(vovworld)- ກົງກັບໂອກາດສະເຫລີມສະຫລອງ 126 ປີແຫ່ງວັນຄ້າຍວັນເກີດປະທານໂຮ່ຈິມີນ, ຜູ້ນຳທີ່ແສນເຄົາລົບຮັກຂອງຊາດຫວຽດນາມ, ຄະນະເລຂາສູນກາງພັກກອມມູນິດຫວຽດນາມ ໄດ້ຈັດຕັ້ງການສະຫລຸບ 5 ປີແຫ່ງການປະຕິບັດຄຳສັ່ງເລກທີ 03 ຂອງກົມການເມືອງກ່ຽວກັບການສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ. ພ້ອມກັນນັ້ນ ກົມການເມືອງ ໄດ້ປະກາດໃຊ້ຄຳສັ່ງເລກທີ 05 ກ່ຽວກັບການຍູ້ແຮງ ການຮ່ຳຮຽນຕາມແນວຄິດ ຄຸນສົມບັດວິຖີຊີວິດປະທານໂຮ່ຈິມີນ. ສິ່ງດັ່ງກ່າວເປັນການຢືນຢັນເຖິງຜົນງານ ແລະ ຄວາມຕັດສິນໃຈຍູ້ແຮງການຮ່ຳຮຽນປະຕິບັດຕາມແນວຄິດ, ຄຸນສົມບັດ, ວິຖີຊີວິດຂອງປະທານໂຮ່ຈິມີນໃນໝູ່ພະນັກງານ, ສະມາຊິກພັກ ແລະ ປະຊາຊົນຫວຽດນາມ.
ພາບປະກອບ
ຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ
|
ໃນຕະຫລອດໄລຍະ 5 ປີແຫ່ງການປະຕິບັດຄຳສັ່ງເລກທີ 03 ໄດ້ປະກົດອອກແບບຢ່າງດີເດັ່ນກ່ຽວກັບ ການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ ນັບລ້ານໆຄົນ. ບັນດາແບບຢ່າງນີ້ສະແດງໃຫ້ເຫັນວ່າ ຜົນສຳເລັດ ແລະບັນດາບົດຮຽນອັນລ້ຳຄ່າກ່ຽວກັບ ການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ.
ຢັ້ງຢືນຜົນງານຂອງການຂົນຂວາຍ
ທ່ານ ຫວູຫຶວຢາວ, ປີປະທານສະມາຄົມສົ່ງເສີມການຮຽນ ເມືອງ ດົງຫິ ແຂວງ ທາຍງວຽນ ປີນີ້ ມີອາຍຸ 80 ປີແລ້ວ ແຕ່ທ່ານຍັງເມົາມົວກັບວຽກງານຂົນຂວາຍປະຊາຊົນທຸກຊັ້ນວັນນະ ບໍລິຈາກຈຳນວນເງິນນັບພັນຕື້ດົງໃຫ້ແກ່ “ກອງທຶນສົ່ງເສີມການຮຽນ” ຂອງທ້ອງຖິ່ນ ເພື່ອຫນູນຊ່ວຍບັນດານັກຮຽນທຸກຍາກຜ່ານຜ່າຄວາມຫຍຸ້ງຍາກສືບຕໍ່ໄປໂຮງຮຽນ. ທ່ານ ຫວູຫຶວຢາວ ຖືວ່າ: ການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ ຕ້ອງເປັນປະຈຳ, ແທ້ຈິງ, ຈາກວຽກງານນ້ອຍສຸດ. ຢາກເຮັດໄດ້ຄືແນວນັ້ນ, ທຸກຄຳເວົ້າ, ວຽກເຮັດຕ້ອງສັດຊື່ບໍລິສຸດ, ເຫັນແກ່ສ່ວນລວມບໍ່ເຫັນແກ່ສ່ວນຕົວ, ຍູ້ຮີດຄອງປະເພນີຫຍໍ້ທໍ້ ໃຫ້ຖອຍໄປ ເພື່ອຮັບໃຊ້ປະຊາຊົນໃຫ້ດີທີ່ສຸດ. ທ່ານ ຫວູຫິວຢາວ ເວົ້າດ້ວຍຄວາມໃນໃຈວ່າ:
