຍ
ຕາມສົນທິສັນຍາສາກົນກ່ຽວກັບບັນດາສິດພົນລະເຮືອນ ແລະ ການເມືອງ ຊື່ງຫວຽດນາມ ໄດ້ເຂົ້າຮ່ວມລົງນາມເມື່ອວັນທີ 24/9/1982, ບັນດາສິດ ແລະ ຄວາມເສລີຂອງປະຊາຊົນໄດ້ຮັບການປະຕິບັດໃນຂອບເຂດກົດໝາຍ, ບໍ່ກໍ່ຜົນສະທ້ອນເຖິງຄວາມເປັນລະບຽບຮຽບຮ້ອຍທາງສັງຄົມ, ຄວາມສະຫງົບປອດໄພແຫ່ງຊາດ, ຄຸນສົມບັດ, ສຸຂະພາບຂອງວົງຄະນາຍາດ, ສິດ ແລະ ຜົນປະໂຫຍດຂອງບັນດາສ່ວນບຸກຄົນອື່ນ. ເປັນທີ່ຈະແຈ້ງແລ້ວວ່າ ສິດເສລີຂອງພົນລະເມືອງ ໄດ້ ແລະ ພວມໄດ້ຮັບຄວາມເຄົາລົບຈາກລັດ ແລະ ໄດ້ຮັບປະກັນໃນຂອບເຂດຂອງລັດຖະທຳມະນູນ ແລະ ກົດໝາຍຫວຽດນາມ.
ເປັນອັນວ່າ ບັນດາມາດຕະການຊື່ງຫວຽດນາມ ປະຕິບັດໃນໄລຍະຜ່ານມາສຳລັບບັນດາກໍລະນີເຕົ້າໂຮມຫລາຍຄົນ, ສວຍໃຊ້ຄັນຕະລະບັດ “ປົກປັກຮັກສາສິ່ງແວດລ້ອມ”ເພື່ອກໍ່ຄວາມວຸ້ນວາຍ ແລະ ປຸກປັ່ນຈະລາຈົນໂຄ່ນລົ້ມ ແມ່ນແນໃສ່ຮັກສາສະຖຽນລະພາບດ້ານການເມືອງ ຄວາມເປັນລະບຽບຮຽບຮ້ອຍທາງສັງຄົມ, ຮັບປະກັນຊີວິດສະຫງົບສຸກຂອງປະຊາຊົນ. ບັນດາການກະທຳລະເມີດກົດໝາຍ, ນາບຂູ່ຜົນປະໂຫຍດລວມຂອງວົງຄະນາຍາດ, ຜົນປະໂຫຍດພື້ນຖານຂອງບໍ່ວ່າປະເທດໃດກໍລ້ວນແຕ່ຕ້ອງປັບໄຫມລົງໂທດຕາມກົດໝາຍຂອງປະເທດນັ້ນ.
ດ້ວຍຄວາມເປັນຈິງທີ່ຈະແຈ້ງຄືແນວນັ້ນ, ຄຳປາໄສຂອງຂ້າຫລວງໃຫຍ່ ສປຊ ກ່ຽວກັບບັນດາກໍລະນີການເຕົ້າໂຮມຂອງຫລາຍຄົນຢູ່ ຫວຽດນາມ ແມ່ນການຜິດເຂວຢ່າງສິ້ນເຊິງ, ຊ້ຳບໍ່ໜຳ ມີການເສກສັ້ນປັ້ນແຕ່ງກ່ຽວກັບບັນຫາສິດທິມະນຸດຢູ່ຫວຽດນາມ. ການຂາດພາວະວິໄສ ໂດຍມີຈຸດປະສົງແທ້ຈິງໃນບັນຫາສິດທິມະນຸດຂອງແຕ່ລະປະເທດ ແມ່ນເລື່ອງຕ້ອງຕຳຫນິຕິຕຽນ, ຍາກທີ່ຈະແກ້ຄວາມໄດ້ ແລະ ບໍ່ອາດໄດ້ຮັບການຮັບຮູ້ຈາກຫາງສຽງຫວຽດນາມ ແລະ ສາກົນ.