“ດ້ວຍຄວາມປາດຖະຫນາຢາກສົ່ງເສີມ, ຫນູນຊ່ວຍປະຊາຊົນຮ່ຳຮຽນຕາມແບບຢ່າງຄຸນສົມບັດປະທານໂຮ່ຈິມີນ, ສະນັ້ນໄດ້ຊ່ວຍໃຫ້ຂ້າພະເຈົ້າຜ່ານຜ່າຄວາມຫຍຸ້ງຍາກ, ສິ່ງກີດຂວາງໃນການປະຕິບັດວຽກງານນີ້. ເມື່ອລົງຕາແສງເພື່ອຂົນຂວາຍປະຊາຊົນ, ອາກາດບໍ່ສະດວກ, ບາງເທື່ອຖືກຝົນຕົກແຮງຫລືຮ້ອນເອົ້າເຖິງ 42 ອົງສາC , ແຕ່ເພື່ອພວກຫລານ, ເພື່ອຫນ້າທີ່ ສະນັ້ນ ພວກຂ້າພະເຈົ້າຕັດສິນໃຈຂົນຂວາຍສ້າງຕັ້ງສະມາຄົມສາຂາກຸ້ມບ້ານ, ຕາແສງ. ມາຮອດປະຈຸບັນ, ພວກຂ້າພະເຈົ້າມີ 257 ສາຂາສະມາຄົມຢູ່ 257 ບ້ານ, ກວມ 100% ຈຳນວນຕາແສງມີສະມາຄົມສົ່ງເສີມການຮຽນ. ບັນດາສະມາຄົມລ້ວນແຕ່ເຄື່ອນໄຫວຢ່າງມີປະສິດທິຜົນ.”
ຈາກບັນດາວຽກງານລະອຽດຂອງແຕ່ລະຄົນ, ການປະຕິບັດຄຳສັ່ງເລກທີ 03 ໄດ້ກາຍເປັນການເຄື່ອນໄຫວເປັນປະຈຳ, ຕາມລະບຽບຢູ່ຄະນະພັກ, ອົງການຈັດຕັ້ງແຕ່ລະຂັ້ນ ແລະ ທົ່ວລະບົບການເມືອງ. ທ່ານ ຫວໍກົງຈີ, ຮອງເລຂາ ປະຈຳຄະນະພັກນະຄອນ ດາຫນັງ ໃຫ້ຮູ້ວ່າ:
“ການປະຕິບັດຄຳສັ່ງເລກທີ 03 ໃນ 5 ປີຜ່ານມາ ບັນລຸໄດ້ໝາກຜົນຕັ້ງຫນ້າຫລາຍຢ່າງ ນັບທັງຄວາມຮັບຮູ້ ແລະ ການກະທຳ ໃນບັນດາຂົງເຂດ ໄດ້ປະກອບສ່ວນສຳຄັນໃນວຽກງານກໍ່ສ້າງພັກ, ກໍ່ສ້າງລະບົບການເມືອງ, ຝືກຝົນຫລໍ່ຫລອມຖັນແຖວພະນັກງານ, ສະມາຊິກພັກ, ລັດຖະກອນ ແລະ ການກະທົບຢ່າງຕັ້ງຫນ້າເຖິງການປະຕິບັດຫນ້າທີ່ການເມືອງພັດທະນາເສດຖະກິດສັງຄົມຂອງນະຄອນ ດາຫນັງ ໃນ 5 ປີຜ່ານມາ.”
ຕາມການຕີລາຄາແລ້ວ, ການປະຕິບັດຄຳສັ່ງເລກທີ 03 ໄດ້ປະກອບສ່ວນຢ່າງຕັ້ງຫນ້າເຂົ້າໃນການພັດທະນາເສດຖະກິດສັງຄົມ, ປັບປຸງດ້ານປ້ອງກັນຊາດປ້ອງກັນຄວາມສະຫງົບ, ເປີດກວ້າງການພົວພັນກັບຕ່າງປະເທດ, ກໍ່ສ້າງພັກ ແລະ ລະບົບການເມືອງ, ປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ, ສະກັດກັ້ນສະພາບເສື່ອມທາດຂາດຄຸນດ້ານແນວຄິດການເມືອງ, ຄຸນສົມບັດ, ວິຖີຊີວິດຂອງພະນັກງານ, ສະມາຊິກພັກພາກສ່ວນຫນຶ່ງ. ການຮ່ຳຮຽນ ແລະ ປະຕິບັດຕາມຄຸນສົມບັດປະທານໂຮ່ຈິມີນນັບມື້ນັບເປັນລະບຽບເທື່ອລະກ້າວ ແລະ ແທ້ຈິງກວ່າ, ຈຳກັດບັນດາປະກົດການແບບຮູບການ, ບໍ່ເລິກເຊິ່ງ, ປະກອບສ່ວນປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ, ລັດ.
ຕື່ນຕົວ, ຮ່ຳຮຽນ ແລະ ປະຕິບັດຕາມຄຸນສົມບັດປະທານໂຮ່ຈິມີນເປັນປະຈຳ
ຕໍ່ຈາກຜົນສຳເລັດຂອງຄຳສັ່ງເລກທີ 03, ຄຳສັ່ງເລກທີ 05 ຂອງກົມການເມືອງ ໄດ້ຢືນຢັນສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ວິຖີຊີວິດປະທານໂຮ່ຈິມີນ, ສ້າງການຫັນປ່ຽນຢ່າງແຮງກ່ຽວກັບຄວາມຮັບຮູ້ ແລະ ການກະທຳໃນພັກ, ລະບົບການເມືອງ ແລະ ປະຊາຊົນ, ສະກັດກັ້ນ, ຍູ້ການເສື່ອມທາດຂາດຄຸນດ້ານແນວຄິດການເມືອງ, ຄຸນສົມບັດ, ວິຖີຊີວິດ ແລະ ບັນດາປະກົດການຜັນແປເອງຢູ່ພາຍໃນໃຫ້ຖອຍໄປ, ຍູ້ແຮງການຕໍ່ສູ້ປອ້ງກັນ, ຕ້ານການສໍ້ລາດບັງຫລວງ, ການຟຸມເຟືອຍ, ອາດຍາສິດ. ທ່ານ ດີງເທຮີງ, ຜູ້ປະຈຳການຄະນະເລຂາສູນກາງພັກກອມມູນິດຫວຽດນາມ, ໃຫ້ຮູ້ວ່າ:
“ສືບຕໍ່ເຮັດໃຫ້ທົ່ວພັກ, ທົ່ວປວງຊົນ, ທົ່ວກອງທັບ ມີຄວາມຮັບຮູ້ບັນດາເນື້ອໃນພື້ນຖານ ແລະ ຄຸນຄ່າອັນໃຫຍ່ຫລວງຂອງແນວຄິດ, ຄຸນສົມບັດ, ວິຖີຊີວິດຂອງປະທານໂຮ່ຈິມີນ ນັບມື້ນັບເລິກເຊິ່ງກວ່າ. ເຮັດໃຫ້ແນວຄິດ, ຄຸນສົມບັດ, ວິຖີຊີວິດຂອງເພີ່ນກາຍເປັນພື້ນຖານດ້ານຈິດໃຈຢ່າງໝັ້ນຄົງຂອງຊີວິດສັງຄົມ, ສ້າງວັດທະນະທຳ, ຊາວຫວຽດນາມ ຕອບສະຫນອງຄວາມຮຽກຮ້ອງຕ້ອງການການພັດທະນາແບບຍືນຍົງ ແລະ ປົກປັກຮັກສາປະເທດຊາດ ເພື່ອຈຸດໝາຍປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.”
ເລື່ອງກົມການເມືອງ ຄະນະບໍລິຫານງານສູນກາງພັກກອມມູນິດຫວຽດນາມ ປະກາດໃຊ້ຄຳສັ່ງເລກທີ 05 ກ່ຽວກັບການຍູ້ແຮງ ການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດ, ວິຖີຊີວິດປະທານໂຮ່ຈິມີນ ອີກຄັ້ງຫນຶ້ງໄດ້ຢັ້ງຢືນແຜນນະໂຍບາຍໃຫຍ່ຂອງພັກກອມມູນິດຫວຽດນາມ ເພື່ອສືບຕໍ່ຍົກສູງຄວາມຮັບຮູ້ກ່ຽວກັບບັນດາເນື້ອໃນພື້ນຖານ ແລະຄຸນຄ່າອັນໃຫຍ່ຫລວງຂອງແນວຄິດ, ຄຸນສົມບັດ, ວິຖີຊີວິດປະທານໂຮ່ຈິມີນ ນັບມື້ນັບເລິກເຊິ່ງ. ຈັດຕັ້ງການຊາບຊືມ, ປະຕິບັດຄຳສັ່ງເລກທີ 05 ແມ່ນການປະກອບສ່ວນສ້າງບາດກ້າວຫັນປ່ຽນຢ່າງແຮງ, ກວ້າງຂວາງ ແລະ ຍືນຍົງໃນການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ວິຖີຊີວິດຂອງປະທານໂຮ່ຈິມີນ.